Yele-za-pɛr-tib 47
47
1A Zuzɛb tɩ cen na tɩ yel kʋ̀ a Faarawɔ̃: «A ɩ̃ sãà nɩ a ɩ̃ yɛbr yi n a Kanãa wa ta n a bɛ píir, a bɛ bʋʋr, a bɛ nĩi nɩ a bɛ bʋ̃-tɛrɩ za. Bɛ be n Gosɛn vuo pʋɔ.» 2Al pùorí, ʋ ír nɩbɛ anũu a ʋ yɛbr pʋɔ wul a Faarawɔ̃. 3A Faarawɔ̃ tɩ sowri bɛ na: «Bʋ̃ʋ tome n'a nyɩ tone?» Bɛ sɔw: «Nãà a, píir nɩ bʋʋr'a tɩ guole, mɛ̃ a lɛ a tɩ sãàkʋm-kore na tɩ dãw ɩrɛ a. 4A kɔ̃ lo n faa yaga a Kanãa tẽw, a mʋ̃ɔ bɛ cãà be a tɩ dʋn ƴãw ɛ. Tɩ zɔ na wa a ka mɛ̃ nʋʋrɩ a. Sàw kɛ̀ tɩ zɩ̃ a Gosɛn vuo pʋɔ.» 5A Faarawɔ̃ tɩ yel'ɩ a Zuzɛb: «A fʋ sãà nɩ a fʋ yɛbr wa n a fʋ zie. 6A Eziptɩ tẽw n'ɩ ŋan na cere a. Ƴãw bɛ a zi-vla zie. Bɛ na tʋ̃ɔ́ na kpɩɛr a Gosɛn vuo pʋɔ. Ɛ́ fʋ̃ʋ wa tɩɛrɩ bãw kɛ́ nɩbɛ be n a bɛ pʋɔ bãw a tome vla a, fʋ̃ʋ kaa ír bɛ ƴãw bɛ kaarɛ a mãa mɩŋa dʋn zie.»
7A Zuzɛb tɩ tɛr'ɩ a ʋ sãà wa wul a Faarawɔ̃. A Zakɔb tɩ puor'ɩ a Faarawɔ̃ nɩ ƴãwfʋ, 8ɛ́ a Faarawɔ̃ sowr'ʋ: «Yome a ŋmɩn n'a fʋ tɛr?» 9A Zakɔb sɔw: «Yome lɩz'a ayʋɔb nɩ pie n'ɩ à ŋá ɩ̃ na lʋɔrɛ a ten mɛ̃ sãan a. A ɩ̃ nyɔ-vʋʋrʋ yome bɛ yãwmɛ ɩ, ɛ́ bɛ vɩɛl ɛ. A bɛ ta a ɩ̃ sãàkʋm-kore yome ɩ, bɛl na tɩ zɩnɛ a ten lʋɔrɛ mɛ̃ a mãa a.» 10A Zakɔb tɩ lɛb'a puori a Faarawɔ̃, ɛ́ yi a ʋ yir.
11A Zuzɛb tɩ ƴãw nɩ a ʋ sãà nɩ a ʋ yɛbr a Eziptɩ tẽw zi-vla zie, Aramɩsɛsɩ#47:11 Aramɩsɛsɩ vuo pʋɔ: Nyɛ̃ Ety 1.11. vuo pʋɔ, mɛ̃ a lɛ a Faarawɔ̃ na tɩ ƴãw a nʋɔr kʋ̀ ʋ a. Ʋ tɩ kʋ̀ bɛ nɩ tẽsɔwr bɛ so a. 12Ʋ tɩ kʋ̀ n bʋ̃-dɩrɩ a ʋ sãà nɩ a ʋ yɛbr nɩ a bɛ yie dem, man nɩ a dɩ-dɩrbɛ nʋɔr.
A tub a Zuzɛb na tɩ tu a kɔ̃ daar a
13A kɔ̃ tɩ kpɛ n faa yaga, bʋ̃-dɩra kãw za bɛ tɩ cãà a tẽw za pʋɔ ɩ. A kɔ̃ ŋa tɩ ɩ na a nɩbɛ kõw kõw a Eziptɩ nɩ a Kanãa. 14A Zuzɛb tɩ kʋ̀ɔr'ɩ a ble wob'ɩ a Eziptɩ nɩ a Kanãa ten libie za tɩ ƴãw bɛ bin a Faarawɔ̃ nãà yir. 15Libir za na bɛ tɩ cãà be a Eziptɩ nɩ a Kanãa a, a Eziptɩ tẽw dem tɩ wa na wa yel a Zuzɛb: «Kʋ̀ tɩ bʋ̃-dɩrɩ. Bʋnʋ ƴãw n'a fʋ na jɩ́rɛ tɩ tɩ tɩ kpi, tɩ na bɛ tɛr libie a ƴãw?» 16A Zuzɛb sɔw: «Nyɩmɛ bɛ wa cãà tɛr libie a, nyɩɩm kʋ̀ m a nyɩ dʋn, ɩ̃ɩ na kʋ̀ nyɩ nɩ a bʋ̃-dɩrɩ lɩɛr'ɩ.»
17Lɛ n'a bɛ tɩ wa n a bɛ dʋn wa kʋ̀ a Zuzɛb, ʋʋ kʋ̀ bɛ bʋ̃-dɩrɩ lɩɛr'ɩ a bɛ wie, a bɛ píir, a bɛ bʋʋr, a bɛ nĩi nɩ a bɛ bòn. Ʋ tɩ kʋ̀ bɛ nɩ a bʋ̃-dɩrɩ, a ʋlɩ yũon nɛ, lɩɛr'ɩ a bɛ dʋn za. 18Bɛ tɩ lɛb'a wa a vɩɛr daarɩ́ wa yel a Zuzɛb: «Tẽw kaarɛ ɛ, tɩ kʋ̃ tʋ̃ɔ́ sɔwlɩ fʋ tɩ na bɛ cãà tɛr libir a ɩ, nɩ a tɩ dʋn fʋ na so baarɩ a ɩ. A alɩ bome nɛ na cɛ tɩ a n'ɩ a tɩɩm mɩŋa nɩ a tɩ tẽsɔwr. 19Bʋnʋ ƴãw n'a fʋ na jɩ́rɛ tɩ tɩ tɩ kpi? Tɩmɛ bɛ wa ka be a, a tɩ tẽsɔwr bɛ tɛr yel-ɩra ɩ. Dà tɩ lãwnɩ a tɩ tẽsɔwr, ɛ́ kʋ̀ tɩ bʋ̃-dɩrɩ. Tɩɩm nɩ a tɩ tẽsɔwr za na be n a Faarawɔ̃ ƴãw. Kʋ̀ tɩ bʋ̃-bʋʋrɛ, ɛ́ tɩ na vʋʋrɛ na, tɩ kʋ̃ kpi ɛ, ɛ́ a tɩ tẽsɔwr kʋ̃ lɩɛbɩ wɛja-kpalɛ ɩ.»
20A Zuzɛb tɩ dà n a Eziptɩ tẽsɔwr za a Faarawɔ̃ ƴãw, a kɔ̃ na tɩ kpɛ faa tɩ zuo, ɛ́ Eziptɩ tẽw nɩr za kʋɔrɛ a ʋ púo a ƴãw. À ŋá n'a a tẽw za tɩ lɩɛbɩ a Faarawɔ̃ sob, 21ɛ́ a Zuzɛb ɩ a Eziptɩ tẽw dem za lɩɛbɩ gbãgbaar. 22Ɛcɛ a Zuzɛb bɛ tɩ dà a bàwr-maalbɛ tẽsɔwr ɛ, a Faarawɔ̃ nʋɔr kãw na tɩ yi gù bɛ a ƴãw. Bʋ̃ʋ n'ʋ vɛ̃, a bome a Faarawɔ̃ na tɩ kʋ̀rɛ bɛ a n'a bɛ tɩ guole nɩ bɛ tʋɔra, alɛ so a bɛ tɩ fɛr bɛ bɛ kʋ̀ɔrɩ a bɛ tẽsɔwr ɛ.
23A Zuzɛb tɩ yel'ɩ a nɩbɛ: «Dɩ̃a na ta a, ɩ̃ dà nyɩ na kʋ̀ a Faarawɔ̃, nyɩmɛ nɩ a nyɩ tẽsɔwr: Ɩ̃ na kʋ̀ nyɩ nɩ bʋ̃-bʋʋrɛ nyɩ bʋ̀r a nyɩ póru. 24Ɛcɛ a deb daar a, nyɩ na põ nɩ a bome ziir anũu, ír zi-been kʋ̀ a Faarawɔ̃ ɛ́ tɛr a ziir anaar al na cɛ a. Alɛ n'a nyɩ na dɩrɛ, nyɩmɛ nɩ a nyɩ bibiir, nɩ a bɛlɩ dem za na kpɩɛr a nyɩ yie pʋɔ a. Al pʋɔ n'a nyɩ na mɩ́ ír a bʋ̃-bʋʋrɛ.» 25Bɛ tɩ sɔw ʋ na: «Tẽw kaarɛ ɛ, fʋ faa tɩ na! Fʋ na maalɩ tɩ vla à ŋá a, tɩ sàw na kɛ́ tɩ ɩ a Faarawɔ̃ gbãgbaar.» 26Lɛ n'a a Zuzɛb tɩ ƴãw nʋɔr na cãà be nɩ dɩ̃a a: kɛ́ a Faarawɔ̃ na mɩ́ so a bʋ̃-dieri ziir anũu sob a Eziptɩ tẽw pʋɔ. A bàwr-maalbɛ tẽsɔwr tɛwr'a a Faarawɔ̃ bɛ tɩ so ɩ.
A lɛ a Zakɔb kũu na wa pɩɛlɛ ʋ ƴɛ̀r a
27A Ɩsɩrayɛl nɩbɛ tɩ kpɩɛr'ɩ a Eziptɩ, a Gosɛn vuo pʋɔ. Bɛ tɩ so nɩ ziir a be, dɔw bibiir, ɛ́ tɛr tɩ yãwmɛ yaga za. 28A Zakɔb tɩ maal'ɩ yome pie nɩ ayopõi a Eziptɩ, ɛ́ a ʋ yome za nʋɔr tɩ ɩ lɩz'a ayopõi dɔwlɩ yome ayopõi (147).
29A Zakɔb kũu na wa pɩɛlɛ a, ʋ bʋɔl'ɩ a ʋ bidɛb Zuzɛb wa yel ʋ: «Fʋ̃ʋ wa nɔnɛ mɛ̃ a, fʋ̃ʋ ɩ a fʋ nɔ̃wfʋ nɩ a fʋ na tu m a, a sãá. Taa ũùne mɛ̃ a Eziptɩ ka ɩ. Tõ a fʋ nũu a ɩ̃ gbɛkpɛ̃ɛ pile ɛ́ ƴãw a nʋɔr kʋ̀ m#47:29 Nyɛ̃ 24.2 nɩ a manʋ.. 30Mãa wa kpi cen tɩ páw a ɩ̃ sãà mɩnɛ a, fʋ na de nɩ a ɩ̃ kũu a Eziptɩ ka, cen nɩ tɩ ũù a bɛ yaa pʋɔ.» A Zuzɛb tɩ sɔw na: «Ɩ̃ na ɩ n a lɛ fʋ na yel a#47:30 Nyɛ̃ 49.29-32 nɩ 50.6..» 31A Zakɔb lɛb yel: «Pɔ kɛ́ fʋ na ɩ n a lɛ.» A Zuzɛb pɔ. Lɛ n'a a Zakɔb tɩ gbĩ dume gũu tɩ tɔ tẽw a ʋ gado zu ƴãw.
Currently Selected:
Yele-za-pɛr-tib 47: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
