Eziptɩ tẽw yib 15
15
A Moyiir nɩ a Ɩsɩrayɛl nɩbɛ cɛ n danʋ yielu
1Lɛ n'a a Moyiir nɩ a Ɩsɩrayɛl nɩbɛ tɩ yieli a danʋ yielu ŋa a Sore ƴãw#15:1 Nyɛ̃ Yel-w 15.3.:
Ɩ̃ na yiele nɩ a Sore ƴãw. Ʋ dɩ n dɛblʋ!
A wie nɩ a wi-zɔmnbɛ za a,
ʋ lɔb bɛ na ƴãw a kʋ̃ɔ-kpɛ̃ɛ pʋɔ.
2A Sore so a ɩ̃ fãw nɩ a ɩ̃ yielu,
ʋl ƴãw n'a ɩ̃ nyɛ̃ a faafʋ#15:2 Nyɛ̃ Ɩza 12.2, Ssy 118.14.
Ʋlɛ n'ɩ a ɩ̃ Naaŋmɩn, ɩ̃ na danɛ ʋ a na.
Ʋlɛ n'ɩ a ɩ̃ sãà Naaŋmɩn, ɩ̃ na zɛwr ʋ na.
3A Sore ɩ n zɛ-zɛbrɛ, a ʋ yúor'ɩ a Sore!
4A Faarawɔ̃ zɛbr-torkori nɩ a ʋ zɛbr-nɩbɛ,
a ʋ soja-zɛb-bãw-karɩ,
ʋ lɔb bɛ na ƴãw a kʋ̃ɔ-kpɛ̃ɛ pʋɔ.
A Bàa-kɛkɛɛ kʋ̃ɔ-kpɛ̃ɛ kʋ̃ɔ paal'a pàw bɛ.
5Bɛ tɔl'a siw a kʋ̃ɔ pɛrɩ́ mɛ̃ kʋsɛ-gbile a,
ɛ́ a kʋ̃ɔ-kpɛ̃ɛ kʋ̃ɔnɩ pàw bɛ.
6A fʋ dʋrʋ nũu a bɩɩ, Sore e,
nyɛ̃ kpɛ̃w ʋ na kpɛmɛ a!
A fʋ dʋrʋ nũu a, Sore e,
ʋ tʋ̃ɔ́ nɩ a fʋ dɔ̃ dem pẽlẽpẽlẽ.
7Fʋ ɩ n kpɛ̃ɛ bɛ pɩɛl ɛ!
Fʋ mɩ́ da n a bɛlɩ dem na ìr a fʋ ƴãw a lɔb.
Fʋ mɩ́ nyɛ̃ nɩ suur ɩ mɛ̃ vũu a, dɩ bɛ mɛ̃ mɔ̃-kon a.
8Fʋ pɛbl'a nɩ fãw a kʋ̃ɔnɩ zɔ gbõ taa,
a kʋ̃ɔ-mie ìr àr mɛ̃ dacin a,
a kʋ̃ɔnɩ gúr gã a kʋ̃ɔ-kpɛ̃ɛ pɛrɩ́.
9A tɩ dɔ̃ dem tɩ yel'a:
«Tɩ na diw na bɩɛrɩ bɛ, tɩ na pàw bɛ na,
tɩ na põ nɩ a bɛ bome tɩ na fá a,
a tɩ zuo a lɛ tɩ na bɔbr a.
Tɩ na vɔ̃ n a tɩ zɛbr-sɔ-bɛrɛ,
tɩ na lɛb'a nyɔw bɛ.»
10Ɛcɛ fʋ̃ʋ a, Sore e, fʋ pɛbl'ɩ a fʋ pɩɛlʋ,
a kʋ̃ɔ-kpɛ̃ɛ paalɩ pàw bɛ.
Bɛ tɔl'a siw mɛ̃ kure a,
a kʋ̃ɔnɩ na damnɛ nɩ fãw a pʋɔ.
11A ŋmɩmɛ pʋɔ a, ãa n'ʋ ɩ mɛ̃ a fʋ̃ʋ a, Sore e?
Ãa n'ʋ ɩ mɛ̃ a fʋ̃ʋ na nyɩwrɛ nɩ sonu a?
Na bɛ tɛr dɩ̃ɛnʋ, ɛ́ sɛwnɩ danʋ a?
Na maalɛ nɔ-ɓãa-yele a?
12Fʋ zɛw nɩ a fʋ dʋrʋ nũu,
ɛ́ a tẽsɔw vɔl a tɩ dɔ̃ dem.
13Fʋ faa nɩ a fʋ nɩ-bʋʋrɛ!
Fʋ tɛr bɛ na nɩ nɔ̃wfʋ, nɩ fãw,
cere nɩ a fʋ kpɛb zie na ɩ sõw a.
14A nɩ-bʋʋr-yoru wõ n a yel ŋa màwr:
pʋl-vʋ̃ɔ nyɔw nɩ a Filisɩtɛ̃ mɩnɛ,
15dɛ̃bɩ̃ɛ ɩrɛ nɩ a Edɔm na-mɩnɛ,
pʋ̀lá vʋ̃ɔnɛ nɩ a Mowab na-mɩnɛ,
a Kanãa tẽw dem fãw za baar'a.
16Dɛ̃bɩ̃ɛ sɩrɩ na tɛr bɛ, bɛ dɩ vuo ɩ.
A fʋ kpãkpãw-kpɛ̃w ton ɩ na bɛ gbini àr gbili,
ɛ́ gù a fʋ nɩ-bʋʋrɛ tɩ tɔl baarɩ, Sore e,
a fʋ nɩ-bʋʋrɛ fʋ na páw a.
17Ƴɛrɛŋa a, fʋ tɛr bɛ na cere nɩ a fʋ tãw zu,
kɛ́ fʋ tɩ ƴãw bɛ a be, Sore e.
A zie fʋ na cɔbrɩ a fʋ kpɛb ƴãw a n'ʋ,
a zi-sõw fʋ̃ʋ mɩŋa na ƴãw a.
18Sore e, fʋ dɩrɛ nɩ naalʋ kʋralɛ!
19A lɛn daar a Faarawɔ̃ wie, a ʋ zɛbr-torkori nɩ a ʋ wi-zɔmnbɛ na tɩ kpɛ a kʋ̃ɔ-kpɛ̃ɛ pʋɔ a, a Sore tɩ ɩ na a kʋ̃ɔnɩ lɛb wa paalɩ pàw bɛ. Ɛcɛ, a Ɩsɩrayɛl nɩbɛ bɛl tɩ kpɛ na tɔl a kʋ̃ɔ-kpɛ̃ɛ dĩo pʋɔ nɩ gbɛ-kon. 20Lɛ n'a a pɔw-naaŋmɩn-ƴɛ̀r-manɛ Miriyam na ɩ a Aarɔ̃ yeepuule a, tɩ de a ʋ gãgaar. A pɔwbɛ za tɩ ìr'a tu ʋ, ŋmɩɛr a gãgaɩ ƴawr'ɩ. 21A Miriyam tɩ cɛ na ƴãw bɛ à ŋá:
Nyɩ yiele danɛ nɩ a Sore: ʋ dɩ n dɛblʋ,
ʋ lɔb'ɩ a wie nɩ a wi-zɔmnbɛ za
ƴãw a kʋ̃ɔ-kpɛ̃ɛ pʋɔ!
A CENU A ƖSƖRAYƐL NƖBƐ NA CEN A WƐJA-KPALƐ PƲƆ A
15:22—18:27
A Maara kʋ̃ɔ lɩɛb'ɩ kʋ̃ɔ-vla
22A Moyiir tɩ ɩ na a Ɩsɩrayɛl nɩbɛ yi a Bàa-kɛkɛɛ kʋ̃ɔ-kpɛ̃ɛ́, ɛ́ tu Súùr wɛja-kpalɛ lowr. Bɛ tɩ cen nɩ a wɛja-kpalɛ pʋɔ bibie ata, ɛ́ bɛ nyɛ̃ kʋ̃ɔ ɩ. 23Bɛ tɩ ta n Maara, ɛ́ bɛ tʋ̃ɔ́ a be kʋ̃ɔ nyũ ɛ, a na tɩ tome a ƴãw. Alɛ so Maara ŋa na por a, a pɛr lɛ kɛ́ “Tuo”. 24A nɩbɛ tɩ zɛbr'ɩ nɩ a Moyiir yere á ŋá: «Bʋ̃ʋ n'ʋ tɩ na nyũ?» 25A Moyiir tɩ kõ na cɔw a Sore, ʋ wul ʋ dàa kãw. A Moyiir tɩ lɔb'ɩ a dàa nɛ ƴãw a kʋ̃ɔmɩ́, a kʋ̃ɔ lɩɛbɩ, tɛr nyub.
Be n'a a Sore tɩ tɛr wulu a Ɩsɩrayɛl nɩbɛ zie, ɛ́ ƴãw tub kʋ̀ bɛ. Be mɩ̀ n'a ʋ tɩ ɩ bɛ kaa. 26Ʋ tɩ yel bɛ na: «Nyɩmɛ wa sɩrɩ sàwr a mãa Sore nyɩ Naaŋmɩn nʋɔr, maalɛ a lɛ ɩ̃ na mɩ́ nyɛ̃ a tu sɔ́r a, nyɩmɛ wa bɛrɛ wone a ɩ̃ nɛ-ƴãwnɩ, ɛ́ tuur a ɩ̃ wulu za a, a bàalʋ ɩ̃ na ƴãw a Eziptɩ tẽw nɩbɛ a, ɩ̃ bɛ ƴãwnɛ nyɩ a bàalʋ á ŋá been kãw za ɩ. Bʋ̃ʋ n'ʋ vɛ̃, mãa n'ɩ a Sore na sanɛ nyɩ a.»
27Al pùorí, a Ɩsɩrayɛl nɩbɛ tɩ ta n Elim. Bul-nɛ́ɛ pie nɩ ayi nɩ kpãkparmɛ tɩɩr lɩz'a ata nɩ pie tɩ be n a be. Bɛ tɩ maal'ɩ a bɛ pɛnɛ-sɛwr a be, pɩɛlɩ a kʋ̃ɔ.
Currently Selected:
Eziptɩ tẽw yib 15: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
