Jã Sɛbɛ 18
18
A JEEJU NYƆWFƲ
(Mat 26.47-56, Mar 14.43-50, Lu 22.47-53)
1A mɩnɛ a *Jeeju na ƴɛr a lɛ baar, ʋ yi nɩ na a ʋ *par-tuurbe cen na gãw a Sɛdʋrɔ̃ kʋlaa gaan. Nakʋɔ be na a jie ʋlɔ, a Jeeju lãa kpɛ nɩ a ʋ par-tuurbe a be. 2A Judasɩ ʋlɔ na diere ʋ a juu mɩ bɔ̃w na a ʋna jie, a-na-ɩ a Jeeju nɩ a ʋ par-tuurbe ma dãa na cere a be. 3A lɛ, a Judasɩ taw na a Orom sɔdaalsɩ nɩ a parsãdiele bala a *baar-lo-nɩ-bɛrɛ nɩ a *Farɩsɩ nɩbɛ na tʋ̃, a ba tɛrɛ a vũusɩ nɩ a lãpar nɩ a jɛb yele cenʼɩ̃ a be. 4A Jeeju bɔ̃w na a ala a jaa nɔɔ tara ʋ ɩ̃ tuor soor ba:
“Ala nyɩ bʋɔrɔ?” 5A ba yel ʋ:
“A Najarɛtɩ Jeeju sɩ bʋɔrɔ.”
A Jeeju yel ba:
“A maa ʋ.”
Ɩ̃ a Judasɩ ʋlɔ na diere ʋ a juu lãa na ɩraa nɩ ba a be. 6A mɩnɛ a Jeeju na yel ba: “A maa ʋ,” ba tɛwtɛw na lo a tene. 7A Jeeju lɛ soor ba:
“Ala nyɩ bʋɔrɔ?”
A ba yel ʋ:
“A Najarɛtɩ Jeeju sɩ bʋɔrɔ.” 8A Jeeju yel ba:
“Ɩ̃ yel nyɩ na a maa ʋ. A ala ɩ̃ ɩ a maa nyɩ bʋɔrɔ, nyɩ́ bar a nɩbɛ na a ba cen.” 9Ʋ yelʼã a lɛ a mɩnɛ a ʋna ƴɛrɩ̃ ʋ na dãa ƴɛr na tʋɔ maal baar. Ʋ dãa na yel: “A bala fʋ na kʋ ma, bõ-ƴen ma bɔr wa.” 10A be jie, a Sɩmɔ̃ Pɩɛr vʋ̃ɔ na a bãjɩnɛ ʋ na dãa tɛrɛ cɛ nɩ a *baar-lo-nɩ-kpɛ̃ɛ tʋ̃tʋnɔ dʋrɩ̃ toor ŋmaa. A tʋ̃tʋnɔ ʋlɔ yuor dɩ na Malɩkɩsɩ. 11Ɩ̃-cɛ a Jeeju yelʼã a Pɩɛr:
“Su a fʋ bãjɩnɛ a sɔkpa pʋɔ. Mɩnɛ a ɩ ɩ̃ kɔ̃ nyu nɩ a won ŋman ʋlɔ a Sãa na kʋ ma wa?”
A JEEJU BA NA NYƆW CENʼƖ̃ A AN SƐ̃
12A lɛ, a sɔdaalsɩ nɩ a ba nɩ-kpɛ̃ɛ nɩ a Jufisɩ parsãdiele nyɔw na a *Jeeju lũ. 13Ba de na nĩe taw ʋ cenʼɩ̃ a An sɛ̃, a-na-ɩ a An ɩ̃ ɩ a Kayifi dɩ̃ɛmɛ ɩ̃ a Kayifi ɩ̃ dãa ɩ a *baar-lo-nɩ-kpɛ̃ɛ a ʋna yuon naa pʋɔ. 14A ʋna Kayifi ɩ̃ dãa yel a Jufisɩ áa na ɩ na son a nɩ-bõ-ƴen na kpi a nɩbɛ ba jaa ɩnɛ.
A PƖƐR NA CƖƖRƖ̃ A ꞌWAA Ɩ A JEEJU PAR-TUURE WA
(Mat 26.69-70, Mar 14.66-68, Lu 22.55-57)
15A Sɩmɔ̃ Pɩɛr nɩ a *par-tuure ƴen sʋbɔ tuure na a *Jeeju. A *baar-lo-nɩ-kpɛ̃ɛ dãa na bɔ̃w a ʋna par-tuure naa, ala-ɩ̃-sɔ ʋ nyɛ sɔr lãa kpɛ nɩ a Jeeju a baar-lo-nɩ-kpɛ̃ɛ yir a gbalɩ̃ pʋɔ, 16ɩ̃-cɛ a Pɩɛr cãa ɩraa a yẽw a dɔ̃dɔr nʋɔr. A ʋna par-tuure a baar-lo-nɩ-kpɛ̃ɛ na bɔ̃w yi na ƴɛrʼɩ̃ a tʋtʋ̃-poole ʋlɔ na gure a dɔ̃dɔr, ɩ̃ taw a Pɩɛr kpɛ nɩ. 17A tʋ̃tʋ̃-poole ʋlɔ na gure a dɔ̃dɔr soorʼã a Pɩɛr:
“A fʋ̃ʋ mɩ, faa ɩ a daba na par-tuure ƴen sʋbɔ wa mɩɩ?”
Ʋ yel ʋ:
“Maa ɩ a ʋ par-tuure wa.” 18A mɩnɛ a aar na ɩrɛ, a tʋ̃tʋnbɔ nɩ a parsãdiele gbɔw na a vũu ꞌwuoro, a Pɩɛr mɩ lãa ɩraa nɩ ba ꞌwuoro.
A BAAR-LO-NƖ-KPƐ̃Ɛ NA SOOR A JEEJU
(Mat 26.59-66, Mar 14.55-64, Lu 22.66-71)
19A *baar-lo-nɩ-kpɛ̃ɛ soorʼã a *Jeeju a ʋ *par-tuurbe ɩnɛ nɩ a ʋ jaanfʋ ɩnɛ ʋ na jaana a nɩbɛ. 20A Jeeju yel ʋ:
“Cãa pʋɔ ɩ̃ ma dãa ƴɛrɛ a ƴɛrɩ̃ kʋrɔ a nɩbɛ, jaana nɩ ba a daar a jaa a *puorfʋ yie pʋɔ nɩ a Naaŋmɩn puor-yir kpɛ̃ɛ pʋɔ, na ɩ a jiir ala a Jufisɩ ba jaa na ma duoro taa. Maa sɔɔlɩ̃ yel bom kãw wa. 21Bõ ɩnɛ fʋ sooro a maa? Soor a bala na wõ a ɩ̃ ƴɛrɩ̃; ba bɔ̃w na a ala ɩ̃ na man ba.” 22A mɩnɛ a Jeeju na yel a lɛ, a parsãde ƴen sʋbɔ na ɩraa a ʋ lõboorɩ̃ ɓa ʋ na ɩ̃ yel:
“Lɛ ɩ̃ sɛw a fʋ na ƴɛrʼɩ̃ a baar-lo-nɩ-kpɛ̃ɛ mɩɩ?” 23A Jeeju yel ʋ:
“A ala ɩ̃ ɩ ƴɛr-fãa ɩ̃ ƴɛr, miil a fãa jie, ɩ̃-cɛ a ala ɩ̃ ɩ ƴɛr-son ɩ̃ ƴɛr, bõ ɩnɛ fʋ ɓa ma?”
24A lɛ, a An ɩ na a ba lũ ʋ cenʼɩ̃ a baar-lo-nɩ-kpɛ̃ɛ Kayifi sɛ̃.
A PƖƐR NA LƐ CƖƖRƖ̃ A ꞌWAA Ɩ A JEEJU PAR-TUURE WA
(Mat 26.71-75, Mar 14.69-72, Lu 22.58-62)
25A mɩnɛ a Sɩmɔ̃ Pɩɛr na cãa ɩraa a be ꞌwuoro a vũu, ba soor ʋ na:
“A fʋ̃ʋ mɩ, faa ɩ a ʋ *par-tuure ƴen sʋbɔ wa mɩɩ?”
A Pɩɛr cɩɩrɩ̃ ɩ̃ yel:
“Maa ɩ a ʋ par-tuure wa.” 26A *baar-lo-nɩ-kpɛ̃ɛ tʋ̃tʋnɔ ƴen sʋbɔ na ɩ bal bõ-ƴen nɩ a ʋlɔ a Pɩɛr na dãa cɛ a toor ŋmaa, yelʼã a Pɩɛr:
“Maa dãa nyɛ fʋ a fʋ lãa be nɩ ʋ be a nakʋɔ pʋɔ wa?” 27Ɩ̃-cɛ a Pɩɛr lɛ cɩɩrɩ̃ na á aa ɩ yel-mɩ̃ɛ ʋ wa, ɩ̃ a ɩ a nɔraa kõ na a jie naan.
A JEEJU BA NA CENʼƖ̃ A PƖLATƖ SƐ̃
(Mat 27.1-2, Mar 15.1-5, Lu 23.1-5)
28A ala na yi tɔ, ba yi nɩ na a *Jeeju a Kayifi yir ɩ̃ cenʼɩ̃ a jamana *Pɩlatɩ yir. A ɩ na a dʋ̃ꞌwʋlɩ̃ ɓaaraa. Ɩ̃-cɛ a Jufisɩ mɩ̃ɛ ma dãa kpɛ a jamana yir wa, a mɩnɛ ba kɔ̃ wa sãw a ba mɩ̃ɛ, kɔ̃ tʋɔ dɩ a *Pakɩ fɛtɩ wa. 29Ala-ɩ̃-sɔ a Pɩlatɩ yi na be a yẽw na soor ba:
“Bõ ƴɛrɩ̃ nyɩ ƴɔ̃w a daba na?” 30A ba yel ʋ:
“A ʋlɔ ma dãa ɩ nɩ-bier wa, sɩ kɔ̃ɔ dãa nyɔw ʋ wa nɩ a fʋ sɛ̃ wa.” 31A Pɩlatɩ yel ba:
“A nyɩmɩ mɩ̃ɛ, nyɩ́ de ʋ guor a ʋ ƴɛrɩ̃ tu nɩ a nyɩ ƴɛr-kpɛn sɔr.” A Jufisɩ yel ʋ:
“A sɩmɩ, saa tɛrɛ sɔr na kú nɩrɛ wa.” 32A ta na a lɛ a mɩnɛ a ƴɛrɩ̃ ʋlɔ a Jeeju na dãa ƴɛr miilʼɩ̃ a kũu wɔ̃ mɩnɛ ʋ na kpiire, na maal baar. 33A jamana Pɩlatɩ lɛ kpɛ na a diem ɩ̃ bʋɔl a Jeeju soor:
“Fʋ̃ʋ ɩ̃ ɩ a Jufisɩ jamana mɩɩ?” 34A Jeeju yel ʋ:
“Fʋ̃ʋ tɩɛr fʋ yẽ ɩ̃ yel a lɛ, mɩɩ nɩbɛ ɩ̃ yel a ala kʋ fʋ a ɩ̃ ɩnɛ?” 35A Pɩlatɩ yel ʋ:
“Jufi nɩrɛ ɩ̃ ɩ mɩɩ? Má a fʋ bal nɩbɛ nɩ a *baar-lo-nɩ-bɛrɛ ɩ̃ nyɔw fʋ wa nɩ a ɩ̃ sɛ̃. Bõ ʋlɔ fʋ maal?” 36A Jeeju yel ʋ:
“A ɩ̃ jamana fãw ma yi ka a tẽw na pʋɔ wa. A ala ɩ̃ dãa ɩ a tẽw na pʋɔ ʋ yi, a ɩ̃ tʋ̃tʋnbɔ naa dãa na jɛbɛ a jɛb ƴɔnɔ ma, a ba kɔ̃ tʋɔ nyɔw ma kʋ a Jufisɩ wa. Ɩ̃-cɛ a ɩ̃ jamana fãw ma yi ka a tẽw na pʋɔ wa.” 37A Pɩlatɩ soor ʋ:
“A ala ɩ̃ ɩ a lɛ ʋ, jamana fʋ ɩ mɩɩ?”
A Jeeju yel ʋ:
“A lɛ fʋ na yel ʋ, jamana ɩ̃ ɩ. Ba dɔw ma na ɩ̃ wa ka a tẽw pʋɔ, na ɩ̃ mana a yel-mɩ̃ɛ kʋrɔ a nɩbɛ. A ʋlɔ na ɩ a yel-mɩ̃ɛ sʋbɔ ma cɛlɛ na a ɩ̃ ƴɛrɩ̃.” 38A Pɩlatɩ soor ʋ:
“A yel-mɩ̃ɛ parʼɩ̃ a bõ?”
A JEEJU KƲFƲ BA NA GUORO
(Mat 27.15-31, Mar 15.6-20, Lu 23.13-25)
A lɛ a *Pɩlatɩ na ƴɛr a lɛ baar, ʋ lɛ yi na na yel a Jufisɩ:
“Maa nyɛ a daba na sãwfʋ jie wa. 39Ɩ̃-cɛ a mɩnɛ nyɩ na mɩlɩ̃ nɩ, ɩ̃ ma barʼã kasu nɩ-bõ-ƴen kʋ nyɩ a *Pakɩ fɛtɩ daar. A Jufisɩ jamana nyɩ bʋɔrɔ ɩ̃ bar kʋ nyɩ mɩɩ?” 40A lɛ, ba wuure na yele nɩ:
“Aa ɩ ʋlɔ sɩ bʋɔrɔ wa! Barabasɩ sɩ bʋɔrɔ!”
Ɩ̃ a ʋna Barabasɩ naa ɩ na nɩ-bier.
Currently Selected:
Jã Sɛbɛ 18: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
