Markɩ Sɛbɛ 1

A JÃ-BATII ƳƐR-SON HIERFƲ

(Mat 3.1-12, Lu 3.1-18, Jã 1.19-28)

1Ka a ƴɛr-son na mana a Naaŋmɩn Bie *Jeeju-Kirisi ƴɛrɩ̃ nyɔw. 2A mɩnɛ a Naaŋmɩn na yel a ʋ ƴɛr-hiere Ejayi ʋ sɛb ƴɔ̃w a ʋ sɛbɛ pʋɔ:

“Nyɛ, ɩ̃ na tʋ̃ na nɩrɛ ʋ de fʋ nĩe pɛl a fʋ sɔr.

3Ʋ ɩ na a nɩrɛ na wuure a wɛkar pʋɔ, yele:

Nyɩ́ gbɛɛrɩ̃ a Nɩ-kpɛ̃ɛ sɔr,

nyɩ́ cɔɔrɩ̃ a ʋ sɔr-bil a tor.”

4Lɛ a Jã dãa yi a wɛkar pʋɔ na ʋ mʋrɔ a nɩbɛ a kʋ̃ɔ, ɩ̃ na ʋ kpãkpana ba yele:

“Nyɩ́ lɩɛb a nyɩ yɛ̃, ɩ̃ ɩ a ba mʋr nyɩ a kʋ̃ɔ, a mɩnɛ a Naaŋmɩn na de a nyɩ faar a jaa bar kʋ nyɩ.”

5A Jude loor tẽ-deme nɩ a Jerujalɛm-tẽw nɩbɛ ba jaa cenʼã a Jã jie na ba caala a ba maal-faar ɩ̃ a Jã mʋrɔ ba a kʋ̃ɔ a Jʋrdɛ̃ manɩ̃.

6A Jã dãa na su a kparʋ ba na maalʼɩ̃ a nyʋɔmɩ kɔbɔ, ɩ̃ na ʋ sɛ a sɩɛ gan. A ʋ bõ-dɩraa a be a wɛkar pʋɔ dãa na ɩ a sãsobo nɩ a sɩɩr. 7Ʋ hiere na yele a nɩbɛ:

“Nɩrɛ be na a ɩ̃ puo-sɔw waara, na tɛrɛ fãw gãw ma. Maa sɛw na gũu sɩɩr a ʋ nafaba wa. 8A maa, kʋ̃ɔ pʋɔ ɩ̃ mʋr nyɩ, ɩ̃-cɛ a ʋlɔ, Naaŋmɩn Sɩɛ pʋɔ ʋ nɔɔ mʋr nyɩ.”

A JEEJU KƲ̃Ɔ MƲRFƲ NƖ A Ʋ BƖƖRFƲ

(Mat 3.13—4.11, Lu 3.21-22, 4.1-13)

9A daar ʋlɔ pʋɔ, a *Jeeju yi na a Najarɛtɩ-tẽw a Galile loor ɩ̃ wa a Jʋrdɛ̃ manɩ̃, a Jã mʋr ʋ a kʋ̃ɔ. 10A lɛ ʋ na yire a kʋ̃ɔmɩ, ʋ nyɛ na a saꞌlon ʋ bar ayi ɩ̃ a Naaŋmɩn Sɩɛ suure a ʋ juu, ŋmam kaarɩ̃, 11ɩ̃ a kɔkɩr kãw bʋrɔ be a saꞌlon:

“Fʋ̃ʋ ɩ a ɩ̃ Bi-nʋnaa, na kpɛ a ɩ̃ suur pʋɔ.”

12A be a jie naan a Naaŋmɩn Sɩɛ taw na a Jeeju cenʼɩ̃ a wɛkar pʋɔ, 13ʋ maal be bibie lɩjaayi, a Satã bɩɩrɛ ʋ. A Jeeju dãa na be a wɛ-dʋn sɔ̃w ɩ̃ a Naaŋmɩn sɩ-tʋnɩsɩ hana ʋ a be.

A JƖ̃-BƐRBƐ ANAAN NA TUURE A JEEJU

(Mat 4.12-22, Lu 4.14-15, 5.1-11)

14A mɩnɛ ba na nyɔw a Jã ƴɔ̃w a kasu pʋɔ baar, a *Jeeju cenʼã a Galile-wɩɛr pʋɔ, hiere a Naaŋmɩn ƴɛr-son kʋrɔ a nɩbɛ 15yele:

“A daar ta na ɩ̃ a Naaŋmɩn fãw mɩ pɩɛl. Nyɩ́ lɩɛb a nyɩ yɛ̃, ɩ̃ sɔw de a ƴɛr-son.”

16A mɩnɛ ʋ na lara a Galile man gbẽgbere nʋɔr, ʋ nyɛ na a Sɩmɔ̃ nɩ a ʋ yɛbɛ Ãdire, a ba lɔbɔ a jʋɔ a man pʋɔ, a-na-ɩ jɩm-bɛrbɛ ba dãa ɩ. 17A Jeeju yel ba:

“Nyɩ́ tuure ma. Ɩ̃ na lɩɛb nyɩ na a nyɩ bʋɔrɔ a nɩbɛ a jɩm-nyɔɔrbɔ kaarɩ̃.” 18A jie naan ba barʼã a ba jʋʋr ɩ̃ tuure ʋ.

19A mɩnɛ ba na cen jãa fɩ̃ɩ, a Jeeju nyɛ na a Jakɩ nɩ a ʋ yɛbɛ Jã, na ɩ a Jebede bi-dabsɩ, a ba mɩ be a ba gbor pʋɔ cɔɔrɔ a ba jʋʋr. 20A jie naan ʋ bʋɔl ba na, a ba ir bar a ba sãa Jebede nɩ a tʋ̃tʋ̃-biir a be a gbor pʋɔ ɩ̃ tu a Jeeju.

A KƆ̃TƆN-IRE NA BE A PUORFƲ YIR PƲƆ

(Lu 4.31-37)

21A *Jeeju nɩ a ʋ *par-tuurbe cenʼã a Kapɛɛnam-tẽw. A be a Jeeju kpɛ na a ba *puorfʋ yir a *bibi-ciiraa dayen, ɩ̃ jaana a nɩbɛ. 22Nɔɛ dãa na ko ba a ʋ jaanfʋ ɩnɛ, a-na-ɩ ʋ tɛrɛ na tʋɔfʋ a ʋ jaanfʋ pʋɔ. ꞌWaa jaana ba wɔ̃ taa nɩ a ba *ƴɛr-kpɛn-bɔɔnbɔ wa.

23A daar ʋlɔ pʋɔ a mɩnɛ a Jeeju na be a be a puorfʋ yir, daba kãw a kɔ̃tɔn bier na ire kpɛ na be na ʋ wuur, 24yel:

“Najarɛtɩ Jeeju, bõ ɩnɛ fʋ wa a ka? Má a sɩ sãwfʋ ɩnɛ fʋ wa! Ɩ̃ bɔ̃w na a ʋlɔ fʋ na ɩ. Fʋ ɩ na a Naaŋmɩn nɩ-cɛcɛ.” 25a Jeeju ful ƴɔ̃w ʋ ɩ̃ yel ʋ:

“Pɔw a nʋɔr! Yi cen ɩ̃ cɛ a daba na!” 26A kɔ̃tɔn bier damʼã a daba nɩ fãgã kpar, ɩ̃ wuurʼɩ̃ kɔkɩr kpɛ̃w, ɩ̃ yi ɩ̃ cɛ ʋ. 27A nɔɛ ko na a nɩbɛ ba jaa, a ba sooro taa, yele:

“Bõ nɩ a naa? Jaan-paalaa ʋ jaana nɩ tʋɔfʋ, ɩ̃ a ʋlɔ wa mɩ yel a kɔ̃tɔn-bebe a bom, ba ma sɔw na jɔrɔ a ʋ ƴɛrɩ̃sɩ.”

28Wa nyɔw nɩ a bibir ʋlɔ, a Jeeju yuor yi na pɔw a Galile wɩɛr ʋ jaa.

A WƲLƖ̃-BƲRƆ BƲRƆ DEME A JEEJU NA KPAAR

(Mat 8.14-17, Lu 4.38-41)

29A mɩnɛ ba na yi a ʋna *puorfʋ yir baar, ba lãa na cenʼɩ̃ a Jakɩ nɩ a Jã na ta a Sɩmɔ̃ nɩ a Ãdire yir. 30A be a Sɩmɔ̃ dɩ̃ɛ-mã ɩ̃gan dãa na kpor, ʋ gã. A jie naan, ba manʼã kʋ a *Jeeju, 31ʋ taw ta, na ʋ nyɔw ʋ a nuu ɩ̃ ɩ ʋ ir, a ɩ̃gan lɛ ɓãa ʋ a jie naan, ʋ ir ir ba a saan.

32A jaanʋɔr daar, a mɩnɛ a mɔtɔ̃w na mʋr baar, a nɩbɛ wɩ nɩ na a baalsɩ ba jaa nɩ a kɔ̃tɔn deme a ʋ jie, 33ɩ̃ a ʋna tẽw nɩbɛ ba jaa jilĩ na pɔw a dɔ̃dɔr nʋɔr, 34ʋ kpaar a wʋlɩ̃sɩ deme yayaw na dãa tɛrɛ a wʋlɩ̃-bʋrɔ bʋrɔ, ɩ̃ mɩ diw a kɔ̃tɔn-yaw bar. Ʋ̃ maa kʋ a kɔ̃tɔnsɩ sɔr a ba ƴɛr ƴɛrɩ̃ wa, a-na-ɩ ba bɔ̃w ʋ na.

A JEEJU YƆFƲ A GALILEWƖƐR PƲƆ

(Lu 4.42-44)

35A dʋ̃ꞌwʋlɩ̃ ɓaaraa, a mɩnɛ a wɩɛr na cãa sɔb a gbib, a *Jeeju irʼã yi, na ʋ cen a wɛkar pʋɔ sʋɔrɔ a Naaŋmɩn. 36A Sɩmɔ̃ nɩ a bala ʋ na lãa be nɩ, nyɔw na ɩ̃ bʋɔrɔ ʋ yʋɔrɔ nɩ. 37Ɩ̃ a mɩnɛ ba na wa nyɛ ʋ, ba yel ʋ na:

“A nɩbɛ ba jaa bʋɔrɔ fʋ na.” 38A Jeeju yel ba:

“Sɩ́ cen ji-kpee, a tẽ-cɛɛlsɩ pʋʋr, ɩ̃ mɩ ƴɛr a Naaŋmɩn ƴɛrɩ̃ a be, a-na-ɩ a ala ɩnɛ ɩ̃ wa.” 39Ɩ̃ ʋ yɔ na a Galile wɩɛr ʋ jaa, na ʋ ƴɛr a Naaŋmɩn ƴɛrɩ̃ a *puorfʋ yie pʋʋr, ɩ̃ diw a kɔ̃tɔnsɩ bar.

A KƆ̃W PƆLƖ̃FƲ

(Mat 8.1-4, Lu 5.12-16)

40A kɔ̃w wa na a *Jeeju jie na lo gburĩ a dume a ʋ nii-sɔw, ɩ̃ sʋɔrɔ ʋ a ʋ sũo ʋ, yele nɩ:

“A fʋ̃ʋ sɔw, fʋ na tʋɔ na pɔlɩ̃ ma.” 41A nãw nyɔw na a Jeeju a ʋ ɩnɛ, ʋ tur a nuu sɩɩrʼɩ̃ ʋ, ɩ̃ yel:

“Ɩ̃ sɔw na, pɔlɩ̃!” 42A jie naan a kɔ̃w ɩ̃gan lɩɛbʼã pɔlɩ̃. 43-44A be, a Jeeju kpãa ʋ na kpãkpanʼɩ̃ ɩ̃ yel ʋ:

“Kule ɩ̃ taa wa ƴɛrɛ bom kʋrɔ nɩrɛ wa. Ɩ̃-cɛ, cen na miilʼɩ̃ a fʋ mɩ̃ɛ a Naaŋmɩn baar-loro, ɩ̃ tɩɩr a yele ala a Mowisi na dãa ƴɔ̃w, a nɩbɛ na bɔ̃w ka fʋ sɩrɩ̃ na pɔlɩ̃.” 45Ɩ̃-cɛ ʋ yi na cen na nyɔw a ƴɛrɩ̃ ɩ̃ ƴɛrɛ yʋɔrɔ nɩ kʋrɔ a nɩbɛ. Ala ɩ̃ saa a Jeeju ma lɛ dãa tʋɔrɔ kpɛɛrɛ a tẽw pʋɔ, a nɩrɛ lɛ bɔ̃wnɔ nɩ ʋ wa, ɩ̃-cɛ a mɔɔ pʋɔ ʋ dãa be, ɩ̃ a nɩbɛ ma yi a lõbobo a jaa ɩ̃ waara a ʋ sɛ̃.

Currently Selected:

Markɩ Sɛbɛ 1: BNT93

Highlight

Copy