MI ÑAMA 6
6
1Li Miali Diedo den yedi Musa: «Moala a baa le min baa tieni *Falono yaala. N baa teni wan cedi ban gedi leni n nuu paaciamu. N go baa tieni o u paalu wan deli yi o diema nni leni laa paaciamu.»
U Tienu niani Musa ke o baa faabi Isalele yaaba
2U Tienu den maadi leni Musa ki yedi o: «N tie Li Miali Diedo.#Cil 17.1; 28.3; 35.11; Ñam 3.13-15 3N den doagidi Abalahama kani, Isaaka kani leni Jakobo kani ke n tie U Tienu yua n tie U Tienu U Paaciamu kuli Daano. Ama baa den bandi nni leni n yeli yaali n tie: “Li Miali Diedo.” 4N go den kuani n *ŋantaado leni ba ke n baa pa ba Kanana yaa diema ban den goagoadi ki go kali naankani kuli. 5N gbadi Isalele yaaba yenbidi kelima Ejipiti yaaba n teni ke bi laadi yaa fala ti yonbidi nni. N tiadi n ŋantaado. 6Li tie lani yaa po ke a baa yedi Isalele yaaba: N tie Li Miali Diedo, n baa faabi yi leni Ejipiti yaaba n tuuni yi yaa tuona. N baa faabi yi bi yonbidi nni. N baa doagidi n paaciamu ki jia ti buudi ki ciadi yi. 7N baa taa yi yin tua n niba. N baa tie yi Tienu ke yi baa bandi ke li tie mini Li Miali Diedo yi Tienu. N baa faabi yi leni Ejipiti yaaba n tuuni yi yaa tuona kuli. 8N baa teni yin kua yaa diema ke n den poli ke n baa pa Abalahama leni Isaaka leni Jakobo. N baa pa yi ma man tua yi diema. Mini n tie Li Miali Diedo.» 9Lani n tie Musa n den yedi Isalele yaaba yaala. Ama baa den fidi ki cengi Musa maama kelima bi yonbibiaditi po. 10Li Miali Diedo den maadi leni Musa ki yedi: 11«Gedi ki maadi leni Ejipiti bado Falono ke wan cedi Isalele bila n ña o diema nni.» 12Musa den goa ki yedi Li Miali Diedo nintuali: «Diidi Isalele yaaba naa cengi n maama, Falono wan baa ga lede ki cengi mini yua ki bani maama?»
13Li Miali Diedo den maadi Musa leni Alono ki teni ba a ñoabona Isalele yaaba po leni Ejipiti bado Falono po ke wan teni ke Isalele yaaba n ña Ejipiti diema nni.
Musa leni Alono yaajanba yela
14Bine n tie bi buoli yudanba. Isalele bijakpelo Lubena yaa bijaba den tie Enoka leni Palu leni Hetisiloni leni Kalimi. Bani n tie Lubena yaa buoli. 15Simeyono mo yaa bijaba tie Yemuela leni Jamina leni Ohada leni Jakina leni Tisokala leni Kanana yaa pua yaa bijua Sayula. Ban mo n tie Simeyono yaa buoli.
16Bine mo n tie Lefi mo yaa bijaba yaa yela leni bi bila, Gelisoni leni Kehati leni Melali. Lefi yaa miali bina den tie kobiga n piitaa n bina lele. 17Gelisoni mo yaa bijaba den tie Libini leni Simeyi leni bi yaa buoli. 18Kehati mo yaa bijaba den tie Amilama leni Jitisehala leni Ebiloni leni Usieli. Kehati mo yaa miali bina den pundi kobiga n piitaa n bina taa. 19Melali mo yaa bijaba den tie Makili leni Musi. Bani mo n tie Lefi yaa buoli leni bi yaa bila.#Coa 3.17-20; 26.57-58; 1Baj 6.16-19 20Amilama den taa o baa waalo Jokebedi ke o tua o pua. O den mali opo Alono leni Musa. Amilama mo yaa miali bina den tie kobiga n piitaa n bina lele. 21Jitisehala mo yaa bijaba den tie Kole leni Nefagi leni Sikili. 22Usieli leni Elitisafani leni Sitili. 23Alono den taa Aminadabi bisalo Eliseba, yua n tie Nahisona yaa waalo ke o tua o pua. O den mali opo Nadabi leni Abihu Eleyasala leni Itamali. 24Kole mo yaa bijaba den tie Asidi leni Elikana leni Abiasafi. Bani mo n tie Kole buolu yaaba. 25Eleyasala, Alono bijua, den taa Putiela yaa bisiaba siiga nni yendo, ke o tua o pua. O den mali opo Finea. Bani mo n tie Lefi yaa buolu yudanba leni bi buoli. 26Li tie laa Alono leni laa Musa yo ke Li Miali Diedo den yedi ba: «Yin teni Isalele yaaba n ña Ejipiti diema nni ki ŋoadi fuuli fuuli nani bi toacaga n tie maama.» 27Li tie bani n den maadi leni Ejipiti bado Falono ke wan ñani Isalele bila Ejipiti diema nni. Li tie laa Musa leni laa Alono yeni.
U Tienu goa ki tiadi Musa o ñoanianu
28Li Miali Diedo n den maadi leni Musa Ejipiti diema nni, Li Miali Diedo den yedi Musa: «N tie Li Miali Diedo. 29Waani Ejipiti bado Falono min baa waani a yaala kuli.» 30Musa den goa ki yedi Li Miali Diedo nintuali: «Diidi mii bani maama, Falono baa tuo ki cengi nni lede?»
Currently Selected:
MI ÑAMA 6: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
