LUKA 3
3
1Loma yaaba badiciamo Tibeli *Sesa bali piiga n binmuuli binli, Ponisa Pilata den tie Jude diema gufeneeli, *Elodo den die *Galile diema, o waalo Filipi n yaa die Itule leni Takonita diema, Lisaniasa mo n yaa die Abilena diema. 2Hana leni Kayifa den taani ki tie bi kopadicianba badiba.#3.2 Hana den tie bi kopadicianba bado, ama Jufinba yonbidanba, Loma yaaba, den dindi o ki dini o cuado Kayifa, baa yeni Hana den gobidi Kayifa laa tuonli nni. Laa binle Sakali bijua Jan den ye mi fanpienma nni, ke U Tienu maadi leni o.
3Lane o den caa yaa dogi n baali Judana ki wangi bi niba ke ban lebidi bi yama ke wan *batisi ba ban baa bi tuonbiadi sugili. 4Nani lan diani maama o sawalipualo Esayi tili nni:
O nilo kpaani mi fanpienma nni ki tua:
Yin bogini mani o Diedo sanu,
Ki naadi mani o sani.#Esa 40.3-5
5Bi baa gbieni ti joaloandi kuli,
Ki jiini joacianli leni joabiga kuli ki ladi ki dagini,
Ki naadi a sangoana,
Ki piini ti sanbuodi.
6Nisaalo kuli baa le U Tienu *faabima.
7A nigola den kpendi Jan kani ke wan batisi ba. O den yieni ba: «Yinba, u waalabi-buolu na, ŋme fandi yi yin sani ki cia U Tienu pabienli yaali n baa cua na?#Mat 12.34; 23.33 8Yin yaa tuuni mani yaa tuona n doagidi ke yi lebidi yi yama. Yin da tua yi pala nni: ‹Ti pia Abalahama ke o tie ti yaaja.› N waani yi ke U Tienu baa fidi ki teni yaa tana n tie na n tua Abalahama puoliŋuani.#Jan 8.33 9Baa moala bi caani li yali i tijiini po. Yaa tibu n ki luoni yaa bonluonkaala n ŋani kuli, bi baa pedi bu ki lu mi fantama nni.»#Mat 7.19
10A nigola den buali o ki tua: «Ti nan baa tieni lede?» 11O den goa ki yedi ba: «Yua n pia liada lie, wan boagidi leni yua n ki pia, yua n pia mi jiema moko n tieni yeni.»
12Bi lubigaaba moko den cua ke wan batisi ba, ki yedi o: «Canbaa, ti baa tieni lede?»#Luk 7.29 13O den goa ki yedi ba: «Yin da ga mani li lubili ki cie ban bili maama.»
14A minteela moko den buali o: «Ti mo baa tieni lede?» O den yedi ba: «Da tiendi mani bi niba u paalu, ki da gaani suuna ki kuli oba. Yin mangi mani yi pala leni yi ŋmapani.»
15Bi niba den gu ki sugini *U Tienu n Gandi Yua cuama. Bikuli den buali bi yula Jan yaa tie U Tienu n Gandi Yua. 16O den yedi bikuli: «Mini n batisi yi leni mi ñima, ama yua n pia u paalu ki cie nni baa cua, mii pundi baa yua n baa loti o cacaagbansiama. Wani, o baa batisi yi leni U Tienu Fuoma Yua, leni mi fantama. 17O kubi o kaaligu o nuu nni, o baa ŋanbi o jalu cain, ki lendi ki tigi ki wodi ki kuodi o buali nni, ki nan sia mi fenma yaa fantama n kaa pia gbindima.»
18Jan wangi bi niba o laabaaliŋamo ki go tundi ba tunditoe boncianla. 19Ama wan den funi leni Elodo yua n den die Galile kelima o waalo pua Elodiasa po leni wan tieni yaa tuonbiada kuli po,#Mat 14.3-4; Mak 6.17-18 20Elodo go den pugini laa tuonbiadi kuli po tuonbiatoadi, ki luoni Jan li kpaadidieli nni.
Jan batisi Jesu
(Mat 3.13-17; Mak 1.9-11; Jan 1.32-34)
21Bi niba kuli n den kpendi ke Jan batisi ba, o den batisi Jesu moko. Jesu n den jaandi yaa yogunu, tanpoli den luodi 22ke U Tienu Fuoma Yua ñani lipo ke o nannanli naani leni ki kpaajiega ki jiidi ki jagini Jesu po. Bi den gbadi u nialu ke u maadi hali tanpoli po ki yedi: «A tie n *Bijabuadiga, n pali mani apo hali boncianla.»#Cil 22.2; Pis 2.7; Esa 42.1; Mat 3.17; Mak 1.11; Luk 9.35
Jesu yaajanba
(Mat 1.1-17)
23Jesu den cili o tuonli ki pia nani bina piitaa. Bi den nua ke o tie Josefi bijua. Josefi den tie Heli bijua, 24Heli mo tie Mata bijua, Mata mo tie Lefi bijua, Lefi mo tie Meliki bijua, Meliki mo tie Janayi bijua, Janayi mo tie Josefi bijua, 25Josefi mo tie Matatiasa bijua, Matatiasa mo tie Amosi bijua, Amosi mo tie Nahumi bijua, Nahumi mo tie Esili bijua, Esili mo tie Nagayi bijua, 26Nagayi mo tie Mahati bijua, Mahati mo tie Matatiasa bijua, Matatiasa mo tie Semeyini bijua, Semeyini mo tie Joseki bijua, Joseki mo tie Joda bijua, 27Joda mo tie Johana bijua, Johana mo tie Lesa bijua, Lesa mo tie Solobabeli bijua, Solobabeli mo tie Salatieli bijua, Salatieli mo tie Neli bijua, 28Neli mo tie Meliki bijua, Meliki mo tie Adi bijua, Adi mo tie Kosama bijua, Kosama mo tie Elimadama bijua, Elimadama mo tie Ela bijua, 29Ela mo tie Jesu#3.29 Jufinba den maani ki yi bi bila “Jesu”, hali ke Jesu daa cua. Ebilu maama nni “Jesu” yeni tie “Josue”, li bundima tie U Tienu yua n tie o Candaano. bijua, Jesu mo tie Elieseli bijua, Elieseli mo tie Jolima bijua, Jolima mo tie Mata bijua, Mata mo tie Lefi bijua, 30Lefi mo tie Simeyono bijua, Simeyono mo tie Juda bijua, Juda mo tie Josefi bijua, Josefi mo tie Jonama bijua, Jonama mo tie Eliakimi bijua, 31Eliakimi mo tie Meleya bijua, Meleya mo tie Mena bijua, Mena mo tie Matata bijua, Matata mo tie Natan bijua, Natan mo tie o bado Dafidi bijua, 32Dafidi mo tie *Isayi bijua, Isayi mo tie Obedi bijua, Obedi mo tie Boasa bijua, Boasa mo tie Salimono bijua, Salimono mo tie Nasono bijua, 33Nasono mo tie Aminadabi bijua, Aminadabi mo tie Adimini bijua, Adimini mo tie Alini bijua, Alini mo tie Esilomo bijua, Esilomo mo tie Peletisa bijua, Peletisa mo tie Juda bijua, 34Juda mo tie Jakobo bijua, Jakobo mo tie Isaaka bijua, Isaaka mo tie Abalahama bijua, Abalahama mo tie Tela bijua, Tela mo tie Nahola bijua, 35Nakola mo tie Seluga bijua, Seluga mo tie Lehu bijua, Lehu mo tie Peleka bijua, Peleka mo tie Ebeli bijua, Ebeli mo tie Sila bijua, 36Sila mo tie Kayinama bijua, Kayinama mo tie Afakisada bijua, Afakisada mo tie Sema bijua, Sema mo tie Nowe bijua, Nowe mo tie Lemeka bijua, 37Lemeka mo tie Matusalema bijua, Matusalema mo tie Enoka bijua, Enoka mo tie Jeleda bijua, Jeleda mo tie Maleleela bijua, Maleleela mo tie Kenama bijua, 38Kenama mo tie Enosa bijua, Enosa mo tie Seta bijua, Seta mo tie Adama bijua, Adama mo tie U Tienu bijua.
Sutaani tulini Jesu
(Mat 4.1-11; Mak 1.12-13)
Currently Selected:
LUKA 3: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
