Yohane 2

Walyi lwa kulya Kana ya Galilaya

1Nalyo elyi lya nrondo kukaalyikwa walyi kulya Kana ya Galilaya. Na maye wa Yesu kasha nafo. 2Na Yesu kavevaangwa-fo ando amwi na vakiloshyony kyakwe. 3Naasa mfinyo ukafikya. Maye wa Yesu kammbia, “Mmbakitiri-se mfinyo-fo.” 4Yesu kammbia, “Nkyiki kyeru lu vavii nka? Kyeeri kyakwa nkindefika-fo.” 5Maye kavia vasero vefurukannya-fo, “Kindo amuvia na kikava-ki kevekitaniny tupu.” 6Nafo kweiyo nungu irindaru ta mawe tikee shisimbite-u kisumani na mbuka ya Vayuda yeesamba. Nato wo imwi itiri sha lita iyana indi. 7Naasa Yesu kavavia, “Endeishureny nungu yeti mura!” Vakaishura shapu. 8Kawuya kavavia, “Ulaalu raany-fo kinnywa mundekirwaaya nkara yeto wa shoonga.” 9Naasa elyi nkara ulya wa shoonga afika ishosha mura ulya nato wammaluka mfinyo nalamanyi kundo wauka. Vandu vaishi ni valya venfurukanya-u valya varaa mura ulya. Kyasia nkara ulya wa shoonga kavaanga muni walyi. 10Kammbia, “Wo nndu apooka yaava mfinnyo yeto nsha. Vandu vakammbuura llyo ashavaa-ny yeto mfwafwa. Ate yewe mmbo kwasuruma mfinyo yeto nsha fika ulaalu.” 11Nkyo kindo kyeeora wende kya mbee Yesu aletana kulya Kana ya Galilaya, kaora usuri lwakwe paa na valya vakiloshyony kyakwe vakautau ikusirya nawe.

12Naasa kyeeri kilya kyaiduva kandesoka na kulya Kapernaumu we muni na maye na vanavamaye na vandu vakiloshyony kyakwe. Nafo vakakaa-fo mikonu myaangu.

Yesu mmba ya Iruva

(Mat 21:12-13; Mar 11:15-17; Luk 19:45-46)

13Nalyo nkonu ulya nniini wa Vayuda, ulya wa Pasaka, ukee kufii Yesu kanderwa na kulya Yerusalemu. 14Nafo efo mmba ya Iruva kakooya-fo valya veekumba ng'umbe na maanri na mbeta na valya vealasha fesa vakee-fo rembo. 15Nawe kasongosia kyeelashwa aoka na fyoove. Kavaumbuta efo mmba ya Iruva ando amwi na maanri na ng'umbe tilya tawo. Na fesa ta valya vealasha katipusuya si, na ifullwa mesa tawo. 16Kavia na valya veekumba mbeta, “Ipoony-fo findo efi muute yaa! Nta mulaallwe mmba ya Iruva ive mmba yekapya mbusha!” 17Na valya vakiloshyony kyakwe vakakummbwa kilya kyikee kirere kyeyaamba, “Mmbo shavavyo nriminy kimaruma kya mmba yafo.” 18Naasa Vayuda vakaallwa vakammbia, “A ni wende-ki kwiifo kulwoora elyi kwakara itana indo?” 19Yesu karouwa kavavia, “Fisheny mmba yei ya Iruva, neeny shiiseleese lyingyi ando a mikonu iraru shimaa piny.” 20Naasa Vayuda vakaamba, “A elyi kwammiira-u myaaka makumi aana na irindaru mmba yei ya Iruva ikatana yasia, na yewe kwiiseleese lyingyi ando a mikonu iraru kumaa?” 21Indi we mmbo alerera kya mwiili wakwe ukee mmba ya Iruva. 22Naasa llya meendi aleruka auka kwa vafu llyo valya vakiloshyony vakwe valekummbwa kilya aleamba. Nalyo vakakooya ikusirya na efyo fikee fireiye na kirero kilya Yesu alevavia.

Yesu avaishi shore woose

23Naasa kyeeri kilya ekee kulya Yerusalemu nkonu ulya nniini wa Pasaka, veengyi vakapooka ikusirya na irina lyakwe valollye filya fya wende atana. 24Indi Yesu we muni nalakunde ikoora kwawo, kimmba avaishi shore woose, 25Nalatiri kisunundyo na nndu kyeemanya mbony ta vandu-fo, mashika we muni eeshi efyo fikee nnang'ani ya nndu.

Currently Selected:

Yohane 2: MASNT00

Highlight

Copy