MI CILIMA 41
41
1Bina lie n den pendi, *Falono den dangi ti dangidi. O den se u kpenciamu kani. 2Naañuana lele yaa gbengi ki pia mi kpama ki go ŋani bonŋanla den ñani u kpenu nni ki se li boanjaali po ki ŋmani ti muadi. 3Lani yaa puoli naañuamu lele bonkuonmu mo den ñani u kpenu nni ki cua ki balini ba ki se li boanjaali po. 4Yaa naañuamu n kuodi ki go gundi yeni den ŋmani yaa naañuana n ŋani ki go pia mi kpama yeni. Falono den fundi. 5Falono den guani ki go dangi mi taaliema. 6O den laa disiandi lele ke ti gbengi ki go ŋani ki se kankagiyenli po. Li yaa puoli po o go den laa disianmu lele ke mu jugi ke puoli faalu fifigi ke mu kuodi. 7Mu disiankuonmu yeni den nali ti disiangbeeleleediti yeni. Falono den fundi. Wan den dangi yaa dangidi n yeni.
8Lan fii ki faa Falono yama den yagi. O den teni ke bi yini Ejipiti ñoagidanba leni bi yanfodanba kuli. Falono den togidi ba o dangidi. Oba kuli naa den fidi ki waani Falono li bundima.#Dan 2.2 9Lanwani yua den tugi yaaba n tendi o bado o bonñokaala kuli yaa yuli yeni den yedi: «Falono ŋan sinja npo ke dinla n baa tiadi n tagili min den bii yaa biili yaa maama. 10Falono pali den biidi o naacenba po ki teni ke bi luoni mini leni yua den tugi yaaba die a bonjekaala kuli yaa yuli li kpaadidieli yudaano deni. 11Mini leni wani, ñayengu ti den dangi yaa dangidi n pia mi bundima. 12Laa kpaadidieli den pia Ebilu yaaba siiga jawayendo ke o den lo leni ti ki tie li kpaadidieli yudaano yaa yonbo. Ti den togidi o ti dangidi. O den waani ti yua kuli dangidi n bundi yaala. 13Li bonla kuli den tieni nani wan den bundi tipo ti dangidi maama yeni. Falono den goa ki kuani nni n tuonli nni ki teni ke bi soadi o yendo mo.»
Josefi bundi Falono po o dangidi
14Falono den teni ke bi yini Josefi. Bi den jaligi ki ñani o li kpaadidieli nni. O den kuo o yuli leni o langbiadi ki lebidi o tiadi ki gedi Falono kani. 15Falono den yedi Josefi: «N dangi ti dangidi. Oba kuli ki fidi ki baa waani nni tin bundi yaala. Ama n gbadi ke fini wani baa fidi ki bundi yaa dangidi ke bi togidi a.» 16Josefi den goa ki yedi Falono: «Min kaa baa fidi ki bundi ti dangidi. U Tienu n baa doagidi apo ti dangidi yeni n bua ki yedi yaala.»
17Lanwani Falono den yedi Josefi: «N dangidi nni, n den se u kpenciamu boanjaali po. 18Naañuana lele yaa gbengi ki pia mi kpama ki go ŋani den ñani u kpenciamu nni ki se li boanjaali po ki ŋmani ti muadi. 19Lani n pendi naañuakalikuonmu lele leni bi kalikuomi yaamu yaa noalima n gundi hali ke n daa laa laa gundima buolu Ejipiti nni, mo den yuandi ki ñani. 20Mu naañuakalikuonmu yaamu n gundi yeni den ŋmani a naañuagbengileleeda yaa gbengi ki pia mi kpama yeni. 21Baa ke mu den nali ba, mu den baa se ki tie bonkuonmu nani mi kpiama yeni leni mu gundima. Li yaa puoli n den fundi. 22Lani n pendi, n go den dangi ti naa dangidi: disiandi lele ke ti gbengi ki go ŋani den ye kankagiyenli po. 23Disianjugimu lele yaamu ke puoli faalu figi mu ke mu kuodi den yuandi ki pudi ti disiangbeedi po. 24Mu disianjugimu yeni den nali ti disiangbeedi yeni. N togidi n ñoagidanba laa dangidi, ama baa fidi ki bundi npo. Waani nni lan bua ki yedi yaala.»
25Josefi den yedi Falono: «Falono, a dangiliediti kuli bundi bonyenla yo. U Tienu waani Falono wan baa tieni yaale. 26A naañualeleediŋama yeni tie bina lele yo, ti disiangbeeleleediti yaadi n ŋani yeni moko tie bina lele goge. Likuli tie dangiyende. 27Yaa naañuamu n den kuodi ki go gundi yeni ki den ŋoadi bi kpiaba puoli yeni, muni moko tie bina lele yo, muni leni yaa disianmu n den faani ki jugi ke puoli faalu cua ki waadi mu yeni kuli tie bina lele kome. 28Lanwani nani min yedi Falono maama, U Tienu waani Falono wan baa tieni yaale. 29Diidi li guocianli baa tugini bina lele. Li baa yaa tie guocianle Ejipiti diema kuli nni. 30Laa bina yaa pendi, mi konbiadima baa cua Ejipiti diema kuli nni ki waagi bina lele. 31Mi baa jugi mi diema hali bi niba n ban sundi yaa guoli n den tieni Ejipiti diema nni. 32Laa dangidi n tieni figilima lie Falono po yeni, li bua ki yedi ke U Tienu bili ke laa bonla baa tieni tilade. O baa teni lan jaligi ki tieni mo. 33Moala yaama n ye n tie mine: Se Falono n moandi ki baa yaa ja n pia mi yama, ki go tie yanfodaano ki teni wan diedi Ejipiti diema. 34Falono n moandi ki gandi bi niba ki puogi ba, ban ga li lubili yua kuli n baa ko yaa di yaa niinni. Bi yaa boagidi i di yeni kaani muu, kaanyendu n tua li lubili. Ti kpaandi kuli yaa kaanmuulu yeni ban yaa piadi ki biliti u hali li guoli yaa binleleeda n ban pendi. 35A binleleeda yaa kpaandi kuli ban taani ti ki dogini likuli ban gandi yaa kaanu, ki teni Falono oba n bandi ke li bonla kuli cuoni nani lan pundi maama, ki baa yaaba n baa yaa guu ti. 36Bi baa paadi ki bili laa kpaandi mi diema nni ki bogini ki guudi mi koma binleleeda ya n kpendi Ejipiti diema nni yeni yaa po. Lani yaaka, mi koma baa jugi mi diema.»
Josefi tua Falono koanbali
37Laa maama den mangi ki go dagidi Falono leni o naacenba kuli po. 38Falono den yedi ba: «Naani ti baa fidi ki go baa yua tie nani o naa ja ki pia U Tienu Fuoma o niinni?» 39Falono den yedi Josefi: «Yaala n teni ke U Tienu waani a line kuli yeni, yua go pia banma, bi yanfuoma nani fini yeni ki ye. 40Fini n baa yaa tugi n diegu yuli, n dogu nni mo, a yaa yedi yaama mani n baa ye. Ti gbandi, min kaa yaadi yaa po bebe n baa tie mini leni fini siiga mi paadima.»#JTT 7.10 41Falono den yedi Josefi: «Moala n puni a u sanu ŋan diedi Ejipiti diema kuli.» 42Falono den piti o ñoagibima ki pilini Josefi. O den lani o yaa tiadi n ŋani ki pia ti kpiagidi ki go den lani o wula laanu.#Dan 5.29 43O den teni ke bi kaani o o teligu yaagu n ŋua Falono yaa yaagu ki teni ke bi niba ye liiga ki kpaani ki tua: «Gafala mani daa! Yi faami mani daa!» Falono den tieni yeni ki teni ke o diedi Ejipiti diema. 44Falono go den yedi Josefi: «Mini n tie o bado. Oba kuli kan fidi ki tieni bonla Ejipiti diema nni ke ŋaa puni o li sanu.» 45Falono den puni Josefi li yeli. Laa yeli n den tie Tisafinati-Panea. O den puni o o pua ke o yi Asinata, Poti-Fela Ona kopadiciamo bisalo. Lanwani Josefi den ñani ki baa diedi Ejipiti diema kuli. 46Josefi den pia bina piitaa wan den cua ki sedi yaa daali Ejipiti bado Falono nintuali. Lan yaa puoli o den gaani i dogi nni kuli ki baa bandi Ejipiti diema.
47Li guoli yaa binleleeda nni bi niba den soani hali bonŋanla. 48Josefi den taani laa binleleeda yaa kpaandi Ejipiti diema nni. O den teni ke bi taani ti kpaandi kuli i dociami nni. I tinkundogi yaa kpaandi mo, bi den taa ti ki cuani i dogbengi nni. 49Josefi den dogini *ŋalikama nani mi ñincianma boanjaali yaa tanbiili yeni hali ke baa go den coadi lan den yaba ki de maama kelima bi kan go den fidi ki coadi.
50Hali ke mi koma binkpiali daa den cili, Josefi pua Asinata yua n den tie Ona kopadiciamo ban yi yua Poti-Fela bisalo den mali opo bonjala lie. 51Josefi den yini o bijakpelo Manase,#41.51 Manase bundima tie: Yua n teni ke n sundi. kelima o den yedi U Tienu teni ke n sundi n fala leni n baadiegu kuli. 52Wan den yuandi ki mali yua mo, o den yini o Efilayima,#41.52 Efilayima bundima tie: O teni ke n baali pugini. kelima o den yedi U Tienu puni nni li baali min laa fala yaa diema nni.
53Ejipiti nni li guoli binleleeda den pendi. 54Nani Josefi n den yedi maama a binleleeda koma den cili, yaa dogi n sieni kuli yaa niinni mi koma den ye, ama Ejipiti diema nni wani li bonjekaala den ye.#JTT 7.11 55Mi diema nni yaaba kuli n den luo mi jiema yaa yogunu, bi den cua ki kpaani ki mia Falono li bonjekaala. O den yedi ba: «Gedi mani Josefi po ki ban tieni wan baa yedi yi yaala.»#Jan 2.5 56Mi koma den ye Ejipiti diema nni kuli ki kubi bi niba boncianla. Josefi den teni ke bi luodi a buabuana i dogi kuli nni ki kuadi Ejipiti yaaba po ŋalikama. Mi koma den baa ki biagidi ki pugidi Ejipiti nni. 57Yaa dogi n sieni kuli yaa niba den kpendi Ejipiti nni ki baa magi ŋalikama Josefi kani, kelima mi koma den biagi boncianla mi diema kuli nni.
Jakobo soani o bijaba Ejipiti diema nni
Currently Selected:
MI CILIMA 41: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
