A Zã koe‑noogo 20

A Zeezi vʋʋgre

(Mat 28.1-10, Mark 16.1-8, Luk 24.1-12)

1Dimaasã daar yibeoog pĩnda, a Maari Madelɛn kẽnga yaoogẽ wã, rẽ tɩ zĩigã ket n yaa libsgu. La a mikame tɩ b bilga kugrã n bas yaoogã. 2Yẽnda zoeeme n tɩ yãnd a Sɩmo Pɩyɛɛr ne karen-biig a to wã a Zeezi sẽn dag n nongã, n yeel-b tɩ yaa: «B yiisa Zu-soabã yaoogẽ wã, la tõnd ka mi b sẽn tɩ bĩng-b zĩig ning ye.»

3A Pɩyɛɛr ne karen-biig a to wã yiime n na n kẽng yaoogẽ wã. 4Bãmb b yiibã rag n zoetame, la karen-biig a to wã zoee tao-tao n yɩɩg a Pɩyɛɛre, n deng-a n ta yaoogẽ wã. 5A sulgame n gese, n yãnd pɛɛlã sẽn be beenẽ wã, la a yaool n ka kẽ ye. 6A Sɩmo Pɩyɛɛr sẽn dag n pʋgd yẽnda wã taame. A kẽe yaoogẽ wã, n mik tɩ pɛɛlã bee be. 7Peend ning b sẽn dag n lud a Zeezi zug ne-wã me dag n bee be, la a ka naag ne a taabã ye, la b gil-a lame n dɩgl toore. 8Dẽ, karen-biig a to wã, sẽn deng-a n ta wã me kẽe yaoogẽ wã n yãnd bũmb nins sẽn be beenẽ wã, la a tẽeme. 9Bala, a dag n nan ka wʋm Wẽnnaam gʋls-sõngã sẽn yet t'a Zeezi tog n vʋʋgame wã võor ye. 10La karen-biisã lebg n kuila b yiya.

A Zeezi puka b meng ne a Maari Madelɛn

(Mark 16.9-11)

11A Maari yaool n dag n yasa yɩng yaoogã sɛɛgẽ n yãbda. A yãbdame, la a sulgame n na n ges yaoogã pʋgẽ, 12la a yãnda malegs a yiib sẽn yer fu-peelse, n zĩ zĩig ning b sẽn dag n gãneg a Zeezi wã. A yembr dag n zĩi zugã zĩigẽ, t'a yembr zĩ nao wã zĩigẽ. 13Malegsã yeela pagã yaa: «Paga, yaa wãn tɩ fo yãbda?» La a leokame: «Yaa b sẽn dɩk m Zu-soabã tɩ m ka mi b sẽn ning-b zĩig ningã yĩnga.» 14Pagã sẽn gomd a woto wã, a wẽnegame n yãnd a Zeezi sẽn yɛs yĩngri, la a dag n ka mi tɩ yaa bãmb ye. 15A Zeezi yeel-a lame yaa: «Paga, bõe tɩ fo yãbda? Ãnda la fo baooda?» Pagã sẽn tẽed tɩ yaa tɩɩsã gũud la sẽn gomd ne yẽnda wã, a yeelame: «M soaala, sã n yaa yãmb n dɩk-b bɩ y togs maam yãmb sẽn bĩng-b zĩig ning tɩ m na tɩ rɩk-ba.» 16A Zeezi bool-a lame yaa: «Maari!» A Maari wẽnemdame n yeel ne Ebre goam tɩ rabuni, sẽn dat n togs tɩ karen-saamba. 17A Zeezi yeel-a lame yaa: «Ra sɩɩs-m ye, bala, mam nan ka rʋ m ba nengẽ ye. Kẽng m ba-biisã nengẽ n tɩ yeel-b tɩ mam dʋʋda m ba sẽn yaa yãmb ba wã nengẽ, mam Wẽnnaam sẽn yaa yãmb Wẽnnaamã nengẽ.» 18A Maari Madelɛn waa n togsa karen-biisã t'a yãnda Zu-soabã, la bãmb n yeel yẽnda bõn-kãense.

A Zeezi puka b meng ne b karen-biisã

(Mat 28.16-20, Mark 16.14-18, Luk 24.36-49)

19Da-kãng sẽn yaa dimaas daarã yʋngo, doog ning a Zeezi karen-biisã sẽn dag n be wã noy dag n pagame, bãmb sẽn zoet Zʋɩf-rãmbã yĩnga. A Zeezi waame n yals bãmb sʋk n yeel-b yaa: «Bɩ laafɩ zĩnd ne yãmba!» 20A Zeezi sẽn yeel woto, b wilga b karen-biisã b nusã ne b lʋgrã. Karen-biisã sẽn yãnd Zu-soabã, b kɩdmame. 21A Zeezi leb n yeel-b lame yaa: «Bɩ laafɩ zĩnd ne yãmba! Wa m ba sẽn tʋm maamã, mam me tʋmda yãmba.» 22Gom-kãens zugẽ, a Zeezi fʋʋsa bãmb zug n yeel-ba: «Reeg-y Sɩɩg-sõngo. 23#Mat 16.19, 18.18Neb nins yãmb sẽn na n kõ sugrã na n paama sugri, la neb nins yãmb sẽn na tõdg sugrã kõn paam sugr ye.»

A Toma ka-tẽebo

24Karen-biisã piig la a yiibã ned a yembre, a Toma b sẽn boond tɩ Didimã#20.24 Didim: rat n yeelame tɩ kiinkirga dag n ka be ne a taabã wakat ning a Zeezi sẽn wa wã ye. 25Dẽ, karen-biis a taabã yeela yẽnda yaa: «Tõnd yãnda Zu-soabã!» La yẽnda yeela bãmb yaa: «Mam sã n ka yãnd kutã bãn b nusẽ wã, mam sã n ka tʋm m nug-bil kutã bogd pʋgẽ, la m sã n ka tʋm m nug bãmb lʋgrẽ wã, mam kõn tol n tẽ ye.»

26Rasem a nii rẽ zugẽ, a Zeezi karen-biisã da leb n tigma taab roogẽ wã, la a Toma dag n bee ne bãmba. Kʋɩlemsã dag n pagame, la a Zeezi waa n yalsa bãmb sʋk n yeel-b yaa: Bɩ laafɩ zĩnd ne yãmba! 27La b yeela a Toma yaa: «Tẽeg f nug-bilã ka. Ges mam nusã. Tẽeg f nugã n tʋm mam lʋgrẽ wã me, la f tẽ n da yɩ ka-tẽeb soab ye.» 28A Toma leoka bãmb n yeele: Mam Zu-soaba la mam Wẽnnaam! 29A Zeezi yeela yẽnda yaa: Yaa fo sẽn yã maamã yĩng la fo tẽeda. Bark bee neb nins sẽn ka yã n yaool n tẽedã zutu.

Bũmb ning sẽn kɩt tɩ b gʋls sebrã

30Bõn-bãn wʋsg a taab la a Zeezi maan b karen-biisã taoor tɩ ka gʋls seb-kãngã pʋgẽ ye. 31La bãmbã sẽn gʋlsã, yaa tɩ yãmb na tẽ t'a Zeezi yaa Kirisi, Wẽnnaam Bi-ribla, la tɩ yãmb na paam vɩɩm bãmb yʋʋrã yĩnga, yãmb sẽn tẽ wã yĩnga.

Currently Selected:

A Zã koe‑noogo 20: MPBU

Highlight

Copy