A Luk koe‑noogo 1
1
Koɛɛg a Teofill yĩnga
1Neb wʋsg makame n gʋls bũmb nins sẽn maan tõnd sʋkã. 2B sẽn gʋlsã zemsa wa neb nins sẽn dag n yãnd yellã hal a sɩngrẽ sẽn togs tõndã, la b lebg koe-noogã moaandbã. 3Teofill sõngo, mam sẽn fees n bao n bãng fãa neb nins sẽn bils maamã nengẽ wã, mam tagsame tɩ yaa neer tɩ mam me gʋls yãmb n wilg yɛlã sẽn pʋg taab to-to, 4tɩ yãmb tõe n deeg tɩ bũmb nins b sẽn dag n zãms yãmbã yaa sɩda.
Malɛɛk pĩnd n togsa a Zãmbatiis rogem
5 #
1Kib 24.10
Wakat ning a Erood sẽn dag n yaa Zʋʋde rĩmã, maan-kʋʋd a ye n dag n be tɩ b boond t'a Zakari. Yẽnda yaa maan-kʋʋd a Abiya sull a ye neda. A pagã yaa maan-kʋʋd kãsem a Aarõ yagenga, la a yʋʋr la a Elizabɛte. 6Bãmb b yiibã fãa dag n yaa nin-tɩrs Wẽnnaam nifẽ, la b da sakda Zu-soabã tõodã la b noyã fãa sõama. 7La b rag n ka tar biig ye. Bala, a Elizabɛt da yaa kiiri, la b yiibã fãa da kʋʋlame.
8Daar a yembre, a Zakari buudã sẽn da tog n ges maoongã yelle, a Zakari dag n maanda maan-kʋʋr tʋʋmdã Wẽnnaam taoore. 9Bala, b dag n maana bãnde, wa sẽn zems maan-kʋʋdbã miningu, n yãk yẽnda t'a kẽ Zu-soabã roogẽ wã n yõog wisdã. 10La neb kʋʋngã dag n bee yɩng wisdã yõogr wakat n pʋʋsdẽ. 11La Zu-soabã malɛɛk puka a meng ne a Zakari, n yas wisdã yõogr tẽn-kugrã rɩtgo. 12La a Zakari sẽn yã malɛɛkã, a yɛɛsame, tɩ rabeem yõk-a. 13Malɛɛkã yeela yẽnda yaa:
Zakari, da zoe rabeem ye,
bala, Wẽnnaam leoka fo pʋʋsgo.
Fo pag a Elizabɛt na n doga bi-ribl n kõ-fo.
La fo na n pʋda a yʋʋr t'a Zã.
14Fo na n paama sũ-noog n kɩdme,
la neb wʋsg na n maana sũ-noog a rogmã yĩnga.
15 #
Sõd 6.3
Bala, yẽnda na n yɩɩ nin-kãseng Zu-soabã nifẽ.
Yẽnda kõn yũ reezẽ rãam wall bõn-yũudl sẽn yilimd neng ye.
Sɩɩg-sõng na n pida yẽnda a ma sẽn na n dog-a wakat bala.
16A na n kɩtame tɩ Israyɛll kamb wʋsg
lebg n wa Zu-soabã sẽn yaa bãmb Wẽnnaamã nengẽ.
17 #
Mal 3.23,24 Yẽnda na n kẽna Wẽnnaam taoor ne sɩɩg ning
la pãng ning a Eli sẽn dag n tarã,
n kɩt tɩ ba-rãmbã paam zems-n-taar ne b kamba,
n kɩt tɩ kɩɩsdbã paam yam n lebg nin-tɩrse.
La a na n sõnga nebã tɩ b segl n sa Zu-soabã yĩnga.
18A Zakari soka malɛɛkã yaa: «Bõe n na n kɩt tɩ mam bãng bõn-kãnga? Bala, mam yaa nin-kẽema, la m pagã me yʋʋm ka paood ye.» 19#Dãn 8.16, 9.21La malɛɛkã leoka yẽnda yaa: «Mam yaa a Gabriyɛlle, n be Wẽnnaam taoore. B tʋma maam tɩ m wa n gom ne foom la m togs-f koe-no-kãnga. 20Gese, fo na n lebga muka, la fo kõn tõog n gome, hal tɩ ta wakat ning bõn-kãngã sẽn na n paam pidsgã, fo sẽn ka tẽ mam goamã, tɩ b yaool n na n paam pidsgu, b wakat sã n ta wã yĩnga. »
21Wakat-kãnga, nebã da gũuda a Zakari, la a sẽn kaoosd wẽnd doogẽ wã yɛɛsa bãmba. 22La a sẽn yi, a ka tõog n gom ne nebã ye. La b bãngame t'a yãnda yãab wẽnd doogẽ wã. La a sɩngame n bils bãmb ne magbo, la a ket n yaa muka. 23La a Zakari tʋʋmdã rasem sõor sẽn pidi, a kuila a yiri.
24La wakat bilf sẽn paase, a pag a Elizabɛt rɩka pʋga. La yẽnda soondame hal tɩ ta kiis a nu. 25La a yeelame yaa: Ad bũmb ning Zu-soabã sẽn maan n kõ maam, n zems wakat ning bãmb sẽn yãk yam n na n yiis bũmb ning sẽn dag n yaa mam yãnd nebã sʋkã.
Malɛɛk pĩnd n togsa a Zeezi rogem
26Kiis a yoob soabã wakate, Wẽnnaam tʋma malɛɛk a Gabriyɛlle, Galɩle tẽng a yembr sẽn boond tɩ Nazarɛte, 27#Mat 1.18pa-kuil a yembr nengẽ, b sẽn da rɩk n kõ a Davɩɩd yageng a Zozɛfe. Pʋg-sadã yʋʋr la a Maari. 28Malɛɛkã waa yẽnda nengẽ n yeel-a yaa: Mam pʋʋsda foom, ned ning Wẽnnaam sẽn ning barkã. Zu-soabã bee ne foom. 29Gom kãens namsa a Maari t'a sokd a meng tɩ pʋʋs-kãngã võor yaa bõe? 30Malɛɛkã yeel-a lame yaa:
Maari, da zoe rabeem ye.
Bala, fo paama bark Wẽnnaam nifẽ.
31 #
Mat 1.21
Gese, fo na n dɩka pʋga, n dog bi-ribla,
la f na n pʋda a yʋʋr t'a Zeezi.
32 #
2Sãm 7.12,13,16, Eza 9.6 Yẽnda na n yɩɩ nin-kãsenga,
la b na n boond-a lame tɩ
Sẽn-Ka-To Bi-ribla.
Zu-soab a Wẽnnaam na n kõo yẽnda
a yaab a Davɩɩd naam.
33Yẽnda na n sooga a Zakoob buudã wakat sẽn kõn sa,
la a naamã kõn zĩnd saab wakat ye.
34A Maari soka malɛɛkã tɩ bõn-kãng na n yɩɩ wãn n yɩ tɩ yẽnda nan ka mi raoa? 35La malɛɛkã leok-a lame yaa:
Sɩɩg-sõng na n waa fo zugu,
la Wẽn-kẽemdã pãngã na n luda foom ne b maasem.
Yaa woto yĩng la b na n bool bi-sõng ning
fo sẽn na n dogã tɩ Wẽnnaam Bi-ribla.
36Ad fo kẽem a Elizabɛt me rɩka pʋg a kʋʋlem wakate, n na n dog bi-ribla. B sẽn dag n boond yẽnda tɩ kiirã, a tara kiis a yoob pʋg moasã. 37#Sɩng 18.14Bala, bũmb ka be Wẽnnaam sẽn ka tõe ye. 38Dẽ, a Maari yeelame yaa: Mam yaa Zu-soabã tʋmtʋmd poaka. Bɩ yãmb sẽn yeel bũmb ningã yɩ.
La malɛɛkã loogame n bas-a.
A Maari kẽnga a Elizabɛt nengẽ
39Da-kãens pʋgẽ, a Maari yikame n kẽng Zʋʋde tẽng a yembr sẽn be tãmsã sẽnẽ wã tao-tao. 40A Maari kẽe a Zakari zakẽ, n pʋʋs a Elizabɛte. 41A Elizabɛt sẽn wʋm a Maari pʋʋsgã bala, biigã sẽn be yẽnda pʋgẽ wã virsame, la a Elizabɛt pida ne Sɩɩg-sõngo. 42A zẽka a koɛɛg n yeele:
Fo tara Wẽnnaam bark n yɩɩd pagbã fãa.
La biigã sẽn be fo pʋgẽ wã me tara barka.
43Maana a wãn tɩ mam wa paam tɩ m Zu-soabã ma wat m nengẽ? 44Bala, ade, fo pʋʋsmã sẽn kẽ mam tʋbrẽ wã yee, la biigã sẽn be mam pʋgẽ wã sẽn virs ne sũ-noogo. 45Bark bee pag ning sẽn tẽ tɩ Zu-soabã sẽn yeel yẽnda wã na n paama pidsgã zugu.
46La a Maari yeelame yaa:
Mam sɩɩgã pẽgda Zu-soabã,
47la mam sũur pida ne sũ-noogo,
mam fãagd a Wẽnnaam yĩnga.
48 #
1Sãm 1.11
Bala, bãmb gesa b tʋmtʋmd-poakã a sik-m-mengã pʋgẽ.
Bala, sẽn sɩng ne moasã, ad zamaan fãa
neb na n yeelame tɩ bark bee mam zugu.
49Bala, Pãng‑Soabã maana bõn-kãsems n kõ maam.
Bãmb yʋʋr yaa sõmblem.
50«Bãmb nimbãan-zoeerã paada neb nins
sẽn zoet bãmbã zutu, zamaan woo zamaane.»
51Bãmb wilga b nug pãnga.
Bãmb sãeega neb nins sẽn dag n tar wuk-m-meng
tagsd b sũyã pʋsẽ wã.
52 #
Zoob 5.11, 12.19 Bãmb deega pãens rãmbã naam n bas-ba,
la b zẽk sik-m-mens rãmbã.
53Bãmb tɩgsa kom sẽn tar b rãmbã ne arzegse,
la b kɩt tɩ arzegsã rãmb loog zaalem.
54Bãmb sõnga b tʋmtʋmd a Israyɛlle,
la b tẽeg b nimbãan‑zoeerã,
55 #
Sɩng 17.7
#
1Sãm 2.1-10
wa b sẽn dag n yeel tõnd yaab-rãmbã tɩ b na n maana
a Abrahaam ne a yagensã neer wakat fãa wã.
56A Maari paa ne a Elizabɛt sẽn kolg kiis a tãabo, n yaool n lebg n kuil a yiri.
A Zãmbatiis rogem
57A Elizabɛt rogem wakat taame. La a roga bi-ribla. 58Yẽnda yagsã ne a roagdbã wʋmame tɩ Zu-soabã puka b nimbãan-zoeer ne yẽnda, la b lagma ne-a n paam sũ-noogo.
59 #
Mk 12.3
Rogmã rasem a nii daare, bãmb waa ne bi-bilfã n na n kẽes bãongo, la b da rat n pʋda a yʋʋr t'a Zakari wa a baaba. 60La a ma wã gomame n yeel tɩ ayo! T'a yʋʋr na n yɩɩ a Zã. 61Nebã yeela a Elizabɛt tɩ yẽnda roagdbã sʋka, ned ka be n tar yʋ-kãng ye. 62La bãmb bilsa biigã baaba ne nus n dat n bãng a sẽn dat tɩ b pʋd biigã yʋʋr ninga. 63A Zakari kosa walga, n gʋls tɩ biigã yʋʋr la a Zã. La nebã fãa yɛɛsame. 64Wakat-kãng bala, a Zakari zelemd lakame t'a sɩng n gomd n pẽgd Wẽnnaam. 65Rabeem yõka b yagsã fãa. La koe-kãng saaga Zʋʋde tẽmsã fãa sẽn be tãmsã sʋkã. Nebã dag n gomda bõn-kãng yell ne taaba. 66Neb nins fãa sẽn wʋm gomdã da tagsda a yelle, la b sokdẽ tɩ bi-kãngã na n yɩɩ bõe biiga? Bala, Zu-soabã pãng dag n bee ne-a.
A Zakari bãngr goamã
67Biigã ba a Zakari pida ne Sɩɩg-sõngo, n gom pĩnd-n-bãngr goam n yeele:
68Pẽgr Zu-soabã sẽn yaa Israyɛll nebã Wẽnnaam,
bãmb sẽn wa n ges b nebã n fãag-bã yĩnga,
69la bãmb sẽn kõ tõnd fãagd sẽn tar pãnga,
sẽn yit a Davɩɩd sẽn yaa bãmb tʋmtʋmdã buud pʋgẽ
70wa bãmb sẽn dag n gom ne b no-rɛɛs-sõamyã
noy hal wakat sẽn kaoose,
71tɩ b na n fãaga tõnd n yiis d bɛɛbã la neb nins fãa
sẽn kis-b tõndã nusẽ wã.
72Woto, bãmb zoee tõnd yaab-rãmbã nimbãanega,
n tẽeg bãmb kãab-sõngã yelle,
73wa bãmb sẽn dag n kãabe,
n wẽen n yeel tõnd yaab a Abrahaam
74-75tɩ b na n fãaga tõnd n yiis d bɛɛbã nusẽ,
la b kõ tõnd pãn-tõog tɩ pʋʋs bãmb ne sõmblem
la tɩrlem bãmb taoor hal tõnd vɩɩmã tɛka,
tɩ rabeem kaẽ ye.
76 #
Mal 3.1
La foom a bi-bilfã, b na n boola foom
tɩ Sẽn‑Ka‑To no-rɛɛsa.
Bala, fo na n lʋɩɩ Zu-soabã taoore n maneg bãmb soayã,
77la f kɩt tɩ nebã bãng tɩ yaa ne yel‑wẽnã
sugr kosg la b na n paam fãagre,
78tõnd Wẽnnaamã nimbãan-zoeerã sẽn yaa kãsengã yĩnga.
Yaa nimbãan-zoeerã yĩng la sõorã sẽn pukdã na n wa tõnd nengẽ,
79 #
Eza 9.1
n kõ neb nins sẽn zĩ lik pʋgẽ la kũum maasmẽ wã vẽenem,
la a tɛ tõnd tɩ d tũ laafɩ sore.
80La biigã bɩtame t'a yam paasdẽ. La a paa weoogẽ wã hal tɩ ta daar ning a sẽn puk a meng ne Israyɛll nebã.
Currently Selected:
A Luk koe‑noogo 1: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
