Matayi 22

Ishiholanyo sha vusendelo

Luk 2-14: Luk. 14,16-24.

1UYesu ahamula ahayanga navo nohavili muṿiholanyo ahati: 2Uvumwene vwa kumwanya vuli fwe ngatʼumwene wʼayaninye uvusendelo lwʼakumusendezyʼumwantandʼumwana wakwe. 3Wʼahatumʼavanyamata vakwe ahati: Simuvale muvavuzye vala ve twamavisite vinze pavusendelo. Avene vahasitʼukwinza. 4Ahavuyizya ahatumʼavamwavʼavanyamata ahati: Muhayanje navo ve twamavisitʼukuti, yenyi, niṿintu ṿwane ntelesile ninkambaku ningida zyane ndiṿile ṿwontʼinjaninye. Shushi tuvale pavusendelo. 5Avene nyene vatahasajila ṿweneṿwo ndali, vahasavalila, vahavala woka kumugunda wakwe, uwamwavo muvulonsi vwakwe. 6Avamwavo vahalemʼavanyamata vakwe, vahavizizya vahavagoga. 7Uwenʼumwene nyene ahaṿitwa ahatumʼimpuga zyakwe zya vulugu, ahavagogʼavagozʼiva, iyenʼinkaya yavo ahapemba numwoto. 8Pʼahayanga navanyamata vakwe ahati: Uvusendelo vuyananizilwe, nkandi ve visitwe ve vatahondeye. 9Muvale lelo mwonti munkomano zya mumadala, muhavalete pavusendelo vonti venga mukuvaga. 10Pe vahavalʼavanyamata mumadala gonti, vahavavunganiha vonti ve vavazile, avavivi navinza. Vahizula munyumba ya vusendelo ve vatendimʼukulya. 11Ilelʼumwene lwʼayinjiye ukuvenya ve vatendimʼukulya, pʼahaga mumwo wokʼumuntu wʼatazwayʼumwenda wa pavusendelo. 12Ahamuvuzilizya ahati: Weya we, uyinjiye vulʼumu shʼutazwayʼumwenda wa pavusendelo? Uwenʼahapuma mwa. 13Pʼumwene ahavavuzyʼavavihaṿintu ahati: Mumukunje iṿinama ninyove, mumutaje kushisi sha kuluvazu. Mwe zikuva mumwo ninkuta ntupu nululumanyo lutupu ulwa mino. 14Shʼavitwa ve vinji, nkandʼavasavulwa ve vansi.

Ukuvuzilizyʼizya musonko

Luk 15-22: Mal. 12,13-17. Luk. 20,20-26.

15PʼavaFalisayi vahavungana vahayangana ukuti vanzaje zimo izya kumwambamba mumazwi gakwe. 16Vahatuma kukwakwe navasundikwa vavo navantu va Helodi ve vahati: We Musambilizi, twazile we wa nalyoli, nidala lya Mulungu avantu ukuvalanganizya lye lya nalyoli, ninsoni nazimo kuvantʼiwe, she numʼumuntu utakumwenya muvwinza kuminsʼiwe. 17Pe tukukuvuzilizya tukuti: Vulʼiwe, amwe hinzʼukusonkʼumusonko kwa Kesali, amwe ndali? 18UwenʼuYesu ahavamanya uvuvivi vwavo, pʼahavavuzya ahati: Mukundinga shonu mwe valumilenga mwe? 19Simundanjʼulupiya lwa musonko. Pe vahamulangʼidinali. 20Uwenʼahavavuzilizya ahati: Amwʼishiholanyʼishi sha nanu nuvusimbe vwe vusimṿilwe pupo vwa nanu? 21Vahamuvuzya vahati: Vwa Kesali. Pʼuwene ahati: Pe fwane lelo simumupanjʼuKesali iṿwa pavuKesali vwakwe, wope nuMulungu mumupanjʼiṿwa pavuLungu vwakwe. 22Ilelo lwe viṿuye linili, pe vahasukumila, vahamuleha vahavala.

Ukuvuzilizyʼizya kuzyuha

23-33: Mal. 12,18-27. Luk. 20,27-40.

23Umusanya wuyo pe vahapalamila kukwakwe navaSadusayi ve vakuhana vakuti ukuzyuha kutalipo, vope vahamuvuzilizya 24vahati: We Musambilizi, uMose atili: Ingʼumuntʼumusendamwantanda akufwa musitakupapʼumwana, pe pakuti uwamwavo amupwanilʼumushi, amupapilʼavanʼuwamwavo. 25Ilelʼiswe twali navanamuntu vasano navavili panapa. Pʼumukulu wavo ahasendʼumwantanda, ahafwa, ahamuleshelʼuwamwavʼumushi umusitamwana numo. 26Vovulo lelo nuwa vuvili, wope nuwa vutatu vovulo, vonti ve vasanu navavili vovulo. 27Mwisinda muli vonti lelo, pe wope numwantanda ahalandatʼukufwa. 28Inga lumo lelo pakuzyuha amwe pʼaliva mushi wa nanu? She vonti vamile nawo. 29PʼuwenʼuYesu ahavavuzya ahati: Zye mupuṿile, she nukalata mutawumanyile namaha ga Mulungu mutagamanyile. 30Shʼukuzyuha lwe vazyusilʼavantu pe vatalisendaga, pe vatalisendwaga ndali, she valiva fwe ve vahavizya va Mulungu kumwanya. 31Ukwene nyene ukuzyuhʼavafwe mwe vayaya, mutalyazile mwa kalata izwi lyʼavavuzizye we Mulungu lwʼatili:

32Ine ne Mulungu wa Abulahamu, ne Mulungu wa Yisikaka, ne Mulungu wa Yakobu?

UwenʼuMulungu ate Mulungu wa vafwe nkandi wa valanzi. 33Avenʼavantʼimpuga yonti lwe viṿuye linili, pe vahasukumila vahati: Kwe kumanyinsanya vulʼinongwa.

Ukuvuzilizyʼizya luhomelezyʼululusyiʼuvupiti

34-40: Mal. 12,28-31. Luk. 10,25-28.

34Avene nyenʼavaFalisayi lwe vazilʼavapumilizizye avaSadusayi, pe vahavungana vope. 35Pe wokʼuwamwavo umumanyankomelezyo ahati imulinje, ahamuvuzilizya ahati: 36We Musambilizi, ululajizyʼululusyi uvupiti kuzyamwavo munkomelezyo zya Mose lwe luli kwi? 37Uwene ahati: Ulu lwe lukuti:

UMulungu uMwene waho umukundaje nawe mwoyo waho wonti, ninsingo yaho yonti, nukusiva kwaho kwonti.

38Lwe lulajizyʼululusyʼuvupiti kuzyamwavo lunulu, lwe lutanzi. 39Ulwamwavo nyene lwe luholine nalwo lwe lukuti:

Wope nuwamwinyu umukundaje inza shʼuyikunzite weka. 40Mwe zikunjilinkine ninkomelezyo zya Mose zyonti, vope navakuvwi vonti munkomelezyo zye zivili zinizi.

Ukuvuzilizyʼizya Mesiya

41-46: Mal. 12,35-37. Luk. 20,41-44.

41Ayazile lelʼuYesu vavunginʼavaFalisayi, pʼahavavuzilizya ahati: 42Imwe vuli lwe mukusiva, uChilisiti mwana wa nanu? Avene vahati: Mwana-Davidi. 43Uwenʼahamula ahati: UwenʼuDavidi lelo pʼakumutaha ukuva wʼuMwene, lwʼakuyanjila mwa Mupepo lwʼakuti:

44UMwene ayanzile kwa Mwene wane atili:

Tendamaga kumuhono wanʼumulilo, uhafishe pupo

pʼavalugu vaho ndivapelʼukuva hatengo aha kuviha

pupʼiṿinama ṿwahʼiwe.

45Apene lelo ingʼuDavidi akumutaha ilya Mwene, patʼavanje mwana wakwe vuli? 46Patalipo numo uwa kumwamula limʼizwi, umusanya wuyo vahanda ukumunyila ukumuvuzilizya zimo.

Currently Selected:

Matayi 22: NYi1965

Highlight

Copy