GIING'EETA 24
24
Gatmooda Isaka
1Iimuchu nea niwaasiit Abrahamu, nea abeeda ea ninaawda gweanyeakaaschi; nea abeeda ea niidaw NG'UTAMIIDA ghawooda Abrahamu aba haleanjeeda sean. 2Ng'ata gwayeesha Abrahamu siidaanyi bea gadiyeeda, was dea haw aba jeedeaba gheanyi, ambal eara haleanjeeda sean mideawa, “Iina geatindaang'u hing'eadayda gibeesteanyu, 3ak gaydanung' aksiina NG'UTAMIIDA habeawooda, was ASEETA humng'eeda ea ng'eanyiida, bea gideaba maynung' ghaghi orjeedeanyu haweega eemeeda Ganaani, was fuga eandi jeeda, 4ak guwi ng'eanyiida ghayi sijiilsean ak ginyaksi orjeedeanyu was Isaka gatmooda aba jeeda buweadeegeasu.” 5Ghwalamda soomjeanda ak gwayeesha, “Gwadeepa ghaheawa gatmooda gweadu geeshteanyu ghwaan ng'eang'i; abeeda gaydaadealda orjeedang'u gabiikta ng'eanyiida ghayi ileabu?” 6Gwayeesha Abrahamu, “Ng'ula, adiidu giidealdi orjeedeanyu ng'eanyiita. 7NG'UTAMIIDA was ASEETA humng'eeda, ghayi eananean ng'eanyiida ghayi sijiilsean, ak goobaloolan nea ghwaak habeawooda nea gwayi, ‘ng'eanyiini gaydaadaw jeacheangaagu’, gaygoojeagu malaykajeandaanyi gwasin naweadaang'u, ak gaynyaksiina orjeedeanyu gatmooda aba ng'eanyiita. 8Ama deepa ghaheawa gatmooda gweadu geashtaang'u, abeeda gajabala geaw mayghwaaknyi habeawooni iteanyuun; ang'iing'i adiidu giidealdi orjeedeanyu ng'eanyiita.” 9Hean gageanu soomjeanda ak ghwayiin geatindaanyi hing'eadayda gibeesta Abrahamuheeda was siidaanyi haw, ak ghwaak habeawooda aba badaydeaba ng'asheanji.
10Ng'ata gageanu soomjeanda ngamiyaji damanamughuush bea siidaanyi haw ak ghang'eat gawa, ak gageanda haleanjeeda sean miyaasiin bea giidaydeayda bea siidaanyi haw; ak ghang'eat gawa ng'eanyiida Badan-aramu, jeeda mujiineeda Nahori. 11Hean nea ghwahita ghwanung' gwalil ngamiyajeega aba murdeeda healadeeda mida murdeeda mujiini damandeaba shing'ada, damanda badiina gadeemga ramooda beega. 12Ak gwayeesha, “Ea NG'UTAMIIDA, ASEETA siideanyu haw was Abrahamu, eaniyean nung' danyagaada askweareani, geamuscheey ang'iing'i, ak giihiimu bariinyeega huumwa aba heeda siideanyu haw was Abrahamu. 13Ng'ula, aniini ghaamiinaadi aba murdeeda healadeeda, ak ghapka haweega fuga mujiini ghwaram beega. 14Ak hudagi aba jeenyaawa jea dayeesha, ‘Geamuscheey iina ng'eanyi sirbiidaang'u ak gigoonyean beesu aaleayi;’ ak gagoonan beega jea dali ak gwayi, ‘Gaydaramu eara beega ngamiyajeagaagu,’ gagasa ghoah hudi iloosi soomjeandaang'u was Isaka. Ak abeeda gaydanal gideaba niihiimsi siideanyu haw bariinyeagaagu bea huumwa.”
15Damanda miighoahiida mooshta ASEETA hean ghwahidu Rebeka, was hudeaba Betueli was orjeeda Milka, was gatmooda Nahori, was orjeeda geenyea Abrahamu, ghwahidu nea gweana gheata sirbiida jea ghwaramwa beega. 16Nea huda aamiy aba leanga, ak ea miyeasat, nea gawa healadeeda ak ghoanyiit sirbiida beega ak gwascheeng'u. 17Ng'ata ghafwach soomjeanda ak gawa roonyeeda, ak gwayeesha, “Geamuscheey goonean beesu ng'ay aaleayi aba sirbiidaang'u.” 18Ak gwayeesha, “Leaha ng'utamiideanyu”; hean ghwalamwach giirareang'nooda sirbiidaanyi ak goodalealsa beega ghwali. 19Iing'ata nea niidaw beega jea ghwali, gwayeesha huda soomjeanda, “Gaydaramsa eara ngamiyajeagaagu, ea ghoahiit leeydeayda.” 20Hean ghwalamwach ghwayam beega goohiisa jeeda simeeda ak ghafwach gabiikta healadeeda gwaramu beega, ak gwaramsa ngamiyajeagaaschi sean. 21Gang'ula siida nea ghwasiinda ghwadaah ea ninyakta NG'UTAMIIDA bareanyeakaaschi ghana manda.
22Iing'ata nea ning'ata leeydeayda ngamiya, gageanu siida ghuniida sisna dahaabu haw sheayeat ea mulmulan iyeenya bea sheayeeda haw ak ghwayiin geatingaaschi, 23ak gwayeesha, “Rukunean gibeahiing'a. Ghaheang'wa gwanda ghooriida jea gwalla fugeasu ea aniini?” 24Gwayeesha huda, “Aniini geabeayi Betueli was orjeeda Milkayda jiilsheesa Nahori.” 25Ghwalamda ak gwayeesha, “Geandeawi mbarariida ea nyeega jea ghwaak ngamiyajeega, ea heeda jea alilana.” 26Gabuy siida uhuudaanyi ak ghabwat NG'UTAMIIDA, 27ak gwayi, “Badiischeesiinda gahaguuw NG'UTAMIIDA, ASEETA siideanyu haw was Abrahamu, was dea ghayi miighwanung'waada bariinyeagaaschi ea doobiiwnataanyi aba heeda siideanyu haw. Ak ghoadoabiiwan NG'UTAMIIDA aniini aba naweeda ea ghoahiitanaan gheeda buweacheanda siideanyu haw.”
28Hean ghafwach huda ak gawa heeda ghaamwat aba ghoah ak gwarukusa iita ng'asheega sean. 29Abeeda Rebeka gwandeawa orjeeda ghaamwat siguura Labani; hean gwarita Labani ak ghafwach gwaroonyi siida, aba heeda healadeeda. 30Iidu nea ghwadaah ghuniida, ea mulmulanga mida geatinga huda ghaamwat, hean nea ghwayiiy ng'asheega Rebekayda was huda ghaamwat, “Hean goobaloolan siida,” ak ghwayiiy ng'asheega rukusa siida, gawa heeda soomjeanda nea ghamiinaada aba ghuuta healadeeda. 31Ak gwayeesha, “Beeni ghoah, ea siida niidaw NG'UTAMIIDA ghawooda; ghwasaan inyas gimiinaadi aba jarooda? Aba gideaba neasinyi gheeda ea heechea gwalla ngamiyajeega.” 32Ng'ata ghwaan siida ghoah; ak gooduuw Labani ngamiyajeega, ak ghoadaw mbarariida ea nyeega jea ghwaak ngamiyajeega, ea beega jea goohuuna geeshangaaschi ea gea geeshanga fugaaschi adeana. 33Ak iidu nea geeyeadu hamita jea ghwaak; gwayeesha, “Maydeagiischi ea ghanyi dargu iiteanyu.” Geeyeesha, “Rukuni iitaang'u.”
34Ghwalamda ak gwayeesha, “Aniini geawooschi soomjeanda Abrahamu. 35NG'UTAMIIDA niidaw muuchi ghawooda siideanyu haw, ak ea niheedu; ak ea niidaw nooga ea dugwa, ea lapiya ea dahaabu, soomjooga was headiga ea soomjooga was gadeemga, ea ngamiyajeega ea digeeniga. 36Nea Sarayiheeda was gatmooda siideanyu haw gwajiilsa siideanyu haw orjeeda nea niwaasiit; ak ea niidaw haleanjeeda sean mideawa. 37Siideanyu haw ghwaak habeawooda aba badaydeanyu nea gwayi, ‘Maynyaksiina orjeedeanyu gatmooda aba jeeda haweega eemeeda Ganaani, was ng'eanyiida eandi; 38gajuna ghaheanya ea heeda buweadeegeasu, ak ginyaksi orjeedeanyu gatmooda.’ 39Ak geayeeshi siideanyu haw, ‘Gwadeepa ghaheawa gatmooda gweadu geeshteanyu.’ 40Gwayeeshiinean niny, ‘NG'UTAMIIDA was dea easiniisi mureeda galeaga sean gaygoojeagu malaykajeandaanyi adeayeewana ak gayghwanung' nyagaada aba bareanyeakaagu; ak gaynyaksiina orjeedeanyu gatmooda aba heeda buweacheandeanyu ea jeeda ghaheanya; 41ak abeeda gajabala geaw, ak abeeda gayheeleewana habeawoodeanyu, iwuni heeda buweacheandeanyu; amadeepa ea magoonyi, abeeda gajabala geaw ak gayheeleewana habeawoodeanyu.’
42“Asi ghamneawa ghaawunyi askweareani hiji bea healadeedean, ak geayi, ‘Ea NG'UTAMIIDA, ASEETA siideanyu haw was Abrahamu, nung' danyagaada aba jeeda bareanyeekeasu eawi, 43ng'ula, ghaamiinaadi aba heeda healadeeda beega; gagasa huda jea ghwaan ghwaram beega, ak geayeeshi, “Geamuscheey beesu ng'ay aaleayi aba sirbiidaang'u,” 44ak abeeda gwayeeshiinean niny, “Leaha ak gaydaramu eara beega ngamiyajeagaagu,” gidabal ghoah niny gatmooda loosa NG'UTAMIIDA orjeeda siideanyu haw.’
45“Heeda mii daahiida giiteemshoodeanyu, ng'ula, ghwahidu Rebeka nea gwandeawa sirbiida beega aba badaydaanyi; ak gawa heeda healadeeda, ak ghwaram beega. Ak geayeeshi, ‘Geamuscheey beesu aaleayi’. 46Hean ghwalamwach goorareang'na sirbiida gheataanyi, ak gwayi, ‘Leayda, ak gaydaramsa beega eara ngamiyajeagaagu’. Hit ghaaleayi beega, ak gwaramsa eara ngamiyajeega. 47Ng'ata ghaanyaashchi niny, ‘Ang'iing'i gibeahiing'a?’ Gwayi, ‘Geabea Betueli was orjeeda Nahori ea Milka’. Hean ghayiinyi mooneeda ghuniida, ak ghayiinyi mulmulanga geatinga. 48Geabunyi uhuudeanyu ak ghaabwachi NG'UTAMIIDA, ak geabadiischeesi NG'UTAMIIDA, ASEETA siideanyu haw was Abrahamu, ghayi adoabiiwan aba naweeda miy ak geageandi huda buweacheanda siideanyu haw ghoah gatmooda orjeedaanyi. 49Asi ghamneawa iijea sisiina gadiyeeda siideanyu haw nea gisisi ng'asheega miyaas, girukunean; ama maysina, abeeda gaydanal gichea dasin.”
50Ghwalamda Labani ea Betueli ak gwayeesha, “Ng'asheanji gwaleabu heeda NG'UTAMIIDA; majeerukuna ng'asheanda muy ghana dea miy. 51Asi ng'ula, Rebeka nukwa gwanda madeadaang'u, geanda ak giyaadi, ak ginung' ghoah gatmooda orjeeda siidaang'u haw, gawuurji ginyaashta NG'UTAMIIDA.”
52Iiy soomjeanda Abrahamu ng'asheega nyaawa, ghwahiiy geaw ea ghwahita ng'eanyi ak ghabwat NG'UTAMIIDA. 53Hean gweadu soomjeanda haleanjeeda sisna lapiya ea gea dahaabu ea hang'weaka, ak ghoadaw Rebeka ak ghoadaw eara orjeeda ghaamwat ea ghaamwat haleanjeeda suulga bea sheayeeda haw. 54Iidu gweagiischi nea gwaleeshi sea fuga mideawa, ak gwalla hoowa. Iimuchu nea ghang'eat ng'eat sakteayda, gwayi, “Goonean beata dabiikta heeda siideanyu haw.” 55Ghwalamda orjeeda ghaamwat ea ghaamwat ak gwayeesha, “Nung'waada huda eendeawana gili nuwaas, eara ea eawooji damanamughuush; iing'ata eawoojisu abeeda gaygawa.” 56Ghwalamda niny ak gwayeesha, “Adoashiing'danaan, nea nukwa niinyaaktanaan NG'UTAMIIDA aba bareanyeekeasu; anung'waada dawa heeda siideanyu haw.” 57Gwayeesha fugiga, “Gajeeguursiina huda ak geanyaashchi niny.” 58Hean geeguursa Rebeka ak geeyeesha, “Gajadeayeewana siisi?” Gwayeesha, “Gaydawa.” 59Ng'ata geanung' gawa Rebekayda was huda ghaamwat sea gatmooda ghayi mideaydooschi, ea soomjeanda Abrahamu sea fugaaschi. 60Geataw Rebeka ghawooda nea geeyeesha, “Huda giyeanya, gagasa huwa gheamata fuga nyiit sagalamnyooji niba sagalamnyooji damanamughuush; ak gagasa ghoang'waay jiilnangaagu mujiinajeega weajoodiga nyaawa!” 61Hean ghang'eat Rebeka sea gadeemga ghayi mideaydooschi, ak gwading'da ngamiyajeega ak ghwaat geeshta soomjeanda Abrahamu ak ghang'eat ng'eat gaweay.
62Abeeda Isaka nileabu Beer-lahai-roi, ak goobiida ng'eanyiida Negebu. 63Ghang'eat Isaka shing'ada ak gawa gwaneayeewa jeesinga madameega; gagatkat uhuudaanyi ak ghwadaah ngamiyajeega nea ghapka. 64Gagatkat Rebeka uhuudaanyi amadu nea ghwadaah Isaka, ghwararang'aana badayda ngamiya, 65ak ghoanyaash soomjeanda nea gwayeesha, “Siidida neay aba jeeda madamnyeanda nea ghwaan roonyeedeanyean ng'eaha?” Ghwalamda soomjeanda ak gwayeesha, “Nih siideanyu hawi.” Hean gageanu hang'da ak gwadukuta gheanyangaaschi. 66Iidu gwarukusa soomjeanda Isaka iita ng'asheega sean bea ginisin. 67Ng'ata ghwaat Isaka Rebeka jeeda maheemajeanda, ak ghoah gatmoadaanyi; ak ghabwariiy. Ak geegeandeawa Isaka salgheang'da aba miyeeda ghaamwat.
Currently Selected:
GIING'EETA 24: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
