A Zã koe‑noogo 11

A Lazaar kũum

1 # Luk 10.38,39 Dao a yembr n be Betani n ka keem ye. Yẽnda yʋʋr la a Lazaare, A tão‑poak a Maari ne a ma-bi-poak a Mart me dag n vɩɩ tẽn-kãngã. 2#Zã 12.3Yaa Maari‑kãng n rag n kiig tɩdar kaam a Zeezi zug la a yẽes bãmb nao ne a zoobdã. Yaa yẽnda tão a Lazaar n lʋɩ ka-keemã. 3Ma-bi-pogs a yiibã tʋmame tɩ b tɩ yeel a Zeezi yaa: «Zu-soaba, ad ned ning yãmb sẽn nongã bẽedame.» 4A Zeezi sẽn wʋm woto, b yeelame: «Bã-kãngã ka kũum bãag ye, yaa Wẽnnaam waoogr yĩnga, la tɩ Wẽnnaam bi-riblã me na n tũnuga rẽnda n paam waoogre.»

5La a Zeezi yaool n dag n nonga a Mart ne a ma-bi-poakã, la a Lazaare. 6A Zeezi sẽn wʋm t'a Lazaar ka laafɩ wã, b kell n paa zĩig ning b sẽn dag n be wã rasem a yiib yɛsa. 7Rẽ poore, b yeela b karen-biisã tɩ b wa tɩ b leb Zʋʋde. 8Karen-biisã yeela a Zeezi yaa: «Karen-saamba, nindaarẽ ka bal tɩ Zʋɩf-rãmbã dag n dat n lob yãmb ne kuga, tɩ yãmb leb n lebd be?» 9A Zeezi leokame n yeele: «Yibeoog tɩ ta zaabr ka lɛɛr-dãmb piig la a yiibu sɩda? Ned sã n kẽnd wĩndga, a ka lagsd ye. Bala, a nee dũni‑kãngã vẽenemã. 10La ned sã n kẽnd yʋngo, a lagsdame, bala, vẽenem ka be yẽnda pʋgẽ ye.» 11A Zeezi sẽn gom a woto n sa, b yeela b karen-biisã yaa: «Tõnd zoa a Lazaar gũsame,#11.11 Ne a Zeezi, kũum yaa wa gõeem, bala bãmb tõeeme tɩ sẽn ki-a wã vʋʋge. la mam na n kẽng n tɩ nek-a lame.» 12Karen-biisã yeela bãmb yaa: A sã n gũsame, rẽnda a na n paama a menga. 13A Zeezi dag n gomda a Lazaar kũumã yelle, la b karen-biisã dag n tẽedame tɩ yaa gõeem meng-menga. 14Dẽ, a Zeezi yeel-b-la vẽeneg yaa: «A Lazaar kiime.» 15La mam sũur yaa noog m sẽn ka zĩnd be wã yĩnga, tɩ yãmb tõe n tẽ. Wa-y tɩ d kẽng a nengẽ. 16Dẽ, a Toma b sẽn boond tɩ Didim yeela karen-biis a taabã yaa: Wa-y tɩ d me tũ bãmb n tɩ naag n ki.

A Zeezi yaa vʋʋgr la vɩɩm

17A Zeezi sẽn ta be, b mika b sẽn dag n mum a Lazaar tɩ rab-naaslẽ. 18Betani yaool n dag n pẽe ne Zeruzalɛm sẽn zems kɩlo a tãab bala. 19Zʋɩf-rãmb wʋsg waa a Maari ne a Mart nengẽ n na n bels-ba, b tão wã kũum yĩnga.

20A Mart sẽn wʋm t'a Zeezi watame wã, a yiime n seg bãmba, la a Maari paa yir n zĩẽ. 21A Mart yeela a Zeezi yaa: «Zu-soaba, yãmb sã n dag n beẽ ka, mam tão wã dag n ka na n ki ye.» 22La baa ne moasã, mam miime tɩ yãmb sẽn na kos Wẽnnaam bũmb ning fãa, bãmb na n kõo yãmba. 23A Zeezi yeel-a lame: «Fo tão wã na n vʋʋgame.» 24A Mart leoka bãmb n yeele: Mam miime t'a na n vʋʋga vʋʋgrã wakate, yaoolem daarã.#11.24 A Zeezi waoongã daare, wakat ning kũum sẽn na n vʋʋgã. 25A Zeezi yeel-a lame yaa: «Yaa maam la vʋʋgre, la vɩɩm. Ned ning fãa sẽn tẽed maam baa a sã n ki a na paam vɩɩm. 26La ned ning fãa sẽn vɩ n tẽed maam kõn tol n ki ye. Dẽ yĩnga, fo tẽeda woto bɩ?» 27A Mart yeela a Zeezi yaa: «N-yẽe, Zu-soaba, mam tẽedame tɩ yãmb yaa Kirisi, Wẽnnaam bi-riblã, soab ning sẽn tog n wa-a dũniyã zugu.»

A Zeezi yãbame

28A Mart sẽn gom woto n sa, a loogame. La a boola a ma-bi-poak a Maari n soos n yeel-a tɩ Karen-saamb waame la b boond-a lame. 29A Maari sẽn wʋm a woto, a yika tao-tao n babs a Zeezi, 30bala, a Zeezi dag n nan n ka kẽ tẽngã pʋgẽ ye, b rag n ket n bee zĩig ning a Mart sẽn seg bãmbã. 31Zʋɩf-rãmb nins sẽn dag n be yir n belsd a Maari wã sẽn yã t'a yika tao-tao n yi wã, b pʋg-a lame, n tẽed t'a kẽnda yaoogẽ wã n na n tɩ yãbe.

32A Maari sẽn ta zĩig ning a Zeezi sẽn be wã, n yãnd bãmbã, a wõgemda bãmb taoor n yeel bãmb yaa: «Zu-soaba, yãmb sã n dag n zĩndẽ ka, mam tão wã dag n ka na n ki ye.» 33A Zeezi sẽn yã a Maari sẽn yãbdã, la b yã Zʋɩf-rãmb nins sẽn tũ yẽnda wã me sẽn yãbdã, bãmb yĩngã rigimdame, la b sũurã sãamame. 34A Zeezi sokame yaa: «Yãmb ning-a-la yɛ?» La b leoka a Zeezi n yeele: Zu-soaba, wa n ges-y-yã. 35A Zeezi yãbame. 36Dẽ, Zʋɩf-rãmbã yeelame yaa: «Ges-y-yã a sẽn dag n nong-a to-to!» 37Bãmb neb kẽer yeelame: Bãmb sẽn puk zoangã ninã, bãmb dag n ka tõe n maan tɩ rao-kãngã ka ki la?

A Lazaar vʋʋgre

38A Zeezi yĩngã leb n digimdame, la b kẽnga yaoogẽ wã. Dag n yaa tãng bokẽ, tɩ b bilim kugr n yẽd a noorã. 39A Zeezi yeelame: «Lak‑y kugrã.» Kiidã tão a Mart yeela a Zeezi yaa: «Zu-soaba, a zoe n põogame, bala, a kũumã rasem a naas la rũndã. 40A Zeezi yeel-a lame yaa: «Mam ka yeel foom tɩ fo sã n tẽ, fo na n yãnda Wẽnnaam ziir sɩda?» 41Dẽ, nebã laka kugrã, la a Zeezi nak n gesa yĩngr n yeele: M ba, mam pʋʋsda yãmb barka, y sẽn leok mam kosgã yĩnga. 42Mam yẽ miime tɩ yãmb leokda mam kosg wakat fãa, la yaa neb kʋʋngã sẽn be ka wã yĩng la mam sẽn gomdã, tɩ b na tẽ tɩ yaa yãmb n tʋm maam.» 43A Zeezi sẽn gom woto n sɛ, b goma ne pãng n yeele: «Lazaare, wa yi ka!» 44La sẽn dag n ki-a wã yiime, la a nao wã ne a nusã vila ne pɛɛla, la a nengã dag n luda ne peende. A Zeezi yeela nebã tɩ b lood a pɛɛlã, la b bas-a t'a looge.

Kãsem-dãmbã baooda sor n na n kʋ a Zeezi

(Mat 26.1-5, Mark 14.1-2, Luk 22.1-6)

45Zʋɩf-rãmb nins sẽn dag n wa a Maari nengẽ, n yãnd bũmb nins a Zeezi sẽn maanã, wʋsg tẽe bãmba. 46La neb kẽer kẽngame n tɩ yã Fariizẽ-dãmbã n togs-b bũmb ning a Zeezi sẽn maanã.

47Dẽ, maan-kʋʋdbã kãsem-dãmba, la Faariisẽ-dãmbã tigsa kaorengã yɛl bʋ-bʋʋdbã n yeele: «Tõnd na n maana a wãna? Raoã maanda bõn-bãn wʋsgo. 48Tõnd sã n bas-a t'a ket n maandẽ, nebã fãa na n tẽe-a lame, la Rome-dãmbã na n waa n sãama tõnd wẽnd doogã ne d soolmã.» 49Bãmb ned a yembre, a Kayiifi, sẽn dag n yaa-a maan-kʋʋd kãsem yʋʋm‑kãngã yeel-b lame yaa: «Yãmb ka wʋmd yellã baa fɩ. 50Yãmb ka ne tɩ ned a yembr sã n ki nebã fãa yĩng tɩ soolmã tõr da sãam n são?» 51Mik ka ne a mengã yam la a gom a woto ye. A sẽn dag n yaa maan-kʋʋd kãsem yʋʋm‑kãngã, a togsa bãngr gomd n wilg t'a Zeezi tog n kii bãmb soolmã yĩnga. 52La ka bãmb soolmã yĩng bal ye, la yaa sẽn na n yɩlẽ me n tigim Wẽnnaam kambã sẽn sãeegã, tɩ b lebg yĩng a yembre. 53Sẽn sɩng ne da-kãnga, Zʋɩf-rãmbã yãka yam tɩ kʋ a Zeezi. 54Dẽ, a Zeezi dag n ka leb n pukd b meng n kẽnd Zʋɩf-rãmbã sʋk ye. La bãmb yii be n kẽng zĩig sẽn pẽ ne we-rasempʋɩɩgã, tẽng b sẽn boond tɩ Efrayiim pʋgẽ. Bãmb zĩnda be ne b karen-biisã.

55Zʋɩf-rãmbã Pak tigrã dag n kolgame, la tẽngã neb wʋsg kẽnga Zeruzalɛm, sẽn deng tigrã, n na n tɩ yɩlg b mense. 56B rag n baooda a Zeezi la b yet taab wẽnd doogẽ wã yaa: «Yãmb tagsg yaa bõe ne b yellã? B na n kell n paame n ka wa tigrã?» 57Mik maan-kʋʋdbã kãsem-dãmbã ne Fariizẽ-dãmbã dag n yeela nebã tɩ ned sã n bãng a Zeezi zĩiga, bɩ a wa n wilg tɩ b tɩ yõk-ba.

Currently Selected:

A Zã koe‑noogo 11: MPBU

Highlight

Copy