Marko 16
16
Iruka lya Yesu
(Mat 28:1-8; Luk 24:1-12; Yoh 20:1-10)
1Naasa elyi nkonu ulya wa Sabato wamiira, nalyo Maria wa kulya Magdala vakasanga na Maria ulya ungyi akee maye wa Yakobo, na Salome vakandeura miri ifwaamaa vandemwaamba. 2Naasa elyi ngama nraasi, nkonu wa mbee wa mfungare ulya, vakafika alya mbangeny elyi mwi wanrasa-rasa. 3Vakaumburana wo veni na veni vakaamba, “A nndu alweekyaa iteswa-u iwe lilya lyiraye mwaango wa mbanga ilya lummbutaa kwi?” 4Vainnwa indi miso vakakooya, ate iwe lilya lyantesuwa-u. Nalyo mmbo lyekee iniini nnu. 5Vakaanga na efo mbangeny. Vakalolya mwana nkoo akee rembo yoo taari ya woko usha aree soori shaa pyai. Vakaawukwa mmuu. 6Nawe kavavia, “Nta mulaawukwa mmuu-fo. Mmbo mwiifo musiaa Yesu wa kulya Nasareti, yeto alekapywa nsalabeny. Annduka, nnakyikee-se yaa-fo! Llen-te, akaa ando valemwaara! 7Neeni endeny mundevia valya vakiloshyony vakwe na Petro, nawe mmbo ashemusongoyaa indefika kulya Galilaya. Mfo kundo mushellollyaa shaasa alevemuvia.” 8Naasa vakauka alya mmbangeny veerishaa mashika vekee irerema na yuuma mwaangaya, nta valavie nndu kindo mashika a elyi vairyaa nnu.
Yesu akoora na Maria wa Magdala
(Mat 28:9-10; Yoh 20:11-18)
[ 9Nawe elyi Yesu ammaa iruka elyi ngama nraasi elyi lya nkonu yeto waiduva Sabato kapooka ikoora na Maria wa kulya Magdala, ulya alemuuta mimuyo ilya mikasha mfungare. 10Nawe kakwiipoo kanderuuya valya vekee nawe elyo mbee, nawo vakee vating'i na iiya. 11Nawo elyi vaita indo mmbo eefo na muu alollywa mmbwe, valairikye.
Yesu akoora na vakiloshyony vavii
(Luk 24:13-35)
12Naasa numa ya vayo kakoora na vavii va efo nnang'ani yaawo etiri fwana ingyi nawo varie shia yeenda ireminy. 13Nawo vakakwiipoo vakanderuuya valya vengyi mbony. Na yewo-da nta valairikye.
Vakiloshyony varumwa
(Mat 28:16-20; Luk 24:36-49; Yoh 20:19-23; Mav 1:6-8)
14Elyi kyeeri kyeefurummya kakoora na valya ikumi na umwi vaiyo velyaa shoonga. Kavasakira llya valera valakusirya-u, vakaumisa ngoo tawo, nta valairikye valya vallollya annduka. 15Nalyo kavavia, “Waryeny shia yeenda mundefika masangeny moose dang'a. Na wo kindo kyuumbe kiiyo kyoongoyeny Nrumi yeyo ya Iruva ya Nsia. 16Na nndu kakusirya-u na ibatiswa kavebatiswa, mmbo ashekooya ikirwa. Na nndu kalema ikusirya-u mmbo ashuutywaa uvingo. 17Na ngyende mmbo tishiimmyaa yewo vakusirya-u, ni irina lyakwa vashaantaa nalyo mimuyo mikasha, vaveva vandu veerera na ngyulumi shiiya. 18Mmbo vashetiraa shoka na maako. Na kwakooya vana kindo kiwaa, nkishevamanyaa furu-fo. Mmbo vasheekeryaa vandu valwee maako nawo vashie.”
Yesu arwa iruveeu
(Luk 24:50-53; Mav 1:9-11)
19Naasa elyi Nndumi Yesu ammaa irera nawo indo, karoswa na efo iruveeu. Kakaa rembo efo woko usha lwa Iruva. 20Naasa vandu valya vakakwiipoo vakandeamba mbony ta Iruva kundo koose. Na Nndumi kavakaya efo kirundyony kyawo. Na ngyende tilya tikavangisa ndera ilya vashaambaa.]
Currently Selected:
Marko 16: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
