Maliko 5
5
Ukupola kwa wa mpepʼinkandamanu wa vaGelaseni
1-21: Mat. 8,28-34. Luk. 8,26-40.
1Pe vahalambʼusumbi vahafihʼisyila lila, munsi ya vaGelaseni. 2Awenyi lelo lwʼakufuma mwivoti, pʼahahomana numuntu wa mpepʼinkandamanu, afumile mumbipa. 3Wʼahavanga mwe mumbipa shima. Avaposile vontʼavantu ve vatili tumukunje, nage manyololo agaposite. 4She shima vatili twinjizyʼiṿinama ṿwakwe mwikoli, tumukunje namanyololo. Uwene pʼahadumulanya namanyololo gavo, agenʼamakoli ahasya. Pʼahasita nukuva numo uwa kumukunga. 5Shima nashamusanya nashavusiku ahava namumbipa namumagamba, ahapongomoha ahayihoma namavwe. 6Ayazile lelo lwʼamuwenyʼuYesu ukutali, pʼahamushimbilila, ahakupama kukwakwe, 7ahapongomoha nkani ahati: Tuli vuli nane nawe we Yesu we Mwana wa Mulungu Mulusyi? Nkukulapizya kwa Mulungu nkuti utanizizyaje. 8ShʼayazilʼuYesu akuti: We mpepo we nkandamanu fumaga mumuntʼuno. 9PʼuYesu ahamuvuzilizya ahati: Izina lyaho we nanu? Uwenʼahamula ahati: Ne Mpuga izina lyanʼine, she tulʼavinji. 10Ahalambilizya nkani kwa Yesu ahati: Utatuvingaje munsi yinino. 11Ilelo lyali pupo nidimilo lya vahapola vahalyʼuvusole pigamba. 12Pʼimpepʼinkandamanu zihalambilizya kukwakwe zihati: Ututumaje muvahapoli vala, mwe twinjilaje. 13UwenʼuYesu ahitiha. Pʼimpepʼinkandamanu zihafuma zihavalʼukwinjila muvahapoli. Pʼavahapoli idimilo lyonti vahagalagatila paluvambala, vahayitaga mwa sumbi, vonti mwe vavaliye 2,000, vahamila mwa sumbi.
14Avenʼavalumendo ve vahadimagʼavahapoli vahashimbila, vahavalʼukuzikumusya namunkaya mwonti namuṿwegwi. Pʼavahatankaya vahavalʼukwenya zyʼapezile. 15Vahafiha pʼalʼuYesu, vahagʼumuntu we zyamwinjiyʼimpepʼimbivi ukuti atendimʼahinza, azwaye namenda asansamusile, wuyo wʼali nimpuga. Pʼavene vahatetema. 16Avene lelʼava ve vamuwenyi, ve vahavavuzya nizya wa mpepʼimbivi ukumuzuzuvushizyʼuwene nizya vahapoli. 17Pʼavene vahalambilizya kukwakwe ukuti ayepaje kumwavo. 18Ayazile lelo lwʼakuyipashila mwivoti, pʼuwa mpepʼimbivi ula ahalambilizya kukwakwe pakuti ave poka nawo. 19UwenʼuYesu ahahana ahati: Ndali, uvale kuhaya nakuvajenzi vaho uhavavuzye uhatinji: Shʼahonzizye vovulʼuMwene, ampepelezizye nukumpepelezya. 20Pʼuwenʼahavala munsi ya mu-Dekapoli, ahazikumusya zyonti zyʼamupeleyʼuYesu. Pe vonti vahasukumila.
Ukuzyuha kwa mwanʼumulindu wa Yayili nukupola kwa mwantanda wʼali nisha mwiho
22-43: Mat. 9,18-26. Luk. 8,41-56.
21IlelʼuYesu lwʼalamṿile mwivoti, lwʼafisilʼisyilʼili, pe vahavungana pupo pʼali avantʼavinji, lwʼali pasumbi uwene. 22Pe wokʼusongo wavo uwa sinagogi, wʼali wʼuYayili izina, ahapalamila kukwakwe. Lwʼamuwenyi pʼahakupama kuṿinama ṿwakwe, 23ahamulambilizya nkani ahati: Ahana hanʼahalindu hamakusililishila shinishi. Nzagaga, tuvale kukwane, uhamuvishʼumuhono, ukuti apone nukulandila. 24Uwenʼahavuhʼukuvala nawo. Vahalandatʼavantʼimpuga ye mpiti. Vahatitilinkana nawo.
25Ilelo pʼali pupo wope numwantanda woka, wʼalimbiliye nisha mwiho amahʼishumi nagavili, 26wʼayimṿilwe kuvaganga ve vinji. Mwe ṿwasiliye niṿwuma ṿwakwe ṿwonti, nakupola ha, nkandʼiyenʼimpungo yakwe inaṿula nkani. 27Ilelo lwʼayi-ṿuyʼizya Yesu, pʼahajendela mumpuga ya vantu, ahapalamila mwisinda, ahapalamansyʼamenda gakwe. 28Shʼuwene muhati yakwʼatili: Inga nkumupalamansya ge menda gakwe pe nkupola. 29Ilelo pe shihajenda nukwumila panapʼishiduda sha mavanda. Ahayimanya mumuvili ukuti mpozilʼimpungo yanʼino. 30PʼuwenʼuYesu ahayimanya pupo amaha gakwe ukuti gefile gamo mumuvili wakwe. Pʼahavashevelʼavantu ahati: Unanu ampalamansizyʼamenda panapa? 31Pʼavasundikwa vakwe vahamula vahati: Sutakwenyʼavantu ve vakululinkana nawe, havili ukuti: Unanʼampalamansizye? 32Uwenʼahatalanganya ukumwanza wʼahonzizye vovulo. 33Uwenʼumwantanda ilyoga lihamugwila, ahatetema, shʼayimanyilʼukutʼazuzuvusile. Pʼahavalʼukumugwila, ahamuvuzya zyonti, atalesile nazimo. 34UwenʼuYesu ahamuvuzya ahati: We mwana wanʼiwe, lukuzuzuvushizizye lwe lwitiho lwaho; valaga nuvwihalo, yope nimpungo yahʼitalivuyila nalumo. 35Ilelo lwʼamakuyanga linili, pe vahafiha vamo ve vafumile pasongo wavo wa sinagogi, vahamuvuzya vahati: Umwana waho afuye. Ilelo ukumulisyʼumusambilizi shonu? 36UwenʼuYesu ahiṿwa lwe vakumuvuzya, pʼahayanga nawʼusongo wavo wa sinagogi, ahati: Utatetemajʼiwe, uyitihaje vwelele. 37Atahamwitiha numuntu numʼukulandatana nawo. Ahasenda veka ve vaPeteli nuYakobu nuYohani umuzuna wa Yakobu. 38Pe vahinjila munyumba ya songo wavo wa sinagogi. Ahaga mumwo ahalanga hatupu navantu ve vahakutaga nave vahalosyagʼilosyo. 39Ahinjila ahavavuzya ahati: Ahalangʼiha hashi, mukukuta shonu? Shʼumwana atafuye ndali, akasite twe tulo. 40Avene pe vahamuseha. Uwenʼahavavinga vonti. Pe nuyise wa mwana nunyina nava vʼayinzile navo, vʼahinjila navo mwe halʼahalindu. 41Pʼahahalemʼumuhonʼahalindu, ahati: Talita kumi, lye likuti: We halindu, nkukuvuzya nkuti vuhaga. 42Pʼahalindu hahavuha luvilo luvilo, hahajenda. Shʼamaha gakwe hamazilʼishumi nagavili. Pe vonti vahatentwa nukulemwa nkani. 43Uwenʼahavahandanizya nkani ahati: Mutamuvuzyaje numʼumuntu. Ahalajizya ukuti vahapanjʼahalindu yimo iṿwa kulya.
Currently Selected:
Maliko 5: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
