Sɔr-nɛ́ɛ 1
1
A ƖSƖRAYƐL NƖBƐ NA BE A SINAYI WƐJA-KPALƐ PƲƆ A
1:1—10:10
A Ɩsɩrayɛl nɩbɛ sɔ́rʋ dãw-niwn sob
1A Sore tɩ ƴɛ̀r'ɩ a Moyiir zie, a tuor-taa pɛn-sɛw pʋɔ, a Sinayi wɛja-kpalɛ pʋɔ. A Ɩsɩrayɛl nɩbɛ#1:1 Ɩsɩrayɛl nɩbɛ: A Zakɔb bɛ mɩ̀ na bʋɔlɛ kɛ́ Ɩsɩrayɛl a, a ʋ bʋʋrɛ nɛbɛ dɩ à à ŋá. Mɩ̀ nyɛ̃ Ety 1.1 nɩ a manʋ na be a be a. Eziptɩ yib yome ayi sob tɩ n'a, a cuwr ayi sob bibi-dãw-niwn. A Sore tɩ yel ʋ na: 2«Fʋ̃ʋ nɩ a Aarɔ̃, nyɩ sɔ́r a Ɩsɩrayɛl lãw nɩbɛ dɔwlʋ dɔwlʋ nɩ yie yie. Nyɩ sɛb a dɛbr za yée, been been. 3Nyɩ sɔ́r a dɛbr za na tɛr yome lɩzɛr'ɩ dɔwlɛ, ɛ́ na tʋ̃ɔ́ kpɛ a sojarɩ a. A Ɩsɩrayɛl zɛbr-nɩbɛ na ŋma põ põ a, nyɩ na sɛb bɛ na ƴãw a be bɛ na pʋɔ a. 4Dɔwlʋ za pʋɔ nɩ-been na ɩ yir sob a na sõwne nyɩ na. 5A bɛ yée n'ɩ á ŋá:
Urubɛn dɔwlʋ: Sedewuur bidɛb, Elisuur
6Sɩmɩ̃ɔ dɔwlʋ: Suurisadaɩ bidɛb, Selumiyɛl
7Zuda dɔwlʋ: Aminadab bidɛb, Nason
8Ɩsakaar dɔwlʋ: Suwaar bidɛb, Netanɛl
9Zabulɔ̃ dɔwlʋ: Helon bidɛb, Eliyaavʋ
10Zuzɛb bidɛb Efarayim dɔwlʋ: Amihudɩ bidɛb, Elisama
Zuzɛb bidɛb Manase dɔwlʋ: Pedasuur bidɛb, Gamaliyɛl
11Bɛ̃zamɛ dɔwlʋ: Gideoni bidɛb, Avidan
12Dan dɔwlʋ: Amisadaɩ bidɛb, Ahiezɛɛr
13Asɛɛr dɔwlʋ: Okiran bidɛb, Pagiyel
14Gadɩ dɔwlʋ: Dewuyɛl bidɛb, Eliyasafʋ
15Nɛfɩtali dɔwlʋ: Einan bidɛb, Ahira.»
16A Ɩsɩrayɛl lãw yie nɩ-bɛrɛ bɛ na tɩ kaa ír a mɩ̀ tɩ ɩ n a Ɩsɩrayɛl zɛbr-nɩbɛ nɩ-bɛrɛ. 17A Moyiir nɩ a Aarɔ̃ tɩ de nɩ a dɛbr pie nɩ ayi bɛ ŋa bɛ na kaa ír a, ƴãw pʋɔ a bɛ ƴãw, 18ɛ́ bʋɔlɩ a lãw nɩbɛ za ɓã taa, a cuwr ayi sob bibi-dãw-niwn sob. A Ɩsɩrayɛl nɩbɛ bɛl za na tɩ tɛr yome lɩzɛr'ɩ dɔwlɛ a tɩ ƴãw na bɛ sɛb a bɛ yée, dɔwlʋ dɔwlʋ nɩ yie yie. 19A Sinayi wɛja-kpalɛ pʋɔ n'a a Moyiir tɩ sɔ́r bɛ, mɛ̃ a lɛ a Sore na tɩ ƴãw a nʋɔr kʋ̀ ʋ a. 20-43Bɛ tɩ sɔr'ɩ a Ɩsɩrayɛl dɔwlʋ been been nɩbɛ, a dɔwlʋ nɩ a yie. A dɛbr bɛl za na tɩ tɛr yome lɩzɛr'ɩ dɔwlɛ ɛ́ na tʋ̃ɔ́ kpɛ a sojarɩ a, bɛ tɩ sɛb'ɩ a bɛ been been yée. A Zakɔb bidɛb-kpɛ̃ɛ Urubɛn dɔwlʋ n'ʋ bɛ tɩ tĩ nɩ. A nɩbɛ nɛ́ɛ á ŋá n'a bɛ tɩ nyɛ̃:
| Urubɛn dɔwlʋ: | 46 500 |
| Sɩmɩ̃ɔ dɔwlʋ: | 59 300 |
| Gadɩ dɔwlʋ: | 45 650 |
| Zuda dɔwlʋ: | 74 600 |
| Ɩsakaar dɔwlʋ: | 54 400 |
| Zabulɔ̃ dɔwlʋ: | 57 400 |
| Zuzɛb bidɛb Efarayim dɔwlʋ: | 40 500 |
| Zuzɛb bidɛb Manase dɔwlʋ: | 32 200 |
| Bɛ̃zamɛ dɔwlʋ: | 35 400 |
| Dan dɔwlʋ: | 62 700 |
| Asɛɛr dɔwlʋ: | 41 500 |
| Nɛfɩtali dɔwlʋ: | 53 400 |
44À à ŋá n'a a Moyiir, a Aarɔ̃ nɩ a yie nɩ-bɛrɛ pie nɩ ayi bɛl na lɩɛrɩ a Ɩsɩrayɛl dɔwlʋ a, tɩ sɔ́r a nɩbɛ à ɩ. 45A Ɩsɩrayɛl nɩbɛ za bɛ na tɩ sɔ́r a yie yie a, a bɛl na tɩ tɛr yome lɩzɛr'ɩ dɔwlɛ ɛ́ na tʋ̃ɔ́ kpɛ a sojarɩ a, 46a bɛ za nʋɔr tɩ ɩ n tùr-kɔbr ayʋɔb dɔwlɩ túr ata kɔbr anũu nɩ lɩz'a ayi nɩ pie (603 550)
A Levi dɔwlʋ tõ-nʋɔr ɩ n ʋ tʋɔra
47Bɛ bɛ tɩ sɔ́r a Levi dɔwlʋ nɩbɛ lãwnɩ a Ɩsɩrayɛl nɩbɛ bɛl na cɛ a ɩ. 48Bʋ̃ʋ n'ʋ vɛ̃, a Sore tɩ yel'ɩ a Moyiir: 49«Ta sɔ́r a Levi bʋʋrɛ lãwnɩ a Ɩsɩrayɛl nɩbɛ ŋmãa ɩ. 50Fʋ na de nɩ a kpɛb-zi-sõw na ƴãw a wõ-taa kʋsɛ-pamɛ a kaafʋ kʋ̀ bɛ, lãwnɩ a ʋ kpɛ̃kpɛrsɩ za, a bome za na be a ʋ pʋɔ a. Bɛ na mɩ́ tuo nɩ a kpɛb-zi-sõw nɩ a ʋ kpɛ̃kpɛrsɩ. Bɛ na tone nɩ a kpɛb-zi-sõw tome, ɛ́ mɩ́ maalɩ a bɛ laɩ jil koli ʋ. 51Nyɩmɛ wa lore a sɔ́r a, bɛlɛ nɛbɛ na mɩ́ wɩl a kpɛb-zi-sõw, ɛ́ nyɩmɛ wa tɛwr zɩnɛ a, bɛlɛ nɛbɛ na mɩ́ lɛb maalɩ ʋ. Nɩ-zawla wa pɩɛlɛ a kpɛb-zi-sõw a, bɛ na kʋ ʋ na. 52A Ɩsɩrayɛl nɩbɛ na mɩ́ maal'ɩ a bɛ pɛnɛ-sɛwr, ŋa za a ʋ laɩ pʋɔ, pɩɛlɩ a ʋ sojarɩ nɩ-pɛr na ɓã taa a dɩrapo#1:52 Dɩrapo: Farsɩ ƴɛ̀r-bir'ʋ: pɛn bɛ na mɩ́ 'lẽ ƴãw dàa ƴãw, ʋ ɩ nɩbɛ bɛ mɩnɛ kãw bɩɩ bom kãw bãwfʋ a n'ʋ. Nyɛ̃ Ety 17.15.. 53A Levi bʋʋrɛ tɛwr nɛbɛ na mɩ́ maalɩ a bɛ laɩ jil koli a kpɛb-zi-sõw, ɛ́ tone a bɛ tome a ʋ pʋɔ. À ŋá n'a a Ɩsɩrayɛl nɩbɛ kʋ̃ mɩ́ ɩrɛ wa ɩ a ɩ̃ suur ìr a bɛ ƴãw ɛ.» 54A Ɩsɩrayɛl nɩbɛ tɩ ɩ n a lɛ tɔr za a Sore na tɩ yel kʋ̀ a Moyiir a.
Currently Selected:
Sɔr-nɛ́ɛ 1: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.