Yele-za-pɛr-tib 28

1A Ɩzaakɩ tɩ bʋɔl'ɩ a Zakɔb wa ƴɛ̀r nɔ-vla ƴãw ʋ, ɛ́ ƴãw nʋɔr ŋa kʋ̀ ʋ: «Taa kule a Kanãa tẽw powle kãw za ɩ. 2Cen a Mezopotami tẽw Saa-zu, a fʋ mã sãà Betuwɛl zie, tɩ kul a fʋ mã-dɛb Labã pɔwyaa kãw a be. 3A Naaŋmɩn kpɛnʋ-za-sob, ʋ maalɩ fʋ, ʋ ɩ fʋ yɛ̀r yãwmɛ yaga, ɛ́ ɩ nɩ-bʋʋrɛ na yãwmɛ ɓã taa a sãàkʋm. 4Ʋ kʋ̀ fʋ̃ʋ nɩ a fʋ bʋʋrɛ a maalʋ mɛ̃ a Abraham a, fʋ tʋ̃ɔ́ so a tẽw fʋ na kpɩɛr a, a tẽw a Naaŋmɩn na kʋ̀ a Abraham a#28:4 Nyɛ̃ 17.4-8..» 5À ŋá n'a a Ɩzaakɩ tɩ ƴãw a Zakɔb cen a Mezopotami tẽw Saa-zu, a Aram tẽw dɔɔ Betuwɛl bidɛb Labã na ɩ a Zakɔb nɩ Ezawu mã Erebeka yɛ-dɛb a zie.

6A Ezawu tɩ wõ na k'aa Ɩzaakɩ ƴɛ̀r'ɩ nɔ-vla ƴãw a Zakɔb, ɛ́ ƴãw k'ʋʋ cen a Mezopotami tẽw Saa-zu tɩ de pɔw a be. Ʋ mɩ̀ tɩ wõ na k'aa lɛn daar ʋ na tɩ ƴɛ̀rɛ a nɔ-vla ƴãwnɛ ʋ a, ʋ yel ʋ nɩ à ŋá: «Taa kule Kanãa tẽw powle ɩ.» 7A Zakɔb tɩ sàw nɩ a ʋ sãà nɩ a ʋ mã nʋɔr cen a Mezopotami. 8Lɛ n'a a Ezawu tɩ nyɛ̃ bãw k'aa Kanãa tẽw powli bɛ pɛlɩ a ʋ sãà Ɩzaakɩ pʋɔ ɩ. 9Ʋ tɩ cen na tɩ páw a Abraham bidɛb Ɩsɩmayɛl, kul a ʋ pɔwyaa Mahalatɩ na ɩ a Nebayɔtɩ yeepuule a, ƴãw pʋɔ a ʋ pɔwbɛ ƴãw.

A zánʋ a Zakɔb na zánɩ a Betɛl a

10A Zakɔb tɩ yi n a Bɛɛr-Seva cen Haran. 11Ʋ tɩ ta n zie kãw gã, a mʋ̃tɔ̃w na tɩ kpɛ a ƴãw. Ʋ tɩ ɓáw nɩ kʋsɩɛr kɔw nɩ a zu gã nɩ a be. 12Ʋ tɩ zanɩ na nyɛ̃ dɛ́r na tewli a tẽsɔw ɛ́ a nyʋɔr tɩ tɔ a salom a. Naaŋmɩn malkɩ mɩnɛ tɩ dúor'ɩ a dɛ́r ɛ́ siwr#28:12 Nyɛ̃ Zã 1.51.. 13A Sore tɩ àr'a kɔw a Zakɔb ɛ́ yere kʋ̀rɛ ʋ: «Mãa n'ɩ a Sore, a fʋ sãàkʋm Abraham Naaŋmɩn, a Ɩzaakɩ Naaŋmɩn. A tẽsɔw ŋa zu fʋ na gã a, ɩ̃ na kʋ̀ ʋ nɩ fʋ̃ʋ nɩ a fʋ bʋʋrɛ. 14A fʋ bʋʋrɛ na yãwmɛ na mɛ̃ a tẽsɔw tanɛ a. A nyɩ tẽsɔw na yɛ̀lɩ na cen a mʋ̃tɔ̃w-kpɛb-lowr nɩ a saa-pɛrɩ́, a saa-pɛrɩ́-gʋba-lowr nɩ a saa-pɛrɩ́-dʋrʋ-lowr. Fʋ̃ʋ nɩ a fʋ bʋʋrɛ ƴãw n'a ɩ̃ na maalɩ a tẽw zu nɩ-bʋʋrɛ za. 15Ɩ̃ be n a fʋ zie, ɩ̃ na gùre fʋ nɩ zie nɛ za fʋ na cere a, ɩ̃ɩ na lɛb'a tɛr fʋ wa n a tẽw ŋa pʋɔ. Ɩ̃ kʋ̃ zawrɩ fʋ bɛr ɛ, ɛ́ gù ɩ̃ tɩ maalɩ a lɛ za ɩ̃ na yel kʋ̀ b a.»

16A Zakɔb tɩ zaw na ìr ɛ́ yel: «Yel-mɩŋa za, a Sore be n a ka, ɩ̃ɩ bɛ tɩ bãwnɩ a ɩ.» 17Dɛ̃bɩ̃ɛ tɩ kpɛ ʋ na, ʋ yel: «Nyɛ̃ zie na ɩrɛ dɛ̃bɩ̃ɛ a! Bom za bɛ n'ʋ, a bɛ ɩ a Naaŋmɩn yir nɩ a tẽ-vla dɩ̃dɔr ɛ!» 18A Zakɔb tɩ dãwnɩ nɩ ìru, de a kʋsɩɛr ʋ na kɔw nɩ a zu a bin teli ɛ́ cir kãá ƴãw a nyʋɔrɩ́, ʋ ɩ kʋsɛ-tela. 19Ʋ tɩ por'ɩ a zie nɛ kɛ́ Betɛl, a pɛr lɛ kɛ́ “Naaŋmɩn yir”. Ɛcɛ bɛ tɩ bʋɔlɛ nɩ a zie ŋa a koro za kɛ́ Luuzɩ. 20Al pùorí a Zakɔb tɩ kõ n nʋɔr ŋa: «A Sore wa be a ɩ̃ zie, ɛ́ wa gù m a ɩ̃ sɔ́r zu a, ʋlɛ wa kʋ̀ m bʋ̃-dɩrɩ nɩ bʋ̃-suuri a, 21mãa wa lɛb wa a ɩ̃ sãà yir ɛ́ bom za bɛ ɩ m a, a Sore na ɩ n a ɩ̃ Naaŋmɩn. 22A kʋsɩɛr ŋa ɩ̃ na bin teli ɛ́ maalɩ a na ɩ n Naaŋmɩn yir, ɛ́ a alɩ bome nɛ za a Naaŋmɩn na na kʋ̀rɛ mɛ̃ a, ɩ̃ na mɩ́ kʋ̀ ʋ nɩ a ziir pie sob.»

Currently Selected:

Yele-za-pɛr-tib 28: DBDC

Highlight

Copy