MI CILIMA 50
50
1Josefi den bibi o baa ki labini o benli po ki buudi opo. 2O den puogi o lotolinba ke ban ŋanbi o baa o tinkpilo ke wan da bedi. Lotolinba den ŋanbi Jakobo yeni. 3Bi den tieni dana piinaa ki ŋanbidi o tinkpilo ke wan da bedi. Ejipiti yaaba den buudi opo hali dana piilele.
4Mi kuuma yaa pabiidili dana n den pendi, Josefi den maadi leni *Falono diegu nni yaaba ki yedi ba: «N mia yi li yaa tie ke yi pala mani leni nni, yin waani Falono min baa yedi yi yaala. 5N baa den teni ke n poli, o den yedi nni: ‹Diidi, n baa kpe moala, ŋan piini nni min den gbini yaa kaanu Kanana diema nni ke li tua a kula kaanu.› Lanwani n bua ki gedi lankani ki piini n baa ki guani.»#Cil 47.29-31 6Falono den goa ki yedi o: «Gedi ki ban piini a baa nani wan den teni ke a poli maama.»
7Josefi den fii ki gedi yeni ki ban piini o baa. Falono naacenba kuli den ciani o, yaaba n den waagi Falono yaa diegu nni leni Ejipiti diema yaa nikpela kuli. 8Josefi diegu nni yaaba kuli leni o kpeliba leni o waalo leni o baadiegu nni yaaba kuli den gedi. Baa den ŋa oba Gosena dogi nni se a bila leni i pe leni i ne. 9Bi teliti leni bi taami den gedi, bi den yaba hali boncianla. 10Ban den pundi Atada yaa fanpienma nni, yaama n ye Judana boanjaali kani, bi den buudi ki mua i kumoepaali boncianla. Josefi den biidi o pali kelima o baa kuuma po hali dana lele bianu. 11Mi diema yaaba, Kanana yaaba yeni den tieni siedi li pabiidili po Atada jalu kani ki yedi: «Diidi ki le mani li pabiidicianli ye Ejipiti yaaba siiga.» Lani yaa po bi den yini laa jalu Abela-Mitisilayima yaa jalu yu n ye Judana boanjaali po. 12Li tie yene ke Jakobo yaa bijaba den tieni bi baa n den ñani bipo yaa ñoabonli. 13Bi den gedini o Kanana diema nni ki den piini o Makipela yaa kuanu yaa tanlongu nni. Abalahama n den da yu Heta yua Efilona kani, ke u tua o kula kaanu, yaa tanlongu n tiegi Mamile dogu.#JTT 7.16 14Josefi n den piini o baa ki gbeni, o den guani Ejipiti nni wani leni o kpeliba leni o waalo leni yaaba n den ciani o ki ban piini o baa kuli.
Josefi miali juodima
15Josefi kpeliba n den laa ke bi baa kpe, bi den yedi bi yula: «Josefi yaa cili ki nandi ti ki guani ti tin den tieni o yaa biadima te?» 16Bi den soani u tondu ke bi yedi Josefi: «A baa den ñani yaa ñoabonli n tie na hali ke o daa kpe: 17‹Tieni a kpeliba po sugili bi biadima po leni bi *tuonbiadi po leni ban den tieni a yaala kuli yaa po. Moala ŋan tieni sugili a baa Tienu yaa naacenba po.› » Josefi n den gbadi laa maama o den buudi. 18O kpeliba den cua bani biba ki labini o nintuali ki yedi o: «Ti tie a naacenba.» 19Josefi den yedi ba: «Yin da jie mani kelima naani n tie U Tienu yo? 20Yi den jagi ke yi baa tieni nni mi biadima. Ama U Tienu den lebidi ke lan tua bonŋanla ki ciadi bi niba boncianla miana nani yin nua dinla ke li tie maama yeni. 21Lanwani yin da jie liba, n baa kubi yi yinba leni yi bila.» O den baagi ba yeni ki maadi leni bi pala.
22Josefi leni o baadiegu nni yaaba kuli den ye Ejipiti diema nni. Josefi miali dana den pundi kobiga n bina piiga. 23Josefi den laa Efilayima yaa bila hali yaabitaa. Manase yaa bijua Makili yaa bila go den mali Josefi duna po. 24Josefi den yedi o kpeliba leni o waalo: «N baa kpe moala, ama U Tienu baa cua yikani ki teni yin ña mi naa diema nni ki guani yi wan den poli ke o baa pa Abalahama, Isaaka leni Jakobo yaa diema nni.» 25Josefi den teni ke Isalele bila den poli ki yedi: «U Tienu baa cua yikani ke laa pia tama, lani yin teni ban gedini n kpaba ŋan foagidi leni nekanba.»#Ñam 13.19; Jos 24.32; Ebl 11.22
26Josefi den kpe ki pia kobiga n bina piiga. Bi den ŋanbi o tinkpilo ke wan da bedi ki duani o ku tinkpikpaku nni Ejipiti diema nni.
Currently Selected:
MI CILIMA 50: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
