LUKA 1
1
Mi macilikaama
1N buado Tewofila, bi niba boncianla den moandi ki diani yaala n den tientieni ti siiga yaa togida. 2Bi den diani la ki ŋoadi yaaba n den laa laa bonla leni bi nuni hali li cilima, ki tua o Laabaaliŋamo wangikaaba n den togidi ti maama. 3N den tagidi ki bandi laa bonla kuli bonŋanla ki cili hali li cilima. Min bandi likuli yeni, n moko sua ke li ŋani min diani apo ki ŋoaŋoadi li fuuli, 4ki teni ŋan bandi ke ŋan den baa yaa bangima tie moamoani cain.
Jan Batisi madi maama
5 *Elodo n den ka ti gbandi po Jude diema nni, U Tienu kopadicianba siiga yendo den ye ke bi yi o Sakali. O den tie U Tienu kopadicianba caga siiga cagiyenli yua, Abia yaa cagili. O pua moko den tie Alono puoliŋuanu ki yi Elisabeta.#1Baj 24.10 6Bani bonba lie yeni kuli den tiegi U Tienu nintuali. Bi den ŋua o Diedo *balimaama leni o mabilikaama kuli cain kaa pia tagili. 7Ama baa den pia biga, kelima Elisabeta den tie ŋoaliga. Bani bonba lie kuli den kpeligi.
8Sakali den tuuni o kopadician-tuonli U Tienu nintuali kelima wan den ye yaa cagili nni n baa soani yaa yogunu pundi. 9Bi den toani tiatia nani U Tienu kopadicianba n maani ki tiendi maama, ki gandi o ke o baa kua o Diedo dieli nni ki ju a *dugibila. 10Ban den juugi a dugibila yaa yogunu, U Tienu niba nitaanli kuli den ye niini ki jaandi. 11Lani o Diedo maleki den sedi a dugibila *padibinbinli jienu po ki doagidi o yuli Sakali kani. 12Sakali n den laa o, o yama den yagi ke ti jawaandi cuo o. 13Ama Maleki den yedi o: «Sakali, ŋan da jie, U Tienu ga a miabu, a pua Elisabeta baa maa apo bonjaga, ŋan yini o Jan. 14O baa tie apo pamancianli, yaaba n baa mangi bi pala kelima o madi po baa yaba. 15O baa tie niciamo o Diedo nintuali, o kan ño duven leni yaa daama n bia kuli. O baa gbie leni U Tienu Fuoma Yua hali ki da ye o naa tugu nni.#Coa 6.3 16O baa gobidi ki guani Isalele buolu yaaba boncianla o Diedo bi Tienu kani. 17O baa cuoni U Tienu nintuali leni *Elia yantiali buolu leni o paalu, ki teni bibaanba n goa ki mangi leni bi bila. Ki teni bi ni yiekaaba n baa bi niteginkaaba yanfuoma. O baa bogini bi niba bi pala n tuo o Diedo po.»#Mal 3.23
18Sakali den yedi maleki: «N baa bandi lede ke lankuli tie moamoani? Kelima n kpeligi, n pua mo podi.» 19Maleki den goa ki yedi o: «Mini Gabiyeli, yua n ye U Tienu kani ki tuuni opo. O soani nni ke min maadi a ki waani laa laabaaliŋamo.#Dan 8.16; 9.21 20Nani ŋan ki dugi n maama po yaama n baa tieni mi yogunu yaa pundi yeni, a baa tua muulo ki kan go fidi ki maadi hali laa bonla n baan tieni yaa daali.»
21Bi niba yaaba n den ye niini yeni den ji Sakali ke li paki ba leni wan waagi U Tienu diegu nni maama. 22Wan den ñani, waa fidi ki maadi leni ba. Lane bi den bandi ke o laa li bonlekaala U Tienu diegu nni. O den maadi leni ba leni o nii, ki di tie muulo.
23Sakali tuonli U Tienu diegu nni dana n den gbeni, o den kuni o denpo. 24Yogunuba n den pendi, o pua Elisabeta den punbi. O den ye deenni yogunu kuli hali ŋmaali muu, ki maadi leni o yuli ki tua: 25«O Diedo tieni npo line wan jagi ke o baa ñani npo i fe yaa yogunu bi niba siiga.»
Maleki tuodi ki waani Jesu madi maama
26Sakali pua tugu ŋmaluobilo nni U Tienu den soani yaa maleki n yi Gabiyeli Nasaleti, yaa dogu n ye *Galile diema nni. 27O den soani o li *powandiali kani. Yua n den tie yaa ja n yi Josefi yaa toginaa ki tie Dafidi diegu nni yua. Li powandiali yeni den yi Maliyama.#Mat 1.18 28Maleki yeni den cua o kani ki yedi o: «N fuondi a, fini yua n baa li *ŋanbili U Tienu kani. O Diedo ye leni a.» 29Maliyama yama den yagi boncianla laa maama po, ke o buali o yuli laa fuondi buolu n bua ki yedi yaala. 30Maleki den yedi o: «Maliyama, ŋan da jie, kelima a baa li ŋanbili U Tienu kani. 31Diidi, a baa punbi ki maa bonjaga. Ŋan yini o Jesu.#Mat 1.21 32O baa tie niciamo, bi baa yini Tanpojoma Tienu Bijua. O Diedo U Tienu n baa kaani o o yaaja Dafidi gbandi po,#2Sam 7.12,13,16; Esa 9.7 33wan yaa die Jakobo buolu yaaba hali yaa yogu kuli, o diema kan baa juodima hali abada.»
34Maliyama den yedi maleki: «Min kaa bani ja yeni, lani mo ba ga lede ki tieni?» 35Maleki den goa ki yedi o: «U Tienu Fuoma Yua baa cua a kani, Tanpojoma Tienu paalu baa yini apo. Lani yaa po bi baa yini ŋan baa maa yaa bigagidikaaga yeni U Tienu Bijua. 36Diidi, a kpiilo Elisabeta, o moko punbi bonjaga o pociandi nni. Ban den tua yua ke o tie ŋoaliga o di ye o ŋmaluobilo nni. 37Kelima U Tienu ki pia wan kan fidi yaala.»#Cil 18.14 38Maliyama den yedi: «N tie o Diedo yonbo, lan tua npo nani ŋan yedi maama.» Maleki den ñani o kani.
Maliyama gedi ki ban fuondi Elisabeta
39Laa yogunu Maliyama den fii ki jaligi ki gedi yaa dogu n ye a juana po, Jude diema nni. 40O den kua Sakali deni ki fuondi Elisabeta. 41Elisabeta n den gbadi Maliyama fuondi yaa yogunu, o biga den jeli o tugu nni, U Tienu Fuoma Yua den gbieni Elisabeta 42ke o kpaani: «A baa li seli ki cie bi puoba kuli a tugu nni biga mo baa li seli. 43Be n teni ke n baa ke fini n Diedo naa cua n kani? 44Diidi, min gbadi a fuondi yaa yogunu liga, ki biga ban jeli n tugu nni leni li pamancianli. 45Li pamanli ye leni a fini yua n daani ke wani o Diedo n soani ke bi yedi a yaa bonla baa tieni.»
Maliyama pagi o Diedo
46Maliyama den yedi:
«N kpiagi o Diedo,#1Sam 2.1-10
47N pali mani hali boncianla
Kelima wani U Tienu n Candaano po,
48Kelima o laa npo,
Mini o yonbo yua n tie taliga.
Dinla liiga nifiima n tu nifiima kuli
Baa yedi ke li pamanli ye leni nni,#1Sam 1.11
49Kelima wani U Paaciamu Kuli Daano
Tieni npo yaa bonla n pia pakili.
O yeli gagidi ki ŋani.
50O baa gba mi niñima yaaba n fangi o
Nifiima n tu nifiima kuli po.
51O doagidi o nuu paalu,
Ki yadi ti yantia-japaadi danba.
52O jiini i paaciami danba bi bali kalikaani po
Ki fiini taliginba.#Job 5.11; 12.19
53O guoni a konkonba li bonŋanla,
Ki cabi a piada u nukuomu.
54O todi o naacenba Isalele yaaba.
Waa sundi ki doagidi o niñingbadima,
55Nani wan den yedi ti yaajanba maama,
Abalahama leni o puoliŋuani po yaa yogu kuli.»#Cil 17.7
56Maliyama den kali Elisabeta kani ke li bua ki pundi ŋmaali taa, ki goa ki kuni o denpo.
Jan Batisi madi
57Elisabeta maayogunu den pundi ke o mali bonjaga. 58O yieninlieba leni o kpiiba den gbadi ke o Diedo gbadi opo mi niñincianma, ki taani ki mangi bi pala leni o. 59Li daniili daali bi den cua ki baa kuani ki canpandiga ku koanciagu.#1.59 Laa koanciagu den tie U Tienu n puni Jufinba yaa maalima ke mi doagidi ke bi kuani ki canpandiga yeni U Tienu n pia yaa danligu ŋantaado leni Jufinba niinni. Diidi 2.21. Bi den bua ki yini o o baa yeli Sakali.#Lef 12.3 60Ama o naa den yedi: «Yeni ka, o baa yi Jan.» 61Bi den yedi o: «A kpiiba siiga ki pia yua n yi laa yeli.» 62Bi den maadi o baa mi muulima, ki bua ki bandi wan bua ki biga n yaa yi maama. 63Sakali den mia wan baa diani naani, ki diani lipo: «O yeli yi Jan.» Li den paki bikuli. 64Lanyogunu lanyogunu Sakali lanbu den tabidi, ke o fidi ki yaadi ki pagi U Tienu. 65Ti jawaandi den cuo bi yieninlieba kuli. Yaaba n den ye Jude diema nni kuli den maadi laa bonla kuli bi siiga. 66Yaaba n den gbadi likuli den kubi la bi pala nni ki tua: «Ki naa biga baa tua be.» Moamoani, o Diedo nuu den kubi o.
Sakali n pua yaa sawalo ki biga po
67Ki biga baa Sakali den gbie leni U Tienu Fuoma Yua ki pua sawali ki yedi:
68«O Diedo Isalele Tienu n baa ti pagidi,
Kelima o laa o niba po ki da ki faabi ba.
69Ki fiini tipo o naacemo Dafidi diegu nni
Yaa Candaano n pa.
70O tieni wan den teni ke o sawalipua-gagidikaaba
Maadi yaala hali yogu.
71O den niani ke o baa ga ti ti yibalinba nuu nni,
Leni bani yaaba n nani ti kuli yaa nuu nni.
72Yeni o gbadi ti yaajanba po mi niñima,
Ki tiadi o *ŋantaado yua n gagidi ki ŋani po,
73Wan den poli ki kuani yua leni ti yaaja Abalahama,
74Ke o baa ga ti ti yibalinba nuu nni
Ki teni tin yaa jaandi o kaa jie,
75Ki yaa cuoni o nintuali leni mi gagidiŋanma
Leni mi teginma hali ti miali dana kuli.
76Fini ki canpandiga, bi baa yi ŋa Tienu
Yua n ye hali Tanpojoma yaa sawalipualo
Kelima a baa ga o Diedo liiga,
Ki yaa ŋanbidi o sani,#Mal 3.1
77Ki teni o niba n le o *tindima,
Kelima o tieni bipo sugili bi *tuonbiadi po.
78Kelima ti Tienu yaa niñingbadicianma yaa po
O teni ke o yenma ñani tanpoli
Ki yendi tipo nani u yienu n pudi maama yeni,
79Ki baa yendi yaaba n ye li *biigili nni
Leni mi kuuma jinjingu nni po,
Ki gobidi ti ke tin kua ki yaa cuoni
Mi yanduanma sanu nni.»#Esa 9.1
80Ki biga yeni den kpedi ki go fandi bonŋanla, ki ye li fuali nni hali yaa daali ke o den ti doagidi o yuli Isalele yaaba po.
Jesu Kilisiti madi
(Mat 1.18-25)
Currently Selected:
LUKA 1: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
