Jan 7
7
Jesu waamu naa tuo ki daani o
1Lani n pendi, Jesu den goadi Galile nni. Waa go den bua ki yaa goadi Jude nni, kelima Jufinba den lingi ki bua ki kpa o. 2Jufinba jaanma yaama n yi a suga jaanma den kuli. #Lev 23.34; Tia 16.13. 3Lani yaa po, Jesu waamu den yedi o: «Ŋan fii nekanba ki gedi Jude, ke a ŋoadikaaba mo n le ŋan tuuni yaa tuona. 4Yua n bua bi niba kuli n yaa bani o, kan yaa wuondi wan tiendi yaala. Ŋan tiendi laa bonla yeni, teni ŋanduna kuli n bandi.» 5Ba o waamu mo naa den tuo ki daani o. 6Jesu den yedi ba: «N yogunu daa pundi, ama yinba wani yaa po, yogunu kuli dagidi. 7Ŋanduna yaaba kan fidi ki yaa nani yi, ama bi nani mini wani, kelima n tiendi siedi ke ban tuuni yaa tuona bia. 8Yin gedi mani mi jaanma. Mini n wani da#7.8 U Tienu maama diankpeli tiami naa pia: «Da» yeni. kan gedi, kelima n yogunu daa pundi.» 9Wan den yedi ba yeni, o go den sedi Galile.
Jesu gedi Jerusalemi a suga jaanma yogunu
10O waamu n den fii ki gedi mi jaanma yeni, wani o ba moko den yuandi ki gedi, ama waa den gedi ke bi niba bani. O den gedi ŋasiili nne. 11Jufinba den lingi o mi jaanma nni ki tua: «O ye le?» 12Ku niligu mo den soabidi soabidi leni biyaba, ki maadi o maama. Bine den tua ke o tie niŋamo, bine mo n yaa tua: «Yeni ka, o boandi bi nibe.» 13Ama oba ki den maadi o maama ke bi niba gba, kelima bi den jie Jufinba.
14Mi jaanma dana yeni siiga, Jesu den kua U Tienu diegu nni ki bangi bi niba. 15Li den paki Jufinba, ke bi tua: «O naa nilo gaa lede ki bandi i Diani maama fuuli, wani yua n kaa kua li cogu?» 16Jesu den guani ki yedi ba: «Min bangi yaa bangima, maa tie n yaama ka. Ama mi tie yua n soani nni yaa bangime. 17O nilo yaa bua ki tieni U Tienu yanbuama, o baa bandi n bangima yaa ñani U Tienu kani, bi n yaa maadi n yuli po yo. 18Yua n maadi o yuli po, lingi o yuli po ti kpiagidi. Ama yua n lingi yua n soani o yaa kpiagidi, tie moamoandaano, waa pia boandiba. 19Musa n den soagini yi po li bali maama. Bi yeni ka? Ama yi siiga nni, ba niyendo naa tiendi man bili yaala. Be yaa po ke yi lingi ki bua ki kpa nni?» 20Ku niligu den guani ki yedi o: «A pia ki cicibiadiga. Ŋme n lingi ki baa kpa ŋa?» 21Jesu den guani ki yedi ba: «N den soani tuonyenli ke li paki yikuli. 22Musa den bili yi po ku koanciagu ŋantaado, laa cili Musa yaa kani ka, li den cili ti yaajanba kane. Lani yaa po, yi yen kuani o nilo ku koanciagu, ba U Tienu fuodima daali. #Cil 17.10; Lev 12.3. 23Li yaa tie ke yi kuani o nilo ku koanciagu mi fuodima daali, ke yin da miidi Musa bali maama, be yaa po ke yi pala nan be leni nni, kelima n paagi o nilo cain mi fuodima daali? #Jan 5.9. 24Yin da ja ti buudi nani yin nua maama, ama yin yaa ja ti buudi ke li tiegi.»
Naani Jesu n tie U Tienu n Gandi Yua?
25Jerusalemi yaaba siiga nni bi nitianba den tua: «Naani one ka tie ban lingi ki bua ki kpa yua yeni? 26Diidi ki le, o maadi bi niba siiga ke baa tua o liba. Naani ti yudanba tuo ke o tie U Tienu n Gandi Yua? 27Wani, ti bani wan ñani naani, ama U Tienu n Gandi Yua yaa cua, oba kuli kan bandi wan ñani naani.» 28Lani yaa po, Jesu n den bangi ba U Tienu diegu nni, o den kpaani: «Yi bani nni, ki go bani min ñani naani. Mii cua n yuceli cuama ka. Yua n soani nni tie o moamoandaano. Yii bani o. 29Ama mini n bani o, kelima n ñani o yaa kane. Wani n soani nni.» 30Lani yaa po, bi den lingi ki bua ki cuo o, ama oba kuli ki den cuo o, kelima o yogunu daa den pundi. 31Ku niligu siiga boncianla den tuo ki daani o, ki tua: «Naani U Tienu n Gandi Yua yaa cua, o go baa tieni yaa bancianma n cie o naa nilo n tiendi yaama?»
Bi soani U Tienu diegu jiidikaaba ban cuo Jesu
32 Farisieninba den gbadi ke ku niligu soabidi leni biyaba, ki maadi Jesu maama yeni. Lani, bi kopadicianba yudanba leni Farisieninba den soani U Tienu diegu jiidikaaba, ban cuo o.
33Lani yaa po, Jesu den yedi: «N da baa waagi leni yi u yogunu waamu, lani yaa pendi, n baa guani ki gedi yua n soani nni po. 34Yi baa lingi nni, ama yi kan le nni. Min baa yaa ye naani yeni, yi kan fidi ki cua likani.» 35Lanwani, Jufinba den buali biyaba: «One baa gedi hali le, ke ti kan go le o? Naani o baa gedi Jufinba yaaba n yadi yadi, ki ye bi nilanba siiga, ki ban bangi bi nilanba yeni bi? 36Wan maadi yaa maama ki yedi: ‹Yi baa lingi nni ki nan kan le nni,› ki go yedi: ‹Min baa ye naani, yi kan fidi ki cua likani.› Laa maama mo bua ki yedi be?»
37Laa jaanma juodidaali, lani n tie mi jaanma dacianli, Jesu den se ki kpaani: «U ñuñuunu n pia yua kuli, wan cua n kani ki ño. #Lev 23.36. 38Yaa nilo n tuo ki daani nni, li miali kpenciami baa yaa puubi ki ña o niinni, nani i Diani n yedi maama.»#Esk 47.1; Sak 14.8. 39Jesu n den maadi yeni, o den maadi U Tienu Fuoma yaa maame, yaa niba n tuo ki daani wani Jesu n baa baa yua. U Tienu daa den puni ba o Fuoma yeni, kelima Jesu daa baa o kpiagidi.
40Ku niligu siiga nitianba den gbadi laa maama ki tua: «Moamoani, one n tie tin guu yaa saawalipualo.» 41Bine mo den yedi: «One n tie U Tienu n Gandi Yua.» Bine mo den tua: «Naani U Tienu n Gandi Yua baa ña Galile? 42Naani i Diani ki yedi, ke U Tienu n Gandi Yua baa yaa tie Davidi puoliŋuanu ka? Naani o kan ña Betelemi, Davidi dandogu nni ka?»#2Sam 7.12; Mis 5.1. 43Lanwani, mi paadima den tieni ku niligu nni, kelima Jesu po. 44Bi nitianba den bua ki cuo o, ama oba ki den cuo o.
45U Tienu diegu jiidikaaba n den guani bi kopadicianba yudanba leni Farisieninba yeni kani, bi den buali ba: «Be n teni ke yii cuani o?» 46Bi jiidikaaba den guani ki yedi ba: «Niloba kuli daa maadi nani laa joa n maadi maama.» 47Farisieninba den guani ki buali ba: «O boandi yinba moko bi? 48Naani yi sua ke bi yudanba leni Farisieninba siiga, ba yendo tuo ki daani o? 49Ama ku naa niligu, yaaba n ki bani Musa bali maama fuuli tie ban soli yaaba.» 50Nikodemi, yua n den kpa gedi Jesu kani ku ñiagu, ki tie Farisieninba siiga yua, den yedi ba: #Jan 3.1-2. 51«Naani ti bali maama tuo ban jia o nilo buudi ki cuo o, kaa kpa cengi ki gbadi wan yedi yaala o yuli po, ki bandi wan tiendi yaala?» 52Bi den yedi o: «Naani amoko tie Galile yua yo? Ŋan lingi i Diani nni, a kan le ke saawalipualoba ñani Galile.»
Yaa pua n conbi maama
[ 53Bi den yadi ke yuakuli kuni o denpo.
Currently Selected:
Jan 7: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
