Luki 13
13
Bi niba yàá lebidi bi tagi bi baa bodi
1Lanyogunu bi nitianba den cua ki togidi Jesu yaala n den tieni Galile yaaba, yaaba n den cua ki baa padi U Tienu po, ke Pilati den teni ke bi kpa ba, ki wuli bi soama ke mi taani ki kali leni bi pada yaa yaama. 2Jesu den guani ki yedi: «Yi tama ke laa niba den laa laa fala, kelima bi tieni ti tuonbiadi ki cie Galile yaaba kuli bi? 3N yedi yi, yeni ka baa. Yi yàá lebidi yi yama, yikuli baa bodi yene. 4Bi, Silowe#13.4 Silowe: den tie ñinbunli. diefoagili n den baa ki kpa yaa piiga n niniidiba yeni, yi tama ke bi den tudi U Tienu po ki cie Jerusalemi yaaba kuli bi? 5N yedi yi, yeni ka ba. Yimoko yàá lebidi yi yama, yikuli baa bodi yene.»
Yaa kankanbu n kaa luoni maama
6Lani, Jesu den pua mi naa kpanjama ki yedi: «O joa den ŋuu bu kankanbu o duventiidi kuanu nni. O den cua bu kani ki lingi a kankana kaa laa puu. 7Lanwani, o den yedi o koaguudo: ‹Diidi ki le, binataa ke n kpendi ki lingi bu kankanbu na po a kankana, mii laadi puu. Pedi bu. Be yaa po ke bu miabi u kaanu fanma fanma?› 8O koaguudo den guani ki yedi o: ‹Canbaa, da cedi bu dunla goga. N baa ko ki lindi bu ki tieni ti bugidi. 9Daalinba binli po bu baa luoni, lan yàá ka, ŋan ji pedi bu.› »
Jesu paagi o pua mi fuodima daali
10Dayenli, mi fuodima daali, Jesu den bangi bi niba li bali maama bangima dieli nni. 11O pua den ye lienni ki pia ki cicibiadiga, yaaga n den teni ke o yia hali piiga n binanii, ke o ciaga poali ke o gunbi ki kan fidi ki yaadi ki sedi. 12Jesu n den laa o, o den maadi leni o ki yedi: «O pua na, a paagi ki faabi leni a yianu.» 13O den maani o po o nii. Lanyogunu liga, o pua yeni den yaadi ki sedi, ki kpiagi U Tienu. 14Ama li bali maama bangima dieli yudaano pali den biidi Jesu n paagi o nilo mi fuodima daali yeni po, ke o yedi ku niligu: «Yi pia danaluoba ki baa yaa tuuni yi tuona. Yin yaa kpendi mani laa danluobida yaa niinni ban paagi yi, ki da cua mi fuodima daali.» #Ñam 20.9-10; Tia 5.13-14. 15O Diedo den guani ki yedi o: «Yinba palalie danba, naani mi fuodima daali yi siiga yuakuli ki yen lodi o nua, yaa ka o ŋunbo ki ñani o li yandieli nni ki ban ñuni o? 16O pua yua n tie Abalahama puoliŋuanu, ke Sutaani luo o hali piiga n binanii na mo te, laa pundi min faabi o mi fuodima daali?» 17Wan den maadi yeni yaa yogunu, i fe den cuo o koanginkaaba kuli. Ama ku niligu pali den mangi leni wan tiendi yaa banma ke mi pia ti kpiagidi kuli.
Mutardi leni li dabinli kpanjama
(Mat 13.31-33; Mrk 4.30-32)
18Jesu go den yedi: «U Tienu diema naani be? N baa nandi ma leni be? 19Mi tie nani yaa tibu yaa bonbibu n wa ki cie i tiidi kuli, ke o nilo buli bu o kuanu nni, ke bu pudi ki kpedi ki tua tibu. Ti bonyugiditi den tiendi bi tiana bu beni po.»
20O go den yedi: «N baa nandi U Tienu diema leni be? 21Mi naani leni yaa dabinli ke o pua taa ki buuni yonyiemutaa, ki sieni hali likuli n pili.»
Yaa buliñoabu n miabi
(Mat 7.13-14,21-23)
22Jesu den suagi liiga, ki poandi i dociami leni i dowaali nni, ki bangi bi niba o Laabaaliŋamo, ki ban caa Jerusalemi. 23O nilo den yedi o: «O Diedo, naani niba waamu bebe n baa ciadi?» Jesu den guani ki yedi yaaba n ye likani: 24«Moandi mani ki kua yaa buliñoabu n miabi kani, kelima n tuodi ki waani yi ke bi niba boncianla baa ti yaa moa ki kua likani, ki nan kan fidi. 25O diedaano yaa ti fii ki luoni bu buliñoabu yaa yogunu, ke li sua ke yi se niinpo, yi baa cili ki yaa pua bu buliñoabu, ki tua: ‹Canbaa, luodi ti po.› O baa guani ki yedi yi: ‹Mii bani yin ñani naani.› 26Lanwani, yi baa guani ki yedi o: ‹Ti den dini ki go ñuni a kani, a go den bangi ti ti dogi sani nni moko.› 27O go baa guani ki yedi yi: ‹N yedi yi, mii bani yin ñani naani, fuadi mani n kani, yinba yaaba n tiendi mi biadima.› #Ps 6.9. 28Lanyogunu yi yaa laa Abalahama, Isaaka, Jakob leni bi saawalipuaba kuli ke bi ye U Tienu diema nni, ke yinba wani nan ye niinpo, yi baa yaa buudi ki cegini yi ñina. #Mat 22.13; 25.30; 8.11-12. 29Bi niba baa ti ña nintuali leni puoli po, nuganu leni nujienu po, ki taani ki kali U Tienu diema nni, u saajekaanu kani. 30Diidi, bi tianba yaaba n tie puoli yaaba moala, baa ti tua liiga yaaba. Bi tianba yaaba n tie liiga yaaba mo baa ti tua puoli yaaba.» #Mat 19.30; 20.16; Mrk 10.31.
Jesu kadi ki waani ke o baa kpe Jerusalemi
(Mat 23.37-39)
31Lanyogunu, Farisieninba bi tianba den cua o kani ki yedi o: «Ña ne ki gedi poto, kelima Herodi bua ki kpa ŋa.» 32O den guani ki yedi ba: «Gedi mani ki ban yedi o, wani o colo#13.32 O colo: tie yua n pia bu nunfanbiadibu. yeni, ke n deli ki ñandi mu cicibiadimu bi niba niinni, ki go paagidi bi niba dinla leni saala, li dataali daali n baa soani ki dudi. 33Li tie tiladi min suagi liiga dinla leni saala leni yaa daali n ŋua, kelima laa dagidi saawalipualo n kpe kaanto, kaa tie Jerusalemi.
34Jerusalemi, Jerusalemi, fini yua n kpaani bi saawalipuaba, ki lugidi U Tienu n tuuni a kani yaaba a tana, taalimiŋa yo ke n den bua ki gobidi ki taani a niba n kani nani o kooñua n yen wuugi o koobila o fiabi nni maama, ama yii den bua. 35Lani yaa po, yi diegu baa tua diegbengu. N waani yi, yi kan go le nni hali yin baa ti yedi yaa yogunu: ‹U Tienu n seligi yua n kpendi wani o Diedo yeli nni.› » #Ps 118.26; Jer 22.5.
Currently Selected:
Luki 13: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
