LUKA 23

Yesu aba madeeda Bilato

(Mat 27:1-2,11-14; Mar 15:1-5; Yoh 18:28-38)

1Ghang'eatng'eat fugiga sean bea girgweageedean ak ghwaat madeeda Bilato. 2Geang'eat giihaakteayda nea geeyi, “Geadaayi siisi nea ghoaschoarda eemeedeanya, aba gideaba ghoaghuumwaneesa ea meatawi Gaysari gwaadi nea gwayeena niny Gristoyda was sugoocheanda gil.” 3Ghoanyaash Bilato nea gwayeesha, “Asi ang'iing'i guwoosi sugoocheanda Yahudi?” Ghwasha niny ak gwayeesha, “Gidirukuteaydi ang'iing'i gil.” 4Gwayeesha Bilato Ashoohoodiga hees, ea eemeeda, Mwaadaahi ng'asheanji muy aba badaydeaba siisi.” 5Goodiiktiiksa muuchi nea gwayeeniisa, “Siisi ghoang'waal buuneeda aba giinealshoadaanyi aba ng'eanyiida Yahudi sean, ghang'eada Galilaya ea ghwahidu hiji.”

Yesu geayaat madeeda Herode

6Iiy Bilato ng'asheesu ghoanyaashta siisi ea gaba ng'eanyiida Galilaya. 7Nyas iita gideaba gwanda ng'eanyiida sugoocheanda siyi Herode, ghwaat heeda Herode aba gideaba damandida gwanda Yerusalemu. 8Gahoosan Herode muuchi iidaah Yesu, aba gideaba ghayi nigeawiit gagaseadayi deaktaanyi, aba gideaba ghayi ninyas iitaanyi nea gagasa ghwadaah gwadeagooda jea gwasin. 9Ghoanyaash ng'asheega saang'a; ak ea mwasha. 10Ghang'eatng'eat ashoohoodiga hees ea ng'oorshoodiga ak ghoahaakta muuchi aba uurda. 11Gafool Herode sea shirikareadaanyi ak gwajuuga, ak geekwealsa hang'i mideawa oormeeni miy ak geatealda heeda Bilato. 12Ghang'eada damandida gwaduupchi Herode ea Bilato, aba gideaba ghayi aba mwadi gwanda furjeeda dageascheeda nyaawa.

Yesu geergweaksiina miyeeda

(Mat 27:15-26; Mar 15:6-15; Yoh 18:39—19:16)

13Iidu gaguursa Bilato ashoohoodiga hees sea fuga ahaaghwa ng'eanyiida ea buuneeda, 14ak gwayeesha saawa, “Siisi gooyeadu heedeanyu nea gooyeenyi nischoarda buuneeda. Iidu nea geasikteawi ng'asheanji aba madeedeang'wa, ea mwaadaahi aba headaanyi giidiinyeanda was sean oahaaktaawi; 15nea eara Herode goodeelneasa siisi aba gideaba mandeawana giidiinyeanda miisa miyeeda; 16aba sareani gaydanung' eabwar ak geasiksi gawa.” 17[Aba gideaba iissa gammiisa gideaba gaygootissa siyagi mida ghealooniga aba damanda ghweelmeeda.] 18Hean goojuur sean nea gwayi, “Geanda siisi ak gisiksi Baraba”– 19nea niny ea siida sijaksa ghealooniga aba gideaba ghwanung' ghaghoakghoayda eemeeda mujiini ea gideaba gwanuus siida. 20Gabiikta Bilato goobalool saawa nea gagasa gwasiksa Yesu; 21goojuur nea gwayeesha, Angoora, Angoora niny!” 22Gwayeesha gicha deaba samwagu, “Nea giidiinyeandeaba siisi ea naaha gil?” Mwaadaahi ng'asheanji jea eenuusa, asi gaydabwar ak geasiksi gawa. 23Goojuur muuchi aba uurda nea gagasa eengoor. Ea gwajooriischi giijuureanda nyaawa. 24Goorgweaksiinda Bilato gidagasiida buuneeda. 25Gwasiksa siidida ghayi sijaksa ghealooniga nung' ghaghoakghoayda buuneedean, ea gideaba ninuus siidean, was dea gasa saawa; ak ghoadayda Yesu aba gidagasiida saawa.

Yesu geengoor

(Mat 27:32-44; Mar 15:21-32; Yoh 19:17-27)

26Iidu nea geayaat, geeroonyi Simoneeda ng'eanyiida Girene, nea abeeda gwaleabu neayeeda, ak geang'waay ak geanung' ghwasar beehiidida nea ghwaat Yesu geeshta. 27Ak ghwaat geeshta eemeetuw, ea gadeemga aat geeshta nea gagutu heareega nea gooyeawda. 28Gwayamsa geaw Yesu ak gwayeesha, “Haweega Yerusalemu, adooyeawdaneani, ooyeawda geat ea diibigeagwa. 29Asi ang'ula, gayghwahidu eawoojiga jea gwayeena, ‘Ghang'wana gea was soonung'weega, ea jeesinga moang'wa gwaji, ea gidinga miyeereer!’ 30Hean gaygwayeesha giijeega, ‘Oopeedeayseasa’; ea heayeeniga, ‘Afunyeasa.’ 31Aba gideaba iisisissa ng'asheesu geeta shabwaat, gaygawuurjiin aba geeta ghajaam?” 32Hean geayaat eara fih iyeenya adiiy eenuusuudayi niny. 33Iidu nea sihita hiji siguura Geapkeeda Uhuuda, geengoorsa uhuuda beehiida, sea fugiga adiiyiin, dea manda geatinda dugwa niirja gwanda geatinda ghaadaam. 34Ak gwayi Yesu, “Bwaabwa, eaniyean samsiina fiisu; aba gideaba mwanala gissin.” Hean geelaja hang'weakaaschi ak geeng'alealeesa. 35Ghamiinaada buuneeda nea geeng'ula, nea fugiga ahaaghwa ng'eanyiidean gang'ula nea gwashika nea gwayeena, “Gwalealu suurja, asi dalealna geaw, iiwas Gristoyda ASEETA loat niny!” 36Eara fuga shirikara gwashika ak gaweesa ak ghoadaw beesu ng'weani, 37nea geeyeeniisa, “Iiwoosi sugoocheanda fuga Yahudi, gilealu geaw!” 38Gwanda ng'ooruutka uhuuda beehiidaanyi sing'waar, “Nih sugoocheanda Yahudi gil.” 39Gwayeesha siyagi adiiy gwachi siingooruudayi sea niny, “Ang'iing'i muwoosi Gristohi? Asi lealni geaw ak gilealneasa eara aseasa!” 40Hean goowoowsa niirja nea gwayeesha, “Ang'iing'i miiwali eara ASEETA, nea eara ang'iing'i gindi jeedeaba girgweaksiini? 41Nih gamiiseasa aseasa, aba gideaba geanyaschi giimeardeanya aba gisisinyi, nea siisi ea miigwasin gidamuy wassean.” 42Ng'ata gwayeesha, “Yesu apkaadaan iihiti jeeda sugoocheanduumeadaang'u.” 43Ak gwayeesha, “Aba huumwa geayeeshiineey askweareani, gajeendeayeesiina nyeamus.”

Miyeeda Yesu

(Mat 27:45-56; Mar 15:33-41; Yoh 19:28-30)

44Geeyi bwak ama gul aseeteaba lah gwaduk ng'eanyiisean misaneeda ea gaba aseeta shageash, 45iidu nea gagarbiit aseeta; hean ghang'at bugusta hang'dida sibwaasha jeeda gheeda sibata ASEETEAN nibiyeenya. 46Ng'ata gooyeawda Yesu nea goojuur muuchi nea gwayi, “Bwaabwa, naayiinyi guroroodeanyu geatingaagu!” Ahiit balooli ghoabita. 47Daah shirikarajeanda haw gwaduumsheesa ASEETA nea gwayi, “Aba huumwa siisi ea doabiiwaat!” 48Daah eemeeda gwachi bwatgeat aba hoowa nea ghwadaah ng'asheanjiin, gabiikta gealga nyaawa nea gagiisan. 49Nea fuga sean duupchi ea gadeemga ghayi adeana aba ng'eanyiida Galilaya, ghamiinaada nea sheagi nea ghwadaah ng'asheesu.

Bunyita Yesu

(Mat 27:57-61; Mar 15:42-47; Yoh 19:38-42)

50Aba damandida gwanda siisi siguura Yosefu was siida mujiineeda Yahudi siguura Arimataya. Niny abeeda gaba gweargwa girgweageeda nea ng'eeni, ak gabiissa ea doabiiwaat, 51nea niny ea mamwasa gidagasa saawa ea gissin, nea abeeda goomuuku sugoocheanduumeeda ASEETA. 52Ghang'eat siisi ak gawa ea gawa heeda Bilato ama hita gamus musta Yesu. 53Ng'ata goorareang'u ak gookwealsa hang'da miy ak ghwayiin jeemba bung'eeni mida jeemba lagheana ghayi miyeebung'sa sih. 54Nea eaweecheanji ea eaweeda sing'aap gil jea ghwahina sabaatohi. 55Nea Gadeemga ghayi adeana niny leabu ng'eanyiida Galilaya ghwaat geeshta ghwadaah bung'eeda ea gissibuyda; 56hean iidu gabiikta ghoah ak gwasin nagheeda ea geediga ng'andidi. Ak gafuuf eaweeda Sabaato gwahinda gidanyaashta diigheanda.

Currently Selected:

LUKA 23: BG15

Highlight

Copy