Eziptɩ tẽw yib 5
5
A Moyiir nɩ a Aarɔ̃ na cen tɩ páw a Faarawɔ̃ a
1Al pùorí, a Moyiir nɩ a Aarɔ̃ tɩ cen na tɩ páw a Faarawɔ̃ yel ʋ: «À ŋá n'a a Sore, a Ɩsɩrayɛl Naaŋmɩn ƴɛ̀rɛ: “Bɛr a ɩ̃ nɩbɛ bɛ cen a wɛja-kpalɛ pʋɔ tɩ maalɩ cuw a ɩ̃ ƴãw”.» 2A Faarawɔ̃ tɩ sɔw na: «Ãa n'ɩ a Sore ŋa, ɩ̃ na sàw a ʋ nʋɔr bɛr a Ɩsɩrayɛl nɩbɛ bɛ cen? Ɩ̃ bɛ bãw a Sore ŋa ɩ, ɛ́ kʋ̃ bɛr a Ɩsɩrayɛl nɩbɛ bɛ cen ɛ!» 3A Moyiir nɩ a Aarɔ̃ tɩ lɛb'a yel: «A Ebre mɩnɛ Naaŋmɩn ɩ na tɩ nyɛ̃ ʋ. Bɛr tɩ tɩ cen a wɛja-kpalɛ pʋɔ bibie ata, tɩ maalɩ bàwr kʋ̀ a Sore tɩ Naaŋmɩn, ʋ taa wa mab kʋ tɩ nɩ a jɛ̀lmɛ̃#5:3 Jɛ̀lmɛ̃: Koro za dem bàal-faa kãw na kʋrɛ a n'ʋ. bàalʋ, bɩɩ nɩ a zɛbr ɛ.» 4A Eziptɩ tẽw nãà tɩ yel bɛ na: «Moyiir nɩ Aarɔ̃ ɔ, bʋ̃ʋ n'ʋ so nyɩ bɔbr kɛ́ nyɩ ɩ a Ɩsɩrayɛl nɩbɛ bɛr a bɛ tome? Nyɩ lɛb cen a nyɩ tome zie. 5Ƴɛrɛŋa a nɩbɛ bɛ ŋa na pãa wa yãwmɛ a, nyɩ bɔbr'a kɛ́ bɛ bɛr a bɛ tome?»
A Faarawɔ̃ dɔwl'ɩ a Ɩsɩrayɛl nɩbɛ tome
6A ʋlɩ bibir nɛ a, a Faarawɔ̃ tɩ yel'ɩ à ŋá kʋ̀ a Eziptɩ tẽw nɩbɛ na bɛlɛ a tome kaar a, nɩ a Ɩsɩrayɛl nɩbɛ bɛl na ɩ a nɩ-bɛrɛ a bɛ lãw-tõ-taabɛ zu a: 7«Nyɩ kʋ̃ lɛb kʋ̀ a Ɩsɩrayɛl nɩbɛ a mʋ̃ɔ a birkiri ŋmab ƴãw mɛ̃ a dãwdãw a ɩ. Bɛl mɩŋa n'a na mɩ́ cen tɩ bɔ a mʋ̃ɔ. 8Ɛcɛ nyɩ na mɩ́ fɛr bɛ na ƴãw bɛ ŋma a birkiri nʋɔr na ƴãw a, mɛ̃ a dãwdãw a, nyɩ kʋ̃ siwri a birkiri nʋɔr ɛ. Ƴã-to-dem nɛbɛ! Alɛ so bɛ yere: “Nyɩ ɩ tɩ cen tɩ maalɩ bàwr kʋ̀ a tɩ Naaŋmɩn.” 9Nyɩ dĩ nɩ bɛ a tome bɛ tone, ɛ́ ta cɛlɛ a ziri á ŋá zie ɩ.»
10A tõ-tõ-nɩ-bɛrɛ bɛl na ɩ a Eziptɩ tẽw nɩbɛ a, nɩ a bɛl na ɩ a Ɩsɩrayɛl bʋʋrɛ a, tɩ yi n a nãà yir cen tɩ yel a Ɩsɩrayɛl nɩbɛ: «À ŋá n'a a Faarawɔ̃ yel: Bɛ kʋ̃ cãà kʋ̀rɛ nyɩ a mʋ̃ɔ ɩ. 11Nyɩ cen a be nyɩ na na tʋ̃ɔ́ páw a a tɩ bɔ. Ɛcɛ nyɩ bãwnɩ a, a birkiri nʋɔr bɛ siwre ɩ!»
12Lɛ n'a a Ɩsɩrayɛl nɩbɛ tɩ yi yɛ́r pàw a Eziptɩ tẽw za, kɛ́ bɛ wob a mʋ̃ɔ wa kʋr. 13A tõ-tõ-nɩ-bɛrɛ na ɩ a Eziptɩ tẽw nɩbɛ a, tɩ canɛ bɛ na yere nɩ: «Nyɩ baarɩ a nyɩ ton! Nyɩ ŋma a birkiri lɛ nʋɔr na ƴãw a, bibir za! Mɛ̃ a lɛn daar bɛ na tɩ kʋ̀rɛ nyɩ a mʋ̃ɔ a!» 14Bɛ mɩ́ tɩ ŋmɩɛr'ɩ a tõ-tõ-nɩ-bɛrɛ na ɩ a Ɩsɩrayɛl bʋʋrɛ bɛ na kaa ír ƴãw a, ɛ́ yere: «Bʋ̃ʋ n'ʋ so a bibie á ŋá pʋɔ nyɩ bɛ ŋma a birkiri nʋɔr bɛ na ƴãw kʋ̀ nyɩ mɛ̃ a koro za a?»
15A tõ-tõ-nɩ-bɛrɛ na ɩ a Ɩsɩrayɛl bʋʋrɛ a tɩ wa n a Faarawɔ̃ zie wa zɛbr yere nɩ: «Bʋ̃ʋ n'ʋ so fʋ ɩrɛ tɩ à à ŋá? 16Bɛ bɛ cãà kʋ̀rɛ tɩ mʋ̃ɔ ɩ, ɛ́ mɩ́ yel tɩ: “Nyɩ ŋma birkiri”, ɛ́ mɩ́ lɛb ŋmɩɛr tɩ ƴãw pʋɔ. A fʋ nɩbɛ sãw na!» 17A Faarawɔ̃ tɩ sɔw bɛ na: «Ƴã-to-dem'ɩ nyɩ, ƴã-to-bul! Alɛ so nyɩ yere: “Nyɩ ɩ tɩ cen tɩ maalɩ bàwr kʋ̀ a Sore.” 18Ƴɛrɛŋa a, nyɩ cen tɩ tone. Bɛ bɛ kʋ̀rɛ nyɩ a mʋ̃ɔ ɩ, ɛcɛ a fɛr'a kɛ́ nyɩ ŋma a birkiri a ta.»
19A tõ-tõ-nɩ-bɛrɛ na ɩ a Ɩsɩrayɛl bʋʋrɛ a tɩ nyɛ̃ nɩ a yele a kpɛmɛ a bɛ zu, bʋ̃ʋ n'ʋ vɛ̃, bɛ tɩ yere na kʋ̀rɛ bɛ: «A birkiri nʋɔr bɛ siwre ɩ! Bibir za, nyɩ na mɩ́ ŋma n a birkiri nʋɔr na ƴãw a!» 20Bɛ na tɩ yire a Faarawɔ̃ zie wa báarɛ a, bɛ lo n a Moyiir nɩ a Aarɔ̃ na tɩ àr gùre bɛ a zu. 21Bɛ tɩ yel bɛ na: «A Sore, ʋ jɩ́r a lɛ nyɩ na ɩ a, ɛ́ bãw a nyɩ yele kʋ̀ nyɩ! Nyɩmɛ nɛbɛ so a Faarawɔ̃ nɩ a ʋ tõ-tõ-nɩ-bɛrɛ bɛ cãà bɔbr kɛ́ bɛ mɩ́ nyɛ̃ tɩ ɛ. Nyɩ ƴãw bɛ nɩ zɛbr-sɔ-kpɛ̃ɛ a nũú kɛ́ bɛ kʋ n tɩ!»
22A Moyiir tɩ lɛb'a tɩ páw a Sore yel ʋ: «Sore e, bʋ̃ʋ n'ʋ so fʋ dɔwrɩ a nɩbɛ bɛ ŋa? Bʋnʋ ƴãw n'a fʋ tõ m a ka? 23Fʋ na dɛ tõ m ɩ̃ wa ƴɛ̀r a Faarawɔ̃ zie a fʋ yúor ƴãw a, lɛ n'a ʋ tĩ dɔwrɛ a Ɩsɩrayɛl nɩbɛ, ɛ́ fʋ bɛ ɩrɛ bom kãw za a fʋ nɩbɛ faafʋ ƴãw ɛ!»
Currently Selected:
Eziptɩ tẽw yib 5: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
