Luki Sɛbɛ 21

A LIBIE A KPƖ̃Ɩ-PƆW NA DE KƲ A NAAŊMƖN

(Mar 12.41-44)

1A *Jeeju dʋɔ na ꞌwuor nyɛ a mɩnɛ a tɛraa deme na ƴɔnɔ a ba libie, a be a Naaŋmɩn libie ƴɔ̃wfʋ jie. 2Ʋ mɩ nyɛ na kpɩ̃ɩ-pɔw nã-dɩrɛ ʋ ƴɔnɔ libi-kure ayi na wɔ̃ taa nɩ tama ayi, 3ɩ̃ yel:

“Yel-mɩ̃ɛ ɩ̃ yele nyɩ, a kpɩ̃ɩ-pɔw na na nyɛrɛ a nãw, ƴɔ̃w na gãw a nɩbɛ ba jaa. 4A-na-ɩ a ba jaa, ba ƴɔ̃w na a ala ba na dɩ ɩ̃ cɛ, ɩ̃-cɛ a pɔw na nɩ a ʋ nãw ʋ jaa, ʋ ƴɔ̃w na a ala a jaa ʋ na dãa bin gu nɩ a ʋ mɩ̃ɛ.”

A NAAŊMƖN PUOR-YIR KPƐ̃Ɛ WƐLFƲ ƳƐRƖ̃

(Mat 24.1-2, Mar 13.1-2)

5A nɩbɛ ŋmɛɛ ƴɛrɛ na a Naaŋmɩn puor-yir kpɛ̃ɛ ƴɛrɩ̃, kpiire nɩ a mɩnɛ ba na mɛ nɩ ʋ a kubi-vɛlɛ, ɩ̃ yaarɩ̃ nɩ ʋ a yel-ɓɔmɔ ba na kʋ a Naaŋmɩn. A *Jeeju yel ba:

6“A ala nyɩ na nyɛ, a daar na ta na a kʋsɩr kãw kɔ̃ tʋɔ cɛ dɔɔl ɩraa a ʋ tɔ sʋbɔ juu wa. Ba na wɛlaa na a jaa kpar a tene.” 7A be jie, ba soor ʋ na:

“Jãjaana, dabor a yele ala na ta? Bõ-buor ɩ̃ miile a daar ʋlɔ a ana yele na tara?”

A WON ALA NA DIERE NĨE TARA

(Mat 24.3-14, Mar 13.3-13)

8A *Jeeju yel ba na:

“Nyɩ́ gu nyɩ mɩ̃ɛ kɔ̃ bar nɩrɛ ʋ wa bɛlɩ̃ nyɩ wa, a-na-ɩ a nɩ-yaw na de na a ɩ̃ yuor wa nɩ yele á bala ɩ̃ ɩ a *Kirisi. Ɩ̃ ba na mɩ yelʼã áa daar tara na. Nyɩ taa tuure ba wa. 9A nyɩmɩ wa wõ a jɛb ƴɛrɩ̃sɩ nɩ a faa-taa, nyɩ taa wa ɩ a dãbɩ̃ɛ nyɔwrɔ nyɩ wa, a-na-ɩ a sɛw na a ala na de nĩe ta baar, ɩ̃-cɛ a kɔ̃ gɔr ɩ a tẽw baarfʋ wa.”

10Ʋ lɛ yelʼã:

“Tẽw na nɩbɛ na irʼã jɛbɛ nɩ tẽ-kpee nɩbɛ, ɩ̃ a jamana kãw na irʼã jɛbɛ nɩ a jaman-kpee. 11A tẽw na dama na nɩ kpɛ̃w, ɩ̃ a wʋlɩ̃-yʋɔrsɩ nɩ a kɔ̃-bɛrɛ na lo na a tẽ-bʋrɔ bʋrɔ pʋɔ. Hierũu na mɩ be na a saꞌlon ƴɔnɔ a nɩbɛ a dãbɩ̃ɛ pʋɔ. 12Ɩ̃-cɛ a yele ala a jaa kɔ̃ ta sɛr wa, ɩ̃ ba na nyɔɔr nyɩ na hʋɔlɔ nyɩ. Ba na nyɔɔr nyɩ na cenʼɩ̃ a ba *puorfʋ yie pʋɔ, nɩ a kasu yie pʋɔ. Ba na taw nyɩ na cenʼɩ̃ a jamansɩ nɩ a fãgã deme nii-sɔw a maa ɩnɛ. 13Be nyɩ na nyɛ a sɔr ƴɛr a nyɩ yel-mɩ̃ɛ kʋ ba. 14Nyɩ́ nyɛ a ala na sɛw nyɩ ƴɔ̃w a nyɩ jur pʋɔ: nyɩ taa de nĩe waala a ala ɩnɛ nyɩ nɔɔ yele faara nɩ a nyɩ juu wa, 15a-na-ɩ a maa, ɩ̃ na kʋ nyɩ na a ala nyɩ na ƴɛrɛ, mɩ kʋ nɩ nyɩ a kpaarfʋ ʋlɔ a nyɩ sama-deme na faara a juu, ɩ̃ ma mɩ tʋɔrɔ cɩɩrɛ wa. 16A nyɩ saanba mɩ̃ɛ, nɩ a nyɩ mã nʋmɔ, nɩ a nyɩ yɛɛr, nɩ a nyɩ bal nɩbɛ, nɩ a nyɩ badɛɛ na de nyɩ na a juu a fãgã deme jie. Ba na kú na a ŋmɛɛ a nyɩ sɔ̃w, 17ɩ̃ a nɩbɛ ba jaa na ꞌlaar nyɩ na a maa ɩnɛ. 18Ɩ̃-cɛ a nyɩ jukɔbir bõ-ƴen kɔ̃ be na bɔr wa. 19Nyɩ́ nyɔw cĩcĩ. A lɛ nyɩ na faa a nyɩ baafʋ.

A JERUJALƐM WƐLFƲ ƳƐRƖ̃

(Mat 24.15-21, Mar 13.14-19)

20“A nyɩmɩ wa nyɛ a sɔdaalsɩ a ba kpal a Jerujalɛm, nyɩ́ bɔ̃wnaa, a ʋ wɛlfʋ pɩɛlʼã yɛ̃yɛ̃. 21A lɛ, a bala nɔɔ beree a Jude, bá jɔrɔ duoro a tan jur. A bala nɔɔ beree a Jerujalɛm tẽ-pʋ̃ɔ bá jɔrɔ yire, ɩ̃ a bala nɔɔ beree a cɛ̃cɛ̃w ba taa kpɛɛrɛ a tẽw pʋɔ wa. 22A bibie ala na ɩ na a daar ʋlɔ a Naaŋmɩn na kpãana a *Ɩsɩrayɛl nɩbɛ, maala nɩ a ala a jaa na sɛb a ʋ Sɛbɛ pʋɔ. 23Won na nyɩrɩ̃ na ta a pɔɔ-pʋʋr deme nɩ a bala na tɛrɛ a bi-pɩɩlsɩ a bibie ala cara pʋɔ. A-na-ɩ won kpɛ̃ɛ na ta na a tẽw ʋlɔ, ɩ̃ a Naaŋmɩn su-tuo na lo na a ʋ nɩbɛ juu. 24Sɔ-bãjɩnɛ ba na kú nɩ ba. Ba na nyɔɔr ba na cenʼɩ̃ a ba ɩ gbãgbaar a tẽ-bʋrɔ bʋrɔ a jaa pʋɔ, ɩ̃ a nɩ-bʋlsɩ ɩ̃ na sãsarɩ̃ a Jerujalɛm-tẽw, wa ta nɩ a mɩnɛ a ba fãgã daar nɔɔ baara.

A NƖBƐ BIE WAA

(Mat 24.29-31, Mar 13.24-27)

25“Jɩbsɩ na nyɩrʼã a mɔtɔ̃w pʋɔ, nɩ a cuu pʋɔ, nɩ a ŋmarbie pʋɔ. Tuo na be na a tẽ-bʋrɔ bʋrɔ nɩbɛ ba jaa jie a ka a tẽw juu, a ba ɓine a man kʋ̃ɔ ɩnɛ na hele, ɩ̃ kara duoro ɩ̃ suure. 26A dãbɩ̃ɛ na maalʼã a nɩbɛ a ba pɛl a mɩnɛ ba na jɛ cɛlɛ a bier ala nɔɔ tara a tẽw pʋɔ, a-na-ɩ a fãgãsɩ ala na be a saꞌlon na damʼã nyãkarɩ̃ taa. 27A lɛdaar, ba na nyɛ na a *Nɩbɛ Bie ʋ be a dɔ̃dɔrɩ̃ma pʋɔ nyɩnyɩlɛ waara nɩ a fãgã kpɛ̃w. 28A yele ala ɩ̃ wa tara, nyɩ́ ir ɩraa ɩ̃ jɛw a jur, a-na-ɩ a nyɩ faafʋ daar pɩɛlʼã.”

A FƖGƖ TƖƐ SƲKPA

(Mat 24.32-35, Mar 13.28-31)

29A ala na yi tɔ, a *Jeeju lɔbʼã a sʋkpa na kʋ ba:

“Nyɩ́ nyɛ a fɩgɩ tɩɛ nɩ a tɩɩr a jaa. 30A nyɩmɩ wa ꞌwuor nyɛ a ba tɔbɔ, nyɩ ma bɔ̃w ka a susuur daar tara na. 31A lɛ ʋ mɩ, a nyɩmɩ wa nyɛ a ana yele a tara, nyɩ́ bɔ̃w ka a Naaŋmɩn fãw mɩ tara na. 32Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ na nɩbɛ kɔ̃ baar ba jaa wa, wa ta nɩ a ana yele a jaa nɔɔ tara. 33A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma be tɔlfʋ jie fɩ̃ɩ wa.

NYƖ JƲƲRƆ!

34“Nyɩ́ tɛrɛ nyɩ mɩ̃ɛ. Nyɩ taa bar a folfʋ, nɩ a dãa kʋfʋ, nɩ a tẽw na baafʋ dɛn, a ɩ tuor a nyɩ tɩɛrɩ̃sɩ pʋɔ wa. A ala ma ɩ lɛ ʋ wa, a *Kirisi waa bibir nɔɔ puurĩ nyɩ na, 35a mɩnɛ a jʋɔ na ma lo pɔw a jɩmɛ, a-na-ɩ a na lo na pɔw a nɩbɛ ba jaa na be a ka a tẽw juu. 36Nyɩ taa gure wa. Nyɩ́ ɛ̃ɛ sʋɔrɔ a Naaŋmɩn a daar a jaa, a mɩnɛ a nyɩ na tʋɔ cɩ̃ɛ a ala a jaa ɩnɛ na sɛw a ta, ɩ̃ na nyɩ tʋɔ ɩraa a *Nɩbɛ Bie nii-sɔw.”

37A *Jeeju ma jaana na a nɩbɛ a mɔtɔ̃w a Naaŋmɩn puor-yir kpɛ̃ɛ pʋɔ, ɩ̃-cɛ a tɩsɔw wa ta, ʋ ma cenʼã na gã a tãw ʋlɔ juu ba na bʋɔlɔ a *Olivi-tɩɩr tãw. 38Ɩ̃ a nɩbɛ ba jaa ma ca na ir wa a Naaŋmɩn puor-yir kpɛ̃ɛ pʋɔ a dʋ̃ꞌwʋlɩ̃ ɓaaraa a ʋ ƴɛrɩ̃ cɛlfʋ ɩnɛ.

Currently Selected:

Luki Sɛbɛ 21: BNT93

Highlight

Copy