MI CILIMA 3
3
1U Tienu n den tagi yaa moayandi kuli yaa siiga, o wa den fani ki cie bikuli. O wa yeni den yedi o pua: «Naani li tie moamoani ke Li Miali Diedo yedi: ‹Yin da ŋmani u koaŋamu yaa tiidi yaa bonluonkaala kuli?› »#Doa 12.9; 20.2 2O pua den yedi o wa: «Ti baa fidi ki ŋmani u koaŋamu tiidi yaa bonluonkaala. 3Ama yaa tibu n se u koaŋamu siiga yaa bonluonkaala wani, U Tienu den yedi: ‹Yin da ŋmani la ki da sii la mo ke yin da ti kpe.› » 4O wa den yedi o pua: «Yi kan kpe ba. 5Li tie kelima U Tienu bani ke yi yaa ŋmani la yaa daali, yi nuni baa ŋubidi ke yi baa yaa tie nani U Tienu yeni ki bani mi ŋanma leni mi biadima.» 6O pua den laa ke bu tibu bonluonkaala ŋani li bonjekaala po, ki go ŋani bu nunbu po ki tie yaa bonbuadila n baa teni ke o nilo n baa mi yanfuoma. O den cie bu bonluonkaala ki ŋmani ki puni o calo, yua n den ye o kani, ke omo ŋmani.
7Bani kuli yaa nuni den ŋubidi ke bi den bandi ke bi ye mubima. Bi den ŋali bu kankanbu yaa faadi ki tieni a banda. 8Bi den gbadi Li Miali Diedo U Tienu yaa nialu ke o den goadi u koaŋamu nni ku yenjoboandigu. O ja leni o pua den sani ki wuoni u koaŋamu tiidi yaa siiga ki foagidi leni Li Miali Diedo U Tienu nunga. 9Li Miali Diedo U Tienu den yini o ja ki yedi o: «A ye le?» 10O den yedi: «N gbadi a nialu u koaŋamu nni ki jie kelima n ye mubima ke n sani ki wuoni.» 11Li Miali Diedo U Tienu den yedi: «Ŋme n waani a ke a ye mubima? Naani a ŋmani min den kuani a ke ŋan da ŋmani yaa tibu yaa bonluonkaala?» 12O ja den yedi: «Ŋan den puni nni yaa pua yeni wani n teni nni bu tibu yaa bonluonkaala ke n ŋmani.» 13Li Miali Diedo U Tienu den yedi o pua: «Be yaa po yo ke a tieni line?» O pua den yedi: «O wa n boandi nni ke n ŋmani.»#2Kol 11.3; 1Tim 2.14
14Li Miali Diedo U Tienu den yedi o wa:
«Kelima a tieni lani,
A baa yaa tie ti solindi yua ti denyandi kuli yaa siiga
Leni ti moayandi kuli yaa siiga,
A baa fuli a tugu po
Ki yaa di mi tama hali a miali dana kuli.
15N baa bili ti yibalindi fini leni o pua yaa siiga,
A puoliŋuani leni o puoliŋuani yaa siiga.
O baa mudi a yuli,
Amo baa poagili o taajentindili.»#Doa 12.17
16O den yedi o pua:
«N baa pugini apo fala ŋan punbi yaa yogunu.
A baa maa leni fala.
A gbanandi bonbuakaala baa ŋoadi a calo yaala,
Ama o baa diedi a.»
17O den yedi o ja:
«Kelima a cengi a pua yaa maama
Ki ŋmani min den kuani a ŋan da ŋmani yaa tibu yaa bonluonkaala,
Ki tinga baa tua ti solindi yaaga kelima fini yaa po.
A baa baadi ki niinni a bonjekaala leni fala
Hali a miali dana kuli.
18Ti moabiaditi leni i konkoni baa pudi ki tinga nni,
A baa yaa di yaa bonjekaala n ye u kuanu nni.#Ebl 6.8
19A baa soani li tuonli ki mande ki nan baa li bonjekaala
Hali ŋan baa goa ki tinga nni,
Ŋan den ñani naankani,
Kelima a tie mi tama ki go baa guani mi tama nni.»
20Adama den cili o pua yeli Awa, kelima o den tie miali fo kuli yaa naa. 21Li Miali Diedo U Tienu den tieni ti gbandi yaa liada Adama leni o pua po, ki lani ba. 22Li Miali Diedo U Tienu den yedi: «O ja kpandi ki tua nani tinba yeni ki bandi mi ŋanma leni mi biadima. Tin yie opo moala ke wan da tandi o nuu ki cie li miali tibu yaa bonluonkaala ki ŋmani ki yaa ye ki naa pia juodima.»#Doa 22.14 23Li Miali Diedo U Tienu den deli Adama Edena koaŋamu nni ke wan yaa ko ki tinga wan ñani yaaga yaa niinni yeni. 24Wan den deli Adama yeni, o den sieni *selubanba ke bi fuundi yaa jugisiemu n pia mi fantama Edena yaa koaŋamu puoli ke ban yaa guu li miali tibu yaa sanu.
Kayina leni Abela
Currently Selected:
MI CILIMA 3: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
