Luki Sɛbɛ 16
16
A YEL-ꞌWUORO SƲKPA
1A *Jeeju lɛ yelʼã a ʋ *par-tuurbe go:
“Dab-naaba kãw dãa na tɛrɛ *yel-ꞌwuoro, ɩ̃ a ba wa man kʋ ʋ a mɩnɛ a ʋ yel-ꞌwuoro ʋlɔ na sãwna ʋ a yele, 2a ʋ nɩ-kpɛ̃ɛ bʋɔl ʋ ʋ wa ʋ soor ʋ: ‘Bõ ƴɛrɩ̃sɩ nɩ a ala ɩ̃ na wono a fʋ ɩnɛ? Sɔr a yele miilʼɩ̃ ma a mɩnɛ fʋ na tʋ̃ a fʋ tʋn, a-na-ɩ faa lɛ tʋɔrɔ ɩrɛ a ɩ̃ yel-ꞌwuoro go wa.’ 3A yel-ꞌwuoro lɩɛb yel a ʋ mɩ̃ɛ: ‘Mɩnɛ ɩ̃ na ɩ? A-na-ɩ a ɩ̃ nɩ-kpɛ̃ɛ na de na a ʋ yele ɩ̃ cɛ ma. Ɩ̃ kʋɔrɔ mɩɩ? Maa mɩlɩ̃ nɩ a kɔb wa. Ɩ̃ sʋɔrɔ dɩrɛ mɩɩ? Vĩ na nyɔw ma na. 4Ɩ̃ pãa na bɔ̃w a ala ɩ̃ na maala a nɩbɛ na sɔw de ma a ba yir, a lɛ a ɩ̃ nɩ-kpɛ̃ɛ nɔɔ bara ma a tʋn pʋɔ.’ 5Ɩ̃ ʋ bʋɔlʼã a bala ba jaa na dãa pɛ̃pɛ̃ a ʋ nɩ-kpɛ̃ɛ yele, a ba wa bõ-ƴene-ƴene. Ʋ soor a dãdãw sʋbɔ: ‘Amɩnɛ fʋ tɛrɛ a ɩ̃ nɩ-kpɛ̃ɛ a san?’ 6Ʋ yel ʋ: ‘A kãa na sɛw a tasa-bɛrɛ kʋbaa ʋ,’ a yel-ꞌwuoro yel ʋ: ‘De a fʋ sɛbɛ, jɛ fɔfɔw ɩ̃ sɛb lɩjaayi nɩ pie ƴɔ̃w.’ 7Ɩ̃ lɛ soor a kãw: ‘Ɩ̃ a fʋ̃ʋ, amɩnɛ san fʋ tɛrɛ?’ Ʋ̃ yel ʋ: ‘Ci bɔtɔr kɔɔr anuu ʋ.’ A yel-ꞌwuoro yel ʋ: ‘De a fʋ sɛbɛ. Sɛb kɔɔr anaan ƴɔ̃w.’ 8A yel-ꞌwuor-gõgolaa ʋlɔ nɩ-kpɛ̃ɛ pɛw ʋ na a lɛ ʋ na tɩɛr a nɩdaar a ʋ yele maalfʋ pʋɔ, a-na-ɩ a tẽw na nɩbɛ ma tɛrɛ na yɛ̃ a ba tɔ deme jie gãw a cãa pʋɔ nɩbɛ.
9“Ɩ̃ a maa ɩ̃ yele nyɩ na, nyɩ́ de a tẽw na na-yele na ɩ a gõgolĩfʋ bom, na nyɩ ŋma nɩ ba, a mɩnɛ a daar ʋlɔ a na mɔɔ lɛ tʋɔrɔ sũono nyɩ wa, a ba na de nyɩ kpɛ nɩ a daadaa kpɛfʋ jiir pʋɔ. 10A ʋlɔ na ɩ yel-mɩ̃ɛ sʋbɔ a yel-bil pʋɔ, ʋ na mɩ ɩ na yel-mɩ̃ɛ sʋbɔ a yel-bɛrɛ pʋɔ. A ʋlɔ na gõgolo a yel-bil pʋɔ, ʋ na mɩ gõgolo na a yel-bɛrɛ pʋɔ. 11A ala ɩ nyaa dãa ɩ yel-mɩ̃ɛ deme a tẽw na na-yele pʋɔ wa, ala na ƴɔ̃w nyɩ a nyɩ ꞌwuoro a yel-sono? 12Ɩ̃ a ala ɩ nyaa dãa ɩ yel-mɩ̃ɛ deme a nɩrɛ bom pʋɔ wa, ala na kʋ nyɩ a ala na ɩ a nyɩ ben?
13“Tʋ̃tʋnɔ ma be be na tʋɔrɔ tʋnɔ nɩ-bɛrɛ ayi tʋn wa. Ʋ na ꞌlaarʼã a kãw ɩ̃ nʋ a ƴen sʋbɔ, mɩɩ ʋ na marʼã a kãw ɩ̃ kpɛrɛ a ƴen sʋbɔ. Nyaa tʋɔrɔ puoro a Naaŋmɩn ɩ̃ mɩ ɩrɛ a na-yele gbãgbaar wa.”
A FARƖSƖ NƖBƐ A JEEJU NA ƳƐRƐ NƖ
(Mat 11.12-13, 5.31-32, Mar 10.11-12)
14A *Farɩsɩ nɩbɛ, na dãa nʋ a libie, cɛlɛ na a ƴɛrɩ̃sɩ ala a jaa, ɩ̃ na ba laara a *Jeeju. 15A Jeeju yel ba:
“A nyɩmɩ, a nɩbɛ nii-sɔw nyɩ ma maalʼã wɔ̃ taa nɩ nyɩ torʼã, ɩ̃-cɛ a Naaŋmɩn bɔ̃w na a nyɩ sube. A-na-ɩ a ala a nɩbɛ na ꞌwuoro a ɩ bõ-kpɛ̃ɛ, a ɩ na bõ-kpana a Naaŋmɩn nii-sɔw.
16“Wa ta nɩ a Jã-Batii daar, a dãa na ɩ a Naaŋmɩn ƴɛr-kpɛn nɩ a ʋ ƴɛr-hierbe daar. Wa nyɔw nɩ a daar ʋlɔ, ala ba hiere a Naaŋmɩn fãw ƴɛr-son a nɩbɛ ba jaa ƴɔ̃w kpɛ̃w bʋɔrɔ ba kpɛ a Naaŋmɩn fãw ʋlɔ pʋɔ. 17Ɩ̃-cɛ a saꞌlon nɩ a tene tɔlfʋ nyɩrɩ̃ na yɔw gãw a *Naaŋmɩn ƴɛr-kpɛn bõ-bile fɩ̃ɩ sãwfʋ.
18“A daba lɛ na diw a ʋ pɔw bar ɩ̃ lɛ kul pɔw kpee, ʋ maalʼã a fãa, ɩ̃ a ʋlɔ na kule a pɔw ʋlɔ a ʋ sɩrɛ na diw bar, ʋ mɩ maalʼã a fãa.
A DAB-NAABA NƖ A LAJAAR ƳƐRƖ̃
19“Dab-naaba dãa na be be na ma dãa suure cẽcẽ-vɛlɛ na kpɛmɛ a dafʋ, ɩ̃ mɩ dɩrɛ a dɛ̃w a bibie a jaa. 20Ɩ̃ nãw sʋbɔ mɩ dãa na be be na dɩ Lajaar, a natɩɛ na pɔw a ʋ ɩ̃gan ʋ jaa ʋ ma gana nɩ a naaba yir dɔ̃dɔr nʋɔr. 21Ʋ ma dãa na bʋɔrɔ ʋ tʋɔ dɩ a dɩb-pʋrɔ ala na loro a naaba dɩb dɩfʋ jie, ɩ̃ aa ɩ a ala tɛw ʋ wa, a baar tɔr jaa ma lɛ wɩ na dɛlɛ a ʋ natɩɛ. 22A nãw sʋbɔ ʋlɔ wa kpi na, a sɩ-tʋnɩsɩ de ʋ cenʼɩ̃ ʋ lãa jɛ nɩ a Abʋraham a Naaŋmɩn ji-vɩlaa, ɩ̃ a naaba wa mɩ kpi na, a ba ũu. 23A be a kpɩɩn tẽw, a mɩnɛ ʋ na be a hʋʋr nyɛfʋ pʋɔ ʋ gbã na nyɛ a Abʋraham a nɩdaa ʋ lãa jɛ nɩ a Lajaar. 24A be ʋ wuur yel: ‘l sãa Abʋraham wee, bɔ̃w ma nãw bɩlɛ. Tʋ a Lajaar ʋ cen na ɓɛ kʋ̃ɔ nɩ a ʋ nubir wa ɓãa nɩ ma a dɛlɩ̃bir, a-na-ɩ a wono ma na yayaw a ka a vũu na pʋɔ.’ 25Ɩ̃-cɛ a Abʋraham yel ʋ na: ‘Ɩ̃ bie, tɩɛr bɔ̃w nɩ a mɩnɛ fʋ na dãa pɔw a fʋ nason a lɛ fʋ na dãa cãa be a tẽw juu, ɩ̃ a Lasaar mɩ dãa pɔw a nabebe ɩ̃ a ƴɛ̃ƴɛrɩ̃ na ʋ be na a ka na ʋ bar tɩɛrʋ̃, ɩ̃-cɛ a fʋ be a won pʋɔ. 26Aa ɩ a lɛ tɛw ʋ wa, ɩ̃-cɛ bɔw kpɛ̃ɛ mɩ be na be ba na ƴɔ̃w ʋ var a sɩmɩ nɩ a nyɩmɩ, a mɩnɛ a ʋlɔ na bʋɔrɔ ʋ yi a ka ɩ̃ wɩ a nyɩ sɛ̃ ꞌwaa tʋɔrɔ wa, ɩ̃ a nɩrɛ kɔ̃ mɩ tʋɔ yi a nyɩ sɛ̃ ɩ̃ gãw a sɩ jie wa.’ 27A be jie, a naaba yel: ‘Ɩ̃ sãa, a ala ɩ a lɛ ʋ, ɩ̃ sʋɔrɔ fʋ na: tʋ a Lajaar a ɩ̃ sãa yir 28a-na-ɩ ɩ̃ tɛrɛ na yɛɛr anuu a be, ʋ cen na kpãkpan ba a mɩnɛ ba kɔ̃ wa mɩ wa a hʋʋr nyɛfʋ jie na wa.’ 29A Abʋraham yel ʋ: ‘A fʋ yɛɛr tɛrɛ na a Mowisi nɩ a Naaŋmɩn ƴɛr-hierbe. Bá cɛlɛ a ala ba na sɛb!’ 30A naaba yel: ‘Ɩ̃ sãa Abʋraham, aa ɩrɛɛ wa, ɩ̃-cɛ a ala ɩ nɩrɛ yi na a kũu pʋɔ cen a ba jie, ba na lɩɛbʼã a ba yɛ̃.’ 31Ɩ̃-cɛ a Abʋraham yel ʋ na: ‘A ala ɩ baa cɛlɛ a Mowisi nɩ a Naaŋmɩn ƴɛr-hierbe ƴɛrɩ̃ wa, ɩ̃ a nɩrɛ saarɩ̃ yi a kũu pʋɔ a kɔ̃ maal ba a ba lɩɛb a ba yɛ̃ wa.’ ”
Currently Selected:
Luki Sɛbɛ 16: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
