MI ÑAMA 32
32
1Isalele yaaba n den laa ke Musa waagi li juali yuli po ki naa jiidi, bi den taani Alono kani ki yedi o: «Fii ki duadi tipo yaa *buli n baa yaa cuoni ti nintuali, kelima Musa yaa ja n ñani ti Ejipiti diema nni yeni tii bani yaala n tieni o.»#JTT 7.40
2Alono den yedi ba: «Yin ñani mani yi puoba leni yi bijaba leni yi bisiaba n pia yaa tubilenlena ke a tie wula ki cuani n kani.» 3Lanwani bi niba kuli den ñani bi tubilenlena ya n tie wula ki cuani Alono kani. 4Wan den ga ŋa bi nii nni, o den duadi bipo ki naabiga nannanli. Lani bi den yedi: «Diidi ki le mani, Isalele yaaba, yi Tienu n na, yua n den ñani yi Ejipiti diema nni.»#1Bad 12.28; JTT 7.41 5Alono den laa lankuli, o den maa li *padibinbinli ki nintuali, ki kpaani ki yedi: «Saala baa yaa tie mi *jaanma Li Miali Diedo yeli po.» 6Lan den fii ki faa bi den yagidi ki fii ki padi a padijuukaana ki cuani mi taanyenma pada ke ku niligu den kali ki dini ki go ñuni. Bi den kali ki dini ki go ñuni, lani n pendi bi den fii ki jeli ki ciaga.#1Kol 10.7
7Li Miali Diedo den yedi Musa: «Ŋan fii ki jiidi kelima a niba, ŋan ñani yaaba Ejipiti diema nni yeni biidi bi yula. 8Bi jaligi ki ŋa min den bili ban yaa ŋua yaa sanu yeni. Bi duadi bi yula po ki naabiga ki labini ki kani ki pugi ga ki padi ga a pada ki yedi: Isalele yaaba, diidi ki le mani yi Tienu n na, yua n den ñani yi Ejipiti diema nni.» 9Li Miali Diedo den yedi Musa: «N nua ke yaa nibuolu n tie na tie i tupaali danba. 10Moala ŋan cedi nni, ke n pabienli baa pebidi bipo, min bolini ba. Ama n baa teni fini, ŋan tua nibociamu.»
11Musa den mia Li Miali Diedo U Tienu ki yedi: «Li Miali Diedo be n teni ke a pali pebidi a yaa nibuolu po boncianla yeni? Ŋan den ñani yaaba Ejipiti diema nni leni u paaciamu leni yaa nuu n pa?#Coa 14.13-19 12Be yaa po ke Ejipiti yaaba baa fidi ki yedi: ‹O den ñani ba nekanba ki bua ki faligi ba ki kpa ba a juana po, ki bolini ba ki ñani bi buolu ŋanduna nni.› Ŋan cedi ki ŋa a pabienli, ki lebidi a yama ki da go bolini a yaa nibuolu nani ŋan bi jagi ke a baa bolini maama yeni. 13Ŋan tiadi a naacenba Abalahama leni Isaaka leni Isalele po, ŋan den taa a yeli ki poli ki yedi yaaba: ‹N baa teni yi puoliŋuani n yabidi nani yaa ŋmabila n ye tanpoli yeni, n baa pa yi yaabila min den maadi yaa diema maama yeni man yaa tie bi yaa piama hali yaa yogunu kuli.› »#Cil 22.16-17; 17.8
14Lanwani Li Miali Diedo den lebidi o yama, waa den tieni wan den jagi ke o baa pua o niba yaa nafanu leni yaa yebiadima.
15Musa den lebidi ki jiidi li juali ki kubi siedi maama *tanpabiliedimu o nuu nni. Mu tanpabiliedimu yeni kaliliedi kuli den pia i diani. 16Mu tanpabiliedimu den tie U Tienu wani oba n den ŋanbi yaamu. I diani mo den tie U Tienu wani oba yaa diani wan den diani yi mu tanpabiliedimu po. 17Josue n den gbadi ku niligu niali ke bi kpaani, o den yedi Musa: «Bu toabu fuugu ña li nagili po.» 18Musa den goa ki yedi: «Laa tie yaaba n paadi yaa kuudi, laa didi tie ban paadi yaaba mo yaa bubula. Min gba yaala tie yaaba n yiini yaa niali.»
19Wan den nagini li nagili yaa yogunu o den laa ki naabiga leni bi cajeliba. Musa pali den beni boncianla ke o den luni wan kubi yaa tanpabiliedimu o nuu nni ki mudi mu li juali tinga. 20O den taa ban den duadi yaa naabiga ki juu ga mi fantama nni ki mudimudi ga yomi yomi ki yadi ki yoma u ñingbanu po ki ñuni ma Isalele yaaba. 21Musa den yedi Alono: «Ku niligu na tieni a be ke a teni ke bi tieni yaa tuonbiaciandi n tie na?» 22Alono den goa ki yedi o: «N daano ŋan da bieni a pali. Fini aba, a bani ke bi niba na yama ye mi biadima nni yaa yogunu kuli. 23Bi den yedi nni: ‹Tagi ti po o bulo yua n baa ye ti liiga kelima Musa yua n den ñani ti Ejipiti nni tii bani yaala n tieni o.› 24Lane n mo den yedi ba: Yaaba n pia wula kuli ban ñani ki cuanne. Bi teni nni ke n luni la mi fantama nni ke ki naa naabiga ñani mi niinni.»
Bi tuonbiadi panpaani
25Musa den laa ke ku niligu lebidi bi yula ki tie kala kelima Alono den cedi ba ke bi tie kala ki kpandi ti laadi bonla bi yibalinba nintuali. 26Lanwani Musa den gedi ki se li nagili buliñoabu kani ki kpaani ki yedi: «Ŋme n baa ŋoadi Li Miali Diedo? Wan cua n kani na.» Lanwani Lefi buolu yaaba kuli den fii ki taani ki cua o kani. 27O den yedi ba: «Li Miali Diedo Isalele Tienu yedi mine: ‹Yua kuli n bali o jugisiega ki kua li nagili nni ki cili bu naa buliñoabu ki ban tuoni buyabu. Yua kuli n kpa o kpiilo, o danli, o waalo bi o kpelo.› » 28Lefi buolu yaaba den tieni nani Musa n den yedi ba maama. Laa daali ku niligu siiga yaaba n den kpe den pundi niba tudataa (3 000). 29Musa den yedi: «Yin gagidi mani yi yula Li Miali Diedo po dinla, baa ke yua kuli ku o biga, o kpiilo. Lani n tie Li Miali Diedo n pa yi li seli dinla.»
Musa mia Isalele yaaba po sugili
30Lan den fii ki faa, Musa den yedi ku niligu: «Yi tieni yaa *tuonbiadi n bia boncianla. Moala, n baa do ki gedi Li Miali Diedo kani ki le n yaa baa baa ti candandi yi tuonbiadi po.» 31Musa den goa ki gedi Li Miali Diedo kani ki yedi: «Ŋain, ku niligu na tieni ti tuonbiadi boncianla. Bi duadi bi yula po wula bulo. 32Moala n mia ŋan tieni bipo bi tuonbiadi sugili, yeni yaaka n mia ŋan duuni ki ñani n yeli ŋan diani li yaa tili nni.»#32.32 Diidi: Pis 139.16; Dan 12.1; Luk 10.20; Doa 3.5; 20.15. 33Li Miali Diedo den yedi Musa: «N baa duuni ki ñani yua n tieni npo ti tuonbiadi yaa yeli n tili nni. 34Ŋan gedi moala ki ban ciani ku niligu min den waani a naankani. Diidi ki le n maleki baa kua a liiga ki yaa ciagi a. Ama n pantuuli daali yaa cua n baa guani ba bi tuonbiadi panpaani ki tundi ba tundifala bi tuonbiadi po.» 35Li Miali Diedo den luni ku niligu u yianbiadu kelima bi den tagi ki naabiga Alono n den duadi yaaga yeni.
U Tienu yedi Musa ke ban fii ki suagi liiga
Currently Selected:
MI ÑAMA 32: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
