Luki Sɛbɛ 13
13
A YƐ̃ LƖƐBFƲ MƖƖ A WƐFƲ
1A daar ʋlɔ naan, a nɩbɛ wa na mana kʋrɔ a *Jeeju a mɩnɛ a jamana *Pɩlatɩ na ɩ a ba kú a Galile nɩbɛ ŋmɛɛ a daar ʋlɔ ba na be a baar lofʋ jie. 2A Jeeju yel ba:
“Nyɩ tɩɛrʼã beeka a ba kú ba na a lɛ a-na-ɩ ba nyɩrɩ̃ na maal a fãa gãw a Galile nɩbɛ ba jaa mɩɩ? 3Aa ɩ lɛ ʋ wa! Ɩ̃-cɛ a nyɩmɩ mɩ, a ala ɩ nyaa lɩɛb a nyɩ yɛ̃ wa, lɛ nyɩ na mɩ kpi nyɩ jaa. 4Mɩɩ a nɩbɛ pie-nʼanuu-nʼata bala a yir woor na kar lo kú a be a Silowe, nyɩ tɩɛrʼã beeka a bala ɩ̃ nyɩrɩ̃ bɩɛ gãw a Jerujalɛm tẽ-deme ba jaa mɩɩ? 5Aa ɩ lɛ ʋ wa! Ɩ̃-cɛ a nyɩmɩ mɩ, a ala ɩ nyaa lɩɛb a nyɩ yɛ̃ wa, lɛ nyɩ na mɩ kpi nyɩ jaa.”
A FƖGƖ TƖƐ SƲKPA
6A *Jeeju mɩ lɔbʼã a sʋkpa na kʋ ba:
“Daba kãw dãa na tɛrɛ fɩgɩ tɩɛ a ʋ puo pʋɔ. Bibir kãw, ʋ cenʼã a ʋ ꞌwɔ̃w a wɔmɔ, ɩ̃ na ʋ bɔ faa. 7A lɛ a be, ʋ yel a ʋ tʋ̃tʋ̃-bie: ‘Cɛlɛ! Yomo ata nɩ a dɩnaa ɩ̃ na ma wa a tɩɛ na wɔmɔ ꞌwɔ̃wfʋ ɩ̃ ma bɔ faa. Bõ ɩnɛ ʋ na piw a wɩɛr a lɛ a pɔrɔ? ŋmaa ʋ lɔb bar!’ 8A tʋ̃tʋ̃-bie yel ʋ: ‘Nɩ-kpɛ̃ɛ, bar ʋ a yuon na go. Ɩ̃ na kɔ na viirĩ kolĩ ʋ ɩ̃ na ɩ̃ ƴɔ̃w a pʋɔrʋ̃. 9A nʋmɔ wa sɔw, a ka nɩ a yuon na na waara, ʋ na wɔnɔ. A ala ma ɩ lɛ ʋ wa, fú ɩ a ba ŋmaa ʋ lɔb bar.’ ”
A PƆW A JEEJU NA KPAAR A BIBI-CIIRAA DAYEN
10A *bibi-ciiraa dayen, a *Jeeju jaana na a nɩbɛ a *puorfʋ yir kãw pʋɔ. 11A be, ʋ nyɛ na pɔw a kɔ̃tɔn na ka, ʋ ɩ wʋlɩ̃ maalʼɩ̃ yomo pie-nʼanuu-nʼata ɩ̃ maa mɩ tʋɔ dɔl fɩ̃ɩ wa. 12A Jeeju nyɛ ʋ na ɩ̃ bʋɔl ʋ ʋ wa, ʋ yel ʋ:
“Pɔw wee, a fʋ wʋlɩ̃ baar fʋ na!” 13Ɩ̃ na ʋ dɔɔl ʋ a nur, a pɔw dɔl a jie naan, ɩ̃ nyɔw ɩ̃ pɛwrɛ a Naaŋmɩn. 14Ɩ̃-cɛ suur nyɔw na a puorfʋ yir nɩ-kpɛ̃ɛ, a mɩnɛ a Jeeju na kpaar a pɔw a bibi-ciiraa dayen, ʋ yel a nɩbɛ:
“Bibie ayʋɔb nyɩ sɛw nyɩ tʋ a tʋn. Nyɩ́ ma wa a bibie ala pʋɔ a ba kpaar a nyɩ wʋlɩ̃sɩ. Nyɩ taa ma waara a bibi-ciiraa dayen wa!” 15A Nɩ-kpɛ̃ɛ yel ʋ:
“Nyɩna poe ayi deme naa! A nyɩ jaa bõ-ƴene-ƴene maa yuo a nyɩ nii mɩɩ a nyɩ bʋn a bibi-ciiraa dayen cenʼɩ̃ a ba nyu kʋ̃ɔ wa mɩɩ? 16Nyɩ́ nyɛ a pɔw na. Ʋ ɩ na a Abʋraham yãw a Satã na hʋɔl a yomo pie-nʼanuu-nʼata. Aa dãa sɛw ɩ̃ na faa ʋ a ʋna hʋʋr naan ɩnɛ a bibi-ciiraa dayen wa mɩɩ?”
17A mɩnɛ a Jeeju na ƴɛrɛ a lɛ, vĩ nyɔw na a ʋ sama-deme, ɩ̃ a nɩbɛ ba jaa cɩlɛ a tʋ̃-vɛlɛ ala a jaa ʋ na maala ɩnɛ.
A MUTA-TƖƐ BIR SƲKPA
(Mat 13.31-32, Mar 4.30-32)
18A *Jeeju lɛ yel ba na go:
“Bõ a Naaŋmɩn fãw wɔ̃ taa nɩ? Bõ ɩ̃ na de manʼɩ̃ ʋ? 19Ʋ wɔ̃ na taa nɩ a *muta-tɩɛ bir kaarɩ̃ a daba na de bʋr a ʋ nakʋɔ pʋɔ, ʋ bul nũɔ ɩ tɩɛ, a lili cen na ƴɔ̃w a ba cor a ʋ wulbie juu.”
A TABƖR SƲKPA
(Mat 13.33)
20Ʋ lɛ yelʼã:
“Bõ ɩ̃ na de manʼɩ̃ a Naaŋmɩn fãw? 21Ʋ wɔ̃ na taa nɩ a tabɩr a pɔw na de ƴɔ̃w a buru jɔ̃ yaw pʋɔ ʋ maal a jɔ̃ a jaa a vʋ̃ ir.”
A DƆ̃DƆR NƆ-BILE
(Mat 7.13-14,21-23)
22A *Jeeju cere na a Jerujalɛm na ʋ cʋbɔ a tẽ-bɛrɛ nɩ a tẽ-bil jaana a nɩbɛ a Naaŋmɩn ƴɛrɩ̃, 23a nɩrɛ kãw soor ʋ:
“Nɩ-kpɛ̃ɛ, a nɩbɛ bala na pɔwrɔ a Naaŋmɩn faafʋ, fɩ̃ɩ tɛw ba ɩ mɩɩ?” A Jeeju yel ba:
24“Nyɩ́ dɩ tuo kpɛ nɩ a dɔ̃dɔr nɔ-bile pʋɔ. Maa ɩ̃ yele nyɩ, nɩ-yaw na bʋɔrɔ na ba kpɛ ɩ̃ ba kɔ̃ tʋɔ wa.
25“A daar ɩ̃ wa ta a yir sʋbɔ ir nyɔw a pan kpal, nyɩ na ɩraa na a be a yẽw ɩ̃ ŋmeere a pan yele nɩ: ‘Nɩ-kpɛ̃ɛ, yuo sɩ a pan bɩlɛ.’ Ɩ̃ ʋ na yel nyɩ na: ‘Maa bɔ̃w a jie nyɩ na yi wa!’ 26A be nyɩ na nyɔw ɩ̃ yele: ‘Má a sɩmɩ ɩ̃ lãa dɩ taa a dɩb, lãa nyu nɩ, ɩ̃ a fʋ man a Naaŋmɩn ƴɛrɩ̃ a sɩ tẽw.’ 27Ʋ na lɛ yel nyɩ na: ‘Maa bɔ̃w a nyɩ yifʋ jie wa. Nyɩ́ taw yi ɩ̃ cɛ ma, a nyɩmɩ nyɩ jaa na maala a fãa!’ 28A be, a na ɩ nyɩ na kõ-yel-bie nɩ nyɩmɛ nyɩrfʋ, a lɛ nyɩ na nyɛrɛ a Abʋraham nɩ a Ɩjakɩ nɩ a Jakɔb nɩ a Naaŋmɩn ƴɛr-hierbe ba jaa a Naaŋmɩn tẽw, ɩ̃ a nyɩmɩ ʋlɔ́, a ɩ ba lɔb nyɩ na bar a yẽw. 29A nɩbɛ na mɩ yi na a mɔtɔ̃w purfʋ jie nɩ a mɔtɔ̃w mʋrfʋ jie nɩ a tẽw lõbobo a jaa ɩ̃ wa jɛ dɩrɛ a dɩb a be a Naaŋmɩn tẽw. 30Nyɩ́ cɛlɛ: a par-pɔɔrbɔ ŋmɛɛ na lɩɛbʼã ɩ a ni-dierbe ɩ̃ a ni-dierbe ŋmɛɛ lɩɛb ɩ a par-pɔɔrbɔ.”
A JEEJU NƖ A JERUJALƐM
(Mat 23.37-39)
31A ala na yi tɔ, a *Farɩsɩ nɩbɛ ŋmɛɛ wa na yel a *Jeeju:
“Ir yi cen ji-kpee, a-na-ɩ a jamana *Ɛrɔdɩ bʋɔrɔ na ʋ kú fʋ.”
32A Jeeju yel ba:
“Nyɩ́ cen na yel a ʋna sɩ̃sɔl naan, áa dɩnaa nɩ a bio, á ɩ̃ na diw na a kɔ̃tɔn-bebe bar, ɩ̃ kpaar a nɩbɛ wʋlɩ̃sɩ, ɩ̃ a bibie ata dayen á ɩ̃ tʋn na baarʼã. 33Ɩ̃-cɛ a dɩnaa nɩ a bio nɩ a dayere, a sɛw na ɩ̃ cere nɩ a ɩ̃ sɔr, a-na-ɩ aa sɛw a Naaŋmɩn ƴɛr-hiere na kpi ji-kpee, ɩ̃ ma ɩ a Jerujalɛm-tẽw pʋɔ ʋ wa.
34“A nyɩmɩ Jerujalɛm tẽ-deme na ma kú a Naaŋmɩn ƴɛr-hierbe ɩ̃ ma lɔb a bala ʋ na tʋ̃ a nyɩ sɔ̃w nɩ a kubie, gbɛɛ amɩnɛ ɩ̃ dãa bʋɔrɔ ɩ̃ kpaarɩ̃ nyɩ ƴɔ̃w a ɩ̃ pulẽe, a mɩnɛ a nʋ̃ɔ na ma kpaarɩ̃ a ʋ bil ƴɔ̃w a ʋ pɩrɛ pʋɔ, ɩ̃ a nyaa sɔw wa. 35Nyɩ́ cɛlɛ! A nyɩ yir na lɩɛbʼã ɩ da-kpolo. Ɩ̃ yele nyɩ na, nyɩ kɔ̃ lɛ su ma mimir wa tara nɩ a daar ʋlɔ nyɩ na yele áa nʋmɔ a ʋlɔ na waara nɩ a Nɩ-kpɛ̃ɛ yuor wa!”
Currently Selected:
Luki Sɛbɛ 13: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
