Mateo 21

1Na aho vegelaga bihi na Yerusalema na vafikaga ha Betfage ha Lugulu lwa Maguta, Yesu wavatongezaja 2vahemba vavili na wavawila, Jagi ku kakaya kali ha welekela winwe, na haho mukuvona mpunda yitungilwe na kana hamohene nayo, muyitungule na mundetele. 3Na ulu umo alimuwila inwe muhayo, haho muyombe, Guku alizifunda; na itungo lili akuzitumizya. 4Genaya gose gakwilaga kigele muhayo gufikile gwayombilwe na mufumbuzi ati,

5Mumuwile mwanike wa Sioni,

Lolaga, mutemi wako aliza kuwako,

Mudekanu, adamilile ku mpunda, ahene, ku kana ka mpunda,

Mwana wa mpunda ya kuvucha miligo.

6Alisi vahemba vajagako na vitaga kitisi Yesu wavalagilaga; 7na vayiletaga mpunda na kana kayo, na vazyanzaga myenda zyavo kwigulya nazyo, nawe wikalaga kwigulya nazyo. 8Alisi vingi mugati na mbuto ya vanhu vazyanzaga myenda zyavo mu nzila, na vangi vagabutaga matambi ku miti na vaganzaga mu nzila. 9Alisi mbuto izyo zimutongelile na izyo zimulondile zyahamukaga zyuhaya, Hosana Mwana wamwa Davidi! Adosiwe homwene aliza mu lina lyamwa Guku! Hosana mwigulya muno! 10Na aho wingilaga mu Yerusalema, kaya yose yatinginaga vuhaya, Nani mwenuyu? 11Alisi mbuto ya vanhu vayombaga, Mwenuyu ali mufumbuzi Yesu wa Nazareti ya Galilaya.

12Na Yesu wingilaga mwisengelo na wavapezezaja hanze vose hovene vavagi valiguzya na kugula mwisengelo na wazikunulaga meza zya vabadila mapesa na 13masumbi ga vaguzya nkunda, na alivawila, Yatonilwe ati numba yane yikwitanwa numba ya kulomba, alisi inwe muliyivezya kuvi ipilinga lya vasambo. 14Na vamwegelaga vahofu na valema henaha mwisengelo, na wavapizaja. 15Alisi vahozya vahanya na vamanicha fitabu, aho vagavonaga genayo ga kukumya hogene witaga, na vayanda hovene vavagi valihamuka henaho mwisengelo na valihaya, Hosana ku Mwana wamwa Davidi! vagayaga na vamuwilaga, Uligwa genayo venava valiyomba? 16Na Yesu wavawilaga, Ahene, mutali kusoma,

Ku milomo ya vana vado na ya velele wivezezizye ikuzyo?

17Na wavalekaga na wafumaga mu kaya na wajaga ku Betania na walalaga kwenuko.

18Alisi ha wangaluke, aho wavagi alisyoka hangi mu 19kaya, wavagi na nzala. Na aho wavonaga mukuyu bihi na nzila, wagwegelaga na akawine kinhu hago sumbwa madutu duhu. Na waguwilaga, Fikigele ngʼo fisumo kuwako kusika hanahana. Na itungo lili mukuyu gwanyalaga. 20Na vahemba, aho vavonaga vakumaja vuhaya, Lumehoki mukuyu gwenugu gwanyalaga 21itungo lili? Alisi Yesu witavukaga na alivawila, Yalole ndimuwila inwe, ulu muli nʼisanizyo vuduhu kususihanya mukuvezya, ngʼo yeniyi yavezeziwa ku mukuyu duhu, alisi ninga ulu mukuluwila lugulu lwenulu, Vukaga na wiponezye mu nyanza, haho yikukwila. 22Na gose hogene mukugalomba mugati na kulomba, ulu mulisanizya, mukupiwa.

23Na aho wingilaga mwisengelo, vahozya vahanya na vanamhala va chalo vamwegelaga aho wavagi alihembeka na valiyomba, Ku vukovozi ki ulita genaya? 24ninga nani wakupaga vukovozi wenuvu? Alisi Yesu witavukaga na wavawila, Nane nkumuvuzya inwe muhayo gumo, na ulu mulinitavuka, nane nkuvawila inwe 25ku vukovozi ki ndita genaya, Kogiwa kwamwa Yohana kwafumaga kuhe, kwilunde ninga ku vanhu? Na vitozaja hamohene na vayombaga ati, 26Ulu twayomba, Kwilunde, akutuwila, Kuki haho mukamusanizizye; alulu twayomba, Ku vanhu, tulivogoha vanhu, kwisi vose vamwilolelaga Yohana ati ali mufumbuzi. 27Na vamwitavukaga Yesu vuhaya, Tukamanikizye. Nawe wavawila, Nane mwene kumuwila inwe ngʼo ku vukovozi ki ndita genaya. 28Alisi mulivona kinahe? Wavagiho munhu ali na vana vavili. Na wamwegelaga wa mbele umuwila, Mwana wane, uje walelo ukatumame mu mugunda gwa mizabibu. 29Alisi wamwitavukaga, uhaya, Ii, nkanile! alisi hanuma wanogolekaga na wajaga. Na wamwegelaga wa vuvili na wamuwilaga sisyo savasava. 30Nawe witavukaga, uhaya, Ahene, guku! alisi akajile. 31Nani mugati na venava vavili witaga kikowa na ise? Valimuwila, Wa mbele. Yesu alivawila, Yalole ndimuwila inwe, vʼihongo na vayanzi vakumutongela inwe kwingila mu vutemi wa Mulungu. 32Kwisi Yohana wizaga kuwinwe mu nzila ya vugololoku na mukamusanizizye; alisi vʼihongo na vayanzi vamusanizaja; alisi nulu mwayivonaga yeniyi mukanogolekile hanuma na kumusanizya.

Mwigwe mukolani gungi. 33Wavagiho munhu mwene numba homwene walimaga mugunda gwa mizabibu, na wagupilimaja na lugutu na wasimbilagamo ituli lya kukamulila na wazengaga chamba; na wavatulaga mu 34mugunda valimi, na wajaga ku chalo kingi. Alisi aho itungo lya fisumo lyegelaga, wavatumizaja vakumba vakwe ku valimi kigele vanukule fisumo. 35Na valimi vavadimaga vakumba vakwe, umo vamutulagulaga, na ungi vamuvulagaga, na ungi vamutulagulaga mawe. 36Hangi wavatumizaja vakumba vangi vingi kukila va mbele, vavitilaga sisyo savasava. 37Alisi haho wamutumizaja kuwavo mwana wakwe, uhaya, Vakumogoha mwana wane. 38Alisi aho valimi vamuvonaga mwana vayombaga hamohene, Mwenuyu ali musaliki; kako, tumuvulage na tusole isalo lyakwe. 39Na vamudimaga na vamutagilaga hanze na mugunda gwa mizabibu na vamuvulagaga. 40Ulu haho akwiza guku wa mugunda 41gwa mizabibu akuvitilaki valimi venavo? Valimuwila, Vavi venava akuvazigilizya, na akuvatula valimi vangi mu mugunda gwa mizabibu, hovene vakumupa 42fisumo hʼitungo lyafyo. Yesu alivawila, Mutali kusoma mugati na vutone,

Iwe holyene vazenguzi valikanaga lyavile iwe lya ha kituli;

Genaya gafumile kumwa Guku na gali ga kukumya mu minso giswe.

43Kunguno yeniyi ndimuwila inwe ati, vutemi wa Mulungu vukwingiwa kuwinwe na vukupanwa kwigongo lingi holyene likwambya fisumo fyavo. 44Na homwene akugwila kwiwe lyenili akuvinzaguka; alisi mwenuyu likumugwila likumuviganyaviganya. 45Aho vahozya vahanya na Vafarisayo vayigagwa mikolani yakwe, vamanikaja ati aliyomba kunguno yavo. 46Na vakovaga kumudima, alisi vayogohaga mbuto ya vanhu, kwisi yamwilolelaga kitisi ali mufumbuzi.

Currently Selected:

Mateo 21: Nym51

Highlight

Copy