Luka 24

Imbipa inyazi

1-12: Mat. 28,1-8. Mal. 16,1-8. Yoh. 20,1-13.

1Apene nyene pisikʼitanzi lya pamulungu pe vahalavila nahavuvila ukuvala kumbipa, vahasenda numulembo we vayaninye. 2Vahagʼivwe lisegushe kumbipa. 3Pe vahinjila mumbipa, vahagʼumuvili wa Yesu wa Mwene numo. 4Ilelʼavene, lwe vakwalangana pazinizi, lwe zisoṿilʼizya kusiva, pe vahitushilʼavantu vavili vimiliye pupo, vazwayʼamenda ge gakunyengʼenyelʼuvuzelu. 5Pe vahatetema nkani, vahinamila pansi. Pe vala vahayanga navo vahati: Shonu mumwanzʼumulanzi kuvafwʼumu? 6Atalipo numo ndali, azyusile. Mukumbuhaje zila zyʼahavavuzyaga lwe suti ali mu-Galilayi, 7lwʼatili: UMwanamuntu pakuti atwalwaje munyove zya vatalamalandu, pakuti ahomelwaje pashihovenkanyo, havili Pisiku lya vutatu pʼalizyuha. 8Navantanda vahakumbuhʼamazwi gakwe, 9vahafuma mumbipa, vahavwela kuhaya, pe vahavavuzya zyonti zinizi avishumi nawoka navanji vonti. 10Avene lelo ve vavavuzizye avapositili uMaliya wa mu-Magadala nuYohana nuMaliya unyina wa Yakobu navanjʼavantandʼavamwavo ve vali navo. 11Avene nyenʼavapositili amazwi ga vantanda gahava fwe tulumbe, vahasitʼukwitiha. 12PʼuwenʼuPeteli ahavuha, ahashimbila ukuvala kumbipa. Ahinanjizya mumwo, ahaga ge menda geka. Pʼahavala kuhaya, ahasukumilʼinongwa zye zilolesile.

UYesu akuvitushizya ava ku-Emavusi

13-35: Mat. 16,12. 13.

13Ilelo pamusanya wuyo pʼavamwavo vavili vahavala munkaya yoka ye vakuti Emavusi, ye yali fwe ngati mayili gasano nagavili ukufuma ku-Yelusalemu. 14Pe vahaziyanga zyontʼinongwa zye zyamalolesile. 15Vazile lelo lwe vakuziyanga, lwe vakuzyanilanya vovulo, pe vahitushilʼuYesu, wope apalamiye akujenda navo. 16Agene nyenʼaminso gavo gahava fwe ngati shimo shigapinyile, pe vahapotwa ukumumanyʼuwene. 17Uwene ahavavuzya ahati: Ge mazwi vuli ge mukuyanga nukuzyanilanya lwe mukujenda? Pe vahimilila, vahasyonoloha kuminso. 18Ilelo pʼahamula woka wuyo wʼali wʼuKiliyopa izina, ahamuvuzya ahati: We mujeni wenewe weka mu-Yelusalemu we musitakuzimanya zye zipezilwe mumwo, izya mumanda ganaga? 19Uwenʼahavavuzya ahati: Zili vuli? Avene vahamuvuzya vahati: Izya Yesu wa mu-Nazaleti, wʼahavangʼumuntu umukuvwi, we nuMulungu navantu vamuwenyi amaha naga kuvombela naga kuyanjilʼinongwa. 20Zye zizyo navashiputʼavapiti navahombe vitu vahamulonjelela kuvulonzi, vahati we wa kugogwa, ve vahamuhomela pashihovenkanyo. 21Iswe nyene twasuvilagʼukuti wʼakuvʼukutavuzyʼuYisilayili. Havili lelo umusanyʼuno lye lya vutatu inga tukuvazya tukwanda pala pe zipezilwe zinizi. 22Havili vatugandusizye navantanda vamʼavamwitu. Ve vavazile kumbipa shanzanche, 23vahapotwa ukwaga umuvili wakwe, vahinza, vahati: Tuwenyi nishitushizya sha vahavizya ve vakuti mulanzʼuwene. 24Pe vahajenda nukuvala vamo navamwitu kumbipa, vahaga zyonti zili she shila she vayanzilʼavantanda, uwene nyene vahapotwa nukumwaga.

25Pʼuwenʼahayanga navo ahati: Alala, vwe vusitanjele vuli imwe, vwe vuhata vuli amoyo ukulema zyonti zye vayanzilʼavakuvwi. 26Amwe ayanzilwe nzilʼuChilisiti ukuti pakuti ayimbaje, ajende lilyo ukwinjila muvupiti vwakwe? 27Pʼahataliha navo pa-Mose napavakuvwi vonti, ahavasimishizya zyonti zye zikumuyanga wuyo weka muvakalata vonti. 28Ilelo lwe vavazilʼukufiha munkaya mwe vahavalaga, pʼuwene ahava fwe ngati akuti mpitilile. 29Pʼavene vahamulambilizya vahati: Syalaga naswe, she shamazuva shinishi, vwope nuvusiku vwiliye. Pʼahinjila munyumba, ahasyala navo. 30Ilelo lwʼatendime navo ukulya, pʼahasendʼumukati, ahaputa, ahawumensulanya, ahavapa. 31Pe gahigulilwʼaminso gavo, vahamumanya. Uwene nyene ahavembeluha lwe vakwenya. 32Pe vahavuzanyʼavene vahati: Zye zizyo gatavavagʼamoyo gitu muhati lwʼakuyanga naswe mwidala, lwʼakutuṿumbulilagʼava-kalata? 33Pe vahavuha pahavalilizyo huho, vahagalushila ukuvala mu-Yelusalemu. Mwe vahaga vavunginʼavishumi nawoka navamwavo ve vali navo. 34Ve vahaga vakuti: Azyusile nalyoli uMwene, amwitushizizye nuSimoni. 35Vope vahavavuzya izya mwidala, nazye vamumanyilaga mumwo lwʼamensulanyʼumukati.

UYesu akwitushizya avapositili

36-49: Mat. 16,14-18. Yoh. 20,19-23.

36Ilelo lwe vamakuyanga zinizi, pe wuyo weka ahimilila pahati, ahati: Uvwihalo vuve namwe. 37Pe vahaganduha nkani, nishitetemwi shihavagwila. Shʼavene vatili: Ingavanga ishinzyunguli tushiwenyi. 38Pʼuwene ahavavuzya ahati: Mukutentwa shonu, ninsivʼizya kuganagana mukusiva zyashi mumoyo ginyu? 39Nzagaji munenye ninyove zyane niṿinama ṿwane, mumanye ukuti nkwe nene. Mumpalamansye mumuvili, shʼishinzyunguli shite numuvili, shite namafupa, ge mumbwenyi ukuva nago ine. 40Ilelo lwʼayanzile linili, pʼahavasontela ninyove niṿinama. 41Ilelo lwe vashilʼukwitiha she vali nuluseshelo, lwe Vakusukumila, pʼahati: Ingavanga muli naṿwo ṿimo iṿwa kulya munumu? 42Pe vahamupʼinyonkolanye ya nswi insalule. 43Pʼuwenʼahalya lwe vakwenya.

44Pʼahavavuzya ahati: Zinizi zye zila zye navavuzizye lwe lwali swenti nane, zye natili: Pakuti zyinze zisililishile zyonti zye zikunjangʼine, zye zisimṿilwe namunkomelezyo zya Mose Namuvakuvwi namwa kalata wa nyimbo. 45Pʼahavigulilʼinjele izya kumanyilʼavakalata. 46Ahavavuzya ahati: Inza she vasimṿile nzila vovulo, vatili: Pakuti uChilisiti ayimbaje vovulo, havili pakuti ajende nukuzyuha kuvafwe pisiku lya vutatu, 47havili pakuti avantu inkolo zyonti vavavuzye mwizina lyakwe ukuti mupindushe pe muliyaga uvuswila vwa malandu ginyu,—vatalishe mu-Yelusalemu. 48Imwe nyene mwe mukuzihomeshezya zinizi. 49Mwenye lelo, ine ndivatumila huho hʼafinzilʼuTata atili ndihatuma, he halivinzilʼimwe. Imwe suti muvanje munkayʼumu, muhafishe pala pe ndivazwihʼamaha ga kumwanya.

UYesu akuzuva kumwanya

50-53: Mat. 16,19.

50Pʼahavalongolela, ahavala navo mu-Betaniya. Ahavusyʼinyove zyakwe, ahavalota. 51Vazile lelo lwʼakuvalota, pʼahepa kuli vuvo, ahatwalwa kumwanya. 52Pʼavene vahaputa kukwakwe. Pe vahagalushila ukuvala mu-Yelusalemu, vahaseshela nkani. 53Shima vahava mwe mwa tempeli, vahamutimʼuMulungu.

Currently Selected:

Luka 24: NYi1965

Highlight

Copy