LUKA 9

Yezu b'a ka kalanden tan ni fila ci

(Mat 10.1-9,11-14; Mar 6.6-13)

1Yezu y'a ka kalanden tan ni fila lajɛn ka sebagaya ni fanga d'u ma ka jinaw gwɛn, ani ka banabagatɔw kɛnɛya. 2O kɔ, a y'u ci ka taa Ala ka masaya koo fɔ, ka banabagatɔw kɛnɛya. 3A y'a fɔ u ye ko: “Aw kana fɛɛn si ta, bere wo, dugutaaminan wo, dumuni wo, wari wo, aw kana o si ta. Aw kana duloki fila don. 4N'aw ye jatigila sɔrɔ yɔrɔ o yɔrɔ, aw ye to yen fɔɔ aw bɔtuma ka se o dugu kɔnɔ. 5Ni dugu dɔ mɔgɔw banna ka jigiyɔrɔ d'aw ma, aw ye bɔ yen, k'aw ka sennabuguri furanfuran#9.5 I bɛ se k'o kɔrɔ filɛ Mat 10.14 ka kunnafoni na jukɔrɔ. I ka Kɛw 13.51 fana filɛ. ka bɔ aw seen na. O bɛna kɛ taamasinyɛ ye k'a yira u la k'u bɛn'a ye.”

6Kalandenw taara yaala duguw la ka Ala ka kibaru diman fɔ ani ka banabagatɔw kɛnɛya o yɔrɔw bɛɛ la.

Erɔdi hakili bɛ nyagami Yezu koo la

(Mat 14.1-2; Mar 6.14-16)

7O tuma na, Galile mara kuntigi tun ye Erɔdi ye. Ale ye kokɛnin nunu bɛɛ kibaru mɛn minkɛ, a hakili nyagamina, bari dɔw tun ko Zan batizelikɛla le kununna. 8Dɔw fana ko kira Eli le segira ka na. Dɔ wɛrɛw ko kirakɔrɔw dɔ le kununna. 9Nga Erɔdi ko: “Ne y'a to u ye Zan kuun tigɛ. Ne do bɛ min ka koo kɛnin kibaru mɛnna, o ye jon le ye?” O la, a tun b'a fɛ a nyaa ka la Yezu kan.

Yezu bɛ dumuni di cɛɛ waa duuru ma

(Mat 14.13-21; Mar 6.30-44)

10Cidenw kɔsegira tuma min na, u ye koo minw kɛ, u y'o bɛɛ lakali Yezu ye. A taara n'u ye danna dugu dɔ faan fɛ min tɔgɔ ko Bɛtisayida. 11Nga jama nana a lɔn minkɛ, u taar'a fɛ. Yezu y'u kunbɛn ni nisɔndiya ye, ani ka u kalan Ala ka masaya koo la. Minw tun bɛ kɛnɛyali fɛ, a ye olu kɛnɛya.

12Tile tun bɛ nyini ka ban minkɛ, a ka kalandenw gwɛrɛla a la k'a fɔ a ye ko: “Sira di jama ma u ka taa dafɛ duguw la ka dumuni ani la yɔrɔ nyini u yɛrɛ ye, bari an bɛ kongo le kɔnɔ yan.”

13Nga Yezu y'u jaabi k'u yɛrɛ ka dumuni d'u ma.

U y'a fɔ a ye ko foyi t'u fɛ ni burukun duuru ani jigɛ fila tɛ. Ko fɔɔ n'u taara dumuni san ka n'a d'u ma sa. 14Bari cɛɛw tun bɛ mɔgɔ waa duuru bɔ.

Yezu y'a fɔ a ka kalandenw ye k'u k'a fɔ mɔgɔw ye k'u ka sigi jɛnkulu jɛnkulu, mɔgɔ bi duduuru.

15Kalandenw y'a kɛ ka kɛnyɛ n'a ka kuma fɔli ye, jama bɛɛ sigira. 16Yezu ye burukun duuru ni jigɛ fila nunu ta, k'a nyaa kɔrɔ ta sanfɛ ka barika la Ala ye k'u tilantilan k'u di a ka kalandenw ma k'u k'o tilan mɔgɔw cɛ. 17U bɛɛ ye dumuni kɛ ka fa. Dumuni tɔɔ min tora, u y'o cɛ ka segi tan ni fila fa n'a ye.

Piyɛri b'a fɔ ko Yezu ye Krista ye

(Mat 16.13-21; Mar 8.27-31)

18Loon dɔ, ka Yezu to Ala dali la a kelen, a ka kalandenw tun b'a gɛrɛfɛ. A tilara tuma min na, a y'u nyininga ko: “Mɔgɔw b'a fɔra ko ne ye jon ye?”

19U y'a jaabi ko: “Dɔw ko i ye Zan batizelikɛla ye. Dɔw ko i ye Eli ye. Dɔw fana ko i ye kirakɔrɔw dɔ ye min kununna.”

20Yezu ko: “Aw ka miiri la do, ne ye jon ye?”

Piyɛri y'a jaabi ko: “I ye Ala ka Mɔgɔwolomanin nin ye.”

21Yezu y'a fɔ k'a gwɛlɛya u ma k'u kana o fɔ mɔgɔ si ye.

Yezu b'a ka saya n'a kununni koo fɔ

(Mat 16.21-28; Mar 8.34—9.1)

22A y'a fɔ u ye tugu ko: “Mɔgɔ Dencɛ ka kan ka tɔɔrɔ kosɛbɛ. Cɛkɔrɔbaw ni sarakalasebagaw ani sariya karamɔgɔw bɛna ban a la. U bɛn'a faga, nga tile saba a faganin kɔ, a bɛna kunun.”

23O kɔ, a y'a fɔ jama ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn loon o loon ka tugu ne kɔ. 24Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne kɔsɔn, o tigi nii bɛna kisi. 25A bɛ mun nya mɔgɔ ye ka dinyɛ kɔnɔ fɛɛn bɛɛ sɔrɔ n'o tigi bɛna bɔnɔ a nii la walima n'a yɛrɛ bɛna halaki? 26Ni mɔgɔ min maloyara, a ma sɔn ne ni n ka kuma ma, Mɔgɔ Dencɛ mana segi tuma min na n'a ka nɔɔrɔ ye, n'a Faa ta, ani mɛlɛkɛ senumanw ta ye, a fana tɛna sɔn o tigi ma. 27Tinyɛ na, ne b'a fɔ aw ye ko mɔgɔ minw bɛ yan, u dɔw tɛna sa ni u ma Ala ka sebagaya ye.”

Yezu ka nɔɔrɔ bɛ yira a ka kalandenw na

(Mat 17.1-8; Mar 9.2-8)

28Tile seegi nyɔgɔn o kuma nunu fɔnin kɔ, Yezu taara ni Piyɛri ni Zan ani Zaki ye kulu jamanjan dɔ kan ka Ala dali. 29Ka Yezu to dalili la, a nyada yɛlɛmana, a ka fani gwɛra fɔɔ a bɛ manamana. 30O yɔrɔnin bɛ, cɛɛ fila dɔ lɔra n'u bɛ kumana Yezu fɛ. Olu tun ye Musa ni Eli ye. 31Nɔɔrɔ tun b'u la. Yezu bɛna taa Zeruzalɛmu ka sa cogo min na k'a ka baara dafa, u tun b'o kuma le la. 32Sinɔgɔ tun bɛ Piyɛri n'a tɔnyɔgɔnw na, u sinɔgɔra, u nana kunun tuma min na, u ye Yezu ka Alaya nɔɔrɔ ye, ani cɛɛ fila nunu a gɛrɛfɛ. 33Cɛɛ fila nunu taatɔ ka bɔ Yezu kɔrɔ, Piyɛri y'a fɔ a ye ko: “Matigi, a ka nyi an ka to yan. Anw bɛ bugu saba lɔ, e ta kelen, Musa ta kelen, Eli ta kelen.” Piyɛri tun bɛ min fɔra, a tun m'a lɔn.

34Ka Piyɛri to o kuma na, sankaba dɔ jigira k'u datugu. Kalanden saba nunu y'o ye minkɛ, u siranna. 35Kumakan dɔ bɔra o sankaba la k'a fɔ ko: “Nin ye ne Dencɛ ye ne ye min ci aw ma, aw k'a lamɛn.”

36Kumakan nin bɔ tuma na, kalandenw ma mɔgɔ si ye tugu Yezu kelen kɔ. Olu ye min ye, u y'o mara u kɔnɔ, u m'o lakali mɔgɔ si ye o waati la.

Yezu bɛ jina gwɛn ka bɔ deen dɔ la

(Mat 17.14-18; Mar 9.14-27)

37O dugusagwɛ, u jigitɔ ka bɔ kulu nin kan, jamaba dɔ taara Yezu kunbɛn. 38Cɛɛ dɔ tora jama cɛma ka pɛrɛn ko: “Karamɔgɔ, ne b'i dali, i ka n dencɛ cogoya filɛ, bari ale dama le ye n dencɛ ye. 39Jina dɔ bɛ to ka wili a fɛ, n'a wilila a kama, a bɛ bari ka kule, a b'a yuguyugu kosɛbɛ fɔɔ a daa bɛ kanga. A b'a tɔɔrɔ kosɛbɛ, a tɛ bɔ a la joona. 40Ne y'i ka kalandenw dali ko u k'a gwɛn ka bɔ a la, nga u ma se.”

41Yezu y'a fɔ ko: “Aw bii mɔgɔw kɔni, aw ka jugu, aw tɛ la Ala la. Ne bɛna to n'aw ye k'aw ka koo munyu fɔɔ tuma jumɛn?” A y'a fɔ deen faa ye ko: “Na n'i dencɛ ye yan.”

42Deen gwɛrɛtɔ, jina y'a ta k'a ben duguma k'a yuguyugu kosɛbɛ. Nga Yezu jamana jina kunna k'a gwɛn. Deen kɛnɛyara, a y'a d'a faa ma. 43Mɔgɔw bɛɛ kabakoyara Ala ka sebagaya nin kɔsɔn.

Yezu b'a ka saya n'a kununko fɔ tugu

(Mat 17.22-23; Mar 9.30-32)

Yezu ka kokɛninw bɛɛ tun bɛ mɔgɔw kabakoya minkɛ, a y'a fɔ a ka kalandenw ye ko:

44“N bɛna kuma min fɔ sisan, aw k'o lamɛn ka nya: U bɛna Mɔgɔ Dencɛ don mɔgɔjuguw bolo.” 45Nga olu m'o kuma faamu, a kɔrɔ dogonin tora u ma ten. U tun bɛ siran k'a nyininga o kuma kɔrɔ la.

Jon le ye nyamɔgɔ ye?

(Mat 18.1-5; Mar 9.33-37)

46Kalandenw bɛɛ tun bɛ miiri ko jon le bɛna kɛ nyamɔgɔ ye. 47Yezu y'u ka miiriya lɔn minkɛ, a ye denmisɛn dɔ ta k'a lɔ a gɛrɛfɛ. 48A y'a fɔ u ye ko: “Mɔgɔ o mɔgɔ mana nin denmisɛn nyɔgɔn minɛ ka nya ne kɔsɔn, o tigi bɛ ne le minɛ ka nya. Mɔgɔ min bɛ ne minɛ ka nya, o tigi bɛ ne cibaga le minɛ ka nya. Aw tɛ mɔgɔ min jati aw cɛma, o tigi le ye nyamɔgɔ ye.”

Mɔgɔ min tɛ an jugu ye, o ye an nyiin ye

(Mar 9.38-41)

49Zan ye kuma ta k'a fɔ Yezu ye ko: “Karamɔgɔ, an ye cɛɛ dɔ ye min bɛ jinaw gwɛn ka bɔ mɔgɔw la n'i tɔgɔ ye. An tun b'a fɛ k'a bali, bari an dɔ tɛ.”

50Yezu y'a jaabi ko: “Aw kan'a bali, bari mɔgɔ min tɛ aw jugu ye, o ye aw nyiin ye.”

Samari mara dugu dɔ mɔgɔw bɛ ban ka Yezu ladon

51Yezu tun ka kan ka bɔ dinyɛ na ka ta'a Faa fɛ waati min na, o tuma surunyana minkɛ, a y'a ;naniya ko a bɛ taa Zeruzalɛmu. 52O la, a ye cidenw bila ka ta'a yɛrɛ nya. Olu taara don Samari mara dugu dɔ kɔnɔ ka jatigiso nyini Yezu ye. 53Nga o dugu mɔgɔw ma sɔn ka Yezu ladon, bari a tun bɛ taara Zeruzalɛmu. 54A ka kalanden dɔw Zaki ni Zan y'o mɛn minkɛ, u y'a fɔ Yezu ye ko: “Matigi, i b'a fɛ an b'a kɛ tasuma bɛ jigi ka bɔ sankolo la k'u halaki wa?”

55Yezu y'a nyaa yɛlɛma k'u sɔngɔ kosɛbɛ. 56O kɔ, u tɛmɛna ka taa dugu wɛrɛ la.#9.56 Kitabu caaman na, dɔ faranin b'a kan ko: “55 k'a fɔ ko: Aw ka kan ka kɛ ni miiriya min ye, aw m'o lɔn wa? 56 Bari Mɔgɔ Dencɛ ma na waasa ka mɔgɔw halaki, nga a nana waasa u ka kisi le. O kɔ...”.

Mɔgɔ dɔw b'a fɛ ka tugu Yezu kɔ

(Mat 8.19-22)

57K'u to sira kan, cɛɛ dɔ y'a fɔ Yezu ye ko: “I mana taa yɔrɔ o yɔrɔ, ne bɛna tugu i kɔ.”

58Yezu y'a jaabi ko: “Dingɛ bɛ kongo wuluw fɛ, nyaga bɛ kɔnɔw fɛ, nga layɔrɔ tɛ Mɔgɔ Dencɛ tɔgɔ la.”

59Yezu fana y'a fɔ cɛɛ dɔ ye ko: “Tugu ne kɔ.”

Nga o cɛɛ ko: “Matigi, a to ne bɛ taa n facɛ suu don fɔlɔ.”

60Yezu y'a jaabi ko: “Minw tora soo, a to olu ka u ka suuw don. E kɔni, e ka ta'a wango la ko Ala ye masa ye.”

61Cɛɛ wɛrɛ y'a fɔ Yezu ye ko: “Ne bɛna tugu i kɔ, Matigi. Nga i b'a to ne bɛ ta'a sara n ka somɔgɔw la fɔlɔ.” 62Yezu y'a jaabi ko: “Mɔgɔ o mɔgɔ bɛ misidaba minɛ ko a bɛ sɛnɛ kɛ, n'a bɛ filɛli kɛ a kɔfɛ, o tigi man kan ni Ala ka baara ye.”

Currently Selected:

LUKA 9: JULNT94

Highlight

Copy