Luka 2

A Yeezu dɔwfʋ yele

(Mat 1:18-25)

1A lɛn daar, a Sezaar Ogusi tɩ ƴãw nɩ nʋɔr kɛ́ bɛ sɔ́r a tẽ-daa zu-sɛbla za bãw bɛ nʋɔr. 2A sɔ́rʋ dãw-niwn sob ŋa tɩ maal'ɩ a lɛn daar Kirinisi na tɩ ɩ a Ʋrɔm tẽw na-kpɛ̃ɛ-lɩɛrɛ a Siiri tẽw pʋɔ a. 3A nɩbɛ za mɩ́ tɩ cen na bɛ tɩ sɔ́r bɛ, ŋa za a ʋ tẽ-yira pʋɔ. 4A Zuzɛb mɩ̀ tɩ yi n a Galile, Nazarɛtɩ tẽw pʋɔ, ɛ́ do a Zude, a Daviir tẽw ʋl pʋɔ bɛ na bʋɔlɛ kɛ́ Bɛtɩlɛm a, ʋ na tɩ ɩ a Daviir bʋʋrɛ nɩ a ʋ yir nɩr a ƴãw. 5Ʋ tɩ tɛr'ɩ a ʋ pɔw Marya na ta dɔwfʋ a cen nɩ a sɔ́rʋ ƴãw. 6A Marya dɔwfʋ bibir tɩ páw bɛ nɩ a be. 7A Marya tɩ dɔw nɩ a ʋ pɔwsɩ-bie, dɛble, de pɛnɛ pili nɩ ʋ gaalɩ dʋ̃-laa pʋɔ, bɛ na tɩ bɔ gaa zie gù a sãanbɛ dĩó a ƴãw.

Malkɩ yel'ɩ a Yeezu dɔwfʋ yele kʋ̀ dʋ̃-cɩ̃ɩnbɛ

8A ʋlɩ tẽw nɛ pʋɔ a, dʋ̃-cɩ̃ɩnbɛ tɩ be n be, gánɛ a wɩ̀ɛ pʋɔ gùre a bɛ dʋn tɩ̃ɩsɔwr za. 9A Sore malkɩ kãw tɩ sãá nɩ a bɛ zie, ɛ́ a Sore vɩɛlʋ cãà pili pàw bɛ, kɛ̀ dɛ̃bɩ̃ɛ dɛ nyɔw bɛ yaga za. 10A malkɩ tɩ yel bɛ na: «Nyɩ ta zɔrɛ dɛ̃bɩ̃ɛ ɩ, yel-vla na na ɩrɛ nʋ̃ɔ̀ a Ɩsɩrayɛl bʋʋrɛ za a n'ʋ ɩ̃ waar k'ɩ̃ɩ wa yel kʋ̀ nyɩ. 11Faarɛ dɔw nɩ a nyɩ ƴãw a dɩ̃a, a Daviir tẽw pʋɔ, ʋlɛ n'ɩ a Kɩrɩta, a Sore. 12A ʋ bãwfʋ n'ɩ ŋa: nyɩ na tɩ nyɛ̃ nɩ bi-pɩɩla na pili pɛnɛ gã nɩ dʋ̃-laa pʋɔ a. 13Bɛ wa bere na, malkɩ-yaga siw páw a dãw-niwn sob bɛ danɛ a Naaŋmɩn yere nɩ:

14“Naaŋmɩn so danʋ a saa-zu za,

ɛ́ a ʋ nɩ-nɔnɩ so ƴã-ɓaarʋ a tẽw zu ka”.»

A dʋ̃-cɩ̃ɩnbɛ cen nɩ a Bɛtɩlɛm

15A malkɩ mɩnɛ na tɩ bɛr bɛ ɛ́ lɛb do a tẽ-vla pʋɔ a, a dʋ̃-cɩ̃ɩnbɛ tɩ yere na kʋ̀rɛ taa: «Nyɩ ɩ tɩ ta a Bɛtɩlɛm nyɛ̃ a yel ŋa na ɩ a Sore yel kʋ̀ tɩ a.» 16Bɛ tɩ paw na cen tɩ nyɛ̃ a Marya nɩ a Zuzɛb nɩ a bi-pɩɩla na gã a dʋ̃-laa pʋɔ a. 17Bɛ na tɩ nyɛ̃ baar'a, bɛ tɩ manɩ nɩ a lɛ a malkɩ na yel kʋ̀ bɛ a bie ƴãw a. 18A bɛlɩ dem za na tɩ wone a dʋ̃-cɩ̃ɩnbɛ manʋ a, bɛ mɩ́ tɩ nyɔw nɩ nʋɔr. 19A Marya ʋl tɩ tɛr'ɩ a yele á ŋá za tɩɛrɛ a ʋ socir pʋɔ. 20Al pùorí, a dʋ̃-cɩ̃ɩnbɛ tɩ lɛb'a danɛ a Naaŋmɩn kule nɩ, ɛ́ íre a ʋ yúor a yele á ŋá ƴãw, bɛ na tɩ wõ ɛ́ nyɛ̃ a tu mɛ̃ a lɛ bɛ na tɩ yel kʋ̀ bɛ a.

A Yeezu yúor póru

21A bibie ani sob na wa vɩɛ a, ɩ a bie yʋɔr-ŋmãafʋ bibir a, bɛ por'ɩ a ʋ yúor kɛ́ Yeezu. A yúor ŋa n'ʋ a malkɩ tɩ tɩr, ɛ́ a mã bɛ tɛr a ʋ pʋɔ sɛr ɛ.

A Yeezu bɛ na de kʋ̀ a Naaŋmɩn a

22A bibir na wa vɩɛ, bɛ na na tu a bɛ dɛwr-so-bɛrʋ tub mɛ̃ a lɛ a Moyiir wulu na ƴãw a, a Yeezu sãà nɩ a ʋ mã tɩ ɓáw ʋ na cen nɩ a Zerizalɛm, kɛ́ bɛ tɩ de ʋ kʋ̀ a Sore, 23mɛ̃ a lɛ bɛ na sɛb a Sore Wulu sɛbɛ pʋɔ a: «Pɔwsɩ-bie za na ɩ dɛble a, bɛ na de ʋ na kʋ̀ a Sore#2:23 Nyɛ̃ Ety 13.2, Sɔr-n 18.15-16..» 24Bɛ mɩ̀ tɩ tɛr'ɩ a bàwr-maal-bom waar'ɩ a bàwr maalʋ ƴãw, mɛ̃ a lɛ a Sore Wulu na ƴãw a: «Ŋmam-daa nɩ ŋmam-pɔw, bɩɩ naŋmã-pɔ́lɛ́ ayi#2:24 Nyɛ̃ Lev 12.8..»

25Zɩ̃ kɛ́ nɩr kãw tɩ be n a Zerizalɛm dɩ kɛ́ Sɩmɩ̃ɔ. Ʋ tɩ ɩ n nɩ-mɩŋa ɛ́ ƴãwnɛ a Naaŋmɩn. Ʋ tɩ gùre nɩ a mɔwlʋ a Ɩsɩrayɛl nãà wa nyɛ̃ a, ɛ́ a Vʋʋrʋ sõw tɩ be a ʋ zie. 26A Vʋʋrʋ Sõw tɩ ɩ na ʋ bãwnɩ a, kɛ́ ʋlɛ bɛ wa nyɛ̃ a Sore Nɩ-kabra a, k'ʋʋ kʋ̃ kpi ɛ. 27A Vʋʋrʋ Sõw tɩ dam ʋ na ƴãw ʋ wa a Ŋmɩn-yir-kpɛ̃ɛ pʋɔ. A Yeezu sãà nɩ a ʋ mã na tɩ tɛr ʋ kpɩɛr'ɩ kɛ́ bɛ tɩ tu a tub a ʋ ƴãw, mɛ̃ a lɛ a Sore Wulu sɛbɛ na yel a, 28a Sɩmɩ̃ɔ tɩ de nɩ a Yeezu na tɩ cãà ɩ bibile a ƴãw a ʋ nuru pʋɔ, ɛ́ puori a Naaŋmɩn yãanɩ yel:

29«Sore e, ƴɛrɛŋa a,

fʋ na tʋ̃ɔ́ na bɛr a fʋ tõ-tõ-bie

ʋ kule nɩ ƴã-ɓaarʋ mɛ̃ a lɛ fʋ na yel a.

30A ɩ̃ mimie sɩrɩ na nyɛ̃ a fʋ faafʋ,

31fʋ na cɔbrɩ a nɩ-bʋʋrɛ za niŋé a:

32ʋ ɩ n cãà na na ɩ a tẽ-daa nɩ-bʋʋrɛ za bãw fʋ a,

ɛ́ ɩ a fʋ nɩ-bʋʋrɛ Ɩsɩrayɛl yúor-vɩɛlʋ-danʋ.»

A Sɩmɩ̃ɔ na ƴɛ̀r naaŋmɩn-ƴɛ̀r-manɛ ƴɛ̀rʋ a

33Nɔ-ɓãan tɩ nyɔw nɩ a bie sãà nɩ a ʋ mã, a yele a Sɩmɩ̃ɔ na tɩ yere cáarɛ nɩ ʋ a ƴãw. 34A Sɩmɩ̃ɔ tɩ maalɩ bɛ na ɛ́ yel a bie mã Marya: «Nyɛ̃, a fʋ bie ŋa na so na nɩ-yaga lo ɛ́ nɩ-yaga lɛb ìr a Ɩsɩrayɛl bʋʋrɛ pʋɔ, ʋ na ɩ n bãwfʋ bɛ ŋmɩɛr'ɩ nɔkpɛn. 35Lɛ n'a nɩ-yaga pʋ-tɩɛr-sɔwlɩ na sãá. Ɛ́ a fʋ̃ʋ tɔr za a, kpɩɛrʋ na kpɛ b'a, ɩ mɛ̃ sʋɔ na cɔ̀r a fʋ socir puo a.»

A pɔw-naaŋmɩn-ƴɛ̀r-manɛ Ana yele

36Pɔw-naaŋmɩn-ƴɛ̀r-manɛ kãw mɩ̀ tɩ be n a be, Ana, Fanɩɛl pɔwyaa, na tɩ ɩ a Asɛɛr yir dɔwlʋ nɩr a. Ʋ tɩ kor'ɩ yaga. Ʋ na tɩ kul a sɩr maalɩ yome ayopõi a n'a, 37ʋ ɩ a pɔw-kʋɔr tɩ ta a yome lɩz'a anaar nɩ anaar. Ʋ bɛ tɩ cere zãánɛ nɩ a Zerizalɛm Ŋmɩn-yir-kpɛ̃ɛ ɩ, ɛ́ tone a Naaŋmɩn mʋ̃tɔ̃w nɩ tɩ̃ɩsɔw. Ʋ mɩ́ tɩ tɛr'ɩ mʋta-tuo ɛ́ puore. 38Ʋ na tɩ ta a be a ʋlɩ tɛm nɛ tɔr za pʋɔ a, ʋ danɛ nɩ a Naaŋmɩn ɛ́ manɛ a bie yele kʋ̀rɛ a bɛlɩ dem za na tɩ gùre a Zerizalɛm faafʋ a.

A Yeezu nɩ a ʋ dɔwrbɛ lɛb'a kul a Nazarɛtɩ

39Bɛ na tɩ tu a yele za a Sore Wulu sɛbɛ na ƴãw nʋɔr kɛ́ bɛ mɩ́ tu a, bɛ lɛb'a cen a Galile, a bɛ tẽw Nazarɛtɩ. 40A bie ʋl tɩ kɛrɛ na ɛ́ bɩrɛ nɩr, yã-bãwfʋ tɩ be n a ʋ zie yaga, ɛ́ a Naaŋmɩn maalʋ tu ʋ.

A Yeezu na kpɛ a Ŋmɩn-yir-kpɛ̃ɛ pʋɔ a ʋ yome pie nɩ ayi daar a

41Yome za, a Yeezu sãà nɩ a ʋ mã mɩ́ tɩ cen nɩ a Zerizalɛm a Zifʋ mɩnɛ Tɔl-gãw cuw ƴãw. 42A Yeezu na wa nyɛ̃ yome pie nɩ ayi a, bɛ tɛr ʋ na do n a cuw ƴãw a Zerizalɛm, mɛ̃ a lɛ a tub na tuur a yome za a. 43Ɛcɛ a cuw na wa dɩ yi baarɩ bɛ lɛb kule a, a Yeezu na tɩ cãà ɩ bibile a tɩ cãà na be a Zerizalɛm, ɛ́ a ʋ sãà nɩ a ʋ mã bɛ bãwnɩ a ɩ. 44Bɛ tɩ tɩɛr k'ʋʋ be n a bɛ sɔr-lãw-cen-taabɛ pʋɔ, ɛ́ cen mʋ̃tɔ̃-ɓil za, al pùorí bɛ nyɔw a ʋ bɔb, a bɛ nɩbɛ nɩ a bɛ nɩ-bãwnɩ pʋɔ. 45Ɛcɛ bɛ na bɛ tɩ nyɛ̃ ʋ a, bɛ lɛb'a bɔ ʋ tɩ sãá nɩ a Zerizalɛm. 46Bibie ata pùorí n'a bɛ tɩ nyɛ̃ ʋ a Ŋmɩn-yir-kpɛ̃ɛ pʋɔ, ʋ zɩ̃ a Naaŋmɩn wulu bãw-bãw-karɩ sɔgɔ, bɛrɛ wone a bɛ ƴɛ̀rʋ tɛr'ɩ sowru a bɛ zie. 47A bɛlɩ dem za na tɩ wone a ʋ ƴɛ̀rʋ a, mɩ́ tɩ nyɔw nɩ nʋɔr, a yã ʋ na tɩ bãw a ƴãw, nɩ a sɔwfʋ ʋ na mɩ́ tɩ sɔw a ƴãw. 48A Yeezu sãà nɩ a ʋ mã na tɩ nyɛ̃ ʋ a, nʋɔr ɓãá bɛ na, ɛ́ a mã yel ʋ: «Ɩ̃ bie e, bʋ̃ʋ n'ʋ so fʋ ɩ tɩ à ŋá? Nyɛ̃, mãa nɩ a fʋ sãà pi n pée bɔbr'ɩ fʋ gʋɔr'ɩ.» 49Ʋ tɩ sɔw bɛ na: «Bʋnʋ ƴãw n'a nyɩ nɩ̃ɛ bɔbr mɛ̃? Nyɩ bɛ tɩ bãw kɛ́ a fɛr'a k'ɩ̃ɩ be a ɩ̃ sãà yir pʋɔ ɩ?» 50Ɛcɛ a ʋ ƴɛ̀rʋ ŋa ʋ na tɩ ƴɛ̀r kʋ̀ bɛ a, bɛ bɛ tɩ bãw a ʋ pɛr ɛ.

51Ʋ tɩ siw na páw bɛ, lɛb wa a Nazarɛtɩ. Ʋ tɩ sàwr'ɩ a bɛ nʋɔr. A ʋ mã tɩ maal'a tɛr a yele á ŋá za vla a ʋ socir pʋɔ. 52A Yeezu ʋl a, a yã-bãwfʋ, a ƴã-gan kɛrʋ nɩ a pʋ-pɩɛlʋ, à á ŋá za tɩ kɛrɛ nɩ a ʋ zie, a Naaŋmɩn niŋé nɩ a nɩsaalbɛ niŋé.

Currently Selected:

Luka 2: DBDC

Highlight

Copy