Luki 23

Bi gedini Jesu Pilati bujiali kani

(Mat 27.2,11-14; Mrk 15.1-5; Jan 18.28,33-38)

1Lani, bi cancantieba taanli kuli den fii ki gedini Jesu guveneeri Pilati po. 2Bi den cili ki kuli o ki yedi: «Ti den laa one ke o yaandi ti niba, ki tua ke ban da pa o badiciamo Sesari li lubili. O go den tua ke wani n tie U Tienu n Gandi Yua, o badiciamo.» 3Pilati den buali Jesu: «A tie Jufinba bado bi?» Jesu den guani ki yedi o: «Fini n yedi yeni.»

4Pilati den yedi bi kopadicianba yudanba leni ku niligu: «Mii laa ke o joa na tieni tagiliba kuli.» 5Bi den nia ki yedi: «O den cili hali Galile po ki tagi Jude nni kuli, ki pundi hali ne, ki bangi bi niba ki tigini ba ke ban yie li bali.»

Pilati teni ke bi gedini Jesu Herodi po

6Pilati n den gbadi laa maama, o den buali o joa yeni yaa tie Galile nilo yo. 7Wan den gbadi ke o tie Herodi diema nilo, o den soani o Herodi po. Li sua ke Herodi ye Jerusalemi laa dana nni. 8Wan den laa Jesu, o pali den mangi boncianla, kelima hali yogu o den bua ki le o. Li tie ke o den gba ke bi maadi o maama ke o sugini wan tieni mi bancianma wan le. 9O den buali Jesu i buali boncianla, ama waa den guani o maamiba kuli. 10Bi kopadicianba yudanba leni li bali maama banda den ye likani ki kuliti Jesu boncianla kaa cedi. 11Herodi den taani leni o toatieba ki fali o, ki ñuadi o, ki lani o ti tiakpiagidi, ki guani o Pilati po. 12Landaali Herodi leni Pilati den mangi leni biyaba, ti yibalindi n den kpa ye bani yaaba yaa siiga.

Pilati jia ki kadi ke ban kpa Jesu

(Mat 27.15-26; Mrk 15.6-15; Jan 18.39—19.16)

13Pilati den taani bi kopadicianba yudanba, Jufinba liiga yaaba leni ku niligu kuli, 14ki yedi ba: «Yi den cuani n kani o joa na ki yedi ke o yaandi bi niba ki tua ke ban yie li bali. To, n buali o yi nintuali ki sua waa tieni liba yin kuli o yaala kuli siiga. 15Herodi moko naa sua ke o pia tagiliba, lane ke o guani o ti kani. O joa na ki tieni liba kuli yaala n pundi tin kpa o. 16Lani yaa po, n yaa baa teni ke bi pua o, sn baa ŋa o.» [ 17Li den sua ke mi Pendima jaanma nagini, ke li tie tiladi Pilati n faabi kpaadiyenli ku niligu po.] 18Ku niligu kuli den taani ki tiani: «Teni ban kpa o joa na, ki faabi ti po Barabasi.» 19Bi den kuani Barabasi li kpaadidieli nni, kelima o den fiini mi janjanma u dogu nni, ki go kpa o nilo. 20Pilati den bua ki faabi Jesu. Lani yaa po, o go den maadi leni ku niligu. 21Ama bi den tangi ki tua: «Joani o li dapoanpoanli po! Joani o li dapoanpoanli po!» 22Pilati go den maadi ba mi taataama ki yedi: «O tieni be ke li bia? Mii laa ke o tieni yaa bonbiadila n pundi mi kuuma. Lanwani, n baa teni ban pua o, ki ŋaa o.» 23Bi go den ñii ki tangi ki tua ke ban joani o li dapoanpoanli po, hali ke bi tantani den paadi Pilati. 24Lani yaa po, Pilati den jia ti buudi ki kadi, ke ban mia ban tieni Jesu yaala yeni, baa tieni. 25O den ŋaa ban den kuani yaa joa li kpaadidieli nni, kelima mi janjanma leni mi nikpama po yeni, nani ku niligu n mia maama. Bi taa Jesu ki teni ba, ke ban tieni o ban bua yaala.

Bi joani Jesu li dapoanpoanli po

(Mat 27.32-44; Mrk 15.21-32; Jan 19.17-27)

26Ban den ñani Jesu likani ki caani o ki baa n kpa o, bi den tuogi Sireni dogu yua ke bi yi o Simon, ke o ñani i kuani po. Bi den cuo o ki bugini o li dapoanpoanli, wan yaa bugi ki ŋua Jesu. 27Niba boncianla den ŋua o. Bi siiga bi puoba den ye, ki pua bi bena ki mua Jesu po. 28O den jigidi ki yedi ba: «Yinba Jerusalemi puoba, da mua mani n po, ama yaa mua mani yi yula po leni yi bila po, 29kelima dana baa ti cua, ke bi baa yedi: ‹Li pamanli ye leni mu ŋoalimu, yaaba n ki mali leni yaaba n ki ŋaani biga kuli.› 30Lanyogunu, bi niba baa yaa maadi leni a joaciama ki tua: ‹Baa mani ti po,› ki go yaa miadi leni a joabila ki tua: ‹Ŋoagini mani ti.› #Ose 10.8; Doa 6.16. 31Ku dasoangigu yaa cuo u mu, ku dakuongu mo baa kua le?»#23.31 Bi tianba bundi: Bi yaa tieni mini yua n ki pia tagili nanda, bi baa tieni yinba yaaba n nani lede?

32Bi go den cuani nikpabilie ki baa taani ki kpa ba leni Jesu.

33Ban den pundi ban yi yaa kaanu “ku Yukuokuogu”, bi den joani Jesu li dapoanpoanli po, ki go joani bi nibiadiliediba yeni moko a dapoanpoana po, yendo Jesu jienu po, olielo mo o ganu po. 34Jesu den yedi: «N Baa, tieni bi po sugili, kelima baa bani ban tiendi yaala.» Bi den toani tiatia ki boagidi o tiayiekaadi. #Ps 22.19.

35Ku niligu den se likani ki diidi. Jufinba yudanba den ñuadi Jesu ki tua: «O den gaani nitoaba, o yaa tie Kilisiti U Tienu n Gandi Yua, wan gaa o yuli.» #Ps 22.8. 36Bi minteela moko den ñuadi o, ki cua o kani ki teni o mi ñinmiligima, ki yedi: #Ps 69.22. 37«A yaa tie Jufinba bado, ŋan gaa a yuli.» 38Yaa diani n tie ne den taabi ki yiini o yuli po: «One n tie Jufinba bado.»

39Bi nibiadiliediba yaaba n den juani a dapoanpoana po yeni siiga yendo den sugi Jesu, ki yedi: «Ŋaa tie U Tienu n Gandi Yua ka? Gaa a yuli ki nan gaa timo!» 40Ama o lielo den funi leni o ki yedi: «Ŋaa jie U Tienu, fini yua n taa cuonu leni one? 41Tinba yaa cuonu wani tiegi, kelima ti gaa ti tuona panpaani yo. Ama one wani naa tieni bonbiadiliba kuli.» 42Lani, o den yedi: «Jesu, ŋan tiadi n po a yaa ti cua ki diedi a diema yaa yogunu.» 43Jesu den guani ki yedi o: «N waani a moamoani, dinla liga a baa yaa ye leni nni ŋalijani.»

Jesu kuuma

(Mat 27.45-56; Mrk 15.33-41; Jan 19.28-30)

44Lan den bua ki pundi u yensiicocolu, u yienu den biigi, ke li biigili tieni ki tinga nni kuli, ki yaa caa hali li yenlebidili. 45U Tienu diegu kpalidoaginkaabu den padi siiga nni, ki boagidi kaanilie. #Ñam 26.31-33. 46Jesu den kpaani ki yedi: «N Baa, n guani n miali a nuu nni.» Wan den yedi yeni, o den fuo ki jiidi. #Ps 31.6.

47Minteela kobiga yudaano n den laa yaala n tieni, o den pagi U Tienu ki yedi: «Moamoani, o joa na den li tiege!»

48Yaa niligu n den taani likani ki diidi, n laa yaala n tieni, bi den lebidi ki kuni ki pua bi bena. 49Yaaba n den bani Jesu kuli leni yaa puoba n den ciani o hali Galile, den se foagima ki nua yaala n tiendi. #Luk 8.2-3.

Jesu piinma

(Mat 27.57-61; Mrk 15.42-47; Jan 19.38-42)

50-51Jufinba cancantieba taancianli yaaba siiga yendo den ye ke bi yi o Josefi, yaa nilo n ŋani ki tiegi, ki tie Jufinba dogu Alimate yua. O den guu ke U Tienu diema cuama. Waa den taani leni o lieba bi jagili leni ban den tieni yaala kuli nni. 52Laa joa den gedi Pilati kani ki mia o ke wan teni o Jesu gbanandi. 53O den jiini o li dapoanpoanli po, ki bobini o bu kpalipienbu, ki duani o li takuli nni. Li den sua ke bi kpie li takuli yeni ku tangu po ki daa duani kpiemo kuli lienni. 54Landaali den tie U Tienu fuodima daali boginli. Li den sua ke mi fuodima daali cilima yogunu bua ki pundi.

55Bi puoba, yaaba n den ñani Galile ki ciani Jesu yeni, den ŋoadi Josefi ki laa li takuli leni wan duani Jesu maama. 56Lani, bi den guani bi denpo ki bogini yaa tibidi n pia u nuulumanu leni tulale. Mi fuodima daali bi den fuodi, nani li bali maama n bili maama. #Ñam 20.10; Tia 5.14.

Currently Selected:

Luki 23: BGP

Highlight

Copy