A Luk koe‑noogo 20

A Zeezi reega b noorã yɛɛnẽ?

(Mat 21.23-27, Mark 11.27-33)

1Daar a yembre, a Zeezi sẽn zãmsd nebã wẽnd doogẽ wã la b moond koe-noogã, maan-kʋʋdbã kãsem-dãmbã, la gʋlsdbã ne kãsem-dãmbã waame. 2La b yeela a Zeezi yaa: «Togs-y tõndo: Yaa ne no-bʋg la yãmb maand bõn-kãensã, wall ãnd n kõ yãmb no-kãnga.» 3A Zeezi leok-b lame yaa: «Mam me na n soka yãmb sokre. 4Togs-y maam: A Zã lisgã yii arzãn bɩ, bɩ yaa ninsaalb nengẽ?» 5La bãmb yẽsa ne taab n yeele: «Tõnd sã n yeel t'a yii arzãna, b na n yeelame tɩ la yaa bõe tɩ tõnd ka tẽ a Zã, 6la tõnd sã n yet t'a yii ninsaalb nengẽ, nebã fãa na n loba tõnd kuga, bala nebã tẽeda hakɩɩk t'a Zã yaa Wẽnnaam no-rɛɛsa.» 7Dẽ bãmb leokame tɩ b ka mi lis-kãng sẽn yi zĩig ning ye. 8A Zeezi yeel-b lame yaa: «Mam me ka na n togs yãmb mam sẽn paam noorã zĩig ning n maand bõn-kãensã ye.»

Reezẽ tɩɩs pʋʋg koaadb yel-bũndi

(Mat 21.33-44, Mark 12.1-11)

9 # Eza 5.1 La a Zeezi sɩngame n wẽ nebã yel-bũn‑kãngã n yeele: Dao a ye n da sel reezẽ tɩɩs pʋʋgo, n dɩk-a n peng reezẽ tɩɩs pʋʋg koaadba, la a yi n tog sor n na n tɩ kaoose. 10La bõn-bɩʋʋng sẽn ta, a tʋma tʋmtʋmd reezẽ tɩ‑koaadbã nengẽ tɩ b kɩs-a reezẽ tɩɩs biis t'a wa n kõ-a. La reezẽ tɩ‑koaadbã pãba yẽnda n lebs-a t'a kuil nug-zaala. 11Yẽnda leb n tʋma tʋmtʋmd a to yɛsa. La koaadbã pãba yẽnda n paoog-a n lebs-a t'a kuil nug-zaala. 12Yẽnda leb n tʋma tãabẽ soaba, la b pogla yẽnda n dig-a. 13La reezẽ tɩɩs pʋʋgã soab yeelame yaa: «Mam na n maana bõe? Mam na n tʋma m bi-ribl-nongrã tɩ tõeeme tɩ b waoog-a.» 14La reezẽ tɩ‑koaadbã sẽn yã biigã, b yẽsa ne taab n yeele: «Yaa yõwã n na n soog a ba wã paoongã bɩ d kʋ‑a tɩ arzɛkã lebg tõnd dẽnda.» 15La b yõka yẽnda n yiis reezẽ tɩɩs pʋʋgẽ wã n kʋ-a. Moasã reezẽ tɩɩs pʋʋgã soab na n maan-b-la bõe? 16A na n waame, n sãam koaadb-kãense, la a rɩk pʋʋgã n peng koaadb a taaba. La nebã sẽn wʋm bõn-kãnga, b yeelame tɩ: Bɩ ra yɩ a woto ye. 17#Yɩɩn 118.22La a Zeezi gesa bãmb n yeel yaa: Gʋlsg sõngã sẽn yeel tɩ: «Kugr ning tãn-metbã sẽn zãgsã lebga roogã pãng kugri, a soakã zĩigẽ wã» võor yaa bõe? 18Ned ning sẽn na n lʋɩ-a kug-kãngã zug na n tõtmame, la kug-kãngã sẽn na n lʋɩ ned ning zugu, a na n beds-a lame.

Zemsame tɩ yao rĩm a Sezaar yõor yaoodo?

(Mat 21.45-46, 22.15-22, Mark 12.12-17)

19Maan-kʋʋdbã kãsem-dãmb ne tõog karen-saam-dãmbã baoome tɩ yõk a Zeezi wakat-kãng bala, la bãmb zoee nebã. B rag n bãngame tɩ yaa bãmb yĩng la a Zeezi sẽn wẽ yel-bũn‑kãngã wã. 20Bãmb sɩngame n gũusd a Zeezi, sẽn na yɩl n paam a Zeezi gomd n bẽd-b n yõk n tɩ kɩs pãn-soaadbã ne Gʋvɛrneerã sẽn so noorã. 21Nin-kãens soka a Zeezi a woto: Karen-saamba, tõnd miime tɩ yãmb gomda tɩrlem la y zãmsd nebã ne tɩrlem, la tɩ yãmb ka tũusd neb ye. La yãmb zãmsda nebã Wẽnnaam sor wa sẽn zems sɩdã. 22Tõnd tara noor tɩ yao rĩm a Sezaar yõor yaood bɩ? Bɩ d ka tare? 23La a Zeezi sẽn bãng bãmb sɩlmã leok-b lame yaa: 24Wilg-y maam lagfo. Maasmã ne gʋlsmã sẽn be a zugã yaa ãndã rẽnda? Tɩ b leok tɩ rĩm a Sezaare. 25Dẽ, a Zeezi yeela bãmb yaa: Rẽ wã, kõ-y rĩm a Sezaar bũmb ning sẽn yaa rĩm a Sezaar dẽnda, la y kõ Wẽnnaam bũmb ning sẽn yaa Wẽnnaam dẽnda. 26Bãmb ka tõog n yõk a Zeezi b gomd baa a yembr pʋgẽ nebã taoor ye. La a Zeezi leokrã yɛɛs-b lame tɩ b sĩndi.

Sokr kũum vʋʋgr poorẽ

(Mat 22.23-33, Mark 12.18-27)

27 # Tʋʋm 23.8 Saduusẽ-dãmbã sẽn yet tɩ kũum vʋʋgr ka be wã neb kẽer kolgame n sok a Zeezi a woto: 28#Tõ 25.5«Karen-saamba, a Moyiis dag n gʋlsame n yeel tõnd tɩ: Ned ba-biig sã n tar pag n ki n bas-a n ka paam biiga, bɩ yẽnda peeg pagã n dog kamb a ba-biigã yĩnga.» 29La raop a yopoe n dag n be n yaa ba-biisi. La kãsma peega paga la a kiime n ka paam biig ye. 30La yiib soabã reega pʋg‑kõorã, n ki n bas-a tɩ tãab soaba reeg-a. 31La a yɩɩ woto ne bãmb b yopoe wã fãa, b kiime n ka paam kamb ye. 32La pagã me yaool n kiime. 33Kũum vʋʋgr daare, bãmb sʋkã, yẽnda na n yɩɩ ãndã soab paga? Bala yẽnda sẽn dag n zĩnd ne neb a yopoe wã fãa la?

34A Zeezi leoka bãmb yaa: «Dũni‑kãnga nebã peegda pagba, tɩ pagbã kuiis sɩdba, 35la neb nins b sẽn na n mik tɩ b zemsame tɩ zĩnd dũni ning sẽn watã pʋgẽ wã la tɩ vʋʋg n bas kũumã ka na n leb n peeg pagba, wala kuil sɩdb ye. 36Bãmb ka tõe n leb n ki yɛs ye, bala, b na n yɩɩ wa malegse, la b na n yɩɩ Wẽnnaam kamba, bãmb sẽn vʋʋg n bas kũumã yĩnga. 37#Yik 3.6Zĩig ning b sẽn gomd tuugã bugmã sẽn be a zugã yellã, a Moyiis wilgame tɩ kũum vʋʋgdame, yẽnda sẽn boond Zu-soabã t'a Abrahaam ne a Izak la a Zakoob Wẽnnaamã. 38La Wẽnnaam ka kũum Wẽnnaam ye, b yaa nin-vɩɩs Wẽnnaam. Bala ne bãmba nebã fãa vɩɩme.»

39Gʋlsdb kẽer leokame yaa: «Karen-saamba, yãmb goma sõama.» 40La bãmb ka saag n leb n sok a Zeezi sokr a to yɛs ye.

Kiris yɩɩ a wãn n yaa Davɩɩd yagenga?

(Mat 22.41-46, Mark 12.35-37)

41A Zeezi sok-b lame yaa: «B tõe n yɩɩ a wãn n yeel tɩ Kiris yaa a Davɩɩd yagenga? 42#Yɩɩn 110.1A Davɩɩd meng yeela yɩɩn-sõamyã sebr pʋgẽ tɩ:

‹Zu-soabã yeela mam Zu-soabã yaa:

Zĩnd mam dɩtgo,

43hal tɩ m kɩt tɩ f bɛɛbã yɩ fo nao roagendga.»

44Dẽ, a Davɩɩd boonda bãmb tɩ Zu-soaba, woto bãmb na n yɩɩ a wãn n yaa a yagenga?› »

A Zeezi gomda tõog karen-saam-dãmbã yelle

(Mat 23.1-16, Mark 12.38-40, Luk 11.37-54)

45La nebã fãa sẽn kelgd a Zeezi, bãmb yeela b karen-biisã yaa: 46Gũus-y y mens ne gʋlsdbã sẽn nong n gõod ne fu-wogdo, n nongẽ tɩ nebã pʋʋsd bãmb raasẽ, la b baood n zĩnd waoogr goeels zut karen-dotẽ, la rɩɩb zĩisẽ wã. 47Bãmb deesda pʋg‑kõapã paoong zãnga, la b pʋʋsd pʋʋs-wogd nebã nin gesg yĩnga. Bãmb na n paama sɩbgr sẽn yaa toog n yɩɩda.

Currently Selected:

A Luk koe‑noogo 20: MPBU

Highlight

Copy