Matayi 7
7
Ukulongʼavanji
1Mutalongaje, ukuti namwe mutahalongwaje. 2She mumwo mwe mukuvalongʼavanji mwe namwe mulilongwa mumwo. Ishifinjilo shisho she mukuvalinjilʼavanji, she mulilinjilwa shisho namwenemwe. 3Ukwenya hashʼahambaza he hali mwilyinso lya wamwinyu, shʼigambo mwilyinso lyaho utakulyenya? 4Havili pe watinji uyanje vuli kuwamwinyu ukuti: Twiṿwe nkefwʼahambaza he hali mwilyinso lyaho, she nawʼigambo lili mwilyinso lyaho wenewe? 5We mulumilengʼiwe, uyefwe sutʼigambo lye lili mwilyinso lyaho wenewe, inga pʼulingaje lelo ukwefwa wope nuwamwinyu ahambaza he hali mwilyinso lyakwe. 6Shʼimfinjile mutazipanjʼimbwa. Uvwando vwinyu mutazitajilaje inguluve. Shʼizyene zikuvuhanyanjila niṿinama ṿwavo, havili zikugalunkana ukuvanyonkolanya mwenemwe.
Ukusimpa muluputo
7Simulavaje, pe mulipelwa; simulondaje, pe muliyaga; simuhonyonsyaje kulwiji, pe muliyigulilwa. 8She vonti ava venga vakulava, ve vakuposhela; vonti nava venga vakulondola, ve vakuṿwaga; vonti nava venga vakuhonyonsya kulwiji ve vakwigulilwa. 9Imwe mwe muvaliye amwʼalipʼumuntu wʼakumupʼivwʼumwana wakwe, lwʼalaṿilʼumukati? 10Wʼaku-mupʼinjoha lwʼalaṿilʼinswi? 11Apene lelo ngʼimwe, mwe vanyala vwelele, ingʼavana vinyu mukuvapʼiṿwinza namwe, pʼuSo wa kumwanya asitʼukupitilizya ukuvapʼiṿwinza vuvo ve vakulava kukwakwe?
Ululajizyo ulwinza nkani
12Ilelo zyonti zyenga mukasimʼukuti avantu vavavombelʼimwe, zye muvavombele zizyo namwe, she zye nkomelezyo navakuvwi.
Amadala gavili
13Simutushʼukwinjila mushikwilo ishifinyanu, she shibabaye nishikwilo, libabaye nidala lye likuvala kwe kuvutupulwa, vinji ve vakujenda pupo. 14Shifinyanu nishikwilo, lifinyanu nidala lye likuvala kuvulanzi, vansi vene ve vakulyaga.
Uvwanalyoli nuvulumilenga
15Mwandajʼavakuvwi avilenga ve vali fwe ngati ngʼonzi munzi lwe vakwinza kumwinyu, muhati nyene impumpi inkali. 16Mulivamanyila pansanga zyavo zye vakuhoma. Amwʼumuntu akuyavilʼamampensya pamachese? Amwʼumuntʼakutungulʼamakunyu pamansonya? 17She gahonzizye vovulo gontʼamakwʼaminza, gakuhomʼinsangʼinyinza. Agenʼamakwʼamavivi nyene ge gakuhomʼinsangʼimbivi. 18Ikwʼilyinza litakuhomʼinsangʼimbivi, lyope nikwʼivivi litakuhomʼinsangʼinyinza. 19Gontʼamakwi ge gatakuhomʼinsangʼinyinza gakutemangwa, gakutajilwa mumwoto, 20mwe mumwo nkuti mulivamanyila munsanga zyavo.
Amazwi nimbombo
21Te vonti ve vakuntahʼine vakuti: Mwene Mwene valiyinjila mushinamwene sha kumwanya, nkandi vonti ve vakuvomba zizyo zyʼakasimʼuTata wa kumwanya. 22Pisiku lilʼavinji valimbuzya valiti: Mwene Mwene, amwe tutahakuvwaga mwizina lyaho? Amwe impepʼimbivi tutahazifumwaga mwizina lyaho? Amwe amamfindango ge minji tutahapelaga mwizina lyaho? 23Pe ndivavuzyʼapazelu nditi: Ntavamanyile nalumʼimwe, simwepe papane mwe mukuvomba zye zite munkomelezyo.
Inyalo zivili
24Ilelʼuno wengʼakwiṿwʼamazwi gane ganaga, uno wengʼakugalandata, we nkumuholanya nkuti ali fwe muntu wa njele wʼinyumba yakwe azenzile piyalavwe. 25Pʼihomoha nimṿula, gahizula namahava, yihaṿugula ninkungu, ṿwe ṿihabunchilʼinyumba yiyo, iyene nyene yihasita nukumongonkana, she yalizilwe piyalavwe. 26Nkandʼuno wengʼakwiṿwʼamazwi gane ganaga, havili atakugalandata, we nkumuholanya numupukupuku wʼinyumba yakwe azenzile palusenga. 27Pʼihomoha nimṿula, gahizula namahava, yihaṿugula ninkungu, ṿwe ṿihayibunchilʼinyumba yinino ilelo pʼiyene yihakumpuha yihamongonkana nkani.
28Vazile lelo lwʼamazilʼuYesu ukuyangʼamazwi ganaga, pʼavantu vonti mwe vavaliye mumpuga vahasukumila vahati: Kwe kuyanga vulʼinongwa! 29Shʼuwene lwʼakuyanga, alolesile ukuva we muhatamaha wuyo, atahayanga inza shʼavamanyakalata vavo.
Currently Selected:
Matayi 7: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
