Yohane 13

Yesu asangya vakiloshony marende

1Naasa kyeeri nkonu ulya nniini wa Pasaka ulandefika Yesu amanyaa kyeeri kyakwe kyammeesha nakwiipoo kunu ulaniny yelu indefika kwa Nde. Nawe ndesa alekunda yewo vakwe meendi akee kunu ulaniny, mmbo alevakunda dede deny. 2Naasa kweefo kwelyiwa shoonga ya nkwaany. Na yeto nkumbi emmaa yaanga. Yuda Iskariote, ulya akee mwana wa Simon, naambo nandenndiinngya. 3Nawe Yesu emmanya Nde mmbo ammeenrambikya findo fyoose maakony akwe nawe mmbo alesha auka kwa Iruva, na efo kwa Iruva mfo kundo aifo asheendaa nafo. 4Naasa kakwiipoo alya kilyiiyony kya kilaayo. Kakuuta soori yakwe ya yeerya. Kaende soori ya ifurukannya shoongen kakufinga nayo yoo mwiininy. 5Kawuya kaletya mura wa isamba nndeeveny. Kapooka isangya valya vakiloshyony marende nayaangata na soori ilya akufingye. 6Naasa afika yoo kwa Simon Petro, we kammbia, “Nndumi a yewe mmbo kushisangyaa marende?” 7Yesu kaallwa kammbia, “Kindo shiifo ntanaa nkukiishi ulaalu-fo, mmbo kushekimanyaa numa.” 8Petro kammbia, “Ode nta-fo nkusheeshisangyaa marende nakukafika indii-fo.” Yesu kanndouwa, “Kwakooya kulaore shakusangya marende nkukee umwi neeny-fo.” 9Simon Petro kaallwa, “Woi Nndumi, nshi marende tupu-fo, naakwa ni maako na nrwe-da mbee.” 10Yesu kammbia, “Yeto ansamba nnatiri kisanngyo-se-fo, kulaore ni marende meni, mmbo ameeremuka efo mwiiliny koose. Neeni mukee veeremutu-da, indi nshi moose-fo.” 11Nyeeli eeshi ulya eefo anndinngyaa, nkyo kimaruma kaamba, “Nshi mukee veeremutu moose-fo.”

12Naasa elyi ammaa ivasangya marende kawuya iipoo soori ilya yakwe ya yeerya. Kakaa-fo lyingyi rembo kavavia, “Mwamanya ekyo shamutannya shaasa kikai-ro? 13Mmbo mwashivaanga llosha na Nndumi. Na elyi mwaamba indo kikava kisha-da, kimmba yeny mmbwe. 14Naasany kwankooya yeny mmbo shamusangya marende shikee nndumi na llosha waany, na yeni-da mmbo kimusumanyi mukusangye marende. 15Mmbo shamureeya kindo kyeelola neeni mundetawa indo shaasa yeny shamutannya yeni. 16Ni dede kya dede shamuvia, nkwiifoo nndundi airye nndumi wakwe-fo, nta nndu nrumi airye ulya alenruma-fo. 17Kwakooya mmbo mwammeekimanya, mushevaa va ngoma mukauta indo. 18Nshi shaamba indo kikee kya woose-fo. Yeny shiveishi yewo shilevasauwa. Indi kilya kikee kireiye kuti kindeinukya kyeamba,

‘Yeto alyiiye nkate wakwa,

mmbwe ashirosyaa tutu nashikape inanga.’ ”

19Mmbo shalava imuvia ulaalu kulaore kyammba indo, na elyi kivaa indo naambo mukooye ikusirya-u sheelyi yeny mmbwe. 20Ni dede kya dede shamuvia, “Yeto awaryaa nndu shanruma ni yeny ashiwarya, na yeto ashiwarya yeny mmbo awarya yeto aleshiruma.”

Yesu aamba kyeeringywa lyakwe

(Mat 26:20-25; Mar 14:17-21; Luk 22:21-23)

21Na elyi Yesu amaamba indo nalyo kasavaa efo nriminy, kakureeka-u kaamba, “Ni dede kya dede shamuvia, Nndu umwi wa kunu nnang'ani yaany asheshiriinngyaa.” 22Nalyo valya vakiloshyony vakakulola-lola vakatirwa ntamba kya nndu arera kyakwe. 23Naasa kweifo umwi wa valya vakiloshyony vakwe akaa rembo yoo uvariny lwakwe. Mmbwe ulya Yesu eitani nawe. 24Nawe Simon Petro kansinnya kammbia, “Mmbese yeto arera kyakwe ni vii.” 25Naasa nndu ulya nalyo yeni kakwaamira yoo uvariny lwa Yesu akweevetye kammbia, “Nndumi, ni vii?” 26Yesu kamwaallwa, “Ni yeto shinkapyaa kipereshu eki yoo nndeeveny shinniinngye, yeto mmbwe.” Naasa kipereshu kilya kakikapa efo nndeeveny, kaniingya Yuda Iskariote wa Simon. 27Nawe eekilya kipereshu kilya Satana kamwaanga. Naasa Yesu kammbia, “Ekyo kwiifo kutanaa kitani uviny.” 28Na valya veefo velyaa shoonga nkwiifo nndu alemanya kimaruma kammbia indo-fo.

29Kukakaa-fo vekusaraa kya Yuda elyi arie mboloko yeesuruma fesa kulakooye Yesu mmbo ammbia, Endeura findo efyo lwatura fya nkonu yeu nniini ao nandeniingya vakiva kindo. 30Naasa elyi ammeelya kipereshu kilya nalyo kasomuka na poo na kio kyemmesha.

Ivavaso iiya

31Naasa eekisomuka na poo Yesu kaamba, “Mwana yeto wa nndu ni ulaalu ammeng'aniswa na Iruva kaveng'aniswa kyeendwa mmbwe. 32Kwakooya Iruva mmbo ammeeng'aniswa kyeendwa mmbwe, na Iruva ashenng'anisaa kikee kyakwe muni. Na ulaalu indi-da ashenng'anisaa-se.”

33“Nyira fivana nsindaa neeni kyaangu-da. Mmbo musheshiruuyaa. Nakyo kivevaa indo-da shaasa shilevia Vayuda shaamba, ‘Kundo yeny nsheendaa, mmushiidimaa ifika-fo yeni-fo. Neeny shamuviany ulaalu.’ 34Mmbo shamuniingya ivavaso iiya lyikee indi, kaeny mukundani shaasa shilemukunda yeni, neeni mukundani indo! 35Kindo vandu woose vashemumanyaa nakyo mukee vakiloshyony kyakwa ni elyi mwakundana.”

Yesu aamba Petro ashenkanaa

(Mat 26:31-35; Mar 14:27-31; Luk 22:31-34)

36Simon Petro kammbia, “A nkwi kusheendaa Nndumi?” Yesu kaallwa, “Kundo yeny nsheendaa, yewe nkushiidimaa ishisora-fo ulaalu-fo, mmbo kusheshisoraa-fo elyi numa.” 37Petro Kammbia, “Nndumi, a kimaruma nkikyi elyi shilashiidimaa ikusora-fo ulaalu? Mmbo nshelekeyaa muu wakwa kimaruma kyafo.” 38Yesu kaallwa, kaamba, “Mmbo kushelekaya muu wafo kimaruma kyakwa?” Ni dede kya dede shakuvia, “Oro ya nguku nnyikapaa kulaore kwanshikana kararu-fo.”

Currently Selected:

Yohane 13: MASNT00

Highlight

Copy