Tẽn‑tʋmdbã tʋʋmã 4
4
B kaooda a Pɩyɛɛr ne a Zã bʋʋdo
1A Pɩyɛɛr ne a Zã sẽn da ket n gomd ne nebã, maan-kʋʋdbã ne wẽnd-doog gũudbã naab la Saduusẽ-dãmbã waame. 2Bãmb sũyã puuga wʋsg ne tẽn-tʋmdbã a yiibã sẽn da zãmsd nebã la b moondẽ n yetẽ tɩ neb nins sẽn tũud a Zeezi wã na n vʋʋg n basa kũum wala a Zeezi sẽn vʋʋg n bas kũumã. 3La b yõga tẽn-tʋmdbã n kɩs gũudbã tɩ b gũ-b hal tɩ beoog vẽege, bala wĩndga da zoe n kẽeme. 4Baoosgo, neb nins sẽn da wʋm koe-moonegã, wʋsg tẽeme. Nebã sẽn tẽ wã sõor kolga tus a nu.
5La vẽkembeoogo, Zʋɩf-rãmbã nanambs la kãsem-dãmbã ne tõog karen-saam-dãmbã, 6la maan-kʋʋdbã kãsem a Ãnd ne a Kayiifi, la a Zã la a Alegsãndr la neb nins fãa sẽn dag n yaa maan-kʋʋdbã kãsem-dãmb buudã tigma taab Zeruzalɛm. 7Bãmb talla a Pɩyɛɛr ne a Zã n wa n yals bãmb sʋk n sok-b tɩ yaa ne pãn‑bʋgo, wala yaa ne ãnda yʋʋr la b maan bõn-kãnga. 8Dẽ, a Pɩyɛɛr sẽn pid ne Sɩɩg-sõngo, yẽnda yeel-b lame yaa: Zʋɩf-rãmbã nanambse, ne kãsem-dãmba, 9b sẽn sokd tõnd rũndã n dat bãng maan-neer ning sẽn maan koamsã, la sẽn yɩ to-to tɩ rao-kãng paam maagrã, 10Yãmb fãa ne Israyɛll nebã fãa bãng-y neere, tɩ yaa ne Nazarɛt dao a Zeezi Kiris yãmb sẽn ka da-pɩk zug tɩ Wẽnnaam vʋʋg-b n bas kũumã yʋʋre, n kɩt tɩ rao-kãngã paam laafɩ zãng n yas yãmb fãa taoore. 11#Yɩɩn 118.22Wa gʋls sõamyã sẽn yetã, a Zeezi yaa:
«Kugr ning yãmb a tãn-metbã sẽn dag n zãgsã,
yaa kug-kãng n lebg roogã pãng kugri.»
12Fãagr ka be ne ned a to sã n ka a Zeezi ye. Bala, Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ n paam fãagr ye. 13La bãmb sẽn yãnd a Pɩyɛɛr ne a Zã pel-kɛgengã, b yɛɛsame, bala, b rag n bãngame t'a Pɩyɛɛr ne a Zã yaa nin-zaals sẽn ka paam zãmsgo. La b rag n bãngame t'a Pɩyɛɛr ne a Zã rag n tũuda a Zeezi. 14Kaorengã yɛl-bʋ-kaoodbã sẽn yã rao ningã sẽn paam maagrã t'a yik n yas a Pɩyɛɛr ne a Zã sɛɛgẽ wã, b rag n ka tar sẽn na leok ye. 15La b kõo a Pɩyɛɛr dãmb noor tɩ b yi kaoreng yɛl-bʋ-bʋʋdbã roogẽ. La kaoreng yɛl-bʋ-bʋʋdbã yẽsa ne taab n yeel yaa: Tõnd na n maana nin-kãensã bõe? 16Bala, Zeruzalɛm nebã fãa bãnga vẽeneg tɩ nin-kãensã maana bõn-bãn-kãsenga, la tõnd ka tõe n kɩɩs bõn-kãng ye. 17La sẽn na n yɩl tɩ yel-kãngã ra saag nebã sʋk n paase, wa-y tɩ d gɩdg-b tɩ b ra leb n gom ne ned ba a yembr a Zeezi yʋʋrã yell ye. 18Dẽ, b boola a Pɩyɛɛr ne a Zã n yeel-b tɩ b ra leb n tol n gom la b zãms nebã ne a Zeezi yʋʋr ye. 19La a Pɩyɛɛr ne a Zã leok-b lame yaa: Yaa tɩrg Wẽnnaam nifẽ tɩ tõnd sak yãmb n yaool n bas Wẽnnaam? Bɩ yãmb mens togse. 20Bala, tõnd ka tõe n ka gom bũmb ning tõnd sẽn yã la d wʋmã yell ye. 21La kaoreng yɛl-bʋ-bʋʋdbã leb n lenga a Pɩyɛɛr dãmb n leb n bas-b n ka tõog n paam bũmb sẽn na n sɩbg-b ye, b sẽn zoet nebã yĩnga. Bala, nebã fãa ra pẽgda Wẽnnaam bũmb ning sẽn maanã yĩnga. 22Bala, rao ning maagrã sẽn yɩ bõn-bãndã dag n tara sẽn yɩɩd yʋʋm pis-naase.
Tẽedbã pʋʋsa Wẽnnaam n paam daoodo
23La b sẽn yiis a Pɩyɛɛr ne a Zã n base, bãmb kẽnga b ba-biis a taaba nengẽ, n tɩ togs-b bũmb ning fãa maan-kʋʋdbã kãsem-dãmbã ne kãsem-dãmbã sẽn da yeel bãmbã. 24#Yik 20.11, Neem 9.6, Yɩɩn 146.6Tẽedbã sẽn wʋm yõwã, b lagma taab n pʋʋs Wẽnnaam n yeel yaa: Zu-soaba, yãmb n naan yĩngr la tẽnga, la ko-kãsengã, la bũmb nins fãa sẽn be b pʋsẽ wã, 25#Yɩɩn 2.1,2yãmb n kɩt tɩ tõnd yaab a Davɩɩd sẽn yaa yãmb tʋmtʋmdã gom ne Sɩɩg-sõng pãnga, n yeel tɩ: «Yaa bõe yĩng tɩ buud toay-toayã sũy puudẽ, la yaa bõe tɩ nebã set sedb sẽn ka võore. 26Dũniyã rĩm-dãmbã segla b mens zabr yĩnga, la nanambsã lagma taaba, n na n zab ne Zu-soabã la ne bãmb Kirisã.» 27#Luk 23.7-11, Mat 27.1,2, Mark 15.1, Luk 23.1, Zã 18.28,29Bala, rĩm a Erood ne a Põns Pilat sɩd lagma taab Zeruzalɛm ka, ne bu-zẽmsã la ne Israyɛll nebã n zab ne yãmb tẽn-tʋmd-sõng a Zeezi yãmb sẽn yãkã. 28Woto, bãmb pidsa bũmb ning fãa sẽn zems yãmb sẽn da pĩnd n yãk ne y pãngã la y ratmã. 29La moasã, Zu-soaba, kelg-y bãmb zabr goamã. La y kõ y tẽn-tʋmdbã raood kãseng tɩ b moon yãmb koɛɛgã. 30Tẽeg-y y nug n kɩt tɩ neb paam maagre, tɩ bõn-bãnã la bãnã maan ne y tʋmtʋmd-sõng a Zeezi yʋʋre.
31La bãmb sẽn pʋʋs n sɛ, bãmb sẽn dag n tigim taab roog ningã rigimdame. La b fãa pida ne Sɩɩg-sõngo. La b moona Wẽnnaam koɛɛgã ne raoodo.
Tẽedbã pʋɩɩ b sẽn tarã fãa ne taaba
32 #
Tʋʋm 2.44,45 Neb wʋsgã sẽn yaa Kiris tẽedbã sũyã la b yamã fãa ra yaa a yembre. Bãmb ned ba a yembr dag n ka yet tɩ bũmb nins yẽ sẽn so wã yaa a meng rẽnd ye. La paoongã fãa rag n yaa bãmb fãa n so. 33La tẽn-tʋmdbã rag n kɩta Zu-soabã a Zeezi vʋʋgrã kaset ne pãn-kãsenga. La bark kãseng rag n sigda bãmb fãa zutu. 34La bãmb sʋkã ned ba a yembr da ka naong soab ye. Bala, neb nins fãa sẽn da tar pʋto, wall rotã koosa bãmb fãa, n dɩk b sẽn koosã ligd n tall n wa. 35La b kɩta tẽn-tʋmdbã ligdã, la b pʋɩta ligdã tɩ ned kam fãa paam sẽn zems a sõngre.
36La a Zozɛfe, tẽn-tʋmdbã sẽn pʋd a soab yʋʋr t'a Barnabaas sẽn dat n togs tɩ ned sẽn belsd a taaba. Yẽnda yaa Leevi buudu la a yita Sɩpre. 37Yẽnda koosa a pʋʋg n tall ligdã n wa rɩgl tẽn-tʋmdbã taoore.
Currently Selected:
Tẽn‑tʋmdbã tʋʋmã 4: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
