Maliko 6
6
UYesu akuhanya mu-Nazaleti
1-6: Mat. 13,53-58. Luk. 4,15-30.
1Pʼahepa pupo ahavala munkaya mwʼakuliye. Avasundikwa vakwe vahamulandata. 2Ilelo lwe lifisilʼisabati, pʼuwenʼahandʼukuvasambilizyʼavantu musinagogi. Avene vamʼavinji ve vahatejelezyaga vahasukumila, vahati: Zyʼazyazile kwi zinizi? Zye njele vuli zyʼali nazyo? Ge mamfindango vuli gʼakupela munyove zyakwe? 3Amwʼate wuyo we muselemala, we mwana wa Maliya we wamwavo wa vaYakobu nuYose nuYuda nuSimoni? Avanavavo avalindu tute navo panapa? Pe vahapunula muli wuyo. 4UwenʼuYesu ahavavuzya ahati: Umukuvwi atakusovʼumushinzi nkandi kwe kumwavo nakuvaenzi vakwe na munyumba yakwe. 5Ahasita nukupela numʼumumfindango wa maha mumwo, heka he ha kuvihʼinyove vamʼavapotwe aha kuvazuzuvushizya. 6Ahasukumila she vatali nulwitiho nalumo. Pʼahavala munkaya zyonti mwe zizyunguluye, ahavasambilizyʼavantu.
Avapositili ishumi navavili nukukumusyʼintumi kwavo
7-13: Mat. 10,9-15. Luk. 9,1-6.
7Ahavitʼavishumi navavili, ahavasogozya nkuvatuma Ukwo vavili Ukwo vavili. Ahavapa namaha aga kuvinjilʼimpepʼinkandamanu. 8Ahavavuzya ahati: Mutasende naṿimo iṿwa kujenda naṿwo mwidala, ye ndisa yeka ye musendaje. Kwe ndali ukupayʼimpayo, ye ndali imbugulu, twe ndali utwahela mumalamba. 9Nkandʼindyato zye muzwalaje kuṿinama. Amashati ge ndali ukuva gavili. 10Ahavavuzya ahati: Ninyumba yenga mukwinjila mumwo, mwe muhakate mumwo, muhafishe pupo lwe mukuvuhʼukusogola nzila. 11Mwonti mwenga vakusitʼukuvaposhelʼimwe nukutejelezya zye mukuyanga, pe muhafume mumwavo, muhavakunyuntile nulusuto lwa kuṿinama ṿwinyu, zye zivanje zya kumanyila mumwʼavene. 12Pe vahavala, vahapangʼilya kuti simupinduhaje. 13Vaha-fumwa nimpepʼimbivi zye nyinji nkani, navapotwe vahavapaha namafuta, ilelo pe vahazuzuvuha.
Ukufwa kwa Yohani umwozyi
14-29: Mat. 14,1-12. Luk. 9,7-9.
14Wope nuHelodi umwene ahiṿwa zinizi, shʼizina lyakwe lyakumusile. Ahati: WʼuYohani umwozyi, azyusile kuvafwe, mwe mumwo mwʼakupelʼamamfindango ganaga. 15Vamo vahati wʼuEliya, vamo vahati mukuvwi ali fwe vakuvwi va lulwo. 16UwenʼuHelodi lwʼayiṿuye pʼahati: UYohani we namudumuyʼitwe, azyusile kuvafwe. 17ShʼuHelodi atumilʼavantu ukulemʼuYohani, ahanawigalila mujela pamulandu wa Helodiya umuha wa wamwavo uwa Filipu. Shʼamusenzite. 18ShʼuYohani amuvuzizye atili: Zye mwiho ukuva nawʼumuha wamwinyu iwe. 19PʼuHelodiya ahamufinjilagʼukumugoga, nkandi ahapotwa. 20ShʼuHelodi ahamunyilʼuYohani, shʼamuwenyi ukuvʼumuntʼumugolosu umufinjile. Shimʼahamusunga. Lwʼafumilʼukwiṿwa zyʼamuvuzizyʼuYohani, pʼahazilandata zye nyinji. Ahaseshelaga pakumutejelezya. 21Lumo pe lihinzʼisikʼilyinza. ShʼuHelodi avisitʼavahombe vakwe navatwale va vulugu navanamfumu va mu-Galilayi ukulyʼiṿintu pachaka wa kukumbushilʼukupafilwʼuwene. 22Pʼumwana-Helodiya umulindu ahinjila, ahapunzʼingʼoma, ahahondela nakwa Helodi nakuli vonti ve vatendime nawʼukulyʼiṿintu. Pʼumwene ahamuvuzyʼumulindu ahati: Lavaga hamo kukwane, nashenga ṿwonu ṿwengʼukasimʼukulava, nkukupa. 23Ahamulapila ahati: Ṿwonu ṿwengʼukulava nkukupa, nashenga nyusu ya vumwene vwane. 24Uwenʼahafuma kunzi ukumuvuzilizyʼunyina, ahati: Ndave shonu? Wuyo nyenʼahati: Itwe lya Yohani umwozyi. 25Ahashimbilʼukuvala mwʼalʼumwene, ahati: Nkulava nkuti mpanga shinishi vovulo itwe lya Yohani umwozyi pibeseni. 26Pʼumwene ahaswimililwa nkani. Ukwene nyene shʼafisilʼalafile, she nukwiṿwa viṿuye vuvo vʼahalya navʼiṿintu, pʼahanyilʼukuhana. 27Pʼumwene ahamutumʼumusinjala, ahati: Valaga, usendʼitwe lya Yohani. Wʼahavala, ahadumulʼitwe lyakwe mujela. 28Ahaletʼitwe lyakwe pibeseni, ahamuninchilizyʼumulindu. Uwenʼahavalʼukumupʼunyina. 29Ilelo lwe viṿuyʼavasundikwa vakwe, pe vahavalʼukusendʼiṿimba lyakwe, vahaliviha mumbipa.
Ukugaluha kwa vapositili
32-44: Mat. 14,13-21. Luk. 9,11-17. Yoh. 6,1-13.
30Pʼavapositili vahavungana pupo pʼalʼuYesu, vahamuvuzya zyonti nazye vavomṿile nazye vasambilizizye. 31Uwenʼahavavuzya ahati: Shushi, tuvale tuyelelesile mulwugwa mula, mwe muhatuzye hamo. She valʼavantʼavinji ve vahasusuntaga shima ukumutunjilʼuwene. Mwe mumwo nukulya vatahalyangʼahinza.
32Pe vahalamba mwivoti, vahavala mulwugwa mwe vahayeleleha. 33Avenʼavantu ve vinji vahavalola lwe vakwepa, vahavamanya, pe vahafuma munkaya zyonti, vahapimpila niṿinama ukuvala kula, vahatalihʼukufiha kuli vuvo. 34IlelʼuYesu lwʼakuzuva pʼahenyʼavantʼimpugʼimpiti. Pʼahavapepelezya, she vali fwe ngʼonzi zye zite numudimi. Pʼahandʼukuvasambilizyʼinyinji.
UYesu akulisya avantu 5,000
35Vahalinga lwe vwiliye shamazuva avasundikwa vakwe, pe vahapalamila kukwakwe, vahati: Mwe mulwugwa munumu, vwope nuvusiku vwiliye, 36uvavwezyajʼavantu, vavale muṿwegwi mwonti namunkaya zyonti, kwe vayikalilʼiṿwa kulya. 37Uwenʼahamula ahati: Simuvapanje mwenemwe iṿwa kulya. Avene vahati: Ingavanga tuvalʼukuvakalilʼiṿintu ṿwa kulya pamadinali 200, inga pe tuvapanjʼiṿwa kulya? 38Uwenʼahavavuzilizya ahati: Muli namakati galinga? Valaji mwenye. Pe vahavalʼukwenya, vahati: Gasano, ninswi zivili. 39Ahati: Simuvavuzye vonti vatendame pansi muvulilo muvulilo mwisolʼilyolo. 40Pe vahatendama vahava mundongo mundongo, ukʼamashumʼishumi, ukʼamashumi gasano. 41PʼuYesu ahasenda ge makati gasano gugo nazye nswi zivili, ahenya kumwanya, ahaputa. Pʼahamensulanyʼamakati ganaga, ahavaninchilizyʼavasundikwa vakwe, ve vahavapʼavantu. Zyope ninswi zivili ahavagavanya vonti. 42Vahalya, vahikuta vonti. 43Vahavunganihʼiṿwalila, ṿihizulʼiṿisejʼishumi naṿivili, twope nutuswi twe twasyaye pupo. 44Avene ve valiyʼamakati ganaga vali 5,000, ukuvazya ve vanaṿuli veka.
UYesu akujenda pasumbi pamwanya
45-56: Mat. 14,22-36. Yoh. 6,15-21.
45PʼuYesu ahavalongolezyʼavasundikwa vakwe, ahati: Simuyipashile mwivoti, mutalishʼimwe ukulamba ukuvala mu-Betisayida isyila lila. Nkuvavwezya sutʼavantʼiva. 46Ilelo lwʼalagine navo, pʼahazuva pigamba ukuputa. 47Ilelo lwe vwiliye shamazuva, pʼivoti lyavo lyali pahati pasumbi. Uwenʼahava weka isyilʼili. 48Ahavenya, ahaga vakulwa namavilingwa ukujenzyaʼivoti, shʼinkungu yafumile kwe venyizye. Uwenʼahalinga pahavalilizyo ha vune, mwe vakuvazizya ve vakusunga pavusiku, ahavinzila, ahahanya pamwanya pasumbi ukujenda. Ahati mbashile. 49Avene lwe vamuwenyʼakujenda pamwanya pasumbi, pe vahati muhati ukuti she shitumbu, pe vahakuta. 50She vamuwenyi vonti, vahatentwa vonti muhati. Naluvilo uwenʼahayanga navo ahati: Simujimbaje, she nene, kwe ndali ukutetema. 51Ahayipashila mwivoti mwe vali. Pʼinkungu yihategama. Pe vahatentwa muhati, vahasukumila nkani. 52She vatazyazilʼinjele mumakati gala, shʼamoyo gavo gagomile.
Ukupola kwa vantu mu-Genesaleti
53Ilelo lwe valamṿile pe vahavalʼukufiha munsi ya mu-Genesaleti, mwʼivoti lihasulila kushipuma. 54Ilelo lwe vafumile mwivoti, pʼavantu vahamumanya luvilo, 55vahasavalila mwonti mwizyunguluye iya mumwo, vahavanyatula pamazagala vontʼavapotwe, vahavaleta kwe viṿuye ukuti ali kula. 56Mwonti mwʼahajendaga namunkaya, namumalinga, namuṿwegwi, mwonti vahavaviha pamasolo avayeyevazu, vahalambilizya kukwakwe vahati: Tulingajʼukulemʼinkanzu yakwe kuvupinte; ilelo vonti vuvo ve vayilemile, ve vahazuzuvuha.
Currently Selected:
Maliko 6: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
