Luka 10
10
Yesu aruma vakiloshyony vakwe makumi mfungare
1Naasa numa yavayo Nndumi kasauwa vandu vengyi-se makumi mfungare. Kavaruma vavii vavii vandensongoya vafike wo muri wa vandu na wo kundo arie yeenda. 2Naasa kavavia, “Fya iilula fiifo fiingyi, lyo varundi vakaangwa. Kyetereveny Nndumi muni fimu narumi varundi efo mailullyony akwe. 3Kweengyeny! Akakava shamuruma mukee sha ngurana ta moonri nnang'ani a mafite a ngoroshony. 4Nta mulakamare mboloko yesuruma fesa, nta nkusha, nta fyaaru-fo. Nta mulaidikire nndu efo shia.” 5Indi yefo mmba kwa nndu kundo mwaammiira nafo pookeny yaamba, “Keeny na ufoo kunu kyeny! 6Na kwakooya mmbo kwiifo mwana wa ufoo, naasa ufoo elo lwany lushenkayaa. Kilave indo, ufoo lwany mmbo lushemuwuiyaa. 7Indi efo mmba kwa nndu yeto amuwarya kaeny-fo mwilyaa na ina fya efo kwawo. Mashika nndu nndundi nkuti nawonise weesi lwakwe. Nta mulave veuka mmba yei mweende yeyo ingyi-fo. 8Na wo muri wa vandu mwammaanga nafo vakamuwarya kulyiiyeny efyo vamweengye. 9Na yewo mukoyaa-fo valwee vakireny muwoongoye, ‘Mwammaafukyo ni umangyi lwa Iruva kunu kwany!’ 10Na wo muri wa vandu mwammaanga nafo valamuwarye, ukeny-fo mufike efo mitaniny yavayo mwishambaa, 11‘Na kiluulyi ekyi kya kunu muriny kwany ekyo kyakutira na marende eru akyo lwamukukutya kimuwuiye! Kyaidi manyiny umangyi lwa Iruva lwamaafukya!’ 12Na yeny shamuvia nkonu yeto ukamfika ekyo kya Sodoma kishangwaa ngota kya muri yeto.”
Oshiny lwany
(Mat 11:20-24)
13Oshiny lwafo yewe Korasini! Oshiny lwafo yewe Betisaida! Mashika efyo fya wiidimi filetanyikya kwany kukooye mmbo fileutikya kulya Tiro na Sidoni, kukooye valemaaluka efo nriminy kasha na iraa makunnya na ifu. 14Indi ekyo kya Tiro na Sidoni mmbo kishangwaa ngota ekyo kyany elyi vandu vasherumbuywaa mwaandu. 15Na yewe Kapernaumu nshi kwekee nrose kwafika ngini-u mmbo kushoolotwaa kufike kundo kwa vafu. 16Nndu amwaaranya yeni ni yeny ashaaranya. Na nndu amumina yeny ashimina. Indi yeto ashimina yeny mmbo amina yeto aleshiruma.
Valya makumi mfungare vawuya
17Nalyo valya makumi mfungare vakawuya vefuraa vakaamba, “Nndumi na mimuyo yeyo mikasha mmbo ilevelwiirikya kimaruma kya irina lyafo.” 18Nawe kavavia, “Mmbo shilelollya Satana ashoolokaa auka iruve-u sha kimwii. 19Akakalo shamuniinga wiidimi lwevavara shoka na nguluva na iitorya finya toose ta yeto nkiduva. Nta kulaiyo kindo kishiidimaa imumanya furu-fo. 20Indi kindo mushefuraa nakyo nshi elyi mimuyo yeyo mikasha imwiirikye-fo, mmbo mushefuraa elyi marina any akee mareiye efo iruveeu.”
Ifura lya Yesu
(Mat 11:25-27; 13:16-17)
21Kyeeri kilya kyeni kalooka kyuuka na Mumuyo Mweele kaamba, “Woi Nde shakwaarafuma paa kukee Nndumi wa efo iruve-u na kunu urukeny, kimmba mbony yeti kwatirika vandu veeshi reu na yewo varango, kwawuya itirambuya vakoku. Ee-da Nde, ni indo kivekusenyi!” 22Nalyo kaindukya valya vakiloshyony kaamba, “Mmbo shilerambikywa findo fyoose ni Nde wakwa. Nta nkwiiyo nndu eeshi Mwana mmbwe, kulaore ni Nde-fo, nta Nde mmbwe ungau kulaore ni Mwana-fo, na Mwana-fo, na nndu yeto mwana ankunda inrambuya.” 23Nalyo kaindukya valya vakiloshyony vakee kyaanya kyawo kaamba, “Ngoma vandu miso awo alolye kindo mulolye yeni! 24Shamashika shamuvia, kweiifo veawuya fisuku veengyi naakwa ni vamangyi velangye ilola yefyo mulolye yeni, valalolye, na iita mbony mwaita yeni valaite.”
Kyaaso kya Nsamaria Nsaari
25Nalyo akakau nndu akufundye mavavasyo ankwipoo kasha imweesa, kaamba, “Ale llosha! Shatana inda shikooye muu wa llung'anu uve ding'u yakwa?” 26Nawe kammbia, “A efo kitabuny kya mavavaso mmbo kyikee kyireiye kwasoma-fo inda?” 27Nawe kaamba, “Mmbo kushekundaa Nndumi Iruva wafo, kunkunde na ngoo yafo shoose, na nrima wafo moose, na finya yafo shoose, na makusaro afo moose. Kuvekunda na nndu uroo shaasa kukukundye kumuni.” 28Nawe kambia, “Mmbo kwaveallwa nisha. Kevetana indo, kuwoniny-muu!” 29Nawe akundye ikwallwa nndu wa usumanu we muni, kavia Yesu, “A uroye wakwa mmbi?” 30Nalyo Yesu karouwa kaamba, “Kweefo nndu aleuka kulya Yerusalemu kandesoka na kulya Yeriko, kakooya veala shia. Nawo wakamuuta soori takwe, vakammbika fyaasha, vakanra-u akee kinanawo kya ifwa na ikya. Vakakweengya. 31Naasa nndu Nkohani kasoka na shia ilya sheni nalamanyi kindo kiifo, kallollya, keera mbai. 32Na nndu wa Valevi ni indo-da kasha nang'u, kallollya, keera mbai. 33Naasa nndu wa Samaria arye kyaaro kafika alya ando akai, kallollya kavavyo mmuu kyakwe. 34Keenda na yoo akai, na fyaasha filya fyakwe kafyaamba mafura na mfinyo. Kafinga-u na firami. Kansaamisa mungony wa nshungu wakwe, kandemfita mmba ya veny, kammbavarya-fo. 35Na elyi lya ndesi kauta fesa kaniingya ulya muni mmba ya veny, kammbia, ‘Sheekya immbavara, na kwakooya kwalekyeya kya mmwasi nkutaa elyi shiwuyaa.’ ” 36A kwaambany inda kya vandu valya vararu, ulya akee uroye wa ulya alewoywa ni veala shia ni ungau ndesa? 37Nawe Kaamba, “Ni ulya alensarya ukiva-te!” Yesu kammbia, “Kweengye kuvetana indo!”
Yesu kyeny kwa Marta na Maria
38Naasa veefo varie shia, nawe kaira neefo kimuriny kya vandu. Nafo kweifo nndu nka avaangwaa Marta. Kammbwarya efo kyeny kwakwe. 39Nawe atiri mfwamaye avaangwaa Maria. We kashekaa rembo yoo marendeny a Nndumi kava amwaaranyaa marero alya akwe. 40Naasa Marta eefo afurukanaa kya findo fiingyi fyeerunda. Kyasia kasha nang'u kaamba, “Nndumi, a mmbo kilakutinnyi elyi mfwama ashira sharunda shimuni? Mbieny nashyeekye-te!” 41Naasa Nndumi kambia, “Marta, Yewe mmbo kwasaukwa na ikuvinisa na findo fiingyi. 42Kindo kilavaa ira mmbo kyava kimwi nsi, na Maria kakusawuya waavi yelo usha, nalo nta nnashelusokwaa-se-fo.”
Currently Selected:
Luka 10: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
