MI ÑAMA 29
29
1Ŋan baa tieni maama nne ki gagidi ki ŋanbi Alono leni o bijaba ban tua n kopadicianba ki yaa tuuni npo. Ŋan gandi naatonli leni petona lie ya n ki pia poadoba kuli. 2Ŋan taa *ŋalikama yoma ki pua yaa dupen n ki pia *dabinli leni yaa maada n ki pia dabinli ki buuni leni mi kpama leni yaa lalaadi n ki pia dabinli ki nan ñuni mi kpama bonŋanla. 3Ŋan kpieni likuli ku baabuogu nni ki cuani la u *kaangagidiŋamu nni. Ŋan go cuani laa yogunu li naatonli leni a petonlieda.
4Ŋan kuani Alono leni o bijaba u *Kadikaanu gbandieli nni ki baa mi ñima ki wali ba. 5Li yaa yuandi ŋan lani Alono o tiadi yaadi n gagidi ki ŋani: o tialakaadi, o liadili, u *benŋuunu liadili leni u benŋuunu wuni uba leni li *benliadili ki ñagini o leni u benŋuunu yaa gbanñagidigu. 6Ŋan fini o yuli ti finfinjuadi ki maani mi maalima bonla yaala n gagidi ki ŋani ti finfinjuadi po. 7Ŋan taa mi kpagagidikaama ki wuli o yuli po ki gagidi ki ŋanbi o. 8Li yaa puoli ŋan yini Alono bijaba, ki teni ban nagini ŋan lani ba bi tiadi. 9Ŋan ñagini ba bi gbanñagiditi ki fini ba bi finfinjuadi. Li yaa puoli bi baa yaa tie kopadicianba yaa yogu n tu yaa yogu. Ŋan baa tieni maama n yeni ki kuani Alono leni o bijaba bi tuonli nni. 10Ŋan cuani li naatonli u Kadikaanu gbandieli nni. Alono leni o bijaba baa maani bi nii li naatonli yuli po. 11Ŋan kodi li naatonli Li Miali Diedo nintuali u Kadikaanu gbandieli buliñoatuogili kani. 12Ŋan ñani li naatonli soama ki tandi ki sii ma leni a nubili ki duunduuni li *padibinbinli yina, ki yuandi ki wuli mi soama yeni kuli li padibinbinli bunbunli po. 13Ŋan taa yaa kpakaagu n ŋuagi ti nuadi kuli, leni li puali leni a cayaanlieda leni a kpama, ki sia likuli li padibinbinli po. 14Ama ŋan ñani li nagili nni li naatonli nandi, li gbangu leni li bindi ki ban buoni likuli. Laa padili tie ti *tuonbiadi padili.
15Ŋan taa a petona siiga yenli, Alono leni o bijaba baa maani bi nii li yuli po. 16Ŋan kodi li petonli yeni ki taa li soama ki wuli ma ki gaani ki lindi li padibinbinli kuli. 17Ŋan jia li petonli bonjenajena ki ŋuudi ki ciaga leni a taana ki maani a li padibinbinli po li yuli leni yaa bonjena n sieni po. 18Ŋan sia li petonli yeni kuli li padibinbinli po. Laa bonla tie li padijuukaali Li Miali Diedo po yaala n baa buodi ke li nuulu baa yaa mani Li Miali Diedo U Tienu po.#Efe 5.2; Filp 4.18
19Ŋan taa li petonlieli Alono leni o bijaba n maani bi nii li yuli po. 20Ŋan kodi li petonli yeni ki taa li soama ki tieni Alono leni o bijaba jienu tubifajoma po ki go tieni bi jienu nubijali leni bi jientajenbijali po. Ŋan wuli mi soama ki gaani ki lindi li padibinbinli. 21Lani yaa pendi ŋan ñani mi soama li padibinbinli kani ki go ñani yaa kpama n gagidi ki ŋani ki miimii Alono leni o tiadi po, ki go joagi o bijaba leni bi liada po. Laa bonla yaa pendi ŋan gagidi ki ŋanbi Alono leni o tiadi, o bijaba moko leni bi tiadi baa gagidi ki yaa ŋani. 22Ŋan taa o pia yeni juoli, yaa kpama n baali ki ciaga, li puali n puabi yaa nandi nni, a cayaanlieda leni a kpama leni li jienpanli, kelima li petonlieli yeni yaa padili n baa tua bi kopadicianba tuonli cilima. 23Ŋan ñani yaa dupen n ki pia dabinli baabuogu yaagu n se Li Miali Diedo nintuali yaa niinni maadiyenli leni li kpama leni lalaayengu. 24Ŋan tieni likuli Alono leni o bijaba nuu nni ki teni ban tieni yaa bogidili n doagidi ke bi teni la U Tienu. 25Lan yaa pendi ŋan ga bi nuu nni ki sia la li padibinbinli po. Laa padili tie padijuukaali Li Miali Diedo nintuali ki go tie yaa nuulu n mani Li Miali Diedo po.
26Li yaa yuandi ŋan taa li padipetonli yeni bengunli ki tieni yaa bogidili n doagidi ke a teni li Li Miali Diedo, lani n baa tua a yaa biinu.
27Ŋan gagidi ŋan den kodi yaa petonli ki kuani Alono leni o bijaba bi tuonli yeni yaa bengunli leni li panli lan yaa tie li bogidili. 28Lani n baa teni Isalele yaaba n yaa ñandi yogunu kuli ki yanga nni laa nandi Alono leni o puoliŋuani po, bi yaa cuani n nintuali mi taanyenma padili po yaa yogunu. Bi baa yaa ñandi laa bonla Li Miali Diedo po.
29Alono yaa kpe o bijaba n baa ga laa tiagagidikaadi ki laa ti ban gandi ba yaa daali ki gagidi ki ŋanbi ba ke bi baa cili bi tuona.
30Yaa kopadiciamo n baa ga Alono kaanu o bijaba siiga baa laa laa tiadi dana lele. O baa kua u Kadikaanu gbandieli nni ki soani wan pia yaa tuonli u kaangagidiŋamu yaa niinni.
31Ŋan taa li petonlieli yaali n yen padi bi kopadicianba n cili bi tuonli yaa daali ki ŋaani li nandi yaa kaanu n gagidi ki ŋani yaa niinni. 32Alono leni o bijaba baa ŋmani laa nandi leni yaa dupen n sieni ku baabuogu nni u Kadikaanu gbandieli buliñoabu kani. 33Bani bebe n baa fidi ki je yaa jiema n kua mi gagidima leni bi kopadicianba tuoncilima ŋantaadi leni yaa padili n baa mia U Tienu sugili. Nitoa kuli ki pia u sanu ki je laa bonla kuli, kelima li tie yaa jiema n gagidi ki ŋani. 34Li yaa tie ke bi kopadicianba tuonli cilima padinandi leni li dupen yaa sieni ku tiŋaagu, ŋan sia yaala n sieni. Oba kan je laa jiema kelima li tie yaa bonla n gagidi ki ŋani.
35Ŋan tieni Alono leni o bijaba po nani min bili apo maama. Bi kopadicianba tuoncilima bogida baa tieni dana lele.
36Daali kuli ŋan padi naatonyenli ti tuonbiadi sugili po, yene ke a baa gagidi ki ŋanbi li padibinbinli, lani yaa puoli ŋan wuli mi kpama lipo ki gagidi ki ŋanbi li. 37Laa bogida baa tieni dana lele. Li yaa pendi li padibinbinli baa gagidi ki yaa ŋani hali boncianla. Yaa nilo bi yaa bonla n sii li padibinbinli baa gagidi.
Daali kuli leni li pada
38Daali kuli ŋan padi li padibinbinli po pebila lie yaaba n pia binyenli yenli. Ŋaa tiendi yeni daali kuli ki da cedi. 39Yi yen baa padi ki pebiyenga ku tiŋaagu, ki bonliega mo ku yenjuogu. 40Ku tiŋaagu leni ku yenjuogu yaa pebiga yaa po ŋan baa mi yoma kilo bonba taa ki nugi ma leni *olifie kpama litidi yendo leni boagidima, ki go pugini duven tiidi daama litidi bonyendo leni boagidima. Li padili yaa po li baa yaa tie yaa padili yaa nuulu n mani Li Miali Diedo po. 41Ŋan padi ki pebiliega ku yenjuogu. Laa padili leni laa cabima baa tie nani ku tiŋaagu yaa pada yeni. Ŋan juu laa padili lin tua npo yaa padili yaa nuulu n mani. 42Yinba leni yi puoliŋuani n yaa padi laa padili hali yaa yogu n tu yaa yogu. Yin yaa padi laa padili u Kadikaanu gbandieli buliñoatuogili nni Li Miali Diedo nintuali. Lankane n yen baa kadi leni yi ki maadi leni yi.
43N yen baa kadi leni Isalele yaaba laa kaanu yo. N kpiagidi baa gagidi ki ŋanbi laa kaanu. 44N baa gagidi ki ŋanbi u Kadikaanu gbandieli leni li padibinbinli. N baa gagidi ki ŋanbi Alono leni o bijaba ke ban yaa padi n pada. 45N baa ye Isalele yaaba siiga. N baa tie bi Tienu. 46Lanwani bi baa bandi ke mini n tie Li Miali Diedo bi Tienu yua n ñani ba Ejipiti diema nni ki baa yaa ye bi siiga. Mini n tie Li Miali Diedo bi Tienu.
Tulale padibinbinli
Currently Selected:
MI ÑAMA 29: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
