Eziptɩ tẽw yib 19

A NAAŊMƖN MAALƐ NƖ NƖ A ƖSƖRAYƐL NƖBƐ WÕ-TAA

19—24

A Naaŋmɩn bɔbr'a k'ʋʋ maal'ɩ a Ɩsɩrayɛl nɩbɛ wõ-taa, bɛlɛ wa sàw a

1-2A Ɩsɩrayɛl nɩbɛ tɩ bɛr'ɩ a Erefidim. Bɛ na tɩ yi a Eziptɩ maalɩ cuwr ata a, a cuwr ata sob bibi-dãw-niwn sob'a bɛ tɩ kpɛ a Sinayi wɛja-kpalɛ pʋɔ. Bɛ tɩ maal'ɩ a bɛ pɛnɛ-sɛwr a wɛja-kpalɛ pʋɔ, tori a Sinayi tãw. 3A Moyiir tɩ do n a tãw, k'ʋʋ tɩ tuori a Naaŋmɩn.

A Sore tɩ be n a tãw nyʋɔrɩ́, ɛ́ bʋɔlɩ a Moyiir yel ʋ: «Tɩ yel à ŋá kʋ̀ a Zakɔb bʋʋrɛ, a Ɩsɩrayɛl nɩbɛ: 4“Nyɩɩm mɩŋa nyɛ̃ nɩ a lɛ ɩ̃ na ɩ a Eziptɩ tẽw nɩbɛ a. Nyɩ nyɛ̃ nɩ a lɛ ɩ̃ na tɛr nyɩ, mɛ̃ sɩla pɩgɛ zu a, wa n a ɩ̃ zie ka a. 5Ƴɛrɛŋa a, nyɩmɛ wa wone a ɩ̃ ƴɛ̀rʋ, ɛ́ tɛr a ɩ̃ wõ-taa vla a, nyɩ na ɩ na mɛ̃ na-bom a a ɩ̃ zie, a nɩ-bʋʋrɛ za pʋɔ. Bʋ̃ʋ n'ʋ vɛ̃, mãa so a tẽ-daa za, 6ɛcɛ nyɩ na ɩ n bàwr-maalbɛ naalʋ-tẽw#19:6 Bàwr-maalbɛ naalʋ-tẽw: A pɛr lɛ k'aa nɩ-bʋʋrɛ za na tone nɩ a Naaŋmɩn tome mɛ̃ a bàwr-maalbɛ a, bɩɩ k'aa bàwr-maalbɛ nɛbɛ na kaarɛ a bɛ zie. a ɩ̃ zie nɩ nɩ-bʋʋr-sõw.” À á ŋá n'a fʋ na tɩ yel kʋ̀ a Ɩsɩrayɛl nɩbɛ.»

7A Moyiir tɩ lɛb'a wa a pɛnɛ-sɛwr pʋɔ wa bʋɔlɩ a Ɩsɩrayɛl nɩ-kore manɩ a ƴɛ̀rʋ al za a Sore na tɩ ƴãw k'ʋʋ yel a kʋ̀ bɛ. 8A nɩbɛ za tɩ sɔw na mɛ̃ nɩ-been a, yel à ŋá: «Tɩ na ɩ n a lɛ za a Sore na yel a.» A Moyiir tɩ lɛb'a tɩ manɩ a lɛ a nɩbɛ na sɔw a kʋ̀ a Sore. 9Lɛ n'a a Sore tɩ yel a Moyiir: «Ɩ̃ na wa n a fʋ zie zʋ̀ʋr-sɛbla#19:9 Nyɛ̃ 13.21 nɩ a manʋ. pʋɔ, a nɩbɛ tʋ̃ɔ́ wone ɩ̃ na ƴɛ̀rɛ a fʋ zie a, ɛ́ mɩ̀ mɩ́ sàw de b kʋralɛ.» A Moyiir tɩ lɛb'a yel a lɛ a nɩbɛ na sɔw a kʋ̀ a Sore.

A Naaŋmɩn tuor'ɩ a Moyiir a Sinayi tãw zu

10A Sore tɩ cãà na lɛb yel a Moyiir: «Lɛb cen a nɩbɛ zie tɩ yel bɛ kɛ́ bɛ so a bɛ dɛwr bɛr, a dɩ̃a nɩ a bio. Bɛ mɩ̀ pɛ́w a bɛ kparɩ. 11Bɛ cɔbrɩ gù a deyere, bʋ̃ʋ n'ʋ vɛ̃, a deyere n'a ɩ̃ na siw a Sinayi tãw zu, a nɩbɛ za niŋé. 12Ƴãw tʋr-bɔwrɩ viiri koli a tãw, ɛ́ yel bɛ à ŋá: “Nyɩ taa dúor a tãw zu ɛ, nyɩ taa tawr pɩɛlɛ ʋ ɛ. Nɩr za wa tawr pɩɛlɛ a tãw a, bɛ na kʋ ʋ na. 13Nɩsaal'ʋ bɩɩ dʋ̃w n'ʋ a, ʋ bɛ cãanɛ ɩ. Nɩr bɛ tʋɔr a sãwna sob ɛ, kʋsɛbɛ n'a bɛ na lɔb'ɩ kʋ, bɩɩ pime n'a bɛ na baw nɩ ʋ kʋ. A ɩɩl wa pɛblɩ a lɛn daar a n'a bɛ mɩnɛ na do a tãw zu.» 14A Moyiir tɩ yi n a tãw zu lɛb siw a nɩbɛ zie, tɩ ƴãw bɛ so a bɛ dɛwr bɛr, ɛ́ pɛ́w a bɛ kparɩ. 15Al pùorí ʋ yel bɛ: «Nyɩ cɔbrɩ gù a deyere. Nyɩ taa pɩɛlɛ a nyɩ pɔwbɛ ɩ.»

16A deyere daarɩ́ biɓaara a, a saa tɩ tanɛ na, ɛ́ nyɩwrɛ, ɛ́ zʋ̀ʋr-sɛbla tɩ pàw a tãw. Ɩɩl mɩ̀ tɩ pɛblɛ nɩ kpɛ̃w kpɛ̃w za. Dɛ̃bɩ̃ɛ tɩ nyɔw nɩ a nɩbɛ a pɛnɛ-sɛwr pʋɔ, bɛ màwr. 17A Moyiir tɩ ɩ na bɛ yi a pɛnɛ-sɛwr pʋɔ tuori a Naaŋmɩn. Bɛ tɩ tɛw na àr a tãw sɩɛ ƴãw. 18A Sinayi tãw tɩ ɩ n zʋ̀ʋ́r tɛwr, a Sore na tɩ siw a ʋ zu a vũu pʋɔ a ƴãw. A zʋ̀ʋ́r tɩ ìre na dúor mɛ̃ vũu-kpɛ̃ɛ zʋ̀ʋ́r a, ɛ́ a tãw za gbiwre gbigbigbi! 19A ɩɩl kɔkɔr tɩ lɛb'a bãw yire. A Moyiir mɩ́ tɩ ƴɛ̀r a, ɛ́ a Naaŋmɩn sɔw nɩ a saa-tanʋ.

20A Sore tɩ siw nɩ a Sinayi tãw nyʋɔrɩ́, ɛ́ bʋɔlɩ a Moyiir a be, ʋ do. 21A Sore tɩ yel ʋ na: «Siw tɩ kpãa a nɩbɛ, kɛ́ bɛ taa zɔrɛ birbir waar kɛ́ bɛ wa nyɛ̃ m ɛ, alɛ bɛ ɩ lɛ nɩ-yaga nãà mab'a kpi. 22Mɔ̃ mɩ̀, a bàwr-maalbɛ mɩ̀ na saa mɩ́ tʋ̃ɔ́ taw pɩɛlɩ mɛ̃ a, a fɛr'a kɛ́ bɛ so a bɛ dɛwr bɛr, alɛ bɛ ɩ lɛ, ɩ̃ nãà mab'a nyɛ̃ nɩ bɛ suur, a mãa Sore.» 23A Moyiir tɩ sɔw ʋ na: «A nɩbɛ kʋ̃ tʋ̃ɔ́ do a Sinayi tãw zu ɛ. Mɛ̃ fʋ taa kpaalɩ tɩ yel à ŋá: “Ƴãw tʋr-bɔwrɩ viiri koli a tãw, ʋ ɩ tã-sõw.”» 24A Sore tɩ yel ʋ na: «Lɛb siw, al pùorí fʋ̃ʋ nɩ a Aarɔ̃ do wa. Ɛcɛ a bàwr-maalbɛ nɩ a nɩbɛ a, bɛ taa wa zɔrɛ birbir dúor waar a ɩ̃ zie, ɩ̃ wa mab nyɛ̃ nɩ bɛ suur ɛ.» 25A Moyiir tɩ lɛb'a siw a nɩbɛ zie, tɩ ƴɛ̀r a bɛ zie.

Currently Selected:

Eziptɩ tẽw yib 19: DBDC

Highlight

Copy