Nɩ-tʋnɩsɩ tʋmɔ Sɛbɛ 5
5
A ANANƖYA NƖ A SAFƖRA ƳƐRƖ̃
1Daba dãa na be be na dɩ Ananɩya, ɩ̃ a ʋ pɔw dɩ Safɩra.
Ba de na a ba puo da 2ɩ̃ gor taa a bala ayi ɩ̃ ŋmaa a libie sɔɔlɩ̃. A Ananɩya de na a libi-ŋmãa na cɛ cenʼɩ̃ na bin a *nɩ-tʋnɩsɩ nii-sɔw. 3A Pɩɛr yel ʋ:
“Ananɩya, bõ ɩ a Satã kpɛ sɛw a fʋ suur a fʋ bɛlɩ̃ a Naaŋmɩn Sɩɛ ɩ̃ sɔɔlɩ̃ a puo libi-ŋmãa? 4A puo ɩ̃ dãa cãa be be, ʋ kɔ̃ɔ ɩ a fʋ ben wa mɩɩ? Ɩ̃ a lɛ fʋ na da ʋ baar, a libie ma ɩ a fʋ ben wa mɩɩ? Bõ ɩ̃ ƴɔ̃w a maal-bir ʋlɔ tɩɛrʋ̃ a fʋ suur pʋɔ? Aa ɩ nɩrɛ fʋ bɛlɩ̃ wa. Naaŋmɩn fʋ bɛlɩ̃.” 5A mɩnɛ a Ananɩya na wõ a ƴɛrɩ̃ ʋlɔ ʋ lo na kpi, a dãbɩ̃ɛ nyɔw a nɩbɛ bala ba jaa na wonaa. 6A polbil irʼã a ba sɔ̃w ɓɔw a kũu lũ tuo yi nɩ na ũu.
7A ɩ na fɩ̃ɩ a ʋ pɔw wɩ, ɩ̃ ꞌwaa bɔ̃w a ala na dãa ta wa. 8A Pɩɛr soor ʋ:
“Man ma a amɩnɛ nyɩ na da a nyɩ puo. A nɔhɔ̃ nyɩ da mɩɩ?” A pɔw sɔw áa lɛ ba da. 9A Pɩɛr yel ʋ:
“Bõ ɩ̃ ɩ a nyɩ man taa ɩ̃ bɩɩrɛ a Nɩ-kpɛ̃ɛ Sɩɛ? Nyɛ, a bala na ũu a fʋ sɩrɛ tara na be a dɔ̃dɔr nʋɔr. Ba na mɩ ɓɔw fʋ na tuo yi nɩ.” 10A jie naan ʋ lo na kpi a Pɩɛr nii-sɔw, a polbil bala kpɛ nyɛ a kũu ɩ̃ ɓɔw yi nɩ na ũu pɩɛlʼɩ̃ a ʋ sɩrɛ, 11a dãbɩ̃ɛ nyɩrɩ̃ nyɔw a *duo-puorbo nɩ a bala ba jaa na wõ a ala.
A NƆ-KOFƲ TƲMƆ ƳƐRƖ̃
12A *nɩ-tʋnɩsɩ maala na a nɔ-kofʋ tʋ̃-yaw na miile a Naaŋmɩn kpɛ̃w a nɩbɛ sɔ̃w. A popuorbo ba jaa ma tiw na taa a Salʋmɔ̃ jɛ̃bɛrɩ̃ pʋɔ, 13ɩ̃ a mɩnɛ a nɩbɛ ba jaa na saarɩ̃ kpiire ba, a nɩ-kpeesɩ maa ꞌlara tara lãa jɩnɛɛ nɩ ba wa. 14Ɩ̃-cɛ a nɩ-yaw, a dabsɩ nɩ a pɔɔbɔ, ma sɔw na a Nɩ-kpɛ̃ɛ ƴɛrɩ̃ ɩ̃ wɩɛrɛ dɔɔlɔ a popuorbo juu. 15A na wɔ̃ a lɛ, a nɩbɛ ma de na a ba wʋlɩ̃sɩ deme ƴɔ̃w a da-gbarɩ̃sɩ juu nɩ a cẽcene pʋɔ cenʼɩ̃ na bin a sɔɛ nɔɛ, a mɩnɛ a Pɩɛr ɩ̃ wa tɔlɔ a ʋ dãadiile ʋ pɔw a ŋmɛɛ. 16A nɩ-yaw mɩ yi na a Jerujalɛm tẽ-bil pʋɔ ɩ̃ jɔ ta nɩ a baalsɩ nɩ a bala a kɔ̃tɔnsɩ na tɛrɛ, ɩ̃ a ba jaa pɔw na a kpɛ̃w.
A JUFISƖ NI-DIERBE NA KPOWRO A NƖ-TƲNƖSƖ
17A *baar-lo-nɩ-kpɛ̃ɛ nɩ a ʋ tɔ deme ba jaa na ɩ a *Saduse nɩbɛ, nyuur kpɛ na sɛw ba, 18a ba ir nyɔɔr a *nɩ-tʋnɩsɩ ƴɔ̃w a kasu pʋɔ. 19Ɩ̃ a Nɩ-kpɛ̃ɛ sɩ-tʋnaa wɩ na a tɩsɔw na yuo a kasu pana ɩ̃ taw ba yi nɩ ɩ̃ yel ba:
20“Nyɩ́ cen a Naaŋmɩn puor-yir kpɛ̃ɛ na ɩraa ƴɛrɛ a baa-paalaa na ƴɛrɩ̃ kʋrɔ a nɩbɛ ba jaa.” 21A lɛ a bio na vɩɛ, a nɩ-tʋnɩsɩ cenʼã a Naaŋmɩn puor-yir kpɛ̃ɛ na jaana a nɩbɛ, a mɩnɛ a sɩ-tʋnaa na yel ba.
A baar-lo-nɩ-kpɛ̃ɛ nɩ a bala na lãa be nɩ ʋ bʋɔlʼã a Jufisɩ ni-dierbe ba jaa a ba duo taa a ƴɛrɩ̃ guorfʋ ɩnɛ. Ba tʋ̃ na á ba ir a nɩ-tʋnɩsɩ a kasu pʋɔ wa nɩ. 22Ɩ̃-cɛ a mɩnɛ a parsãdiele bala na ta a kasu yir, baa nyɛ ba wa, ɩ̃ lɩɛb wa na yel:
23“Sɩ nyɛ na a kasu pan ʋ kpal vɩlaa, ɩ̃ a dɔ̃dɔr-gurbe mɩ ɩraa a be a dɔ̃dɔrɩ̃ gu, ɩ̃-cɛ a mɩnɛ ba na yuo a pan, saa nyɛ nɩrɛ be a diem wa.” 24A mɩnɛ a Naaŋmɩn yir-gurbe nɩ-kpɛ̃ɛ nɩ a *baar-lo-nɩ-bɛrɛ na wõ a ala ba na yel, a ba tɩɛrɩ̃sɩ dama ba na a nɩ-tʋnɩsɩ ɩnɛ, a ba sooro taa a mɩnɛ a ƴɛrɩ̃ ʋlɔ par na be. 25Ɩ̃ a nɩrɛ wɩ na na yel ba:
“Nyɩ́ nyɛ, a nɩbɛ bala nyɩ na dãa pɔw a kasu pʋɔ, ba ɩraa na be a Naaŋmɩn puor-yir kpɛ̃ɛ pʋɔ jaana a nɩbɛ.”
26Ala-ɩ̃-sɔ a Naaŋmɩn yir-gurbe nɩ-kpɛ̃ɛ taw na a parsãdiele cenʼɩ̃ na taw nɩ a nɩ-tʋnɩsɩ jom wɩ nɩ. Aa ɩ fãgã ba taw nɩ ba wa, a-na-ɩ ba jɔrɔ na a dãbɩ̃ɛ a mɩnɛ a nɩbɛ nɔɔ lɔbʼɩ̃ ba a kubie. 27A lɛ ba na ta nɩ ba a ƴɛrɩ̃ guorfʋ jie baar, ba ƴɔ̃w ba na a *ƴɛr-guor-nɩ-bɛrɛ nii-sɔw, a baar-lo-nɩ-kpɛ̃ɛ yel ba:
28“Sɩ dãa na kpãkpan nyɩ a nyɩ taa lɔɔ ƴɛrɛ bʋɔlɔ nɩ a ʋna daba yuor go wa. Ɩ̃ nyɩ́ nyɛ, nyɩ sɛw na a Jerujalɛm-tẽw nɩ a nyɩ jaanfʋ, ɩ̃ nyɩ bʋɔrɔ na nyɩ de a ʋ kũu ƴɛrɩ̃ dɔɔl a sɩ juu.” 29A Pɩɛr nɩ a nɩ-tʋnɩsɩ yel ba:
“A sɛw na a sɩ na jɔrɔ a Naaŋmɩn gãw a nɩbɛ. 30A sɩ sãa-kʋnbɔ Naaŋmɩn maalʼã a *Jeeju ʋlɔ nyɩ na dãa kpa yaal a nɩ-kʋ-daa juu ʋ ir a kũu pʋɔ. 31A Naaŋmɩn de ʋ na biin a ʋ dʋrɩ̃ lõboorɩ̃ a saa juu ʋ ɩ a Jamana nɩ a Fafaara, a mɩnɛ a *Ɩsɩrayɛl nɩbɛ na tʋɔrɔ lɩɛbɛ a ba yɛ̃, a Naaŋmɩn diere a ba maal-faar bara kʋrɔ ba. 32A sɩmɩ, sɩ nyɛ na a ana yele ɩ̃ mana nyɩ, lãw nɩ a Sɩɛ ʋlɔ a Naaŋmɩn na kʋ a bala na jɔrɔ ʋ.” 33Ɩ̃ a mɩnɛ a Jufisɩ ni-dierbe na wõ a ʋna ƴɛrɩ̃, suur nyɩrɩ̃ na nyɔw ba a ba bʋɔrɔ ba kú ba. 34Ɩ̃-cɛ a *ƴɛr-guor-nɩ-kpɛ̃ɛ ƴen sʋbɔ na ɩ a Farɩsɩ nɩrɛ ba na bʋɔlɔ a Gamalɩɛl#5.34 Gamalɩɛl: Yɛr-kpɛn-bɔɔnbɔ nɩ-kpɛ̃ɛ ʋ dãa ɩ; ʋlɔ ɩ̃ jaan a Pol a Naaŋmɩn ƴɛrĩ., na ɩ a *Naaŋmɩn ƴɛr-kpɛn-jaana a nɩbɛ ba jaa na jɔrɔ irʼã ɩraa a ba sɔ̃w ɩ̃ yel a ba ɩ a nɩbɛ na a ba yi sɛr. 35A ala ɩ̃ baar, ʋ yel ba na:
“Ɩsɩrayɛl nɩbɛ, nyɩ́ tɛrɛ nyɩ mɩ̃ɛ a ala nyɩ na ƴɔ̃w nyãa nyɩ maal a nɩbɛ na. 36Nyɩ bɔ̃w na a daar ʋlɔ a Tedasɩ na dãa ir ƴɛr a dab-ƴɛrɩ̃ yel a nɩ-kpɛ̃ɛ ʋ ɩ, a nɩbɛ kɔɔr anaan dãa tuure ʋ. Ɩ̃ a lɛ ba na kú ʋ, a bala na tuure ʋ jɔ na ba jaa yɛ̃yɛlɩ̃, a ʋ ben baar. 37A ala na yi tɔ, a Judasɩ na ɩ a Galile nɩrɛ mɩ irʼã ir a nɩbɛ a sɔrfʋ yuon a ba tuure ʋ. Ɩ̃ ba mɩ kú ʋ na, a bala ba jaa na dãa sɔw a ʋ ƴɛrɩ̃ jɔ ŋma kpee kpee. 38Ala-ɩ̃-sɔ a ƴɛ̃ƴɛrɩ̃ na, ɩ̃ yele nyɩ na, nyɩ́ ir a nyɩ nur a nɩbɛ na jie ɩ̃ cɛ ba, a-na-ɩ a ala ɩ a nɩrɛ jie a ƴɛrɩ̃ na nɩ a tʋn na yi, a na bũburĩ na. 39Ɩ̃-cɛ a ala ɩ a Naaŋmɩn jie a yi, nyaa tʋɔrɔ bũburaa wa.”
40A ƴɛr-guor-nɩ-bɛrɛ sɔw na a Gamalɩɛl nʋɔr ɩ̃ bʋɔl a nɩ-tʋnɩsɩ fɔb ɩ̃ kpãkpan ba a ba taa lɔɔ ƴɛrɛ ƴɛrɩ̃ bʋɔlɔ nɩ a Jeeju yuor go wa, ɩ̃ bar ba a ba cen. 41Ba yi na a be a ƴɛrɩ̃ guorfʋ jie, a nʋɔ ƴala ba a mɩnɛ a Naaŋmɩn na nyɛ a ba sɛw nɩ a kpɛfʋ a
Jeeju yuor ɩnɛ. 42Ɩ̃ a bibie a jaa, ba ma jaana na a nɩbɛ a Naaŋmɩn puor-yir kpɛ̃ɛ pʋɔ, nɩ a nɩbɛ yie pʋʋr ma gala wa, hiere nɩ áa Jeeju ɩ na a *Kirisi.
Currently Selected:
Nɩ-tʋnɩsɩ tʋmɔ Sɛbɛ 5: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
