LUKA 15
15
Gisilleanda roat
(Mat 18:12-14)
1Eaweecha gaweesa fuga ang'oonyi gwaadi ea fuga riing'eega gooleeysiit niny. 2Hean ghoaniikghi Farisaayajeega ea ng'oorshoodiga nea gwayi, “Siisi gaguursa fuga riing'eega ak goombuutooschi.” 3Hean gwarukusa galeega nea gwayeesha, 4“Nih gajea anasihi aba jeedeang'wa mideawa gisil bughala, ama roat agi ea maygwanung'usa heeda giika was seedam ea damashageashiin, ak gawa dareabeeta gagasa diita roadiin ea ghwanyas? 5Amadu nea ghwanyas, ghwayiin gheataanyi nea gahoosan. 6Amadu nea ghwahita gheanyi gaguursa fuga duupchi ea fuga ascheayi ak gwayeesha, ‘Ahoosana sea aniini aba gideaba naanyaschi gisilleandeanyu roat.’ 7Asi gwasunu, ak geayeeshiineegwa, gaygwanda hooseaneega muuchi aba humng'eeda aba badayda siyagi mideawa riing'eeda ak gwaduukuuna, maygawuurji fugiga was seedam ea damashageash doobiiweadi magassa duukuunoodean.
Shiliingajeanda roat
8“Nih gajea ana gatmu, mideawa shiliingaji damanamughuush, ama roat akaleala ea maygoorabeat gheaboonyaneeda, ak goobuus gheeda ak gagasiischi muuchi ea ghwanyasi? 9Amadu nea ghwanyas gaguursa fuga duupchi ea giischeewdaanyi ak gwayeesha, ‘Eehoosana eesa sean aba gideaba naanyaschi shiliingajeandida gwachi roadiin.’ 10Asi gwasunu, ak geayeeshiineegwa, gaygahoosan malaykajeega ASEETA aba badayda siida asagi mideawa riing'eeda iiduukuuna.”
Orjeeda roat
11Hean gwayeesha, “Ghayi gwanda siisi mideawa orju iyeenya; 12gwayeesha daamwanang' ghwaan, ‘Bwaabwa, gwalnean haleanjeeda miisean.’ Ng'ata gagwalsa duwaawi haleanjeeda nyaawa. 13Ama miighang'ata eawoojisu saang'a ghang'eat orjeeda mwanang' ghwashaayda haleanjeadaanyi sean ak gawa bareanyeeka ea gawa ng'eanyiida sheagi, hita ghwasaksakta haleanjeadaanyi. 14Geeyi bwak ama niduulu haleanjeadaanyi sean ghang'eat geejeeda haw aba ng'eanyiita, ak eara niny gaba fuga gasa gichea ghwaak. 15Iidu gawa gadiyeeda aba hichpa siyagi bea ng'eanyiita, ak ghwanung' siidida gawa madamnyeandaanyi ghoarear ukurmajeega. 16Iidu Gagasa ghwaak hamita ak ukurmajeega ak ea manda siisi adaw gil. 17Jeeng'u aba Jeadaanyi gwayi, ‘Gwadeanaan soomjooga agiischi aba ghaheanya, ea ghwalach hamichoojiga nea aniini gayghabwaran jalooda aba hiji! 18Gaydang'eat dawa heeda ghweandeanyu ak geayeeshi niny, “Bwaabwa neadiiysi humng'eeda ea madeadaang'u; 19ak ea mamiisean gideaba gajeeguureewean baleandaang'u, nung' dawuurji fiisu was soomjoogeaba gheang'uun.”’ 20Ghang'eat ak gabiikta heeda ghwaan. Hean nea gudu ea dildeaweat ghoang'wearda ghwaan ama dea ghabwayda ak ghafwach ghwadeapta nea ghwasam gheata.
21Hean gwayeesha Orjeedida niny, ‘Bwaabwa aniini neadiiysi humng'eeda ea madeadaang'u, mamiisean gideaba gajeeguureewean orjeedang'u.’ 22Ghwalamda ghwaan ak gwayeesha soomjoagaaschi, ‘Alamwaja ayeani hang'dida miyiin ak gookwealsi, nea gooshuupchi mooneeda ghuniida nea gooleapsi eara geeka; 23ak gooyeadu meaydida riishaadiin ak goonuuschi, eayaaga nea geehoosanyi; 24aba gideaba orjeeni iteanyuun ghayi nimi, ak ghamneawa ea niduudu; ghayi niroat ak ghamneawa ea sinyas.’ Ak geebiisa eang'eat hooseaneega.
25“Abeeda orjeedaanyi haw gwanda madamnyeanda, damani duu gwandeawa naweeda nea niriiksa gheedean ghwayiiy ghuuta sarmeeda ea deangheeda. 26Gaguursa soomjeanda ak ghoanyaashta nea gwayeesha, Gwandaani hiji? 27Geeyeesha niny, ‘Nibiigu orjeeda geamadu ak ea ninuus gweanu meayda riishaat aba gideaba nibiigu nea gudeamajeek.’ 28Ghwanyareas orjeedida hawiin, ak ghaheawa gawa ghoah. Iidu gwarita ghwaan jarooda ak gamearmearani niny ghwaan ghoah, 29ak ghwasha nea gwayeesha ghwaan, ‘Daaha, aniini naaweacheey gweanyeeka saang'a, nea moang'wa danung'waada huumeandaang'u; nea miigoonean eara dayeenda ak geahoosanyi sea fuga eaduupcheewi. 30Ghamneawa nea ghwahidu orjeeni itaang'uun duulu haleanjeadaang'u sea gadeemga hiseadean ginuuksi meayda riishaat!’ 31Gwayeesha niny, ‘Orjeedeanyu, ang'iing'i geendeaydooschi galeagasean ak haleanjeeda eandeawi sean ea gaagu. 32Ak gicha iisihoosan ghwahit geeng'weela aba gideaba orjeeni bea geamaduun ghayi nimi, ak ghamneawa ea niduudu, ghayi niroat, ak ea sinyas.’”
Currently Selected:
LUKA 15: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
