Mateo 23
23
1Haho Yesu wayombaga na mbuto ya vanhu na 2vahemba vakwe, uhaya, Kwisumbi lyamwa Mose valikala vamanicha fitabu na Vafarisayo. 3Haho gose genaya vakumuwila inwe, genaya mwite na mugamazye, alisi muleke kwita hanuma na milimo yavo, kwisi valiyomba alisi vakavile kwita. 4Valitunga miligo mitimbu na valivavagazya vanhu, alisi venekili vakatogilwe kuyisegezya ninga ngʼo na kala kamo. 5Milimo yavo yose valivezya kigele vavonwe na vanhu, kwisi valizigalihilizya karatasi zya kulombela na valigakulilizya mabomho ga myenda yavo, 6na valitogwa hakwikala kumbele hakulila, 7na masumbi ga kumbele mu masinagogo gavo na kugisiwa mu magulilo na kwitanwa Rabi. 8Alisi inwe muleke kwitanwa Rabi, kwisi umo ali muhembeki winwe, homwene Kristo, na inwe vose muli va vudugu. 9Na inwe muleke kumwitana umo vava ku liwelelo, kwisi umo ali Vava winwe, homwene ali mwilunde. 10Na hangi muleke kwitanwa vakilongozi, kwisi kilongozi winwe ali umo, homwene Kristo. 11Homwene ali muhanya mugati ninwe ave mukumba winwe. 12Homwene aliwikulilizya mwenekili akudoheleziwa; na homwene aliwidohelezya mwenekili akukuliliziwa.
13Musyolo kuwinwe vamanicha fitabu na Vafarisayo, inwe vagulumi, kunguno mulivalugalila vanhu vutemi wʼilunde, kwisi inwe venekili mukavile kwingila, ninga kuvaleka vingile venavo valikova kwingila. 14Musyolo kuwinwe vamanicha fitabu na Vafarisayo, inwe vagulumi, kunguno mukuzilyaga numba zya vasimbe, na mu vuyengani mukulombaga itungo ihanya; kunguno yeniyi mukuyangulwa vuyanguzi vutimbu munogwene.
15Musyolo kuwinwe vamanicha fitabu na Vafarisayo, inwe vagulumi, kwisi mulivita mu nyanza na mu nsi kumugada umo ave muhemba; na ulu wingilaga, haho mulimuvezya kuvi mwana wamwa Shetani, muvi kavili kuvita inwe venekili. 16Musyolo kuwinwe vakilongozi vahofu, hovene muliyomba, Homwene alilahilila kwisengelo gukavile muhayo; alisi homwene alilahilila ku dhahabu ya mwisengelo ali mutondwa. 17Inwe vagulumi na vahofu! Kinani kili kihanya, dhahabu ninga isengelo holyene 18lyayisondohizye dhahabu? Hangi muliyomba, Homwene alilahilila ku hakuhozezya gukavile muhayo, alisi homwene alilahilila ku kipanwa hochene kiliho kwigulya naho ali mutondwa. 19Inwe vahofu! Kinani kili kihanya, kipanwa ninga hakuhozezya, hohene halikisondohya kipanwa? 20Haho homwene alilahilila ku hakuhozezya alilahilila kuho hamohene na gose galiho kwigulya naho. 21Na homwene alilahilila kwisengelo, alilahilila kulyo hamohene na mwenuyo alikalamo. 22Na homwene alilahilila kwilunde alilahilila kwisumbi lya Mulungu.
23Musyolo kuwinwe vamanicha fitabu na Vafarisayo, inwe vagulumi, kunguno mukulipaga ifungu lya ikumi ku luwiga na nzano na kumini, alisi mwagalekaga hogene gali malambu mu ngʼhama: vugololoku, kigongo, isanizyo; yilimudima kugamazya genaya vuduhu kugaleka genayo gangi. 24Inwe vakilongozi vahofu, hovene muliswiza mbu alisi mulimila ntwangavulende.
25Musyolo kuwinwe vamanicha fitabu na Vafarisayo, inwe vagulumi, mulikigusa kikombe na sahani hibala, alisi mugati fyokalile na wivi na wivonya. 26Veve Mufarisayo muhofu, hambele ukiguse kikombe na sahani mugati, kigele five fya pe na hanze.
27Musyolo kuwinwe vamanicha fitabu na Vafarisayo, inwe vagulumi, kunguno mulifikola fivimbi fyasilivilwe na nswakala, hofyene filigela hibala fisoga, alisi mugati fyokalile na maguha ga vafu na zoma zyose. 28Sisyo inwe vene muligela hanze hambele na vanhu kitisi vagololoku, alisi mugati mulokala na vugulumi na wigomu.
29Musyolo kuwinwe vamanicha fitabu na Vafarisayo, inwe vagulumi, kunguno mulifizenga fivimbi fya vafumbuzi na muligazwikila malumeho ga kuvizukila vagololoku na muliyomba, 30Ulu mbe twavagiho mu nsiku zya vansiswe, mbe tukasangilile navo ha magazi ga vafumbuzi. 31Sisyo mulisangilwa kwigulya ninwe venekili ati muli vana va vavulagi va vafumbuzi. 32Muyokazye ngelo ya vansinwe. 33Inwe nzoka, vuvyalwa wa mayoka, lumehoki mulivela kukipela kitanga cha Gehena? 34Kunguno yeniyi ndivatumizya kuwinwe vafumbuzi na va ngelo na vamanicha fitabu, na mugati navo mukuvavulaga vamo na kuvakomela ku musigiti, na mukuvatulagula vamo milanga mu masinagogo ginwe, na mukuvapezezya kufuma kaya yimo kusika kaya yingi, 35kigele gize kwigulya ninwe magazi magololoku gose hogene gazwikivilwe mu liwelelo kufuma magazi gamwa Abele mugololoku kusika magazi gamwa Zakaria mwana Baraka, homwene mwamuvulagile hagati nʼisengelo na hakuhozezya. 36Yalole ndimuwila inwe ati, gose genaya gakufika kwigulya na vuvyalwa wenuvu.
37Yerusalema, Yerusalema hoveve ulivavulaga vafumbuzi na kuvatulagula mawe venavo vatumizivilwe kuwako, kanga nakovaga kuvavilinga vana vako kitisi igongo lilituvilinga twana twalyo hansilili na manana 38galyo, alisi inwe mwakanaga. Lolagi, numba yinwe yikulekwa itongo. 39Kwisi ndimuwila inwe, vukumbu na lelo inwe kumbona ngʼo hangi kusika mulayombe, Adosiwe homwene aliza mu lina lya Guku.
Currently Selected:
Mateo 23: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.
