Jan 11

Lasari kuuma

1Niyendo den ye ki yia ke bi yi o Lasari. O den tie Betani yua. Betani yeni den tie Mariyama leni o naataanpuoga Marti dogu.#Luk 10.38-39. 2(Laa Mariyama tie yua n den wuli Jesu taana po tulale, ki duuni a leni o yudi.) Lasari yua n den yia den tie o naataanjaga. #Jan 12.3. 3A naataanpola yeni den soani u tondu Jesu kani, ki yedi o: «Ti Daano, a buado yia.»

4Jesu n den gbadi lani, o den yedi: «Laa yianu kan tua kuuma, ama u baa cuani U Tienu kpiagide. U Tienu Bijua moko baa baa ti kpiagidi kelima u yaa po.»

5Jesu den bua Marti, o waalo leni Lasari kuli. 6Wan den gbadi ke Lasari yia, o go den tieni danalie wan ye naani. 7Lani n pendi, o den yedi o ŋoadikaaba: «Tin guani ki gedi Jude.» 8O ŋoadikaaba den yedi o: «Canbaa, laa waagi ke Jufinba den bua ki lugidi a a tana likani. Moala, a go baa guani ki gedi lipo?» 9Jesu den guani ki yedi ba: «Yentunmunli kuli pia piiga n leedolie ka? Yua n cuoni li yentunli nni kuli kan yaa tuudi, kelima o nua ŋanduna yenma. 10Ama yua n cuoni ku ñiagu kuli baa yaa tuudi, kelima mi yenma ki ye o niinni.» 11Jesu n den maadi lani, o go den yedi ba: «Ti danli Lasari goa. N baa gedi ki ban fundi o.» 12O ŋoadikaaba den yedi o: «Ti Daano, o yaa goa yo wani, laafia baa tieni.» 13Jesu den maadi o kuuma maama, ama o ŋoadikaaba den tama ke o maadi mi fuodima guama. 14Lane Jesu den kadi ki waani ba: «Lasari kpe. 15N pali mani ke mii den ye lipo, kelima yi yaa po, ke yin daani nni. Tin fii mani ki gedi o po.» 16Lanwani, Toma, ban go yi yua ku poligu, den yedi o ŋoadikalieba: «Ti mo n gedi mani ki ban taani ki kpe leni o.»

Jesu n tie bi tinkpiba fiima leni li miali

17Jesu den pundi likani ki sua ke Lasari ye li takuli nni, ke li pundi dananaa. 18Li sua ke Betani kuu leni Jerusalemi kilo dajenataa, 19ke Jufinba boncianla den cua Marti leni Mariyama kani, ki baa baagi ba kelima bi naataanjaga kuuma po.

20Marti n den gbadi ke Jesu kpendi, o den ñani ki tuogi o. Ama Mariyama den kaa li dieli nni. 21Marti den yedi Jesu: «N Daano, a yaa den ye ne, n naataanjaga kan den kpe. 22Ama n bani ke ba moala, ŋan baa mia U Tienu yaala kuli, o baa pa ŋa la.» 23Jesu den yedi o: «A naataanjaga baa fii bi tinkpiba siiga.» 24Marti den guani ki yedi o: «N bani ke o baa fii, bi tinkpiba kuli n baa fii ŋanduna juodima daali yaa fiima.» 25Jesu den yedi o: «Mini n tie bi tinkpiba fiima leni li miali. Yua n daani nni, ba o yaa kpe, o baa yaa fo. 26Yua n fo ki daani nni kan kpe abada. Naani a dugi mi naa maama po?» 27Marti den yedi o: «Mm, n Daano, n daani ke a tie U Tienu n Gandi Yua, U Tienu Bijua, yua n den baa cua ŋanduna nni.»

Jesu den buudi

28Wan den yedi yeni, o den gedi ki ban yini o waalo Mariyama ŋasiili nni, ki yedi o: «Canbaa cua. O yi ŋa.» 29Mariyama n den gbadi, o den fii tontoni ki gedi Jesu po.

30Li sua ke Jesu daa kua u dogu tugu nni. O da den li ye Marti n den tuogi o naankane. 31Yaa Jufinba n den ye leni Mariyama li dieli nni ki baagi o, n den laa ke o fii tontoni ki ñani yeni, bimoko den fii ki ŋoadi o, kelima bi den tama ke o caa li takuli po ki baa n buude.

32Mariyama n den pundi Jesu n ye naani ki laa o, o den gbaani o taana kani ki yedi o: «N Daano, a yaa den ye ne, n naataanjaga kan den kpe.» 33Jesu n den laa o ke o buudi, ke yaa Jufinba n yegi leni o moko buudi, li paboancianli den cuo, ke o fuo ki jiini. 34O den buali ba: «Yi piini o le?» Bi den yedi o: «Canbaa, cua ki ban le.»

35Jesu den buudi. 36Lani yaa po, Jufinba den yedi: «Diidi ki le mani wan den bua o maama.» 37Bi siiga nni bi tianba den yedi: «Wani yua n den teni o juamo noadi, naani o kan den fidi ki teni Lasari n da kpe?»

Jesu fiini Lasari bi tinkpiba siiga

38Li paboanli go den cuo Jesu ke o fuo ki jiini. O den pundi li takuli kani. Li takuli yeni den tie tanlongu, ke ku tanpabigu bii bu ñoabu. 39Jesu den yedi: «Biidi mani ku tanpabigu ne!» Marti, yua n kpe naataanpuoga den yedi o: «N Daano, moala o baa nuugi, kelima hali ban piini o, dinla n tie dananaa.» 40Jesu den yedi o: «Mii yedi a ke a yaa daani, ke a baa le U Tienu kpiagidi?» 41Lani, bi den biidi ku tanpabigu. Jesu den yaadi ki nuali tanpoli ki yedi: «N Baa, n tuondi a ke a cengi n maama. 42N bani ke a cengi n maama yogunu kuli, ama n yedi yeni, kelima yaa niligu n lindi nni ne yaa po. Yeni bi baa daani ke fini n soani nni.» 43Wan den jaandi yeni, o den kpedi o nialu ki kpaani: «Lasari, ña na!» 44Yua n den kpe yeni den ñani, ke o nii leni o taana kuli fini fini a caba, ke li cabili pini o nunga mo. Jesu den yedi: «Findi findi o mani ki cedi wan gedi!»

Bi cancantieba juogi ke bi baa kpa Jesu

(Mat 26.1-5; Mrk 14.1-2; Luk 22.1-2)

45Yaa Jufinba n den cua Mariyama kani ki laa Jesu n tieni yaala yeni siiga, boncianla den tuo ki daani Jesu. 46Ama bi siiga bi tianba mo den gedi Farisieninba kani, ki waani ba wan tieni yaala.

47Lanwani, bi kopadicianba yudanba leni Farisieninba den taani bi cancantieba, ki yedi: «Ti baa tieni be? Laa nilo tiendi mi bancianma boncianla. 48Ti yaa cedi o ke o tiendi yeni ki pugidi, bi niba kuli baa tuo ki daani o. Yeni mo, Loma yaaba baa ti cua ki bolini ti kaangagidiŋamu#11.48 Lani n tie U Tienu diegu, yaa ka Jerusalemi. leni ti buolu.» 49Bi siiga nni yendo, yua n yi Kayifa ki tie bi kopadicianba bado laa binli, den yedi ba: «Yii bani liba. 50Yii kpaagi ki sua ke li baa yaa ŋani yi po, niyendo n kpe ti buolu kuli po yo? Lani n baa yaa cie ti buolu kuli n bodi.» 51Waa den maadi laa maama o yama po ka, ama wan tie bi kopadicianba bado laa binli yeni, n teni ke o den pua saawali, ke Jesu baa kpe bani Jufinba buolu kuli po. 52Laa tie Jufinba buolu po bebe ka, ama o kuuma baa taani U Tienu bila yaaba n yadi yadi i kaani kuli, ban taani ki tua yenma.

53Ki cili landaali, bi den jagi ki bili ki baa teni ban kpa o. 54Lani yaa po, Jesu den cedi kaa go goadi Jufinba siiga. O den ñani likani ki gedi yaa kaanu n kuu leni mi fanpienma, ban yi yaa dogu Efrayimi. O den kali lipo, wani leni o ŋoadikaaba.

55Jufinba Pendima jaanma n go den nagidi, bi niba boncianla den ñani i dogi nni ki gedi Jerusalemi, ki baa ŋanbi biba hali ke mi Pendima jaanma daa pundi. 56Bi den lingi Jesu. Ban den ye U Tienu diegu nni, bi den tua biyaba: «Yi tama be? O nan ko baa tuo ki cua mi jaanma na bi?» 57Li sua ke bi kopadicianba yudanba leni Farisieninba den ñani li ñoamabonli, ke yua n bani Jesu n ye naani, wan teni ban bandi, ban fidi ki cuo o.

Currently Selected:

Jan 11: BGP

Highlight

Copy