Eziptɩ tẽw yib 9

A dɔwr-kpɛ̃ɛ anũu sob: a dʋn jɛ̀lmɛ̃ bàalʋ

1A Sore tɩ yel'ɩ a Moyiir: «Cen tɩ páw a Faarawɔ̃ yel ʋ: “À ŋá n'a a Sore, a Ebre mɩnɛ Naaŋmɩn yere: Bɛr a ɩ̃ nɩbɛ bɛ cen tɩ maalɩ mɛ̃. 2Fʋ̃ʋ wa cãà zawrɩ na bɛr bɛ bɛ cen a, fʋ̃ʋ wa cãà tɛr bɛ a, 3a mãa Sore a, ɩ̃ bɛ bɛrɛ a fʋ dʋn na be a póru pʋɔ a ɩ: jɛ̀lmɛ̃ bàal-faa faa na nyɔw nɩ a fʋ wie, a fʋ bòn, a fʋ nyɔ̃wmɩ, a fʋ nĩi, a fʋ píir nɩ a fʋ bʋʋr. 4Ɛcɛ a mãa Sore a, ɩ̃ na owr'ɩ a Ɩsɩrayɛl nɩbɛ dʋn nɩ a Eziptɩ nɩbɛ dʋn. A Ɩsɩrayɛl nɩbɛ dʋ̃w been kãw za bɛ kpiir ɛ!”»

5A Sore mɩ̀ tɩ ƴãw nɩ a daar yel á ŋá: «Bio n'a ɩ̃ na ɩ à à ŋá a Eziptɩ tẽw.» 6A bio daarɩ́ a, a Sore tɩ ɩ n a lɛ ʋ na yel a: a Eziptɩ tẽw dʋn tɩ kpi n a za, ɛcɛ a Ɩsɩrayɛl nɩbɛ dʋ̃w been kãw za bɛ tɩ kpi ɛ. 7A Faarawɔ̃ tɩ sowri na nyɛ̃ a Ɩsɩrayɛl nɩbɛ dʋ̃w been kãw za bɛ kpi ɛ. A na saa tɩ ɩ a lɛ a, ʋ cãà na kpãa tobr, bɛ bɛr a Ɩsɩrayɛl nɩbɛ bɛ cen ɛ.

A dɔwrʋ ayʋɔb sob: a natɩɛ

8A Sore tɩ yel'ɩ a Moyiir nɩ a Aarɔ̃: «Nyɩ 'wɔ̃w tãpɛlʋ dãw pʋɔ paalɩ a nuru. A Moyiir na tɩ lɔb a na bɛr saa-zu, a Faarawɔ̃ niŋé. 9A tãpɛlʋ á ŋá na lɩɛb'ɩ uuru lo a Eziptɩ tẽw zu. A na ɩ na a nɩbɛ nɩ a dʋn ƴã-gamɛ mɩ́ ɓuuri ŋmɛr ɩ natɩɛ#9:9 Nyɛ̃ Yel-w 16.2., a Eziptɩ tẽw za pʋɔ.»

10A Moyiir nɩ a Aarɔ̃ tɩ 'wɔ̃w nɩ a tãpɛlʋ cen nɩ tɩ páw nɩ a Faarawɔ̃. A Moyiir tɩ lɔb'ɩ a tãpɛlʋ bɛr a saa-zu, a ɩ a nɩbɛ nɩ a dʋn ƴã-gamɛ mɩ́ ɓuuri ŋmɛr ɩ natɩɛ. 11A Eziptɩ tẽw tɩtɩlbɛ bɛ tɩ tʋ̃ɔ́ àr a Moyiir niŋé ɩ, a natɩɛ ƴãw. Bʋ̃ʋ n'ʋ vɛ̃, a natɩɛ tɩ pàw nɩ a tɩtɩlbɛ nɩ a Eziptɩ tẽw nɩbɛ za ƴã-gamɛ. 12Ɛcɛ a Sore tɩ ɩ na a Faarawɔ̃ kpãa tobr, bɛ bɛr wõ a Moyiir nɩ a Aarɔ̃ ƴɛ̀rʋ ɛ, mɛ̃ a lɛ a Sore na tɩ yel kʋ̀ a Moyiir a.

A dɔwrʋ ayopõi sob: a sa-bi-kube saa

13A Sore tɩ yel'ɩ a Moyiir: «Dãwnɩ ìru a bio cen tɩ páw a Faarawɔ̃ yel ʋ: “À ŋá n'a a mãa Sore, a Ebre mɩnɛ Naaŋmɩn, yere kʋ̀rɛ fʋ: Bɛr a ɩ̃ nɩbɛ bɛ cen tɩ maalɩ mɛ̃. 14Bʋ̃ʋ n'ʋ vɛ̃, ƴɛrɛŋa ʋl a, ɩ̃ na ƴãw fʋ nɩ dɔwrʋ bʋʋrɛ za, a fʋ̃ʋ nɩ a fʋ tõ-tõ-nɩ-bɛrɛ nɩ a fʋ nɩbɛ. A lɛ pʋɔ a, fʋ na bãw na kɛ́ nɩr bɛ ŋmɛ̃ taa nɩ mɛ̃ a tẽw zu ɛ. 15Mãa tɩ zɛw a ɩ̃ nũu a nyɩ ƴãw, ƴãw nyɩ jɛ̀lmɛ̃ bàalʋ fʋ̃ʋ nɩ a fʋ nɩbɛ a, nyɩ kʋ̃ʋ cãà a tẽw zu ɛ. 16Ɛcɛ ɩ̃ bɛr fʋ na fʋ cãà k'ɩ̃ɩ wul a ɩ̃ kpɛnʋ, ɛ́ a ɩ̃ yúor yi a tẽw zu ziir za#9:16 Nyɛ̃ Ʋr 9.17.. 17Fʋ nyɛ̃ a na, ɛ́ cãà bɛ sàw na bɛr a ɩ̃ nɩbɛ bɛ cen ɛ. 18Bio a tɛm ŋa pʋɔ a, ɩ̃ na ɩ na sa-bi-kube saa wa n fãw, mɛ̃ bɛ na bɛ dãw nyɛ̃ a, a lɛ a Eziptɩ tẽw na tĩ kɛ́ be wa tɔ a dɩ̃a a. 19Ƴɛrɛŋa a, ɩ a fʋ dʋn nɩ bom za fʋ na so a póru pʋɔ a, a nyɛ̃ kpɛb zie kpɛ. Nɩr za nɩ dʋ̃w za nãà wa be a póru pʋɔ, ɛ́ bɛ lɛb ta a yir a, a sa-bi-kube na lɔb a na kʋ”.»

20A Faarawɔ̃ tõ-tõ-bi-bɛrɛ bɛl a Sore ƴɛ̀rʋ na tɩ ƴãw dɛ̃bɩ̃ɛ a tɩ ƴãw na a bɛ tõ-tõ-biir diw a dʋn kpɛ n a yie pʋɔ. 21Ɛcɛ a bɛl na bɛ tɩ ŋmɛlɩ kaa a ƴɛ̀rʋ ŋa a tɩ bɛr'ɩ a bɛ tõ-tõ-biir bɛ be a póru pʋɔ nɩ a dʋn.

22A Sore tɩ yel'ɩ a Moyiir: «Tùr a fʋ nũu cɔw a salom, ɛ́ a sa-bi-kube lo a Eziptɩ tẽw za zu, a nɩbɛ zu, a dʋn zu nɩ a tẽw bʋ̃-kʋ́ɔrɩ za zu.» 23A Moyiir tɩ tùr'ɩ a ʋ dabɔl cɔw a salom, a Sore ɩ a saa tanɩ, ɛ́ a sa-bi-kube lore. A saa tɩ nyɩwrɩ na siw ba, ɛ́ a Sore ɩ a sa-bi-kube lore a tẽw za zu. 24A Eziptɩ tẽw na tĩ kɛ́ be a, a Eziptɩ tẽw nɩbɛ bɛ dãw nyɛ̃ sa-bi-kube saa ʋ wa n a fãw ŋa tɔ ɩ#9:24 Nyɛ̃ Yel-w 8.7, 16.21.: sa-bi-kube nɩ saa-nyɩwrʋ za tɩ lãw nɩ taa. 25A sa-bi-kube tɩ lɔb'ɩ bom za na be a póru pʋɔ a Eziptɩ tẽw za pʋɔ a, a nɩbɛ nɩ a dʋn. A tɩ cɩɛr cɩɛr'ɩ a bʋ̃-kʋ́ɔrɩ, ɛ́ kar a tɩrʋ. 26Gosɛn vuo yõ pʋɔ n'a a sa-bi-kube bɛ tɩ lo ɩ, a be a Ɩsɩrayɛl nɩbɛ na tɩ kpɩɛr a. 27A Faarawɔ̃ tɩ bʋɔl'ɩ a Moyiir nɩ a Aarɔ̃ wa yel bɛ: «Ƴɛrɛŋa ʋl a, ɩ̃ sãw na, mãa nɩ a ɩ̃ nɩbɛ sãw na, a Sore n'ʋ tɛr a yel-mɩŋa. 28Nyɩ zɛlɩ a Sore, a saa-tanʋ nɩ a sa-bi-kube ŋmãa. Ɩ̃ na bɛr nyɩ na nyɩ cen, ɩ̃ kʋ̃ cãà tɛr nyɩ ɛ.» 29A Moyiir tɩ sɔw na yel: «Mãa wa yire a tẽw pʋɔ wa báarɛ a, ɩ̃ na tùr'ɩ a nuru cɔw a Sore, zɛlɩ ʋ. A saa-tanʋ nɩ a sa-bi-kube na ŋmãa na, kɛ̀ fʋ bãw k'aa Sore so a tẽw. 30Ɛcɛ ɩ̃ bãwnɩ a na, fʋ̃ʋ nɩ a fʋ tõ-tõ-bi-bɛrɛ cãà bɛ zɔrɛ a Sore Naaŋmɩn ɛ.»

31A lɛ̃ nɩ a ɔɔzʋ tɩ sãw nɩ a za, bʋ̃ʋ n'ʋ vɛ̃, a ɔɔzʋ tɩ dɔw na baarɩ, ɛ́ a lɛ̃ pu. 32Ɛcɛ a ble nɩ a ʋ bʋʋrɛ kãw bɛ na bʋɔlɛ epotʋr a, al bɛ tɩ sãw ɛ, a na bɛ mɩ́ dãwnɩ ɩb a ƴãw.

33A Moyiir tɩ yi n a Faarawɔ̃ zie, ɛ́ cen yi a tẽw pʋɔ. Ʋ tɩ tùr'ɩ a nuru cɔw a Sore, zɛlɩ ʋ. Lɛ n'a a saa bɛ tɩ cãà tanɛ ɩ, ɛ́ a sa-bi-kube nɩ a saa bɛ cãà lore ɩ. 34A Faarawɔ̃ na tɩ nyɛ̃ a saa, a sa-bi-kube nɩ a saa-tanʋ a baar'a, ʋ ɩ na sãw mɛ̃ a dãwdãw a. Ʋlɛ nɩ a ʋ tõ-tõ-bi-bɛrɛ tɩ yel'a kɛ́ bɛ kʋ̃ nyɛ̃ a lɛ ɩ. 35A Faarawɔ̃ tɩ kpãa nɩ tobr zawrɩ na bɛr a Ɩsɩrayɛl nɩbɛ bɛ cen, mɛ̃ a lɛ a Sore na tɩ yel kʋ̀ a Moyiir a.

Currently Selected:

Eziptɩ tẽw yib 9: DBDC

Highlight

Copy