Maliko 3
3
Ukupola kwa muntu wʼinyove yakwe yumiye
1-6: Mat. 12,9-14. Luk. 6,6-11.
1Pʼahavuyizya ahinjila nohavili musinagogi. Mwʼahamwagʼumuntu wʼumuhono wakwe ayumiye. 2Avene vahamutega vahati twenye ingʼakumuzuzuvushizya pisabati, ukuti vazyagaje pupo izya kumulonjelela. 3Uwenʼahayanga kumuntu wʼumuhono ayumiye, ahati: Vuhaga, uyimililʼapazelʼipa. 4Ahavavuzya ahati: Zyonu zihondeye pisabati? Nukuvombʼinyinza nukuvombʼimbivi, nukuzuzuvushizyʼumuntu nukugoga? Avene vahapuma mwa. 5Uwenʼahatalanganya ukuvenya, ahaṿitwa. Havili uvugomu vwa moyo gavo vuhamupelela nahavwila. Pʼahamuvuzyʼumuntʼuno ahati: Golosyʼumuhono. Uwenʼahawugolosya. Pʼahanduhʼumuhono wakwe, ahava mwinza. 6PʼavaFalisayi vahafuma kunzi, vahavalʼukuyangana navanyamata va Helodi, vahitinkana izya kuti tumugoje.
Ukupolʼukunji
7-12: Mat. 12,15. 16. Luk. 6,17-19.
7Pe nuYesu navasundikwa vakwe vahavuhʼukuvala kwa sumbi. Avantʼimpugʼimpiti va mu-Galilayi vahamulandata; ukufuma namu-Yudayi, 8namu-Yelusalemu, namu-Itumayi, namwisyila lila lya Yolidani, namunsi ya Tili niya Sidoni avantʼimpugʼimpiti, ve viṿuye zyʼapezile zyonti, vahamwinzila. 9Uwenʼahayanga navasundikwa vakwe, ukuti vamwanzilʼahavoti aha kutendama mumwo, ukuti avantu vatatitilinkane nawo. 10Shʼavazuzuvushizyagʼavinji. Pe vahamushimbilila vonti ve zyavavaṿizyʼimpotwe zyavo, vahati tumupalamansye. 11Zyope nimpepʼinkandamanu lwe zimuwenyi pe zihamugwila, zihapongomoha zihati: We Mwana wa Mulungu iwe! 12Uwenʼahazipilila nkani ahati: Mutankumusyaje.
UYesu akuvasavula avapositili ishumi navavili
13-19: Mat. 10,1-4. Luk. 6,12-16.
13Pʼahazuva pigamba ahavita vengʼakasime wuyo. Avene vahavala kukwakwe. 14Ahavimihʼishumi navavili ava kuti vavanje poka nawo, ukuti avatumajʼukukumusyʼinongwa, 15ukuti vavanje namaha ga kuvinjila impepʼimbivi. 16Ahavimiha avʼishumi navavili: NuSimoni ahamupaʼizina lya Peteli, 17nuYakobu umwana-Zebedayi, nuYohani umuzuna wa Yakobu, vʼahavapʼilya Bwanelegesi izina, ilya kuti vana-lujilimo, 18nuAndeleya, nuFilipu, nuBalitolomayi, nuMatayi, nuToma, nuYakobu umwana-Alifayi, nuTadayi, nuSimoni wa mu-Kana, 19nuYuda wa mu-Kalyoti wʼamwaniliye ulwa pisinda.
UYesu akwamula lwe vakuti akuvombʼimbombo kuvutuli vwa Setano
22-30: Mat. 12,24-32. Luk. 11,15-22. 12,10.
20Pʼahinjila munyumba. Mwe vahavungana nohavili avantʼimpuga, ve vahatitilinkana nawo, vahapotwʼukulyʼiṿintu. 21Lwe viṿuye zinizi avajenzi vakwe, pe vahavala ukumulema, she vahati umwoyo akumupota.
22Avenʼavamanyakalata ve vafumile mu-Yelusalemu vahati: Ali nuBelizibuli, Zyope namwa songo wa mpepʼimbivi akuzivinjilʼimpepʼimbivi. 23Uwene ahavavunganiha, ahavavuzya muṿiholanyo ahati: USetano woka wʼatinji amuvingaje vulʼuSetano uwamwavo? 24Uvumwene inga vululinkine vuvwo vutupu, pe vutakusimpʼuvumwene vuvwo. 25Yope ninyumba ingʼilulinkinʼinyumba yiyo ntupu, pʼitakusimpa. 26Wope nuSetano ingʼahalambine wuyo, ingʼalulinkine weka, pe wope atakusimpa ndali, pʼakusila. 27Numo atakwinjila munyumba ya wanguṿu ukusampʼiṿijela ṿwakwe ingʼatamukunzile sutʼumuhatasho. Nkandi ingʼamukunzile nzila pe fwane pʼasampaje iṿwa munyumba yakwe. 28Nalyoli nkuvavuzyʼine nkuti: Gontʼamalandu ge vakutalavantu gakuswilwa, gonti naga musamu inga vasamuye. 29Nkandʼuno wengʼamusamuyʼuMupepʼuMufinjile, wʼatakwaga nalumo lumo uvuswila ndali, uwenʼumulandu wakwe uno akuva wa shimashima. 30Zyʼahavavuzya she vatili ali nimpepʼimbivi.
Uvwanamuntu vwa nalyoli
31-35: Mat. 12,46-50. Luk. 8,19-21.
31Pe vahinza nunyina navanine, vahimilila kunzi, vahatumʼuwa kumwitʼuwene. 32Ilelʼavantu vamuvisile pahati lwe vatendime nawo. Ve vahamuvuzya vahati: Yenya, nuvinyu navanino vali panapa, vakukwanza. 33Uwenʼahamula ahati: Umayʼinʼunanu, avamwitu ve vali kwi? 34Pʼahatalanganya ukuvenyʼavantu ve vamuzinganiye pʼatendime, ahati: Yenyi, wʼumayi, ve vamwitu ine vanava. 35Shʼuno wʼakuvomba zizyo zyʼakasimʼuMulungu, we wamwitu wuyo, we mwanawitʼine, we wʼumayi ine wuyo.
Currently Selected:
Maliko 3: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
