Nɩ-tʋnɩsɩ tʋmɔ Sɛbɛ 2
2
A MƖNƐ A NAAŊMƖN SƖƐ NA SUU
1A lɛ a *Pãtekɔtɩ bibir na ta, a popuorbo ba jaa duo na taa a ji-bõ-ƴen. 2A jie naan, a damfʋ yi na a saꞌlon wɔ̃ taa nɩ sɛsɛb kpɛ̃ɛ na fure, ɩ̃ sɛw a ʋna yir ʋ jaa ba na be. 3Ɩ̃ ba nyɛ na bom na wɔ̃ taa nɩ vũu ꞌlerisɩ a ŋma kpee kpee mar a ba jaa bõ-ƴene-ƴene, 4a ba jaa sɛw nɩ a Naaŋmɩn Sɩɛ, ɩ̃ nyɔw a ƴɛr-bʋrɔ bʋrɔ ɩ̃ ƴɛrɛ a mɩnɛ a Naaŋmɩn Sɩɛ na ƴɔw ba a ba ƴɛrɛ.
5A Jufisɩ dãa na be be na jɔrɔ a Naaŋmɩn na yi a ten ten a jaa ɩ̃ wa be a Jerujalɛm-tẽw. 6A mɩnɛ ba na wõ a ʋna damfʋ, ba kaalʼã taa duo, a nʋɔr kpaw ba a-na-ɩ ba wõ na a popuorbo a ba ƴɛrɛ a ƴɛrɩ̃ nɩ a nɩbɛ ba jaa bõ-ƴene-ƴene ƴɛrɩ̃. 7A dũunɩ ba na a nɔɛ ko ba a ba yele:
“A nɩbɛ basɩmɛ na ƴɛrɛ, aa ɩ Galile a ba jaa yi wa? 8Ɩ̃ mɩnɛ a ɩ a sɩ jaa wõ a ba ƴɛrɛ a ƴɛrɩ̃ ʋlɔ ba na dɔw nɩ sɩ? 9A-na-ɩ a sɩmɩ, sɩ yi na a ten kpee kpee. A ŋmɛɛ yi na a Partɩ, a ŋmɛɛ mɩ yi a Mɛɛdɩ, a ŋmɛɛ lɛ yi a Elam, a ŋmɛɛ go lɛ yi a Mesopotamɩ, a ŋmɛɛ yi a Jude nɩ a Kapadɔsɩ, nɩ a Pɔ̃ nɩ a Ajɩ wɩɛr. 10Ɩ̃ a ŋmɛɛ mɩ yi na a Fɩrɩjɩ, nɩ a Pãfɩlɩ, a Ejibti nɩ a Lɩbɩ wɩɛr ʋlɔ na pɩɛlʼɩ̃ a Sɩɩrɛn, ɩ̃ a ŋmɛɛ yi a Orom. 11A sɩ pʋɔ, ŋmɛɛ be na be na ɩ a Jufisɩ, ɩ̃ a ŋmɛɛ be na be na kpɛ a Jufisɩ puorfʋ pʋɔ. A ŋmɛɛ mɩ be na be na yi a Kɩrɛtɩ, ɩ̃ a ŋmɛɛ yi a Arabɩ. Ɩ̃ a sɩmɩ sɩ jaa, sɩ wõ na a ba de a sɩ mɩ̃ɛ ƴɛrɩ̃sɩ ƴɛrɛ nɩ a Naaŋmɩn tʋ̃-bɛrɛ ʋ na maal.”
12Ɩ̃ a nʋɔr ko ba na ba jaa, a ba tɩɛrɩ̃sɩ bɔr ba, a ba sooro taa:
“A par nɩ bõ?” 13Ɩ̃-cɛ a ŋmɛɛ kpɛrɛ na a popuorbo yele nɩ á dãa ɩ̃ kʋrɔ ba.
A PƖƐR ƳƐRƖ̃ Ʋ NA ƳƐR KƲ A NƖBƐ
14A Pɩɛr nɩ a *nɩ-tʋnɩsɩ pie-nɩ-bõ-ƴen lãa na ir ɩraa, ɩ̃ ʋ nyɔw a ƴɛrɩ̃ ɩ̃ ƴɛrɛ nɩ kpɛ̃w kʋrɔ a nɩbɛ:
“A nyɩmɩ na ɩ a Jufisɩ nɩ a nyɩmɩ nyɩ jaa na be a Jerujalɛm, nyɩ́ cɛl vɩlaa bɔ̃w a ala ɩ̃ na ƴɛrɛ nyɩ. 15A nɩbɛ na, aa ɩ dãa ɩ̃ kʋrɔ ba a mɩnɛ nyɩ na tɩɛrɛ wa, a-na-ɩ a cãa na ɩ dʋ̃ꞌwʋlɩ̃ ɓaaraa. 16Ɩ̃-cɛ a ala na maala a ka ɩ na a ala a Naaŋmɩn ƴɛr-hiere Jowɛl na dãa yel:
17‘A Naaŋmɩn yelʼã:
Nyɛ a ala nɔɔ tara a baarfʋ daar.
Ɩ̃ na deerʼã a ɩ̃ Sɩɛ pɔw a nɩbɛ ba jaa.
A nyɩ bi-dabsɩ nɩ a nyɩ bi-pɔɔbɔ nɔɔ ƴɛrɛ na
a ƴɛrɩ̃sɩ ala a Naaŋmɩn nɔɔ kʋrɔ ba.
A nyɩ polbil nɔɔ mɩ nyɛrɛ na a sɩɛ yele
ɩ̃ a nyɩ dab-nyan nɔɔ mɩ nyɛrɛ na a jãasʋlɩ̃sɩ.
18A lɛ ʋ, ɩ̃ na mɩ deerʼã a ɩ̃ Sɩɛ
ƴɔ̃w a ɩ̃ tʋ̃tʋ̃-biir nɩ a ɩ̃ tʋ̃tʋ̃-pooli
a ʋna daarʼãa pʋɔ, ɩ̃ ba nɔɔ ƴɛrɛ na
a ƴɛrɩ̃sɩ ala a Naaŋmɩn nɔɔ kʋrɔ ba.
19Ɩ̃ nɔɔ maalʼã a nɔ-kofʋ tʋmɔ
na miile a ɩ̃ kpɛ̃w a saꞌlon iin nɩ a tẽw pʋɔ.
A jɩ̃ɩ nɔɔ be na be nɩ a vũu,
ɩ̃ a jʋʋr lũburĩ pɔw a wɩɛr.
20A mɔtɔ̃w na lɩɛbʼã liw a tɩsɔw kaarɩ̃,
ɩ̃ a cuu mɩ lɩɛb mʋ̃ɔ a jɩ̃ɩ kaarɩ̃ baar,
ɩ̃-cɛ a Nɩ-kpɛ̃ɛ bibir pãa ta,
a bibir kpɛ̃ɛ ʋlɔ na kpawra a nɩbɛ nʋɔr.
21A lɛdaar, a nɩrɛ lɛ na bʋɔlɔ
a Nɩ-kpɛ̃ɛ yuor, a Naaŋmɩn na faa ʋ na.’
22“*Ɩsɩrayɛl nɩbɛ, nyɩ́ cɛlɛ a ƴɛrɩ̃ na: a Najarɛtɩ *Jeeju ʋlɔ, a Naaŋmɩn miilʼã a ʋ yel-mɩ̃ɛ a nyɩ sɛ̃. A-na-ɩ a Naaŋmɩn de ʋ na tʋ̃ nɩ a nɔ-kofʋ tʋmɔ nɩ a tʋ̃-bɛrɛ na miile a ʋ kpɛ̃w a nyɩ sɔ̃w a mɩnɛ a nyɩmɩ mɩ̃ɛ na mɩ bɔ̃w. 23Ba nyɔw na a ʋna daba ƴɔ̃w a nyɩ nuumɩ, tu nɩ a Naaŋmɩn pʋ-tɩɛrʋ̃ nɩ a mɩnɛ ʋ na dãa de nĩe bɔ̃w a yele ala nɔɔ tara. Ɩ nyɩ kú ʋ na, a-na-ɩ nyɩ ƴɔ̃w na a nɩ-faar a ba kpa ʋ yaal a nɩ-kʋ-daa juu. 24Ɩ̃-cɛ a Naaŋmɩn faa ʋ na a kũu won pʋɔ ɩ̃ ir ʋ a kũu pʋɔ, a-na-ɩ sɔr ma be be a kũu na tʋɔ nyɔw ʋ tɛɛlɛ wa. 25A-na-ɩ a Davɩtɩ dãa na yel a ʋ ɩnɛ:
‘Ɩ̃ ma nyɛ na a Nɩ-kpɛ̃ɛ a ɩ̃ nii-sɔw a daar a jaa.
Ʋ be nɩ ma na a mɩnɛ a bom kɔ̃ wa dama ma wa.
26A ala ɩnɛ a nʋ̃ɔ be na a ɩ̃ suur pʋɔ
ɩ̃ a nʋɔr mɩ nʋmɔ ma ɩ̃ ƴɛrɛ nɩ nyɩ.
Ɩ̃ a ala saarɩ̃ ɩ a ɩ̃ ɩ̃gan balʼã,
ɩ̃-cɛ ɩ̃ na barʼã nyãa gã nɩ,
27a-na-ɩ faa bara a ɩ̃ sɩɛ a kpɩɩn tẽw wa,
ɩ̃ faa mɩ sɔwrɔ a fʋ Nɩ-son ɩ̃gan ʋ sãwna wa.
28Fʋ miil ma na ɩ̃ bɔ̃w a baafʋ sɔɛ,
ɩ̃ a mɩnɛ fʋ na be nɩ ma
fʋ na maalʼã a nʋ̃ɔ a ƴala ma.’
29“Yɛɛr wee! A sɛw na ɩ̃ na ƴɛr nyɩ cãa pʋɔ a sɩ sãa-kʋmɔ Davɩtɩ ɩnɛ, a-na-ɩ ʋ kpi na a ba ũu ʋ, ɩ̃ a ʋ yaa cãa na ka a sɩ jie wa ta nɩ a dɩnaa. 30Ɩ̃-cɛ ʋ dãa na ɩ a Naaŋmɩn ƴɛr-hiere ɩ̃ ʋ bɔ̃w na bɔ̃w ka a Naaŋmɩn dãa na pʋlɩ̃ nɩ ʋ pɔ yel áa ʋ bal parvʋɔr ƴen sʋbɔ nɔɔ mɩ ɩ na a jamana a ʋ kaarɩ̃. 31A Davɩtɩ de na nĩe nyɛ a ala nɔɔ tara, ala-ɩ̃-sɔ ʋ man a *Kirisi kũu-pʋɔ-irfʋ ƴɛrɩ̃, a mɩnɛ ʋ na dãa yel áa Naaŋmɩn ma bar ʋ a kpɩɩn tẽw wa, ɩ̃ a ʋ ɩ̃gan ma mɩ sãw wa. 32A Naaŋmɩn irʼã a Jeeju ʋlɔ a kũu pʋɔ, a sɩ jaa nyɛ a lɛ ɩ̃ mana nyu 33Ɩ̃ a Naaŋmɩn ɓɔw ʋ na do nɩ biin a ʋ dʋrɩ̃ lõboorɩ̃ ɩ̃ kʋ ʋ a ʋ Sɩɛ ʋlɔ ʋ na dãa pʋlɩ̃ nɩ ʋ. A ala ʋ deer a ƴɛ̃ƴɛrɩ̃ a nyɩ nyɛ ɩ̃ mɩ wonaa. 34A-na-ɩ a Davɩtɩ mɩ̃ɛ ma do a saꞌlon wa ɩ̃-cɛ ʋ yelʼã:
‘A Nɩ-kpɛ̃ɛ yelʼã a ɩ̃ Nɩ-kpɛ̃ɛ:
Jɛ a ɩ̃ dʋrɩ̃ lõboorɩ̃
35wa ta nɩ a lɛ ɩ̃ nɔɔ ƴɔnɔ a fʋ sama-deme
a fʋ gbɛɛ pulẽe a ba ɩrɛɛ a fʋ gbɛɛ dɔɔlfʋ jie.’
36Ala-ɩ̃-sɔ a sɛw na a Ɩsɩrayɛl nɩbɛ ba jaa ba bɔ̃w ka yel-mɩ̃ɛ ʋ, áa Jeeju ʋlɔ nyɩ na dãa kpa a nɩ-kʋ-daa juu, áa ʋlɔ a Naaŋmɩn ƴɔ̃w ʋ ɩ a Nɩ-kpɛ̃ɛ nɩ a Kirisi.”
37A lɛ a nɩbɛ na wõ a ana ƴɛrɩ̃sɩ, a tɔ ba na yaw a ba sooro a Pɩɛr nɩ a nɩ-tʋnɩsɩ na lãa be nɩ ʋ:
“Yɛɛr, bõ sɩ na maal?” 38a Pɩɛr yel ba:
“Nyɩ́ lɩɛb a nyɩ yɛ̃, ɩ̃ a ba de a *Jeeju-Kirisi yuor mʋrʼɩ̃ nyɩ a kʋ̃ɔ bõ-ƴene-ƴene, a mɩnɛ a Naaŋmɩn na de a nyɩ maal-faar bar kʋ nyɩ, ɩ̃ nyɩ na pɔw na a Naaŋmɩn bõ-son na ɩ a ʋ Sɩɛ ʋ na kʋrɔ nyɩ. 39A-na-ɩ a nyɩmɩ nɩ a nyɩ bibiir a Naaŋmɩn pʋlɩ̃ nɩ, nɩ a bala ba jaa na be a nɩdaa mɩ, a bala ba jaa a sɩ Nɩ-kpɛ̃ɛ Naaŋmɩn nɔɔ bʋɔlɔ.”
40A Pɩɛr lɛ ƴɛrʼã ƴɛrɩ̃sɩ yaw kpãkpana nɩ ba, bʋɔrɔ nɩ ʋ lɩɛb a ba tɩɛrɩ̃sɩ. Ʋ yel ba na:
“Nyɩ́ faa a nyɩ mɩ̃ɛ yi nɩ a bana nɩ-gõgolĩsɩ pʋɔ!”
41A bala na sɔw a Pɩɛr ƴɛrɩ̃, ba mʋr ba na a kʋ̃ɔ pʋɔ. A lɛ, a bala na dɔɔl a popuorbo pʋɔ a ʋna dayen naa tara na nɩbɛ ture ata. 42Ba tɔ na nyãa ɩ̃ cɛlɛ a ala a nɩ-tʋnɩsɩ na jaana ba, ɩ̃ mɩ nyɔw taa nɩ a nʋfʋ, ɩ̃ mɩ lãw taa a dɩb dɩfʋ jie nɩ a Naaŋmɩn puorfʋ jie.
A DÃDÃW POPUORBO MAALFƲ
43Dãbɩ̃ɛ nyɔw na a nɩbɛ ba jaa a mɩnɛ a *nɩ-tʋnɩsɩ na maala a nɔ-kofʋ tʋ̃-yaw na miile a Naaŋmɩn kpɛ̃w a ba nii-sɔw. 44A popuorbo ba jaa ɓã na taa ɩ nɔ-bõ-ƴen, na ba sũono taa nɩ a ba yele a jaa ba na tɛrɛ, 45Ba ma de na a ba na-yele da, nɩ a bom lɛ ba na tɛrɛ, na ba ma po a libie ba jaa a mɩnɛ a nɩrɛ lɛ na bʋɔrɔ. 46Ba ma duo na taa a Naaŋmɩn puor-yir kpɛ̃ɛ a bibie a jaa, ɩ̃ mɩ lãa yʋɔrɔ taa a yie dɩrɛ taa a dɩb. Ba ma dɩ na a ba dɩb nɩ nʋɔ nɩ pʋ-pɩlaa 47ɩ̃ pɛwrɛ a Naaŋmɩn, pɔwrɔ nɩ a yo-vɩlaa a nɩbɛ ba jaa jie. Ɩ̃ a Nɩ-kpɛ̃ɛ ma de na a bala a Naaŋmɩn na faa ƴɔnɔ a ba pʋɔ a bibie a jaa.
Currently Selected:
Nɩ-tʋnɩsɩ tʋmɔ Sɛbɛ 2: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
