Mi cilima 3
3
O joa leni o pua miidi U Tienu kuali
1U Tienu n den tagi yaa moayandi kuli siiga, o wa n den fani ki cie bikuli. O wa yeni den yedi o pua: «Naani li li tie moamoane ke o Diedo yedi: ‹Yin da ŋmani u koaŋamu tiidi bonluonkaala kuli?› »#Doa 12.9; 20.2. 2O pua den yedi o wa: «Ti baa fidi ki ŋmani u koaŋamu tiidi bonluonkaala. 3Ama yaa tibu n se u koaŋamu siiga yaa bonluonkaala wani, U Tienu den yedi: ‹Yin da ŋmani la, ki da sii la mo, ke yin da ti kpe.› » 4O wa den yedi o pua: «Yi kan kpe ba. 5Li tie ke U Tienu bani ke yi yaa ŋmani la yaa daali, yi nuni baa ŋubidi, ke yi baa yaa tie nani wani yeni, ki bani mi ŋanma leni mi biadima paadima.» 6O pua den laa ke bu tibu bonluonkaala mani mi jiema po, ki go ŋani bu nunbu po, ki tie yaa bonbuadila n baa teni o nilo n baa mi yanfuoma. O den cie bu bonluonkaala ki ŋmani, ki puni o calo yua n den ye o kani, ke omo ŋmani.
7Bikuli nuni den ŋubidi ke bi den bandi ke bi ye mubima. Bi den ŋali ti kankanfaadi, ki tieni a kpataana. 8Bi den gbadi o Diedo U Tienu nialu ke o den goadi u koaŋamu nni ku yenjuaboandigu. O joa leni o pua den sani ki wuoni u koaŋamu tiidi siiga, ki foagidi leni o Diedo U Tienu nunga. 9Li Miali Diedo U Tienu den yini o joa ki yedi o: «A ye le?» 10O den yedi: «N gbadi a nialu u koaŋamu nni ki jie ki sani ki wuoni, kelima n ye mubima.» 11Li Miali Diedo U Tienu den yedi: «Ŋme n waani a ke a ye mubima? Naani a ŋmani min den kuani a ke ŋan da ŋmani yaa tibu bonluonkaala yene?» 12O joa den yedi: «Ŋan den puni nni yaa pua yeni, wani n teni nni bu tibu yeni bonluonkaala ke n ŋmani.» 13Li Miali Diedo U Tienu den yedi o pua: «Be yaa po yo ke a tieni line?» O pua den yedi: «O wa n boandi nni, ke n ŋmani.»#2Kor 11.3; 1Tim 2.14.
14O Diedo U Tienu den yedi o wa:
«Nani ŋan tieni lani yeni,
A baa yaa tie ti solindi yua ti denyandi kuli siiga
Leni ti moayandi kuli siiga.
A baa yaa fuli a tugu po,
Ki di mi tama hali a miali banlu.
15N baa bili ti yibalindi fini leni o pua siiga,
A puoliŋuani leni o puoliŋuani siiga.
O baa mudi a yuli,
Amo baa poagili o taajentindili.»#Doa 12.17.
16O den yedi o pua:
«N baa pugini a po fala ŋan punbi yaa yogunu.
A baa maa leni fala.
A gbanandi bonbuakaala baa teni ŋan ŋoadi a calo,
O baa diedi a.»
17O den yedi o joa:
«Nani ŋan cengi a pua maama,
Ki ŋmani min den kuani a ŋan da ŋmani yaa tibu bonluonkaala yeni,
Ki tinga baa tua ti solindi yaaga, kelima fini yaa po.
A baa yaa baadi ki niinni a bonjekaala leni fala,
Hali a miali banlu.
18Ti moabiaditi leni i konkoni baa pudi ki tinga po,
A baa yaa di yaa bonjekaala n ye u kuanu nni.#Heb 6.8.
19A baa soani li tuonli ki mande, ki nan baa li bonjekaala,
Hali ŋan baa guani ki tinga nni,
Ŋan den ñani naankani,
Kelima a tie mi tama, ki go baa guani mi tama nni.»
20Adama#3.20 Hebilu maama nni, Adama yeli bundima tie mi tama. den yini o pua yeli Awa, kelima o den tie mialifo kuli naa. 21Li Miali Diedo U Tienu den tieni ti gbandi liada Adama leni o pua po, ki lani ba. 22Li Miali Diedo U Tienu den yedi: «Moala ke o nisaalo kpandi ki tua nani tinba yeni, ki bandi mi ŋanma leni mi biadima paadima, tin yie o po ke wan da tandi o nuu ki cie li miali tibu bonluonkaala ki ŋmani, ki yaa ye ki naa pia juodima.»#Doa 22.14. 23Li Miali Diedo U Tienu den deli ki ñani Adama Edeni koaŋamu nni, ke wan yaa ko ki tinga wan ñani yaaga yaa niinni yeni. 24Wan den deli Adama yeni, o den sieni selubanba ke bi fuundi yaa jugisiemu n pia u mu Edeni koaŋamu puoli, ke ban yaa guu li miali tibu sanu.
Currently Selected:
Mi cilima 3: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
