MI ÑAMA 9
9
1Li Miali Diedo den yedi Musa: «Gedi *Falono kani ki waani o yaa maama n tie na: ‹Li Miali Diedo, Ebilu yaaba Tienu yedi: Cedi mani n niba n gedi ki kpiagi nni. 2A yaa yie ki naa tuo ke bi gedi, a yaa go kubi ba yeni, 3diidi Li Miali Diedo nuu baa bolini a yangola ya n ye i kuani nni ki go pua i taami leni i ŋunbi leni ti yuoyuodi leni i ne leni i pe kuli. Yaaba n baa kpe baa yaba hali hali boncianla. 4Li Miali Diedo baa tieni mi gagidima Isalele yaaba yaa yangola leni Ejipiti yaaba yaa yangola siiga. Yaaba n tie Isalele yaaba yaa yangola kan bodi ba. 5Li Miali Diedo den bili u yogunu ki yedi: Saala, mini Li Miali Diedo baa tieni lankuli mi diema nni.› » 6Li Miali Diedo den tieni yeni mo, lan den fii ki faa yaa yogunu. Ejipiti yaaba yaa yangola kuli den kpe, ama baa yanyenga naa den kpe Isalele yaaba yangola yaa siiga. 7Falono den soani ki bandi yaala n tieni kuli ki sua ke baa yanyenga Isalele yaaba yaa yangola siiga nni naa den kpe. Ama Falono pali go den juagi ke waa den tuo bi niba n gedi.
O fala luobilo: A sinakpina
8Li Miali Diedo den yedi Musa leni Alono: «Gbieni yi nii leni ki buaga diekanyaanma. Musa n lu ma tanpoli Falono nintuali. 9Mi baa tua wagima ki yadi ki pini Ejipiti diema kuli. A sinakpinbiada baa cuo bi niba leni ti yandi lan tie mi diema nni naani kuli.» 10Bi den taa ki buaga yaa diekanyaanma ki gedi Falono nintuali. Musa den luni ma tanpoli ke mi tua bi niba po leni ti yandi kuli po n cili sinakpina ki yuandi ki pudi.#Doa 16.2 11Bi ñoagidanba naa den fidi ki cua Musa kani kelima a sinakpina yaa po. Kelima a sinakpina den cuo bi ñoagidanba nani lan cuo Ejipiti yaaba kuli maama. 12Li Miali Diedo den teni ke Falono pali go juagi ke o naa den cengi Musa leni Alono maama nani Li Miali Diedo n den tuodi ki waani Musa maama.
O fala leleelo: A tatana
13Li Miali Diedo den yedi Musa: «Fii ku tiŋapanpangu ki gedi Falono kani ki yedi o: ‹Li Miali Diedo Ebilu yaaba yaa Tienu yedi: Cedi n niba n gedi ki ban kpiagi nni. 14Kelima moala wani, n baa soani n falaciami kuli fini leni a naacenba leni a niba kuli po ke ŋan bandi ke oba kuli naa ye, yua n naani leni nni ki tinga nni kuli. 15Moala li yaa tie ke n tandi n nuu ki pua fini leni a niba u yianbiadu, a baa bodi mi tinfanma nni. 16Ama n cedi ke a ye ke ŋan le n paaciamu, n yeli mo go baa ña li ŋandunli nni kuli.#Lom 9.17 17A yaa go fiini a yuli n niba po ki naa tuo ke bi gedi, 18diidi, saala u naa yogunu n baa teni a tatana n mii ki tinga nni ki yaa yaba hali boncianla, ke li buolu daa kpa tieni Ejipiti diema nni ki cili ban pu Ejipiti diema yaa yogunu ki ban tuoni dinla. 19Lanwani, ŋan teni ban kuani a yangola u wuonkaanu nni leni ŋan die yaala kuli i kuani nni. A tatana yaa baa ki taani yaa niba leni yaa yandi kuli u kuanu po ke baa kua ti diedi nni, bi baa kpe.› » 20Falono yaa naacenba siiga yaaba n den jie Li Miali Diedo yaa maama, den kuani bi naacenba leni bi yangola a diena nni. 21Ama yaaba n naa den nua Li Miali Diedo maama ke mi tie moamoani, den ŋa bi naacenba leni bi yangola i kuani nni.
22Li Miali Diedo den yedi Musa: «Tandi a nuu tanpoli po ke a tatana n baa Ejipiti diema nni kuli bi niba po leni ti yandi leni i kuani yaa muadi kuli po Ejipiti yaa diema nni kuli.»
23Musa den tandi o gbiamu tanpoli po ke Li Miali Diedo den soani i tatantani leni a tatana. Mi fantama mo den jiidi ki tinga nni. Li Miali Diedo den teni ke a tatana mini Ejipiti diema nni kuli. 24A tatana den baa ki taani leni mi fantama ki yaba hali boncianla ke li buolu daa den kpa tieni Ejipiti diema nni hali man den tua diema yaa yogunu.#Doa 8.7; 16.21 25Ejipiti diema nni kuli a tatana den pua yaaba n ye i kuani nni kuli ki cili leni bi niba ki taani leni ti yandi kuli. A tatana go den pua i kuani nni muadi ki kua kua i tiidi kuli. 26Ama Gosena yaa diema nni wani, Isalele yaaba n den ye naankani yeni, tatana naa den tieni.
27Falono den teni bi yini Musa leni Alono ki yedi ba: «Moala wani n tieni ti *tuonbiadi. Li Miali Diedo tiegi, mini leni n niba n nani. 28Mia Li Miali Diedo ke i tatantani leni a tatana n da go ye. Lanwani n baa tuo yin gedi ki kan go yie yipo.» 29Musa den yedi o: «N yaa ñani u dogu nni, n baa yugidi n nii ki teli Li Miali Diedo po, lanwani i tatantani baa sedi, a tatana kan go yaa baali, ke ŋan bandi ke Li Miali Diedo n die ki tinga. 30Ama n bani ke fini leni a naacenba yi daa jie Li Miali Diedo U Tienu.» 31*Olije leni *len den biidi cain, kelima olije den bua ki maa, len mo den tieni mi puuma. 32*Ŋalikama leni o yaa buoli naa den biidi kelima baa den be tonma.
33Musa den ñani Falono kani ki ñani u dogu nni. O den yugidi o nii Li Miali Diedo kani ke i tatantani leni a tatana den sedi, ki taaga moko den cedi kaa go mii. 34Falono n den laa ke ki taaga leni a tatana leni i tatantani sedi, o go den tieni ti tuonbiadi ki juagi o pali, wani leni o naacenba kuli. 35Falono pali go den juagi ke waa den tuo ke Isalele yaaba n gedi nani Li Miali Diedo n den yedi maama Musa ñoabu nni.
O fala niilo: A dondoba
Currently Selected:
MI ÑAMA 9: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
